2 Pɩyɛ 2 - New Testament

Mbá pawɩlɩɣ ɛyáa cɛtɩm tɔm yɔ, pɔkɔŋ pa-nɩŋgbaaŋ hɔm

¹ Ɛzɩma mbʋ́ mbá pɛcɛtaɣ se pɛkɛ mbá posusuu tɔm ndʋ́ tɩlɩnɩ Ɛsɔ cɔlɔ yɔ paasʋ Ɛsɔ ñɩma taa yɔ, ḿbʋ́ ɖɔɖɔ mbá pawɩlɩɣ ɛyáa cɛtɩm tɔm yɔ pɔkɔŋ mɩ-hɛkʋ taa sʋʋ mɛsaɣ tɛɛ. Pɔkɔŋ pawɩlɩ-mɩ tɔm ɛzaɣ́tʋ ndʋ́ tilesiɣ ɛyáa yɔ. Halɩ pɔkɔŋ kizuu ɖa-Wɩlɩyʋ sɔsɔ weyi ɛyabɩ pa-ñʋʋ yɔ. Pʋ-yɔɔ pɩtɩŋɩɣna nɛ asayʋʋ nakʋyʋ tudi-wɛ.

² Ɛyáa sakɩyɛ kɔŋ-wɛ tɩɣzɩnaʋ nɛ pala yem yem. Pa-lakasɩ yɔɔ lɛ, ɛyáa yɔɔdʋʋ toovenim nʋmɔʋ yɔɔ ɛzaɣ́tʋ tɔm.

³ Liidiye laɣzaɣ yɔɔ lɛ, pɔkɔŋ-mɩ cɛtʋʋ nɛ pɔ-nɔɔ leleŋ nɛ pɔhɔɔzɩ mi-nesi taa. Ɛlɛ́, Ɛsɔ weyi ɛhʋʋnɩ ɛyáa yɔ, ɛpazɩ pɔ-tɔm kʋʋ ɖooo lɔŋ. Ɛtɔyɩtʋʋ-wɛ alɩwaatʋ pazɩ taa.

⁴ Mbʋ́ pʋyɔɔ yɔ, Ɛsɔ tohuuzi ɛ-maɣmaɣ e-tiyiyaa mbá paalabɩ kɩwɛɛkɩm yɔ pɔ-yɔɔ. Ɛlɛ́, ɛɖʋ-wɛ kʋñɔŋ maatɛŋ taa se pɛwɛɛ cɩkpɛndʋʋ taa peeɖe nɛ pʋkɔɔ pɩsɩɩnɩ tɔm hʋʋ kɩyakʋ wiye.

⁵ Ɛsɔ tohuuzi caánaʋ́ taa ñɩma yɔɔ ɖɔɖɔ: eyeba nɛ tɛʋ nɩɩ nɛ lɩm su kedeŋa kpeekpe nɛ pʋkʋ mbá paañaŋ-ɩ yɔ. Ɛyáa lutozo ɖeke koŋ ñʋʋ ɛyaba. Pa-taa lɛlʋ lɛ Nowee weyi eesusi ɛyáa se pala mbʋ́ pʋtʋʋzaa yɔ.

⁶ Pʋwayɩ lɛ, ɛhʋʋnɩ Sodom ñɩma nɛ Gomɔɔrɩ ñɩma nɛ ɛkʋ pɔ-tɔm nɛ ɛñaɣzɩ pa nɛ pɛ-tɛtʋ miŋ nɛ papɩsɩ tɔlɩma. Ḿbʋ́ ɛwɩlɩnɩ mbá paañaŋ-ɩ yɔ se ḿbʋ́ pʋkɔŋ-wɛ tɛmnaʋ.

^7-8 Ɛlɛ́, ɛyabɩ Looti weyi ɛkɛ ɛyʋ kʋtʋʋzʋ yɔ ɛ-ñʋʋ. Ɛyáa azaɣ́a mbá paawɛ ɛ-alɩwaatʋ taa yɔ, pe-yem yem lakasɩ cɛyaɣ Looti ɛnʋ siŋŋ. Mbʋ́ pʋyɔɔ yɔ, kʋtʋʋzʋ ɛnʋ, ɛɛwɛ pɛ-hɛkʋ taa nɛ pɩɖɛɛ-ɩ nɛ pɛ-ɛzaɣ́tʋ lakasɩ naʋ. Pɩɩɖɛ-ɩ ɖɔɖɔ nɛ tɔm ɛzaɣ́tʋ ndʋ́ pɔyɔɔdaɣ yɔ tɩ-nɩʋ.

