2 Tesalooniki 1 - New Testament

Sɛtʋ

¹ Ma Pɔɔlɩ, ma nɛ Silaasɩ nɛ Timootee ɖɩmaɣnɩ Krɩstʋ ŋgbɛyɛ taa ñɩma mbá mɩ ɩwɛ Tesalooniki nɛ ɩkɛ ɖa-Caa Ɛsɔ nɛ Kɩpaɣlʋ Yesu Krɩstʋ pa-ñɩma yɔ takayaɣ kanɛ.

² Đɩsɛ-mɩ: Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.

Kɩpaɣlʋ kaɣ kɔm nɛ ɛhʋʋ ɛyáa tɔm kedeŋa yɔɔ

³ Taabalaa! Pʋwɛɛ se ɖɩsa Ɛsɔ mɩ-yɔɔ tam. Pʋmʋna ḿbʋ́, mbʋ́ pʋyɔɔ yɔ, ɩwɛɛ ɩtɛzɩɣ lidaʋ wɛnaʋ nɛ mɩtɩŋa payɩ ɩtɛzɩɣ ɖama sɔɔlʋʋ.

⁴ Pʋ-yɔɔ ɖa-maɣmaɣ ɖɩkʋndʋʋnɩ-mɩ Ɛsɔ aŋgba taa ñɩma hɛkʋ taa ɛzɩma mbʋ́ ɩpɩzaa ɩɖɔkɩ mɩ-tɩ nɛ ɩwɛnɩ lidaʋ alɩwaatʋ ndʋ́ pɛwɛ mɩ-wayɩ kaŋ kaŋ nɛ panazɩɣ-mɩ yɔ pʋ-yɔɔ.

⁵ Ḿbʋ́ wɩlɩɣnɩ se Ɛsɔ tɔm hʋʋ tʋʋzaa. Pɩlabɩ ḿbʋ́ se ɩmʋnɩ e-Kewiyaɣ ŋgá kɔ-yɔɔ ɩtɔkɩ kʋñɔŋ yɔ ka-taa ñɩma.

⁶ Ɛsɔ naʋ taa lɛ, pʋmʋna ḿbʋ́ se pɔkɔɔ paɖʋ kʋñɔŋ mbá paɖʋʋ-mɩ-kʋ yɔ.

⁷ Piyele mbá mɩ ɩtɔkɩ kʋñɔŋ lɛɛlɛɛyɔ yɔ, ɖa nɛ mɩ ɖɩkɔŋ hɛzʋʋ alɩwaatʋ ndʋ́ Kɩpaɣlʋ Yesu nɛ e-tiyiyaa ɖoŋ ñɩma palɩzɩɣ pa-tɩ ɛsɔdaa nɛ pana-wɛ

⁸ miŋ sɔsɔŋ taa yɔ. Ḿbʋ́ ɛkɔŋ se ɛhɔ mbá patasɩ Ɛsɔ nɛ paañaŋ ɖa-Kɩpaɣlʋ Yesu Laŋhɛzɩyɛ Tɔm yɔ pa-nɩŋgbaaŋ.

⁹ Kɩmɩyɛ nɖɩ́ ɛkpaɣ-wɛ yɔ lɛ se ewokini-wɛ asayʋʋ maatɛŋ taa, puposuuni Kɩpaɣlʋ nɛ e-ɖoŋ koboyaɣ.

¹⁰ Puwiye ńɖɩ́ lɛ, ɛkɔŋ se pɩtɩŋnɩ ɛ-ñɩma yɔɔ nɛ ɛ-hɩɖɛ sɛɛ nɛ mbá pɛwɛnɩ lidaʋ ɛ-yɔɔ yɔ, patɩŋa payɩ payɩɣyɩ-ɩ. Ŋgʋ́, mɩ mitisi aseɣɖe nɖɩ́ ɖɩlɩzaa yɔ.

¹¹ Pʋ-yɔɔ ɖɩwɛɛ ɖɩsɛɣ ɖɛ-Ɛsɔ mɩ-yɔɔ se eyele nɛ ɩmʋnɩ mbʋ́ pʋ-yɔɔ ɛya-mɩ yɔ. Đɩsɛɣ-ɩ ɖɔɖɔ se ɛtɩŋnɩ e-ɖoŋ yɔɔ nɛ eyele ɩla camɩyɛ lakasɩ nzɩ́ sɩtɩŋa payɩ ɩɖʋwa yɔ nɛ ɩtɛzɩ wɛʋ kpekpeka mi-lidaʋ wɛnaʋ taa.

¹² Ḿbʋ́ pɩtɩŋɩɣnɩ mɩ-yɔɔ nɛ ɖa-Kɩpaɣlʋ Yesu hɩɖɛ sɛɛ nɛ pɩtɩŋnɩ ɛ́lɛ́ yɔɔ nɛ mɩ-ñɩnɖɛ ñɛsɛɛ ɖɔɖɔ. Đɛ-Ɛsɔ nɛ Kɩpaɣlʋ Yesu Krɩstʋ, po-lootiye yɔɔ pʋkɔŋ pɩla ḿbʋ́.