Ebree 10 - New Testament

Krɩstʋ ɖezi kajalaɣ kɩlaŋ tɩŋa

¹ Ñɩm kɩbam mbʋ́ Krɩstʋ kɔnaa yɔ, Mooyiizi paɣtʋ kɛnɩ pɩ-kɩlɛmʋʋ yem. Tɩtɛkɛ pɩ-maɣmaɣ. Tɩɩpɩzɩɣ tɩñɔɔzɩ ɛyáa nɛ papɩsɩ kɩbama nɛ powolo Ɛsɔ cɔlɔ: ɛzɩma tɩpɩzɩɣ tɩtɩŋnɩ kɩlaŋ weyi palaɣ pɩnzɩ tɩŋa payɩ nɛ pɩfɛyɩ tɩnaɣ yɔ ɩ-yɔɔ nɛ tɩñɔɔzɩ ɛyáa?

² Yee tɩɩpɩzaɣ yɔ, paayeba laʋ. Pʋbʋ, tiiyeba nɛ papɩsɩ ɛyáa kɩbama kpaagbaa pɩsʋʋ nɛ pataatasɩ tɔzʋʋ pa-kɩwɛɛkɩm nabʋyʋ yɔɔ.

³ Ɛlɛ́, kɩlaŋ ɩnʋ ɩtɔzʋʋnɩ ɛyáa pa-kɩwɛɛkɩm yɔɔ paa pɩnaɣ ŋgá.

⁴ Mbʋ́ pʋyɔɔ yɔ, naŋ abalaa nɛ tuliŋ pa-calɩm ɛɛpɩzɩɣ pɩñalɩ ɛyáa kɩwɛɛkɩm kaʋ.

⁵ Pʋ-yɔɔ Krɩstʋ heyi Ɛsɔ alɩwaatʋ ndʋ́ ɛkɔŋaɣ kedeŋa yɔɔ yɔ se: «Ŋtɔsɔɔlɩ kɩlaʋ yaa haɖɛ. Ɛlɛ́, ŋyeba nɛ mɛwɛnɩ tomnaɣ.

⁶ Ŋtɔsɔɔlɩ se pɔhɔ kpɩna nɛ paha-ŋ. Ŋtɔsɔɔlɩ ɖɔɖɔ kɩlaŋ weyi ɛyáa laɣ-ŋ se ŋkpeɣ-wɛ pa-kɩwɛɛkɩm yɔ.

⁷ Peeɖe mɔntɔm se: ‹Hayɩ Ɛsɔ! Ma yɔ: mɛwɛɛ se mala mbʋ́ ñe-liu wɛɛ yɔ ɛzɩ pamaʋ mɔn-tɔm paɣtʋ takayaɣ taa yɔ.› »

⁸ Cɩnɛ lɛ, Krɩstʋ calɩ kaɖʋʋ se: «Ŋtɔsɔɔlɩ se ŋmʋ kɩlaŋ yaa haɖɛ yaa ɛzɩma mbʋ́ pɔhɔkɩ kpɩna se paha-ŋ yɔ. Ŋtɔsɔɔlɩ ɖɔɖɔ kɩlaŋ weyi ɛyáa laɣ-ŋ se ŋkpeɣ-wɛ pa-kɩwɛɛkɩm yɔ.» Ŋgʋ́, kɩlaŋ ɩnʋ palaɣ-ɩ ɛzɩ paɖʋʋ paɣtʋ taa yɔ.

⁹ Pʋwayɩ lɛ, ɛtasɩ se: «Hayɩ Ɛsɔ! Ma yɔ: mɛwɛɛ se mala mbʋ́ ñe-liu wɛɛ yɔ.» Ḿbʋ́ Krɩstʋ ɖeziɣ kajalaɣ kɩlaŋ tɩŋa nɛ ɛlɛɣzɩ ɛ-maɣmaɣ ɛ-ñɩŋgʋ i-lone taa.

¹⁰ Mbʋ́ pʋyɔɔ yɔ, Yesu Krɩstʋ labɩ mbʋ́ Ɛsɔ liu kɛwɛɛ yɔ nɛ palaa-ɩ kpaagbaa laʋ. Ḿbʋ́ hanɩ-ɖʋ waɖɛ nɛ ɖɩpɩsɩ Ɛsɔ ñɩma.

¹¹ Paa cɔjɔ weyi lɛ, ɛwɛ ɛ-tʋmɩyɛ ɖɩlaɖɛ paa kɩyakʋ ŋgʋ́ se ɛlabɩ-ɖɩ. Ɛpaŋ laʋ kpɩna, ŋgʋ́, kɩlaŋ ɩnʋ ɩɩpɩzɩɣ ɩhɛzɩ ɛyáa kɩwɛɛkɩm kaʋ.

¹² Piyele Krɩstʋ yɔ, ɛkpaɣ ɛ-maɣmaɣ ɛ-tɩ ɛha nɛ palaa-ɩ kpaagbaa laʋ ɛyáa kɩwɛɛkɩm yɔɔ. Pʋwayɩ lɛ, ewolo ɛcaɣ Ɛsɔ cɔlɔ lone kɩbanɖɛ taa

¹³ nɛ ɛɖaŋ se ɛ́lɛ́ ɛkpa e-koyindinaa nɛ eluzi ɛ-tɛɛ.

