2 Kɔrɛntɩ 9 - New Testament

Ɛsɔ sɔɔlɩ weyi ɛhaɣnɩ laŋhʋlʋmɩyɛ yɔ

¹ Pɩfɛyɩ se mancazɩ-mɩ maʋ nɛ meheyi-mɩ liidiye nɖɩ́ ɖitiyiɣnɩ Ɛsɔ ñɩma yɔ ɖɩ-tɔm.

² Mbʋ́ pʋyɔɔ yɔ, manawa se mɩ-maɣmaɣ mi-liu wɛɛ se ɩsɩŋnɩ-wɛ. Pʋ-yɔɔ mansam-mɩ Masedonii ñɩma cɔlɔ nɛ meheyi-wɛ se: «Akayɩ egeetiye taa Yesu ŋgbɛyɛ taa ñɩma ñɔɔzɩ pa-tɩ ɖooo pinde se pahaɣ. Mɩ-pana ñaɣʋ labɩnɩ pa-taa ɛyáa sakɩyɛ hʋnʋm se paha.»

³ Paa ḿbʋ́, mentiyi Tiiti nɛ taabalaa ḿbá mɩ-tɛ se samtʋ ndʋ́ ɖɩsam-mɩ haɖɛ ńɖɩ́ ɖɩ-yɔɔ yɔ, tɩtaakɔɔ tɩsayɩ yem. Me-liu wɛɛ se ɩñɔɔzɩ mɩ-tɩ nɛ ɩɖaŋ kpam ɛzɩ meheyuu-mɩ yɔ.

⁴ Pɩtɛkɛ ḿbʋ́ yɔ, yee ma nɛ Masedonii ñɩma ɖɩkɔm ɖɩmaɣnɩ-mɩ nɛ ɩtɔñɔɔzɩdɩ haɖɛ ńɖɩ́ yɔ, fɛyɛ kpaɣ-ɖʋ liu ŋgʋ́ ɖɩɩta-mɩ yɔ kʋ-yɔɔ. Pɩkpaɣ-mɩ ɖɔɖɔ.

⁵ Pʋ-yɔɔ mamaɣzaa nɛ mentendi Tiiti nɛ ɛ-taabalaa ḿbá se pañaɣ pana pɛɖɛ-m nɔɔ nɛ pɔkɔɔ mɩ-tɛ nɛ pɔñɔɔzɩ haɖɛ nɖɩ́ ɩɩɖʋwa se ɩhaɣnɩ mɩ-laŋɩyɛ tɩŋa yɔ. Maatalɩɣ lɛ, pɔñɔɔzɩ pɩtɩŋa pasɩɩ. Ḿbʋ́ wɩlɩɣna se ɩhanɩ sɔɔlɩm, pɩtɛkɛnɩ kɩcɛyʋʋ.

⁶ Ɩtaasɔɔ se weyi eɖuu pazɩ yɔ, ɛkʋŋ pazɩ nɛ weyi ɛ́lɛ́ ɖúu sakɩyɛ yɔ, ɛkʋ sakɩyɛ.

⁷ Pʋwɛɛ se paa weyi ɛha ɛzɩ ɛɖʋʋ ɛ-taa yɔ. Ɛtaahanɩ laŋpɩsɩyɛ yaa kɩcɛyʋʋ. Mbʋ́ pʋyɔɔ yɔ, Ɛsɔ sɔɔlɩ weyi ɛhaɣnɩ laŋhʋlʋmɩyɛ yɔ.

⁸ Ɛsɔ pɩzɩɣ ɛha-mɩ pɩtɩŋa payɩ nɛ pɩkɩlɩ. Peeɖe ɩwɛɣnɩ mbʋ́ pɩtɩŋa payɩ pʋpɔzʋʋ-mɩ yɔ alɩwaatʋ tɩŋa nɛ ɩlabɩnɩ tʋma kɩbana sakɩyɛ.

⁹ Ḿbʋ́ pama Ɛsɔtɔm Takayaɣ taa se: «Ɛsɔ labɩ kʋñɔndɩnaa kʋjɔŋ nɛ ɛ-laŋɩyɛ tɩŋa. Ɛ-camɩyɛ lakasɩ wɛ tam.»

¹⁰ Ɛsɔ cɛlɩɣnɩ haɖʋ ɖomaɣ se eɖuu nɛ ɛhaɣ-ɩ tɔɔnaɣ se ɛtɔɔ. Ɛnʋ kɔŋnɩ-mɩ cɛlʋʋ ɖɔɖɔ mbʋ́ pɩtɩŋa payɩ pʋpɔzʋʋ-mɩ yɔ. Eyeki nɛ puhuu nɛ mɩ-camɩyɛ lakasɩ tɛzɩ ɖɔʋ.

¹¹ Eyeki nɛ ɩwɛnɩ ñɩm sakɩyɛ tam nɛ ɩpɩzɩ ɩwɛɛ kʋjɔŋ labʋ yɔɔ nɛ mɩ-laŋa tɩŋa. Peeɖe ɛyáa sakɩyɛ saŋ Ɛsɔ kʋjɔŋ weyi ɩlakɩ-wɛ nɛ ɖɩcɛlɩɣ-wɛ yɔ ɩ-yɔɔ.

¹² Mbʋ́ pʋyɔɔ yɔ, kʋjɔʋ ŋ́gʋ́, pɩtɛkɛ Ɛsɔ ñɩma ɖeke kɩwazɩɣ. Ɛlɛ́, kiyeki nɛ ɛyáa sakɩyɛ sɛɛ Ɛsɔ nɛ pasam-ɩ kʋ-yɔɔ ɖɔɖɔ.

¹³ Sɩnaʋ mbʋ́ ɩsɩŋnɩ-wɛ yɔ, pɩwɩlɩɣ mbʋ́ ɩkɛnaa yɔ. Peeɖe ɛyáa sakɩyɛ saŋ Ɛsɔ ɛzɩma mbʋ́ ɩɖɔŋ Krɩstʋ Laŋhɛzɩyɛ Tɔm yɔɔ yɔ pʋ-yɔɔ. Pasaŋ-ɩ ɖɔɖɔ ɛzɩma mbʋ́ mɩ nɛ wɛ nɛ lɛlaa tɩŋa payɩ ɩtayɩɣ mɩ-ñɩm nɛ laŋhʋlʋmɩyɛ yɔ pʋ-yɔɔ.

¹⁴ Pɔsɔɔlʋʋ-mɩ siŋŋ nɛ pɛsɛɣ Ɛsɔ mɩ-yɔɔ lootiye sɔsɔɖɛ nɖɩ́ ɛlabɩ-mɩ nɛ ɖɩfɛyɩ kaɣmaɣ yɔ ɖɩ-yɔɔ.

¹⁵ Đɩsa Ɛsɔ ɛ-kʋjɔʋ ŋgʋ́ kɩkɩlɩ pɩtɩŋa payɩ yɔ kʋ-yɔɔ!