2 Timootee 1 - New Testament

Sɛtʋ

¹ Ma Pɔɔlɩ, Ɛsɔ liu wɛnɩ se mɛnkɛ Krɩstʋ Yesu tiyiyu nɛ meheyi ɛyáa wezuu ŋgʋ́ ɛɖʋwa se ɛhaɣ-ɖʋ ɖa nɛ Krɩstʋ Yesu ɛnʋ ɖɛ-kpɛndʋʋ taa yɔ kʋ-tɔm.

² Timootee, man-pɩɣa kʋsɔɔlaɣ! Ña mamaɣ takayaɣ kanɛ. Mɛnsɛ-ŋ: Caa Ɛsɔ nɛ ɖa-Kɩpaɣlʋ Krɩstʋ Yesu palabɩ-ŋ lootiye nɛ pana ña-pʋtɔdɩyɛ nɛ pɛhɛzɩ ña-laŋɩyɛ.

Pɔɔlɩ saŋ Ɛsɔ

³ Mansaŋ Ɛsɔ se malakɩ ɛ-tʋmɩyɛ nɛ laŋɩyɛ kɩbanɖɛ ɛzɩ mɔn-cɔzɔnaa kalabʋ yɔ. Paa wɩsɩ yaa ɖoó yaa alɩwaatʋ ndʋ́ mɛnsɛɣ-ɩ yɔ, mansaŋ-ɩ ñɔ-yɔɔ.

⁴ Mɔntɔzʋʋ ñe-wiluu yɔɔ nɛ piyele pɩlakɩ-m liu kpem se mantasɩ-ŋ naʋ nɛ ma-laŋɩyɛ tɛzɩ hʋlʋmʋʋ.

⁵ Mɔntɔzʋʋ ɖɔɖɔ ɛzɩma mbʋ́ ŋwɛnɩ lidaʋ Ɛsɔ yɔɔ nɛ tɛɛ nɛ pʋ-yɔɔ lɩmaɣza fɛyɩ kɩ-taa yɔ. Lidaʋ ŋ́gʋ́, ñe-neze Loyisi kacalɩnɩ-kʋ wɛnaʋ, ɛ́lɛ́ wayɩ lɛ, ño-ɖoo Eniisi nɛ lɛɛlɛɛyɔ manaɣʋ yɔ, pɩtalɩnɩ-ŋ.

Kʋjɔʋ sɔsɔʋ ŋgʋ́ Ɛsɔ laba Timootee yɔ

⁶ Pʋ-yɔɔ mɔntɔzʋʋ-ŋ se ŋla nɛ kʋjɔʋ ŋgʋ́ Ɛsɔ labɩ-ŋ alɩwaatʋ ndʋ́ mantɩnɩ ñɔ-yɔɔ nesi yɔ, kɩpaɣlɩ camɩyɛ.

⁷ Mbʋ́ pʋyɔɔ yɔ, Fezuu Kiɖeɖeu ŋgʋ́ Ɛsɔ ha-ɖʋ yɔ, kiiyeki se ɖɩwɛɛ niŋkaɣ, ɛlɛ́, kiyeki se ɖɩwɛnɩ ɖoŋ nɛ sɔɔlɩm nɛ tɩ ɖɔkʋʋ.

⁸ Pʋ-yɔɔ lɛ, fɛyɛ ɛtaakpa-ŋ nɛ ɖa-Kɩpaɣlʋ yɔɔ aseɣɖe lɩzʋʋ yaa weyi ma paɖʋ salaka ɛ-yɔɔ yɔ mɔ-yɔɔ. Ɛlɛ́, Yesu Laŋhɛzɩyɛ Tɔm yɔɔ lɛ, tisi nɛ pɩtɩŋnɩ ɖoŋ weyi Ɛsɔ ha-ŋ yɔ ɛ-yɔɔ nɛ ŋtɔɔ kʋñɔŋ ɖɔɖɔ ɛzɩ ma yɔ.

