2 Pɩyɛ 1 - New Testament

Sɛtʋ

¹ Ma Siimɔɔ Pɩyɛ weyi ɛkɛ Yesu Krɩstʋ tʋmlaɖʋ nɛ e-tiyiyu yɔ, mamaɣnɩ takayaɣ kanɛ. Mamaɣ-kɛ mbá mɩ ɩwɛnɩ lidaʋ ɛ-yɔɔ ɖɔɖɔ ɛzɩ ɖa yɔ. Yesu Krɩstʋ weyi ɛkɛ ɖa-ñʋʋ yaɖʋ nɛ ɖɛ-Ɛsɔ yɔ, ɛtʋʋzaa yɔɔ eyebi se ɩwɛnɩ-kʋ. Lidaʋ ŋ́gʋ́, kɩkɛnɩ ɖatɩŋa payɩ pʋyʋ sɔsɔ.

² Mɛnsɛ-mɩ: Ɛsɔ ɛtɩŋnɩ ɛzɩma mbʋ́ ɩsɩm ɛ nɛ ɖa-Kɩpaɣlʋ Yesu yɔ pʋ-yɔɔ nɛ ɛlabɩ-mɩ lootiye kpem nɛ ɛhɛzɩ mɩ-laŋa siŋŋ.

Krɩstʋ ñɩma ɖɔnɛ tɔm

³ Yesu Krɩstʋ wɛnɩ Ɛsɔ ɖoŋ nɛ ɛha-ɖʋ pɩtɩŋa payɩ se ɖɩwɛɛ wezuu nɛ ɖɩla mbʋ́ Ɛsɔ liu wɛɛ yɔ. E-koboyaɣ nɛ ɛzɩma mbʋ́ ɛkɩlɩ pɩtɩŋa yɔ, pɔ-yɔɔ eyebi se ɖɩtɩlɩ Ɛsɔ weyi ɛya-ɖʋ se ɖɩkɛ ɛ-ñɩma yɔ.

⁴ Ḿbʋ́ yebina nɛ ɛlabɩ-ɖʋ kʋjɔŋ sɔsɔŋ weyi ɛɖʋwa se ɛlakɩ-ɖʋ yɔ. Kʋjɔŋ ɩnʋ ɩwɛ ɖeu pɩtɩɩfɛyɩ. Ɛlakɩ-ɖʋ-ɩ se pɩtɩŋnɩ ɩ-yɔɔ nɛ ɩlɩɩ mbʋ́ kedeŋa ñɩma sɔɔlɩ labʋ nɛ pɩwɛɛkɩɣ-wɛ yɔ pi-nesi taa nɛ ɩwɛnɩ wɛtʋ ndʋ́ Ɛsɔ wɛna yɔ.

⁵ Pɩ-maɣmaɣ pʋ-yɔɔ lɛ, ɩñaɣ pana pɩŋŋ nɛ ɩwɛnɩ lidaʋ nɛ ɩwɛɛ siɣsiɣ ɖɔɖɔ mi-wezuu caɣʋ taa. Ɩwɛɛ siɣsiɣ mi-wezuu caɣʋ taa nɛ ɩkpɛlɩkɩ ɖɔɖɔ mbʋ Ɛsɔ liu wɛɛ yɔ.

⁶ Ɩñaɣ pana ɖɔɖɔ nɛ ɩsɔzɩ lɛɣtʋ ńdʋ́ tɩ-yɔɔ tɩ ɖɔkʋʋ, nɛ tɩ ɖɔkʋʋ yɔɔ ɛsɩyɛ sɛʋ nɛ ɛsɩyɛ sɛʋ yɔɔ Ɛsɔ ñam.

⁷ Ɩsɔzɩ Ɛsɔ ñam yɔɔ Krɩstʋ ñɩma sɔɔlʋʋ nɛ Krɩstʋ ñɩma sɔɔlʋʋ yɔɔ ɛyáa kpeekpe sɔɔlʋʋ.

⁸ Toovenim lɛ, wɛtʋ ńdʋ́ʋ́ pʋwɛɛ se ɩwɛna nɛ iyele tɩɖɛɛnɩ ɛsɩndaa. Peeɖe mɩ-tʋmɩyɛ labʋ tɛzɩɣ ɖɛʋ nɛ ɛsɩndaa nɛ ɩtɛzɩ tɩlʋʋ ɖa-Kɩpaɣlʋ Yesu Krɩstʋ camɩyɛ.

⁹ Ɛlɛ́, weyi ɛfɛyɩnɩ-tʋ yɔ, ɛɛnaɣ poliŋ, ɛwɛ ɛzɩ yʋlʋm yɔ. Ɛsɔwa se pañalɩ ɛ-kɩwɛɛkɩm mbʋ́ ɛɛlaba yɔ.

¹⁰ Taabalaa, pʋ-yɔɔ lɛ, mɩ-tʋmɩyɛ labʋ taa lɛ, mɩ-pana ñaɣʋ ɛwɩlɩ-mɩ se Ɛsɔ ya-mɩ. Mbʋ́ pʋyɔɔ yɔ, yee ɩlakɩ ḿbʋ́ yɔ, ɩɩtɔlʋʋ Ɛsɔ nʋmɔʋ taa kaʋ.

