2 Kɔrɛntɩ 8 - New Testament

Pasɩnaʋ Yeruusalɛm Krɩstʋ ñɩma yɔ

¹ Taabalaa, ɖɩcaɣ se ɩtɩlɩ lootiye nɖɩ́ Ɛsɔ labɩ Masedonii egeetiye taa Yesu aŋgba taa ñɩma yɔ.

² Pɩtakɩ-wɛ nɛ kʋñɔmɩŋ siŋŋ, ɛlɛ́, pa-laŋa hʋlʋmɩ siŋŋ nɛ pahanɩ pa-laŋa tɩŋa pilim. Ŋgʋ́, pɛkɛ kʋñɔndɩnaa kpem.

³ Meheyiɣ-mɩ toovenim se paha mbʋ́ papɩzɩɣ yɔ. Halɩ pɩɖɛɛ pʋ-yɔɔ. Pa-maɣmaɣ paasɔɔlɩnɩ ḿbʋ́.

⁴ Paawɛɛ pɛcɛyɩɣ-ɖʋ se ɖɩha-wɛ waɖɛ nɛ pasɩnɩ ɖɔɖɔ Ɛsɔ ñɩma.

⁵ Palaba nɛ pɩkɩlɩ ɛzɩ ɖɩɩmaɣzʋʋ yɔ: pacalɩ pa-tɩ kpaɣʋ nɛ pɛcɛlɩ Kɩpaɣlʋ. Pʋwayɩ lɛ, peyebini-ɖʋ pa-tɩ ɛzɩ Ɛsɔ liu wɛʋ yɔ.

⁶ Ɛzɩma mbʋ́ Tiiti kapazɩ liidiye mʋ́ʋ mɩ-tɛ yɔ, pʋ-yɔɔ ɖitendi-i se ɛñaɣ pana ɛpɩsɩ mɩ-tɛ peeɖe nɛ ɛtɛzɩ sɔɔlɩm tʋmɩyɛ ńɖɩ́ ɛzɩ ɛɛpazʋʋ-ɖɩ yɔ.

⁷ Ɩkɛ ñɩm tɩnaa Ɛsɔ nʋmɔʋ taa: ɩwɛnɩ lidaʋ siŋŋ Krɩstʋ yɔɔ, isusuu Ɛsɔtɔm camɩyɛ. Mbʋ́ ɩsɩm yɔ pʋɖɔwa, ɩñakɩ pana Ɛsɔ tʋmɩyɛ taa nɛ ɩsɔɔlɩ-ɖʋ siŋŋ. Pʋ-yɔɔ lɛ, ɩla sɔɔlɩm tʋmɩyɛ ńɖɩ́ ɖɔɖɔ nɛ mɩ-laŋɩyɛ tɩŋa pilim.

⁸ Mɔyɔɔdʋʋ ḿbʋ́ yɔ, pɩtɛkɛ paɣtʋ natʋyʋ manɖʋʋ-mɩ. Ɛlɛ́, ɛzɩma mbʋ́ lɛlaa ñakɩ pana yɔ pʋ-tɔm meheyiɣ-mɩ se mana se ɩwɛnɩ sɔɔlɩm siŋŋ yaa ɩfɛyɩna.

⁹ Mbʋ́ pʋyɔɔ yɔ, ɩsɩm lootiye nɖɩ́ Kɩpaɣlʋ Yesu Krɩstʋ labɩ-ɖʋ yɔ. Ɛnʋ weyi ɛɛkɛ ñɩm tʋ yɔ, ɛpɩsɩ ɛ-tɩ kʋñɔndʋ mɩ-yɔɔ se pɩtɩŋnɩ ɛ-kʋñɔndʋtʋ yɔɔ nɛ ɩkɛ ñɩm tɩnaa.

¹⁰ Lɛɛlɛɛyɔ lɛ, mbʋ́ mana liidiye haʋ pʋnɛ pʋ-tɔm taa yɔ meheyiɣ-mɩ. Pinde lɛ, mɩɩsɔɔlɩna nɛ ɩlɛyɩ pazʋʋ liidiye ńɖɩ́ ɖɩ-haʋ.

¹¹ Ɩwɛɛ pʋ-yɔɔ nɛ ɩtɛzɩ tʋmɩyɛ ńɖɩ́. Ɩtɛzɩ-ɖɩ labʋ nɛ mɩ-laŋɩyɛ tɩŋa ɛzɩ ɩɩɖʋʋ yɔ. Ɩlabɩ-ɖɩ ɛzɩma mbʋ́ ɩpɩzɩɣ yɔ.

¹² Yee ɛyʋ ɛhaɣ pʋyʋ nɛ ɛ-laŋɩyɛ tɩŋa pilim yɔ, Ɛsɔ mʋ́ʋ-pʋ nɛ ɛmaɣzɩnɩ mbʋ́ pʋdʋ wɛna yɔ. Ɛɛmaɣzɩɣnɩ mbʋ́ ɛfɛyɩna yɔ.