⁹ Ɛnʋ yabɩnɩ ɖa-ñʋʋ nɛ ɛ́yáa-ɖʋ se ɖɩkɛ ɛ-ñɩma. Pɩtɛkɛ tʋma wena ɖɩlaba yɔ a-yɔɔ ɛlabɩ-ɖʋ ḿbʋ́. Ɛlɛ́, pʋcɔ ɛla kedeŋa lɛ, ɛɛɖʋwa se ɛtɩŋɩɣnɩ Krɩstʋ Yesu yɔɔ nɛ ɛlabɩ-ɖʋ lootiye.

¹⁰ Đa-Ñʋʋ Yaɖʋ Krɩstʋ Yesu kɔm yebina nɛ ɖɩnaɣ-ɖɩ lɛɛlɛɛyɔ. Mbʋ́ pʋyɔɔ yɔ, ɛwabɩ sɩm nɛ piyele ɛtɩŋnɩ Laŋhɛzɩyɛ Tɔm yɔɔ nɛ ɛwɩlɩ wezuu maatɛŋ.

¹¹ Laŋhɛzɩyɛ Tɔm ńdʋ́, tɩ-taa Ɛsɔ ɖʋ-m se mɛnkɛ Yesu tiyiyu nɛ mɛntɛ mɛnkɛ wɩlɩyʋ nɛ mɛntɛ mɛnkɛ ti-susiyu.

¹² Pʋ-yɔɔ mɔntɔkɩ kʋñɔŋ kʋnɛ yɔ. Ɛlɛ́, fɛyɛ ɛɛkpaɣ-m nɛ kʋ, mbʋ́ pʋyɔɔ yɔ, mansɩm weyi ɛ-yɔɔ mɛwɛnɩ lidaʋ yɔ nɛ mana siŋŋ se ɛpɩzɩɣ ɛcɔnɩ mbʋ́ ɛɖʋzɩ me-nesi taa yɔ pʋ-yɔɔ nɛ pʋkɔɔ pɩsɩɩnɩ kɩyakʋ ŋgʋ́ ɛɖʋwa yɔ.

¹³ Yele nɛ toovenim tɔm ndʋ́ meheyi-ŋ yɔ, tɩkɛnɩ ña-nʋmɔʋ lidaʋ wɛnaʋ nɛ sɔɔlɩm mbá ŋwɛnɩ ña nɛ Krɩstʋ Yesu mɩ-kpɛndʋʋ taa yɔ pa-taa.

¹⁴ Đɔkɩ pʋyʋ kɩbanʋ weyi Ɛsɔ tɩŋnɩ e-Fezuu Kiɖeɖeu ŋgʋ́ kɩwɛ ɖa-taa yɔ kʋ-yɔɔ nɛ ɛ́ɖʋzɩ ñe-nesi taa yɔ nesi naalɛ kpam.

¹⁵ Ɛzɩ ŋtɛm naʋ yɔ, Aazii egeetiye taa ñɩma tɩŋa payɩ ha-m siɣ́ye, pa-taa yɔ: Fiijɛɛlɩ nɛ Ɛrmoojɛɛnɩ.

¹⁶ Pɩkazɩ Onezifɔɔrɩ lɛ, Kɩpaɣlʋ ɛna ɛ-hɔʋ taa ñɩma pʋtɔdɩyɛ. Mbʋ́ pʋyɔɔ yɔ, ɛɛpam hɛzʋʋ ma-laŋɩyɛ, fɛyɛ takpa-ɩ mɔ-yɔɔ se mɛwɛ salaka taa.

¹⁷ Halɩ alɩwaatʋ ndʋ́ ɛkɔm Room yɔ, ɛñɩnɩ-m ɛzɩ ɛsɩyɛ taa pɩɣa yɔ nɛ ɛkɔɔ ɛna-m.

¹⁸ Pʋ-yɔɔ lɛ, Kɩpaɣlʋ eyele nɛ Ɛsɔ na ɛ-pʋtɔdɩyɛ kɩyakʋ ŋgʋ́ ɛɖʋwa yɔ. Ŋsɩm ɖɔɖɔ tʋma wena atɩŋa payɩ ɛlabɩ-m Efɛɛzɩ yɔ nɛ pɩkɩlɩ lɛlaa tɩŋa.