2 Timootee 3 - New Testament

Mbʋ́ pɩkaɣ labʋ ɛjaɖɛ yɔɔ kɛtɛzaɣ kɩyakɩŋ taa yɔ

¹ Nɩɩ ɖeu se: alɩwaatʋ kaɖɛ ñɩndʋ kɔŋ wɛʋ kɛtɛzaɣ kɩyakɩŋ taa.

² Toovenim lɛ, ɛyáa kɔŋ nɩnaʋ pa-tɩ nɛ pɛ-ɛsɩyɛ sɛɛnɩ liidiye cazʋʋ nɛ pɛkɛ pɔpɔtɩnaa nɛ pakpazɩɣ pa-tɩ nɛ pɛwɛɛkɩɣ Ɛsɔ hɩɖɛ nɛ paañaŋ pa-ñɩma, paawɛɣ ɛsɩmɩyɛ, paañaŋ Ɛsɔ ñɩm.

³ Pa-paa ɛɛwɛɣnɩ pʋyʋ, paasɩŋ pʋtɔdɩyɛ, pɛwɛɛkɩɣ ɛyáa hɩla, paasɩŋ pa-tɩ ɖɔkʋʋ, pɛwɛɣ ñaŋ nɛ pɛkɛ mbʋ́ pʋwɛ ɖeu yɔ pu-koyindinaa.

⁴ Palɩɣ ɛyáa wayɩ, pa-lɩmaɣza fɛyɩ, tɩ kpazʋʋ suni pa-taa. Ɛzɩ paasɔɔlɩ Ɛsɔ lɛ, peyeki pɔsɔɔlʋʋ mbʋ́ pɩkɛdɩnɩ-wɛ yɔ.

⁵ Pɔkɔŋ wɛʋ ɛsɛ yɔɔ ɛzɩ mbá pɔɖɔŋ lidaʋ nʋmɔʋ taa yɔ, naze lɛ, pekiziɣ se ɖoŋ nɩɩyɩ fɛyɩ kɩ-taa. Se pɩtɛ ɛyáa ḿbá!

⁶ Pa-taa nabɛyɛ sʋʋ ɖɩsɩ taa nɛ ponuutuu halaa mbá pɔ-tɔm fɛyɩ kaɖɛ nɛ kɩdɛkɛdɩm su pa-taa ɖo nɛ pe-liu wɛɛ paa ɛbɛ labʋ yɔ.

⁷ Halaa ḿbá, pɛwɛɛ pɛkpɛlɩkɩɣ, ɛlɛ́, paatɩɩpɩzɩɣ se patɩlɩ mbʋ́ pɩkɛ toovenim yɔ kaʋ.

⁸ Ɛzɩma mbʋ́ Yaanɛɛsɩ nɛ Yambrɛɛsɩ paakʋyɩ Mooyiizi yɔɔ yɔ, ḿbʋ́ ɖɔɖɔ ɛyáa ḿbá pakʋyʋʋ mbʋ́ pɩkɛ toovenim yɔ pʋ-yɔɔ. Pɛkɛ mbá pa-ñʋŋ taa wɛɛkaa yɔ. Ɛsɔ takɩɣ-wɛ pe-lidaʋ wɛnaʋ taa se ɛna lɛ, paahɔzʋʋ pʋyʋ:

⁹ paakɔŋ talʋʋ ɖoli, mbʋ́ pʋyɔɔ yɔ, ɛyáa tɩŋa kɔŋ naʋ se pa-ñʋŋ taa fɛyɩ ɛzɩ pɩɩlabʋ Yaanɛɛsɩ nɛ Yambrɛɛsɩ yɔ.

Takayɩsɩ Kiɖeɖesi wazaɣ

¹⁰ Ña lɛ, ŋtɩŋ-m ma-wɩlʋʋ nɛ mɔn-ɖɔnɛ nɛ mbʋ́ manɖʋwa se malakɩ yɔ nɛ me-lidaʋ wɛnaʋ nɛ mɔ-hɔyɛ ɖɔkʋʋ nɛ mɔn-sɔɔlɩm nɛ man-tɩ ɖɔkʋʋ

¹¹ nɛ ma-wayɩ wɛʋ kaŋ kaŋ nɛ man-kʋñɔmɩŋ pa-taa. Ŋsɩm kʋñɔmɩŋ weyi mɔntɔɔ Antɩyɔɔsɩ nɛ Ikoniyɔm nɛ Listrɩ yɔ nɛ ɛzɩma mbʋ́ paawɛ ma-wayɩ kaŋ kaŋ yɔ. Ɛlɛ́, Kɩpaɣlʋ lɩzɩ-m pɩtɩŋa payɩ pɩ-taa.

¹² Toovenim lɛ, mbá patɩŋa payɩ pe-liu wɛɛ se pacaɣ wezuu ɛzɩ Ɛsɔ liu wɛʋ yɔ pa nɛ Krɩstʋ Yesu pɛ-kpɛndʋʋ taa yɔ, pɛwɛɣ pa-wayɩ kaŋ kaŋ.

¹³ Ɛlɛ́, kañadɩnaa nɛ cɛtɩyaa pɛtɛzɩɣ labʋ kɩdɛkɛdɩm nɛ pɛcɛtɩ lɛlaa, ɛlɛ́ pɔkɔŋ pa-maɣmaɣ cɛtʋʋ.

¹⁴ Piyele ña lɛ, ɖɔkɩ mbʋ́ ŋkpɛlɩkaa nɛ ŋwɛnɩ lidaʋ pʋ-yɔɔ yɔ nesi naalɛ kpam. Mbʋ́ pʋyɔɔ yɔ, ŋsɩm weyi ɛkpɛlɩkɩ-ŋ-pʋ yɔ.

¹⁵ Toovenim lɛ, ŋsɩm tɔm ndʋ́ pama Ɛsɔtɔm Takayaɣ taa yɔ ɖooo ña-pɩjatʋ taa. Tɩpɩzɩɣ tɩha-ŋ lɔŋ weyi eyeki nɛ pɩtɩŋnɩ lidaʋ ŋgʋ́ ŋwɛnɩ Krɩstʋ Yesu yɔɔ yɔ kʋ-yɔɔ nɛ pɩya ña-ñʋʋ yɔ.

¹⁶ Ɛsɔ cɔlɔ tɔm ndʋ́ pama takayaɣ ŋ́gá ka-taa yɔ, tɩtɩŋa payɩ tɩlɩnaa. Tɩwɛ wazaɣ: ńdʋ́ pawɩlɩɣnɩ ɛyáa toovenim nɛ mbʋ́ palabɩ pɩfɛyɩ ɖeu yɔ nɛ pɔñɔɔzɩ-wɛ nɛ pɛkpɛlɩkɩ-wɛ ɛzɩma mbʋ́ pacaɣ wezuu kʋtʋʋzʋʋ yɔ.

¹⁷ Pɩlakɩ ḿbʋ́ se Ɛsɔ ɛyʋ ɛtɛzɩ pɩʋ nɛ ɛwɛnɩ mbʋ́ ɛɛlabɩnɩ paa tʋmɩyɛ kɩbanɖɛ nɖɩ́ yɔ.