¹⁴ Mbʋ́ pʋyɔɔ yɔ, kɩlaʋ kʋɖʋmʋʋ koŋ yɔɔ ɛtɩŋnaa nɛ ɛtɛzɩ pɩsʋʋ mbá pɛkɛ Ɛsɔ ñɩma yɔ kɩbama tam.

¹⁵ Ḿbʋ́ ɖɔɖɔ Fezuu Kiɖeɖeu tasɩ-ɖʋ heyuu. Mbʋ́ pʋyɔɔ yɔ, kɩcalɩ-ɖʋ kaɖʋʋ se:

¹⁶ «Kɩpaɣlʋ yɔɔdaa se: ‹Ɩɩnaɣ nɔɔ haʋ mbʋ́ mɔnkɔŋ ɖʋʋ ma nɛ wɛ ɖɛ-hɛkʋ taa kɩyakɩŋ ɩnʋ ɩ-wayɩ yɔ. Manɖʋʋ man-paɣtʋ pa-laŋa taa nɛ mama-tʋ ɖɔɖɔ pa-lɩmaɣza taa.› »

¹⁷ Ɛtasɩ yɔɔdʋʋ se: «Maatasɩɣ tɔzʋʋ pa-kɩwɛɛkɩm yaa pɛ-ɛzaɣ́tʋ lakasɩ pɔ-yɔɔ kaʋ.»

¹⁸ Toovenim lɛ, yee pekpeɣ kɩwɛɛkɩm yɔ, pɩtatasɩ pɔzʋʋ se palaa kɩlaʋ nakʋyʋ pʋ-yɔɔ.

Krɩstʋ tʋlɩ nʋmɔʋ kɩfalʋʋ

¹⁹ Pʋ-yɔɔ lɛ, taabalaa! Đɩna siŋŋ se Yesu calɩm haɣ-ɖʋ waɖɛ se ɖɩsʋʋ lone nɖɩ́ ɖɩkɩlɩ kaɖɛ yɔ ɖɩ-taa kaalɛyɩtʋ.

²⁰ Ɛtɩŋnɩ pɩsaʋ ŋgʋ́ pakaɣ Ɛsɔ ɖɩɣa taa yɔ kʋ-yɔɔ nɛ ɛtʋlɩ-ɖʋ nʋmɔʋ kɩfalʋʋ ŋgʋ́ kɩhaɣ wezuu yɔ. Pɩsaʋ ŋ́gʋ́ lɛ e-tomnaɣ.

²¹ Yee ḿbʋ́, ɖɩwɛnɩ cɔjɔ sɔsɔ nɛ ɛcɔŋnɩ Ɛsɔ ɖɩɣa yɔɔ.

²² Pʋ-yɔɔ lɛ, ɖɩñɔtɩnɩ Ɛsɔ nɛ laŋa kɩbana nɛ lidaʋ wɛnaʋ siŋŋ. Đɔɖɔ lɛ, ɖa-taa ɛwɛɛ cɩɖɩcɩɖɩ nɛ pɔsɔ-ɖʋ lɩm mbʋ́ pʋwɛ cɩɖɩcɩɖɩ yɔ.

²³ Đɩɖɔkɩ ɖaŋʋʋ tɔm ndʋ́ ɖisusuu yɔ nesi naalɛ kpam. Ɛsɔ ɖʋwa se ɛlakɩ-ɖʋ pʋyʋ. Ɛlakɩ-ɖʋ-pʋ ɖɔɖɔ.

²⁴ Đɩmaɣzɩ ɖama yɔɔ nɛ pɩlabɩ-ɖʋ hʋnʋm nɛ ɖɩtɛzɩ ɖama sɔɔlʋʋ nɛ ɖɩla tʋma kɩbana.

²⁵ Nabɛyɛ wɛ ɖa-taa, pɩpɩsɩ-wɛ sɔnzɩ se pataakpeɣli nɛ poluŋ Ɛsɔ tɛɛ. Pɩfɛyɩ se ɖɩla ḿbʋ́. Ɛlɛ́, ɖɩsazɩ ɖama nɛ pɩlabɩ-ɖʋ hʋnʋm. Đɩwɛɛ pʋ-yɔɔ ḿbʋ́, mbʋ́ pʋyɔɔ yɔ, mɩ-maɣmaɣ ɩtɛm naʋ se kɩyakʋ ŋgʋ́ Kɩpaɣlʋ kɔŋ yɔ, kɩwɩzɩ talʋʋ.

²⁶ Yee ɖitisi toovenim tɔm nɛ ɖɩwɛɛ ɖɩlakɩ kɩwɛɛkɩm ɛzɩ pɩmaɣʋ-ɖʋ yɔ yɔ, kɩlaʋ nakʋyʋ tatasɩ kazʋʋ se palaɣ nɛ Ɛsɔ kpeɣ-ɖʋ-pʋ.

