2 Timootee 2 - New Testament

Ɛzɩma pʋwɛɛ se ɛyʋ ɛwɛɛ nɛ ɛkɛ Krɩstʋ sɔɔja kɩbanʋ yɔ pʋ-tɔm

¹ Yee ḿbʋ́ ña man-pɩɣa lɛ, tɩŋnɩ lootiye nɖɩ́ palabɩ-ɖʋ ɖa nɛ Krɩstʋ Yesu ɖɛ-kpɛndʋʋ taa yɔ ɖɩ-yɔɔ nɛ ŋkpa ɖoŋ.

² Tɔm ndʋ́ ŋnɩ mawɩlaɣ ɛyáa sakɩyɛ ɛsɩndaa yɔ, ɖʋzɩ-tʋ mbá ŋtaɣ-wɛ liu yɔ pe-nesi taa nɛ papɩzɩ pawɩlɩ-tʋ ɖɔɖɔ lɛlaa.

³ Ña ɖɔɖɔ, tisi nɛ ŋtɔɔ kʋñɔŋ ɛzɩ Krɩstʋ Yesu sɔɔja kɩbanʋ yɔ.

⁴ Yee sɔɔja nɔɔyʋ ɛwɛ you taa nɛ ɛcaɣ se ɛ-tɔm ɛkɛdɩnɩ ɛ-ñʋʋdʋ yɔ, ɛɛnɩɣnɩ mbʋ́ mbá pɛtɛkɛ sɔɔjanaa yɔ palakɩ yɔ.

⁵ Ḿbʋ́ ɖɔɖɔ pʋwɛɛ: weyi ewoki seya taa yɔ, yee ese ɛzɩ pʋpɔzʋʋ yɔ yɔ, kalɩ pi-ɖeke eehiɣ nabʋyʋ.

⁶ Đɔɖɔ lɛ, haɖʋ weyi ɛkaŋ ñʋʋ nɛ ɛhayɩ siŋŋ yɔ, ɛnʋ pʋwɛɛ se ɛcalɩ mʋ́ʋ e-ɖeɖe.

⁷ Maɣzɩ tɔm ndʋ́ mɔyɔɔdʋʋ yɔ tɩ-yɔɔ camɩyɛ, peeɖe Kɩpaɣlʋ yeki nɛ ŋnɩɩ tɩtɩŋa payɩ tɩ-tɔbʋʋ.

⁸ Tɔzɩ Daaviidi liɖe taa tʋ Yesu Krɩstʋ weyi Ɛsɔ fezi-i nɛ sɩɖaa taa yɔ ɛ-yɔɔ. Ɛ-tɔm lɛ Laŋhɛzɩyɛ Tɔm ndʋ́ monsusuu yɔ.

⁹ Tɩ-yɔɔ malakɩ kʋñɔŋ, halɩ paɖɩ-m yoŋgbasɩ ɛzɩ kɩdɛkɛdɩm laɖʋ nɔɔyʋ yɔ. Ɛlɛ́, pataɖɩ Ɛsɔtɔm yoŋgbasɩ.

¹⁰ Pʋ-yɔɔ mentisaa se manɩɩ wɩzasɩ ńzɩ́ sɩtɩŋa nɛ pʋwazɩ mbá Ɛsɔ lɩzaa yɔ. Ḿbʋ́ yekina nɛ paba pɩzɩ pehiɣ ñʋʋ yabʋ mbʋ́ pʋwɛ Krɩstʋ Yesu cɔlɔ yɔ nɛ koboyaɣ maatɛŋ.

¹¹ Tɔm ndʋ́ meheyiɣ-mɩ yɔ, tɩkɛ toovenim. Ńdʋ́ lɛ se: «Yee ɖa nɛ ɩ ɖɩsɩbɩna yɔ, ɖa nɛ ɩ ɖɩkɔŋnɩ wɛʋ wezuu ɖɔɖɔ.

¹² Yee ɖɩɖɔkɩ ɖa-tɩ ḿbʋ́ kpam yɔ, ɖa nɛ ɩ ɖɩkɔŋnɩ tɔɔʋ kewiyaɣ ɖɔɖɔ. Yee ɖikizi-i yɔ, ɛkɔŋ-ɖʋ kizuu ɖɔɖɔ.

¹³ Yee ɖa ɖaalakɩ mbʋ́ ɖɩɖʋwa yɔ yɔ, ɛnʋ ñalakɩ mbʋ́ ɛɖʋwa yɔ, ɛɛpɩzɩɣ ekizini ɛ-maɣmaɣ ɛ-tɩ.»

Ɛzɩma pʋwɛɛ se ɖisusi Laŋhɛzɩyɛ Tɔm camɩyɛ yɔ

¹⁴ Tɔzɩ ɛyáa tɔm ńdʋ́ nɛ ŋheyi-wɛ Ɛsɔ ɛsɩndaa se pataayoo tɔm pee yɔɔ. Mbʋ́ pʋyɔɔ yɔ, you ŋ́gʋ́ kɩɩwazɩɣ pʋyʋ, ɛlɛ́, kʋɖʋzʋʋ mbá pewelesiɣ-kʋ yɔ.

