2 Timootee 4 - New Testament

Pɔɔlɩ kɛtɛzaɣ paɣtʋ

¹ Krɩstʋ Yesu kɔŋ hʋʋ ɛsɛ ñɩma nɛ sɩɖaa tɔm. Ɛnʋ kaɣnɩ kɔm nɛ ɛtɔɔ kewiyaɣ. Meheyiɣ-ŋ ɛ nɛ Ɛsɔ pɛ-ɛsɩndaa se:

² paa nʋmɔʋ ɛwɛɛ yaa kɩfɛyɩ yɔ, susi ɛyáa Ɛsɔtɔm nɛ ŋñɩɣ tɩ-yɔɔ niye nɛ ŋla nɛ petisi-tʋ nɛ ŋkalɩ-wɛ nɛ ŋsazɩ-wɛ nɛ ŋɖɔkɩ ñɔ-hɔyɛ tam ña-wɩlʋʋ taa.

³ Mbʋ́ pʋyɔɔ yɔ, alɩwaatʋ natʋyʋ kaɣ kɔm nɛ pɩɖɛɛ ɛyáa nɛ tɔm kɩbandʋ ndʋ́ pawɩlɩɣ-wɛ yɔ. Ɛlɛ́, ɛzɩma mbʋ́ pa-nɩŋgbaaŋ taa puu lɛ, pɔkɔŋ ñɩnʋʋ wɩlɩyaa ndɩ ndɩ se paba eheyi-wɛ mbʋ́ pa-maɣmaɣ pe-liu wɛɛ kpem yɔ nɛ pewelesi.

⁴ Pɔkɔŋ nɩnaʋ mʋya welesuu yem. Ŋgʋ́, pɔtɔʋ pa-nɩŋgbaaŋ taa se pataawelesi toovenim tɔm.

⁵ Piyele ña lɛ, ɖɔkɩ ña-tɩ camɩyɛ pɩtɩŋa pɩ-taa. Tisi nɛ ŋtɔɔ kʋñɔŋ, la Laŋhɛzɩyɛ Tɔm susuu tʋmɩyɛ, la tʋmɩyɛ nɖɩ́ Ɛsɔ ɖʋ-ŋ yɔ ɖɩtɩŋa.

⁶ Ma lɛ, mɛwɛ ɛzɩ lɩm mbʋ́ pɛtɛm lizuu tataa yɔ, alɩwaatʋ talaa se mowoni sɔsaa mʋlʋm.

⁷ Malʋbɩ lʋbɩyɛ kɩbanɖɛ nɛ mense nɛ mantalɩ men-seya tɩnaɣ yɔɔ nɛ mɔnɖɔkɩ lidaʋ ŋgʋ́ mɛwɛnɩ Ɛsɔ yɔɔ yɔ.

⁸ Lɛɛlɛɛyɔ lɛ, ɛsɩ man-kɩhɛyʋʋ nɛ ɛɖaŋnɩ-m: ŋ́gʋ́ lɛ tʋʋzʋʋ hulaɣ ŋgá Kɩpaɣlʋ kɔŋ-m cɛlʋʋ kɩyakʋ ŋgʋ́ ɛɖʋwa yɔ. Ɛtʋʋzɩ ɛ-tɔm hʋʋ taa. Pɩtɛkɛ men-ɖeke ɛkɔŋ-kʋ cɛlʋʋ, ɛlɛ́, ɛcɛlɩɣ-kʋ ɖɔɖɔ mbá patɩŋa payɩ paɖaŋnɩ sɔɔlɩm alɩwaatʋ ndʋ́ ɛkɔŋ yɔ.

Lɛɣtʋ ndʋ́ Pɔɔlɩ tasɩ Timootee yɔ

⁹ Cɛyɩ ña-tɩ nɛ ŋkɔɔ mɔn-cɔlɔ kɩyakɩŋ ɩnɛ ɩ-taa.