¹³ Mbʋ́ pʋyɔɔ yɔ, pɔtɔtɔ se ikpizi mi-nesi taa nɛ ɩkpazɩ lɛlaa nɛ piyele ɩsʋʋ kʋñɔŋ taa. Ɛlɛ́, pʋwɛɛ se mɩ nɛ mbá ɩsɩŋna yɔ, ɩwɛɛ kɩmaŋ.

¹⁴ Mbá mɩ ɩwɛnɩ ñɩm lɛɛlɛɛyɔ yɔ, ɩkpaɣ-pʋ nɛ ɩsɩnɩ mbá pɛwɛ kʋñɔŋ taa yɔ. Yee nabʋyʋ taa ɩkɔm ɩsʋʋ kʋñɔŋ taa nɛ paba wɛnɩ ñɩm yɔ, paasɩnɩ-mɩ. Ḿbʋ́ yekina nɛ mɩtɩŋa payɩ ɩwɛɛ kɩmaŋ.

¹⁵ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Weyi eeku tɔɔnaɣ sakɩyɛ yɔ, ɛtaawɛna nɛ pɩkɩlɩ mbʋ́ pʋpɔzʋʋ-ɩ yɔ nɛ weyi ɛ́lɛ́ ku pazɩ yɔ, nabʋyʋ taatɛɖɩɣ-ɩ.»

Tiiti nɛ Krɩstʋ ñɩma lɛlaa powoba Kɔrɛntɩ

¹⁶ Đɩsa Ɛsɔ weyi eyeba nɛ Tiiti ñakɩ pana ɖɔɖɔ mɩ-yɔɔ ɛzɩ ɖa yɔ.

¹⁷ Điheyi-i se ɛkɔɔ mɩ-tɛ nɛ etisi. Halɩ ɛ-maɣmaɣ kpem ɛɛɖʋwa se ɛkɔŋ mɩ-tɛ nɛ ɛla ḿbʋ́ ɖɔɖɔ.

¹⁸ Đitiyiɣ ɛ nɛ taabalʋ weyi esusi Laŋhɛzɩyɛ Tɔm siŋŋ nɛ pasaŋ-ɩ Yesu aŋgba tɩŋa payɩ taa yɔ.

¹⁹ Yesu aŋgba taa ñɩma lɩzɩnɩ-ɩ ɖɔɖɔ se ɖa nɛ ɩ ɖɩcɔɔ nɛ ɖɩmʋ liidiye nɖɩ́ pahawa yɔ. Ḿbʋ́ wɩlɩɣnɩ Kɩpaɣlʋ maɣmaɣ koboyaɣ nɛ ɛzɩma mbʋ́ ɖe-liu wɛɛ se ɖɩsɩnɩ lɛlaa yɔ.

²⁰ Đɩɩcaɣ se nɔɔyʋ ɛhɔmnɩ-ɖʋ tɔm liidiye sɔsɔɖɛ nɖɩ́ ɖɩcɔŋnɩ ɖɩ-yɔɔ yɔ ɖɩ-tɔm taa.

²¹ Ɛlɛ́, ɖɩcaɣ se ɖɩla mbʋ́ pʋmʋnaa se pala Kɩpaɣlʋ ɛsɩndaa nɛ mbʋ́ pʋmʋnaa se pala ɛyáa ɛsɩndaa ɖɔɖɔ yɔ.

²² Đa-taabalʋ weyi ɖitiyiɣ pa nɛ ɩ ḿbʋ́ yɔ, ɖɩmaɣzɩ-ɩ tam sakɩyɛ nɛ ɖɩna se ɛñakɩ pana siŋŋ. Lɛɛlɛɛyɔ, liu ŋgʋ́ ɛtaɣ-mɩ siŋŋ yɔ kʋ-yɔɔ lɛ, ɛtɛzɩɣ pana ñaɣʋ.

²³ Tiiti lɛ, ɛkɛ man-taabalʋ weyi ma nɛ ɩ ɖɩlakɩ tʋmɩyɛ mɩ-cɔlɔ yɔ. Pɩsɛɣ taabalaa lɛlaa mbá pasɩɣ-ɩ yɔ, Yesu aŋgba taa ñɩma tiyiɣni-wɛ. Palakɩ se Krɩstʋ hɩɖɛ ɛsɛɛ.

²⁴ Ɩwɩlɩ-wɛ nɛ pana se ɩsɔɔlɩ-wɛ nɛ pɩwɩlɩ Yesu aŋgba taa ñɩma nɛ patɩlɩ se ɖɩwɛnɩ toovenim se ɖɩkʋndɩnɩ-mɩ.