²⁷ Mbá palakɩ ḿbʋ́ yɔ, sɔɔndʋ kɔŋ-wɛ kpaʋ. Mbʋ́ pʋyɔɔ yɔ, Ɛsɔ kɔŋ-wɛ tɔm hʋnaʋ nɛ ɛɖʋ-wɛ miŋ sɔsɔŋ weyi ɛñakɩ e-koyindinaa yɔ ɛ-taa.

²⁸ Yee nɔɔyʋ ɛtɔɖɔ Mooyiizi paɣtʋ yɔɔ nɛ ɛyáa naalɛ yaa naadozo lɩzɩ ɛ-aseɣɖe yɔ, pakʋʋ-ɩ, pʋtɔdɩyɛ ɛɛwɛɣ.

²⁹ Yee pʋwɛ ḿbʋ́ lɛ, weyi ɛyakɩ Ɛsɔ Pɩyalʋ naŋgbaŋaɣ nɛ ɛtʋʋ-ɩ yɔ, ɛbɛ pɩtɛŋnɩ-ɩ? Ɛtakpaɣ nɔɔ haʋ calɩm nɛ ɛ́yáa pʋyʋ. Ŋgʋ́, ḿbʋ́ pɩsɩnɩ-ɩ cɩɖɩcɩɖɩ tʋ. Ɛtʋ ɖɔɖɔ Fezuu Kiɖeɖeu ŋgʋ́ kɩlakɩ-ɖʋ lootiye yɔ.

³⁰ Đɩsɩm Ɛsɔ, ɛnʋ yɔɔdɩna se: «Ma pʋwɛɛ se mankpa ɛyáa pa-kɩma. Mɛhɛyɩɣnɩ-wɛ mbʋ́ palaba yɔ.» Ɛtasɩ yɔɔdʋʋ se: «Ma Kɩpaɣlʋ mɔnkɔŋnɩ hʋnaʋ ma-ñɩma.»

³¹ Yee ḿbʋ́, pʋtɔɔ weyi ɛtɔlʋʋ Ɛsɔ wezuu tʋ nesi taa yɔ!

³² Ɩtɔzɩ kajalaɣ kɩyakɩŋ weyi ɩ-taa Ɛsɔ ñalɩmɩyɛ ñalɩ mɩ-yɔɔ yɔ ɩ-yɔɔ. Alɩwaatʋ ńdʋ́ʋ́ ɩtɔɔ kʋñɔŋ siŋŋ. Ɛlɛ́, ɩɖɔkɩ mɩ-tɩ kpam mɩ-lʋbɩyɛ taa.

³³ Nabʋyʋ taa, patʋ-mɩ nɛ paɖʋ-mɩ kʋñɔŋ ɛyáa samaɣ taa. Nabʋyʋ taa ɖɔɖɔ lɛ, ɩsɩŋaɣnɩ mbá paɖʋwaɣ-wɛ kʋñɔŋ ḿbʋ́ yɔ.

³⁴ Toovenim lɛ, ɩna salaka tɩnaa pʋtɔdɩyɛ. Mɩ-laŋa kahʋlʋmɩ alɩwaatʋ ndʋ́ pamʋwaɣ mɩ-ñɩm yɔ. Mbʋ́ pʋyɔɔ yɔ, ɩtɛm naʋ se ɩwɛnɩ ñɩm mbʋ́ pɩkɩlɩ ḿbʋ́ nɛ pʋwɛɛ tam yɔ.

³⁵ Pʋ-yɔɔ lɛ, ɩtaalɔ liu: ɩkɔŋ hiɣu kɩhɛyʋʋ sɔsɔʋ.

³⁶ Ɩɖɔkɩ mɩ-hɔ kpam nɛ ɩla mbʋ́ Ɛsɔ liu wɛɛ yɔ nɛ ihiɣ mbʋ́ ɛɖʋwa se ɛhaɣ-mɩ yɔ.

³⁷ Mbʋ́ pʋyɔɔ yɔ, pama Ɛsɔtɔm Takayaɣ taa se: «Pɩkazɩ alɩwaatʋ kpaagbaa pazɩ nɛ weyi pʋwɛɛ se ɛkɔɔ yɔ, ɛkɔɔ. Ɛtacaɣ wayɩ.

³⁸ Kɩpaɣlʋ yɔɔdaa se: Ma-ñɩnʋ weyi ɛtʋʋzɩ mɛ-ɛsɩndaa yɔ, e-lidaʋ yɔɔ lɛ, ɛwɛɣ wezuu. Ɛlɛ́, yee ɛpɩsɩnɩ ɛ-tɩ nɛ wayɩ yɔ, ɛ-tɔm ɛɛkɛdɩɣnɩ-m.»

³⁹ Đa lɛ, ɖɩfɛyɩ mbá papɩsɩɣnɩ pa-tɩ nɛ wayɩ se pele yɔ pa-taa. Ɛlɛ́, ɖɩwɛnɩ lidaʋ Ɛsɔ yɔɔ se ɖa-ciyamnaa ehiɣ ñʋʋ yabʋ.