¹¹ Pʋ-yɔɔ Ɛsɔ kɔŋ-mɩ haʋ waɖɛ se ɩsʋʋ e-Kewiyaɣ ŋgá kaatɛŋ yɔ ka-taa yem hɛɛɛ. Ŋ́gá lɛ ɖa-Kɩpaɣlʋ Yesu Krɩstʋ weyi ɛkɛ ɖa-ñʋʋ yaɖʋ yɔ ɛ-ñɩŋga.

Ɩɖɔ tɔm ndʋ́ pawɩlɩ-mɩ yɔ tɩ-yɔɔ

¹² Pʋ-yɔɔ lɛ, paa ɩtɛm sɩm toovenim tɔm nɛ ɩkpa ɖoŋ tɩ-taa yɔ, mɛwɛɣ mɔntɔzʋʋ-mɩ-tʋ ḿbʋ́.

¹³ Manawa se pʋmʋnaa se mɛwɛɛ mɔntɔzʋʋ-mɩ tɔm ńdʋ́ alɩwaatʋ ndʋ́ mɛwɛnɩ mɛ-ɛsɛ yɔ. Malakɩ ḿbʋ́ se ɩtaaɖoo tɩ-yɔɔ.

¹⁴ Mbʋ́ pʋyɔɔ yɔ, manawa se pɩkazɩ pazɩ yem mankʋyʋʋ kedeŋa yɔɔ cɩnɛ ɛzɩ ɖa-Kɩpaɣlʋ Yesu Krɩstʋ heyuu-m yɔ.

¹⁵ Pʋ-yɔɔ mañakɩ pana se mawɩlɩ-mɩ mbʋ́ ɩɩla nɛ ɩtɔzʋʋ tɔm ńdʋ́ tɩ-yɔɔ tam ma-wayɩ yɔ.

¹⁶ Toovenim lɛ, pɩtɛkɛ mʋya wena ɛyáa maɣzɩɣ nɛ pamʋyʋʋ yɔ a-yɔɔ ɖɩtɩŋnaa nɛ ɖɩkɛdɩ-mɩ ɛzɩma mbʋ́ ɖa-Kɩpaɣlʋ Yesu Krɩstʋ kɔŋnɩ ɖoŋ yɔ. Mbʋ́ pʋyɔɔ yɔ, ɖa-maɣmaɣ ɖɩna e-koboyaɣ nɛ ɖɛ-ɛsɛ.

¹⁷ Đɩɩwɛ alɩwaatʋ ndʋ́ Caa Ɛsɔ ɖʋ-ɩ hɩɖɛ nɛ ɛsam-ɩ yɔ. Ɛsɔ weyi e-koboyaɣ kɩlɩ pɩtɩŋa yɔ, ɛyɔɔdɩ alɩwaatʋ ńdʋ́ se: «Ɛnɛ lɛ man-Pɩyalʋ kʋsɔɔlʋ, maahʋʋ ɛ-yɔɔ kaʋ.»

¹⁸ Đa-maɣmaɣ ɖɩnɩ nɔɔ ŋ́gá nɛ ɛsɔdaa ḿbʋ́. Mbʋ́ pʋyɔɔ yɔ, ɖa nɛ ɩ ɖɩɩwɛna pʋʋ ŋgʋ́ kʋ-yɔɔ Ɛsɔ yɔɔdɩnɩ-ɩ ḿbʋ́ yɔ.

¹⁹ Đɔɖɔ lɛ, tɔm ndʋ́ mbá posusuu tɔm ndʋ́ tɩlɩnɩ Ɛsɔ cɔlɔ yɔ pɔyɔɔdaa nɛ tɩkɛ toovenim siŋŋ yɔ, tɩwɛ ɖɔ-cɔlɔ. Pʋwɛ ɖeu se ɩmaɣzɩ tɩ-yɔɔ. Mbʋ́ pʋyɔɔ yɔ, tɩwɛ ɛzɩ kanɖʋ ŋgʋ́ kɩnaɣ cɩkpɛndʋʋ taa nɛ pʋkɔɔ pɩñandɩ yɔ. Alɩwaatʋ ńdʋ́ʋ́ Krɩstʋ weyi ɛwɛ ɛzɩ tɩmbalʋʋ yɔ, ɛñalɩɣ mɩ-laŋa taa.

²⁰ Pʋwɛɛ se ɩtɩlɩ camɩyɛ se: nɔɔyʋ fɛyɩ se ɛɖɛzɩɣ tɔm ndʋ́ tɩlɩnɩ Ɛsɔ cɔlɔ nɛ pama-tʋ Ɛsɔtɔm Takayaɣ taa yɔ nɛ ɛ-maɣmaɣ ɛ-lɔŋsɩnɖɛ.

²¹ Mbʋ́ pʋyɔɔ yɔ, pɩtɛkɛ mbá posusuu-tʋ yɔ pamaɣzɩna yem nɛ pɔyɔɔdɩ-tʋ. Ɛlɛ́, Fezuu Kiɖeɖeu sazɩnɩ-wɛ nɛ pɔyɔɔdɩ-tʋ.