¹⁵ Ñaɣ pana nɛ ŋkɛ ɛyʋ weyi pasɩm ɛ-yɔɔ yɔ Ɛsɔ ɛsɩndaa ɛzɩ tʋmlaɖʋ weyi fɛyɛ ɛɛkpaɣ-ɩ nɛ ɛ-tʋmɩyɛ nɛ esusuu toovenim tɔm camɩyɛ yɔ.

¹⁶ Taayɔɔdɩ tɔm ndʋ́ tɩɩwazɩɣ pʋyʋ nɛ tɩtɛkɛdɩnɩ Ɛsɔ yɔ, mbʋ́ pʋyɔɔ yɔ, mbá panɩɣnɩ-tʋ yɔ, pɛtɛzɩɣ-ɩ posinaʋ tam.

¹⁷ Pɔ-tɔm kɔŋ wɛʋ ɛzɩ kɩcɩkpʋʋ ŋgʋ́ kʋsʋ sonzoowe yɔ. Pa-taa lɛ: Imenee nɛ Filɛɛtɩ

¹⁸ mbá peyebi toovenim nʋmɔʋ nɛ peheyiɣ ɛyáa se Ɛsɔ tɛm-ɖʋ fezuu nɛ sɩɖaa taa yɔ. Ḿbʋ́ labɩna nɛ nabɛyɛ lesi pe-lidaʋ.

¹⁹ Paa ḿbʋ́ yɔ, tigiɖe nɖɩ́ Ɛsɔ sɩwa yɔ, ɖɩwɛ ɖoŋ pɩtɩɩfɛyɩ, nabʋyʋ ɛɛlakɩ-ɖɩ. Pama ɖɩ-yɔɔ se: «Kɩpaɣlʋ sɩm ɛ-ñɩma.» Pamawa ɖɔɖɔ se: «Weyi ɛkaɖɩɣ se ɛkɛ Kɩpaɣlʋ ñɩnʋ yɔ, pʋdʋ ɛha mbʋ́ pɩtatʋʋzɩ yɔ siɣ́ye.»

²⁰ Ɩtɛm sɩm se: pɩtɛkɛ sika ñanzɩ nɛ liidiye ñɩnzɩ pe-ɖeke pɛwɛnɩ ñɩm tʋ ɖɩɣa taa. Ɛlɛ́, tɩŋ ñɩnzɩ nɛ cʋʋ ñɩnzɩ pɛwɛɛ ɖɔɖɔ. Paɖʋʋ kajalaɣ ñɩnzɩ taa mbʋ́ pʋwɛ wazaɣ yɔ nɛ piyele paɖʋ tɩŋ nɛ cʋʋ pa-ñɩnzɩ taa mbʋ́ pɩfɛyɩ wazaɣ yɔ.

²¹ Ḿbʋ́ pʋwɛnɩ ɛyáa: yee nɔɔyʋ eyebi azuluma lakasɩ yɔ, ɛwɛɣ ɛzɩ ñanaɣ ŋgá paɖʋʋ ka-taa mbʋ́ pʋwɛ wazaɣ yɔ. Pɛkɛzɩɣ-ɩ nɛ hɔɔlʋʋ se ɛkɛ ɛ-caa ñɩnʋ nɛ ɛwɛɛ-ɩ wazaɣ. Ɛwɛɛ se palabɩnɩ-ɩ paa tʋmɩyɛ kɩbanɖɛ nɖɩ́.

Iyele kɩmɛlɛndʋ tɔm nɛ ndʋ́ tɩɩwazɩɣ pʋyʋ yɔ tɩ-hɔm

²² Se ɛzaɣ́tʋ ndʋ́ evebiya nɛ pɛlaa pe-liu wɛɛ kpem se pala yɔ. Ña nɛ mbá pasaŋ Kɩpaɣlʋ nɛ laŋa kɩbana yɔ, ɩñɩnɩ mbʋ́ pʋtʋʋzaa yɔ nɛ ɩwɛnɩ lidaʋ nɛ ɩsɔɔlɩ lɛlaa nɛ ɩñɩnɩ laŋhɛzɩyɛ.

²³ Ɛlɛ́, yele kɩmɛlɛndʋ tɔm nɛ ndʋ́ tɩɩwazɩɣ pʋyʋ yɔ pɔ-hɔm, mbʋ́ pʋyɔɔ yɔ, ŋna ɖeu se tɩkɔŋnɩ you.

²⁴ Ŋgʋ́, pɩfɛyɩ se Kɩpaɣlʋ tʋmlaɖʋ nɛ nɔɔyʋ poyoo. Pʋwɛɛ se ɛla ɛyáa tɩŋa mbʋ́ pʋwɛ ɖeu yɔ nɛ ɛpɩzɩ ɛwɩlɩɣ tɔm nɛ ɛɖɔkʋʋ ɛ-hɔyɛ.

²⁵ Pʋwɛɛ se ɛwɩlɩ mbá paatisiɣ ɛ-tɔm nɛ pɛlɛɣzɩɣ pa-ñɩndʋ yɔ hɛɛɛ nɛ pʋtɔma yɔ, Ɛsɔ ha-wɛ nʋmɔʋ nɛ pɛlɛɣzɩ pa-lɩmaɣza nɛ papɩzɩ patɩlɩ toovenim

²⁶ nɛ pʋtɔma yɔ, palɩɩ eleeu weyi ɛkpa-wɛ se pala mbʋ́ e-liu wɛɛ yɔ ɛ-kaamʋʋ taa.