⁹ Ḿbʋ́ wɩlɩɣnɩ-ɖʋ se Kɩpaɣlʋ sɩm nʋmɔʋ ŋgʋ́ ɛtɩŋɩɣna nɛ ɛlɩzɩ mbá pañaŋ-ɩ yɔ takʋʋ taa yɔ. Pɩwɩlɩɣ-ɖʋ ɖɔɖɔ se ɛsɩm ɛzɩma mbʋ́ ɛsɩɣ azaɣ́a nɛ ɛɖʋ-wɛ kʋñɔŋ tɔm hʋʋ kɩyakʋ wiye yɔ.

¹⁰ Kɔzɩkɔzɩ mbá panɩɣnɩ kɩdɛkɛdɩm labʋ ɛzɩ pa-maɣmaɣ pe-liu wɛʋ yɔ nɛ patakpaɣ Ɛsɔ ɖoŋ payaa pʋyʋ yɔ. Cɛtɩm tɔm wɩlɩyaa mbá meheyi-mɩ pɔ-tɔm yɔ, paacazɩɣ nɔɔyʋ taʋ, pɛkɛ agaɣya tɩnaa. Paañaŋ ɖoŋ ndɩ ndɩ weyi ɩwɛ ɛsɔdaa yɔ kpem nɛ patʋʋ-ɩ.

¹¹ Halɩ Ɛsɔ tiyiyaa mbá paba wɛ ɖoŋ nɛ pɩkɩlɩ-wɛ yɔ, paatʋʋ ɖoŋ ɩnʋ Kɩpaɣlʋ ɛsɩndaa nɛ ɛzaɣ́tʋ tɔm natʋyʋ.

¹² Ɛlɛ́, ḿbá lɛ, pɛwɛ ɛzɩ tɛtɛ kpɩna wena a-ñʋŋ taa fɛyɩ nɛ awɛɛ se pɔkɔŋ-yɛ kpaʋ nɛ pakʋ yɔ. Patʋʋ mbʋ́ paasɩŋ yɔ. Pa-maɣmaɣ pa-lakasɩ nzɩ́ sɩsʋzʋʋ ɛyáa asayʋʋ taa yɔ, ńzɩ́ kɔŋnɩ-wɛ ɖɔɖɔ sʋzʋʋ kɩ-taa.

¹³ Pɔkɔŋ-wɛ labʋ mbʋ́ pɩtatʋʋzɩ yɔ ɛzɩ pa-maɣmaɣ palabʋ lɛlaa yɔ. Pɔsɔɔlɩ kpem se pɔtɔɔ nɛ pɔñɔɔ nɛ pɩɖɛlɛsɩ niye nɛ pɩkpɛndɩnɩ wɩsɩ taa. Alɩwaatʋ ndʋ́ mɩ nɛ wɛ ɩkpɛndɩɣ ɩtɔkɩ kazandʋ yɔ, pa-lakasɩ kpaɣ-mɩ fɛyɛ. Pɛcɛtɩɣ-mɩ nɛ pɩkɛdɩɣnɩ-wɛ siŋŋ.

¹⁴ Halaa acɛyɛ tɩnaa yɔɔ ɖeke pa-lɩmaɣza wɛɛ. Paañɩɣzɩɣ kɩwɛɛkɩm labʋ kpem. Pepeɣziɣ mbá pɛfɛyɩ ɖoŋ Ɛsɔ nʋmɔʋ taa yɔ nɛ pasʋzʋʋ-wɛ kɩwɛɛkɩm taa. Liidiye cazʋʋ lɩmaɣza suni pa-taa. Ɛsɔ wɩlɩ-wɛ kpalʋʋ.