¹⁰ Mbʋ́ pʋyɔɔ yɔ, Demaasɩ kɩlɩ sɔɔlʋʋ mbʋ́ pʋwɛ kedeŋa yɔɔ cɩnɛ yɔ nɛ ese mɔn-cɔlɔ nɛ ɛɖɛɛ Tesalooniki. Krɛɛsaɣ ñowobi Galaasii nɛ piyele Tiiti ñowolo Dalmaasii.

¹¹ Luka ɖeke wɛnɩ mɔn-cɔlɔ. Yaa Maarkɩ nɛ ña nɛ ɩ ɩkɔɔ, mbʋ́ pʋyɔɔ yɔ, ɛwɛɣ-m wazaɣ siŋŋ man-tʋmɩyɛ taa.

¹² Mentiyi Ticiiki Efɛɛzɩ.

¹³ Yee ŋkɔŋ lɛ, ŋkpɛndɩnɩ-m toko sɔsɔʋ ŋgʋ́ meyebi Karpuusi tɛ Trowaasɩ yɔ. Kɔnɩ-m ɖɔɖɔ takayɩsɩ, kɔzɩkɔzɩ nzɩ́ palabɩnɩ tɔna yɔ.

¹⁴ Alɛksandrɩ weyi ɛkɛ kolu yɔ, ɛlabɩ-m ɛzaɣ́tʋ kpem. Kɩpaɣlʋ kɔŋ-ɩ hɛyʋʋ mbʋ́ ɛlaba yɔ pʋ-yɔɔ.

¹⁵ Ña ɖɔɖɔ, kpa ña-tɩ nɛ ɩ, mbʋ́ pʋyɔɔ yɔ, ɛpam tɔm ndʋ́ ɖɩyɔɔdaa yɔ nɛ ɛsɛ siŋŋ.

¹⁶ Nɔɔyʋ taawɛɛ mɔn-cɔlɔ alɩwaatʋ ndʋ́ mancalɩ hʋʋ mɔn-tɔm yɔ, pese patɩŋa payɩ peyebi-m. Kɩpaɣlʋ ɛtaakpaɣ-tʋ ɛlabɩnɩ tʋmɩyɛ.

¹⁷ Ɛlɛ́, ɛnʋ kɛwɛnɩ mɔn-cɔlɔ nɛ ɛha-m ɖoŋ nɛ piyele manpɩzɩ monsusi mbá pɛtɛkɛ Yuda ñɩma yɔ Ɛsɔtɔm tɩŋa payɩ. Ɛnʋ lɩzɩnɩ-m tɔɔyʋʋ nɔɔ taa.

¹⁸ Ɛkɔŋ-m lɩzʋʋ ɖɔɖɔ kɩdɛkɛdɩm mbʋ́ pɩtɩŋa payɩ pɩtalɩ-m yɔ pɩ-taa cɩŋɩlɩm nɛ ewoni-m e-Kewiyaɣ taa ɛsɔdaa. Ɛtɩɣyɩ koboyaɣ pɩnzɩ ɛgbaŋ ɛgbaŋ! Pɩla ḿbʋ́!

Sɛtʋ

¹⁹ Sɛɛ Prisiili nɛ Akilaasɩ nɛ Onezifɔɔrɩ hɔʋ taa ñɩma.

²⁰ Eraastɩ caɣ Kɔrɛntɩ nɛ meyele Trofim Miilɛɛ tɛtʋ taa, mbʋ́ pʋyɔɔ yɔ, pɩwɩɣaɣ-ɩ.

²¹ Cɛyɩ ña-tɩ nɛ ŋkɔɔ mɔn-cɔlɔ nɛ pʋcɔ pɩtalɩ niŋkaɣ alɩwaatʋ. Ebuluusi nɛ Pudɛɛnɩ nɛ Liinuusi nɛ Kloodiyaa nɛ taabalaa lɛlaa tɩŋa pɛsɛ-ŋ.

²² Kɩpaɣlʋ ɛwɛɛ ñɔ-cɔlɔ. Ɛlabɩ-mɩ lootiye.