2 Tesalooniki 3 - New Testament

Pɔɔlɩ pɔzʋʋ se pɛsɛɛ Ɛsɔ ɛ-yɔɔ yɔ

¹ Taabalaa! Ndʋ́ ɖɩtɛzɩɣnɩ-mɩ yɔ lɛ se: ɩsɛɛ Ɛsɔ ɖɔ-yɔɔ nɛ Kɩpaɣlʋ tɔm wɛɛ cɔʋ yɔɔ lɛɛlɛɛ nɛ ɛyáa ɖʋ-tʋ hɩɖɛ ɛzɩ paɖʋʋ-tʋ mɩ-tɛ yɔ.

² Ɩsɛɛ-ɩ se ɛtaayele nɛ ɖɩsʋʋ ñʋŋ taa fɛyɩwaa nɛ kañadɩnaa pe-nesi taa. Mbʋ́ pʋyɔɔ yɔ, pɩtɛkɛ ɛyáa tɩŋa lakɩnɩ mbʋ́ paɖʋwa yɔ.

³ Ɛlɛ́, Kɩpaɣlʋ ñalakɩ mbʋ́ ɛɖʋwa yɔ. Eyeki nɛ ɩkpa ɖoŋ nɛ ehuuzi mɩ-yɔɔ se Satanɩ ɛtaapɩzɩ ɛlabɩ-mɩ pʋyʋ.

⁴ Đa nɛ Kɩpaɣlʋ ɖɛ-kpɛndʋʋ yɔɔ lɛ, ɖɩtaɣ-mɩ liu se ɩɖɔŋ labʋ ɛzɩ ɖɩkam mɩ-ñʋʋ taa yɔ, halɩ ɩwɛɣ pɩ-labʋ yɔɔ ḿbʋ́.

⁵ Kɩpaɣlʋ eyele nɛ Ɛsɔ sɔɔlɩm nɛ Krɩstʋ hɔyɛ ɖɔkʋʋ pɛwɛɛ mɩ-lɩmaɣza taa.

Pɔɔlɩ pɔzʋʋ se pala tʋmɩyɛ ɛzɩ ɛnʋ yɔ

⁶ Taabalaa! Đɩkaŋ mɩ-ñʋʋ taa nɛ ɖa-Kɩpaɣlʋ Yesu Krɩstʋ nɔɔ se ɩtaañɔtɩnɩ taabalaa mbá palakɩ fendu nɛ paaɖɔŋ tɔm ndʋ́ ɖɩwɩlɩ-mɩ nɛ itisi yɔ tɩ-yɔɔ yɔ pa-taa nɔɔyʋ.

⁷ Mɩ-maɣmaɣ, ɩtɛm sɩm mbʋ́ pʋwɛɛ se ɩla nɛ ɩtɩŋ ɖa-nʋmɔʋ taa yɔ: ɖɩtaala fendu alɩwaatʋ ndʋ́ ɖɩɩwɛ mɩ-tɛ yɔ.

⁸ Đɩtɔtɔɔ nɔɔyʋ tɔɔnaɣ yem falaa. Ɛlɛ́, ɖɩlabɩ tʋmɩyɛ siŋŋ wɩsɩ nɛ ɖoó nɛ ɖɩnɩɩ siziŋ se ɖɩtaakɛnɩ mɩ-taa nɔɔyʋ sʋʋtʋ.

⁹ Pɩtɛkɛ se ɖɩtaawɛnɩ waɖɛ yɔɔ. Ɛlɛ́, ɖa-maɣmaɣ ɖɩcaɣaɣ se ɖɩwɩlɩ-mɩ ɛzɩma mbʋ́ pʋwɛɛ se ɩla nɛ ɩtɩŋ ɖa-nʋmɔʋ yɔ.

¹⁰ Alɩwaatʋ ndʋ́ ɖɩɩwɛ mɩ-tɛ yɔ, ɖɩɩkam mɩ-ñʋʋ taa se: «Yee nɔɔyʋ ɛɛcaɣ se ɛla tʋmɩyɛ yɔ, ɛtaatɔɔ ɖɔɖɔ.»

¹¹ Ŋgʋ́, ɖɩnɩɣ naɣ yɔ se mɩ-taa nabɛyɛ lakɩ fendu, mbʋ́ ɛzɩ paala tʋmɩyɛ lɛ, peyele panɩɣnɩ mbʋ́ pɩɩwazɩɣ pʋyʋ yɔ.

¹² Điheyiɣ pɩtɛ ɛyáa ḿbá nɛ ɖɩsazɩɣ-wɛ nɛ Kɩpaɣlʋ Yesu Krɩstʋ nɔɔ se pala tʋmɩyɛ pɛɛyɛɛ taa nɛ pa-maɣmaɣ pe-nesi nɛ pehiɣ pɔtɔɔ.

¹³ Taabalaa! Piyele mɩ lɛ, pɩtaanɩɩ-mɩ nɛ camɩyɛ labʋ.

¹⁴ Yee nɔɔyʋ ɛɛɖɔŋ tɔm ndʋ́ ɖɩma takayaɣ kanɛ ka-taa yɔ tɩ-yɔɔ lɛ, ɩtɩlɩ pʋdʋ camɩyɛ, ɩtaañɔtɩnɩ-ɩ nɛ piyele fɛyɛ kpa-ɩ.

¹⁵ Paa ḿbʋ́ yɔ, ɩtaakpaɣ-ɩ ɛzɩ mi-koyindu yɔ, ɛlɛ́, ɩkalɩ-ɩ ɛzɩ mɩ-taabalʋ yɔ.

Kɛtɛzaɣ sɛtʋ

¹⁶ Kɩpaɣlʋ laŋhɛzɩyɛ tʋ maɣmaɣ ɛhɛzɩ mɩ-laŋa alɩwaatʋ kpeekpe pɩtɩŋa pɩ-taa! Ɛwɛɛ mɩtɩŋa payɩ mɩ-cɔlɔ!

¹⁷ Ma Pɔɔlɩ, ma-maɣmaɣ mamaɣnɩ tɔm pee anɛ nɛ me-nesi. Ana lɛ se: mɛnsɛ-mɩ. Ḿbʋ́ mañɩkɩɣ nesi man-takayɩsɩ tɩŋa taa. Ḿbʋ́ mamaɣ.

¹⁸ Đa-Kɩpaɣlʋ Yesu Krɩstʋ ɛla mɩtɩŋa payɩ lootiye!