¹⁵ Peyebi nʋmɔʋ kɩbaŋgʋ tɩŋʋʋ nɛ pele. Patɩŋ Bosɔɔrɩ pɩyalʋ Balaam weyi ɛɛsɔɔlɩ mbʋ́ pɩtatʋʋzɩ yɔ labʋ se ehiɣ liidiye yɔ ɛ-wayɩ.

¹⁶ Peeɖe Ɛsɔ kalɩ-ɩ ɛ-kaañamtʋ yɔɔ. Kpaŋasɩ ɛɛyɔɔdʋʋ. Ɛlɛ́, Ɛsɔ tɩŋnɩ halɩ ñɩŋga nakɛyɛ yɔɔ nɛ kɔyɔɔdɩ alɩwaatʋ ńdʋ́ tɩ-taa ɛzɩ ɛyʋ yɔ. Ḿbʋ́ kasɩzɩnɩ náyʋ ɛnʋ ɛ-kɩmɛlɛndʋ lakasɩ.

¹⁷ Cɛtɩm tɔm wɩlɩyaa ḿbá, pɛwɛ ɛzɩ hila wena a-taa lɩm sɔwa yɔ. Pɛwɛ ɖɔɖɔ ɛzɩ ɛsɔmɩndʋ ndʋ́ heɣlim sɔsɔm kpakɩɣ pɩɖɛɣna yɔ. Cɩkpɛndʋʋ sɔsɔʋ kpemm taa Ɛsɔ ñɔɔzʋʋ-wɛ ɖɩjaɣyɛ.

¹⁸ Pɔyɔɔdʋʋ camɩyɛ, ɛlɛ́ pɩkɛ kɩmɛlɛndʋ tɔm. Piteleɖida yɔ, nabɛyɛ lɩʋ ɛyáa mbá pelebi nʋmɔʋ yɔ pa-taa yɔ. Ḿbá cɛtɩm tɔm wɩlɩyaa peɣziɣ. Palakɩ yem yem lakasɩ nzɩ́ pa-maɣmaɣ pe-liu wɛɛ yɔ nɛ peyilini-wɛ.

¹⁹ Peheyiɣ-wɛ se pɔkɔŋ pa-tɩ yɔɔ wɛʋ. Ŋgʋ́, pa-maɣmaɣ pɛkɛ kɩwɛɛkɩm mbʋ́ puwokini-wɛ sɩm taa yɔ pu-yomaa. Mbʋ́ pʋyɔɔ yɔ, ɛyʋ kɛ mbʋ́ pʋwɛnɩ ɖoŋ ɛ-yɔɔ yɔ pu-yom.

²⁰ Đa-Kɩpaɣlʋ Yesu Krɩstʋ lɛ ɖa-ñʋʋ yaɖʋ. Toovenim lɛ, yee ɛyáa ɩsɩm-ɩ nɛ peyele kedeŋa yɔɔ cɩnɛ ɛzaɣ́tʋ lakasɩ nɛ pɛtɛ paɖaɣnɩ pɩsʋʋ sɩ-taa nɛ sɩwabɩ-wɛ yɔ, pɛwɛɣ pʋtɔdɩyɛ kpem nɛ pɩkɩlɩ paawɛʋ kajalaɣ taa yɔ.

²¹ Mbʋ́ pʋyɔɔ yɔ, pɩɩkɩlɩ wee wee se pataatɩlɩ mbʋ́ pʋtʋʋzaa yɔ pʋ-nʋmɔʋ ɛzɩ paatɩlɩ-kʋ nɛ pʋwayɩ palɩɩ kɩ-taa nɛ paatasɩɣ ɖɔm paɣtʋ ndʋ́ Ɛsɔ ɖʋwa nɛ pɛkɛdɩ-wɛ yɔ tɩ-yɔɔ yɔ.

²² Mbʋ́ pɩlabɩ-wɛ yɔ, pɩwɩlɩɣ se eduuye nɖɩ́ potuwaa se: «Haɣ pɩsaa kɔtɔkɩ kɔ-tɔtʋ» nɛ lɛɛɖɛ nɖɩ́ potuwaa ɖɔɖɔ se: «Patɩtɛm afa lɩm sɔʋ lɛ, ɛɖaɣnɩ pɩsʋʋ ɛsʋzɩ ɛ-tɩ ahɔya taa» yɔ, akɛ toovenim.