2 Tesalooniki 2 - New Testament

Mbʋ́ pɩkaɣ labʋ nɛ pʋcɔ Kɩpaɣlʋ kɩyakʋ talɩ yɔ

¹ Taabalaa! Đɩcaɣ ɖiheyi-mɩ ɖa-Kɩpaɣlʋ Yesu Krɩstʋ kɔm nɛ ɖikpeɣluu ɛ-cɔlɔ yɔ pɔ-tɔm. Đitendiɣ-mɩ se:

² ɩtaayele mɩ-tɩ nɛ piliɣti mɩ-lɩmaɣza kɩbana kɛlɛʋ yaa sɔɔndʋ kpa-mɩ se Kɩpaɣlʋ kɩyakʋ talaa. Paa nɔɔyʋ eheyi-mɩ se Fezuu Kiɖeɖeu heyini-i-tʋ yaa pɩkɛ Ɛsɔ tɔm yaa ɛcɛlɩ-mɩ takayaɣ se ɖamanɩ-mɩ-kɛ yɔ, ɩtaayele mɩ-tɩ.

³ Ɩtaayele nɛ nɔɔyʋ yili-mɩ natʋyʋ taa kaʋ. Mbʋ́ pʋyɔɔ yɔ, pʋcɔ kɩyakʋ ŋ́gʋ́ kɩtalɩ lɛ, ɛyáa haɣ Ɛsɔ siɣ́ye nɛ Kañadʋ weyi ɛkɔŋ tɛmnaʋ asayʋʋ yɔ, ɛlɩzɩ ɛ-tɩ nɛ pana-ɩ.

⁴ Ɛkɔŋ kpazʋʋ ɛ-tɩ se ɛkɩlɩ mbʋ́ pɩtɩŋa payɩ ɛyáa kpakɩɣ se Ɛsɔ yɔ yaa poluŋuu pɩ-tɛɛ yɔ. Halɩ ewoki ɛsʋʋ Ɛsɔ ɖɩɣa taa nɛ ɛcaɣ se ɛ-maɣmaɣ lɛ Ɛsɔ.

⁵ Ɩɩtɔzʋʋ se ńdʋ́ meheyaɣ-mɩ alɩwaatʋ ndʋ́ maawɛ mɩ-cɔlɔ yɔ yaa we?

⁶ Lɛɛlɛɛyɔ, ɩsɩm mbʋ́ pɩɖɩkɩ-ɩ nʋmɔʋ nɛ pʋkɔɔ pɩsɩɩnɩ alɩwaatʋ ndʋ́ ɛlɩzɩɣ ɛ-tɩ nɛ pana-ɩ yɔ camɩyɛ.

⁷ Ɛ-kañatʋ lakasɩ nzɩ́ sɩwɛ mɛsaɣ tɛɛ yɔ, sɩtɛm pazʋʋ. Ɛlɛ́, pʋwɛɛ se weyi ɛɖɔkɩ-ɩ yɔ, pakʋsɩ-ɩ nɛ pʋcɔ sɩtalɩ.

⁸ Peeɖe Kañadʋ lɩzɩɣ ɛ-tɩ nɛ pana-ɩ, ɛlɛ́, Kɩpaɣlʋ Yesu kɔŋ-ɩ kʋʋ nɛ ɛ-nɔɔ taa heɣlim mbʋ́ ehosuu ɛ-yɔɔ yɔ nɛ ɛnaŋ-ɩ nɛ ñalɩmɩyɛ nɖɩ́ ɛkɔŋna yɔ.

⁹ Pʋcɔ pɩla ḿbʋ́ lɛ, Kañadʋ ɛnʋ, ɛkaɣ kɔm nɛ Satanɩ ɖoŋ nɛ ɛla hama lakasɩ ndɩ ndɩ nɛ ɛwɩlɩ kawɩlɩsɩ nɛ ɛcɛtɩnɩ ɛyáa.

¹⁰ Ɛkɔŋ tɩŋnaʋ kɩdɛkɛdɩm ndɩ ndɩ tɩŋa yɔɔ nɛ eyili mbá pɔkɔŋ lebu yɔ. Mbʋ́ pʋyɔɔ yɔ, pɔtɔsɔɔlɩ toovenim tɔm ndʋ́ pɩɩwɛɛ se tɩya pa-ñʋʋ yɔ.

¹¹ Pʋ-yɔɔ Ɛsɔ tiyiɣni-wɛ ɖoŋ weyi eyeki nɛ pele yɔ se petisi cɛtɩm tɔm.

¹² Pɩlakɩ ḿbʋ́ se pahʋʋnɩ mbá patɩŋa payɩ petetisi toovenim tɔm nɛ panɩɩnɩ mbʋ́ pɩtatʋʋzɩ yɔ.

Pʋwɛɛ se ɩɖɔkɩ mi-lidaʋ kpam

¹³ Piyele ɖa lɛ, pʋwɛɛ se ɖɩsa Ɛsɔ tam taabalaa mbá mɩ Kɩpaɣlʋ sɔɔlaa yɔ mɩ-yɔɔ. Mbʋ́ pʋyɔɔ yɔ, mɩ ɛcalɩ lɩzʋʋ se pɩtɩŋnɩ e-Fezuu Kiɖeɖeu ŋgʋ́ kɩpɩsɩɣ-mɩ cɩɖɩcɩɖɩ ñɩma yɔ nɛ lidaʋ ŋgʋ́ ɩwɛnɩ toovenim yɔɔ yɔ pɔ-yɔɔ nɛ ɛya mɩ-ñʋʋ.

¹⁴ Pʋ-yɔɔ ɖɔɖɔ ɛtɩŋnɩ Laŋhɛzɩyɛ Tɔm ndʋ́ ɖiheyi-mɩ yɔ, tɩ-yɔɔ nɛ ɛ́yáa-mɩ se ihiɣ ɖa-Kɩpaɣlʋ Yesu Krɩstʋ koboyaɣ.

¹⁵ Taabalaa! Yee ḿbʋ́, ɩɖɔkɩ mɩ-tɩ kpam nɛ ɩɖɔkɩ ɖɔɖɔ tɔm ndʋ́ ɖɩwɩlɩ-mɩ nɛ nɔɔ taa yaa ndʋ́ ɖɩma-mɩ nɛ ɖɩwɩlɩ-mɩ yɔ nesi naalɛ.

¹⁶ Toovenim lɛ, ɖa-Caa Ɛsɔ sɔɔlɩ-ɖʋ nɛ ɛtɩŋnɩ e-lootiye yɔɔ nɛ eyele ɖa-laŋa hɛɛ tam nɛ ɖɩɖaŋ mbʋ́ ɛɖʋwa se ɛhaɣ-ɖʋ yɔ kpam. Ɛ nɛ ɖa-Kɩpaɣlʋ Yesu Krɩstʋ maɣmaɣ

¹⁷ pɛhɛzɩ mɩ-laŋa nɛ peyele ɩtɛzɩ kpaʋ ɖoŋ nɛ ɩla mbʋ́ pɩtɩŋa pʋwɛ ɖeu yɔ mɩ-lakasɩ nɛ mɩ-yɔɔdaɣ pa-taa.