2 Kɔrɛntɩ 7 - New Testament

¹ Man-taabalaa kʋsɔɔlaa, mbʋ́ Ɛsɔ heyi-ɖʋ se ɛlakɩ-ɖʋ yɔ pʋ-yɔɔ lɛ, pɩwɛɛ se ɖiyele ɛzaɣ́tʋ ndʋ́ tipisiɣ tomnaɣ yɔ nɛ ndʋ́ tipisiɣ kalɩzaɣ yɔ tɩtɩŋa payɩ nɛ ɖɩwɛɛ cɩɖɩcɩɖɩ. Pʋwɛɛ se ɖɩtɛzɩ kɛʋ ɛ-ñɩma siŋŋ ɖe-wezuu caɣʋ taa. Mbʋ́ pʋyɔɔ yɔ, ɖɩñaŋ-ɩ.

Pɔɔlɩ laŋhʋlʋmɩyɛ tɔm

² Pɩfɛyɩ se ɩkpa-m nɛ mɩ-tɩ. Đɩtala nɔɔyʋ mbʋ́ pɩfɛyɩ ɖeu yɔ. Đɩtaɖʋzɩ nɔɔyʋ, ɖitepeɣzi ɖɔɖɔ nɔɔyʋ nɛ ɖikpizi e-nesi taa.

³ Maayɔɔdʋʋ ḿbʋ́ se mankʋ mɩ-tɔm. Mbʋ́ pʋyɔɔ yɔ, ɛzɩ mɛntɛm yɔɔdʋʋ yɔ, paa pʋwɛɛ se ɖa nɛ mɩ ɖɩsɩ yaa ɖɩwɛɛ wezuu yɔ, ɖɩsɔɔlɩ-mɩ siŋŋ.

⁴ Mɛwɛnɩ lidaʋ siŋŋ mɩ-yɔɔ, mankʋndʋʋnɩ-mɩ siŋŋ. Ma-laŋɩyɛ hɛ niɣ niɣ nɛ man-taa hʋlʋmɩ siŋŋ ɖa-kʋñɔmɩŋ tɩŋa taa.

⁵ Đooo ɖɩtalʋʋ Masedonii egeetiye taa yɔ, ɖɩtatɩɩhɛzɩ kaʋ. Đɩlabɩ kʋñɔŋ pɩtɩŋa pɩ-taa: ɖa nɛ ɛyáa lɛlaa ɖiyowa nɛ sɔɔndʋ kpa-ɖʋ.

⁶ Ɛlɛ́, Ɛsɔ weyi ɛhɛzɩɣ mbá poluzuu pa-tɩ ɛ-tɛɛ yɔ pa-laŋa yɔ, eyeba nɛ Tiiti kɔɔ ɖɔ-cɔlɔ nɛ ɖa-laŋa hɛɛ.

⁷ Pɩtɛkɛ ɛ-kɔm ɖeke hɛzɩnɩ ɖa-laŋa. Ɛkɛdɩ-ɖʋ ɖɔɖɔ ɛzɩma mbʋ́ ɩhɛzɩ ɛ-ñɩnɖɛ yɔ. Eheyi-ɖʋ se mi-liu wɛɛ kpem se ɩna-m, iwiɣ mɔ-yɔɔ nɛ ɩlʋkɩ. Ḿbʋ́ yebina nɛ man-taa tɛzɩ hʋlʋmʋʋ.

⁸ Manawa se takayaɣ ŋgá maama-mɩ yɔ, ka-taa tɔm wɛɛkɩ mɩ-laŋa, ɛlɛ́, maakpiɖiɣ. Paa maakpiɖaa se ka-taa tɔm kaawɛɛkɩ mɩ-laŋa alɩwaatʋ pazɩ yɔ,

⁹ man-taa hʋlʋmɩ lɛɛlɛɛyɔ. Pɩtɛkɛ mɩ-laŋa wɛɛkaa yɔɔ man-taa hʋlʋmaa. Ɛlɛ́, man-taa hʋlʋmɩnɩ ɛzɩma mbʋ́ mɩ-laŋwɛɛkɩyɛ yeba nɛ ɩlɛɣzɩ wɛtʋ yɔ. Mbʋ́ pʋyɔɔ yɔ, Ɛsɔ sɔɔlɩna se mɩ-laŋa ɛwɛɛkɩ ḿbʋ́. Pɩtɛkɛ ɖalabɩnɩ-mɩ kɩdɛkɛdɩm nabʋyʋ.

¹⁰ Toovenim lɛ, laŋwɛɛkɩyɛ nɖɩ́ ɖɩlɩnɩ Ɛsɔ cɔlɔ yɔ, ɖiyeki nɛ ɛyʋ lɛɣzɩ wɛtʋ nɛ ehiɣ ñʋʋ yabʋ, eekpiɖiɣ. Piyele kedeŋa laŋwɛɛkɩyɛ ñɔkɔŋnɩ sɩm.

¹¹ Ɛsɔ tɩŋnɩ ɛzɩma mbʋ́ mɩ-laŋa wɛɛkaa yɔ pʋ-yɔɔ, ɩɩnaɣ mbʋ́ pɩlɩ-mɩ pɩ-taa yɔ: ɩcɔnɩ ɩna ɛzɩma mbʋ́ ɩmaɣzɩɣ pɩtɩŋa pʋ-yɔɔ camɩyɛ yɔ! Ɩcɔnɩ ɩna ɛzɩma mbʋ́ ɩpɩzɩɣ ɩlʋkɩ mɩ-tɩ yɔɔ yɔ! Ɩcɔnɩ ɩna ɛzɩma mbʋ́ fɛyɛ kpaɣ-mɩ nɛ mbʋ́ pɩtɛkɛdɩ yɔ! Ɩcɔnɩ ɩna ɛzɩma mbʋ́ sɔɔndʋ kpaɣ-mɩ yɔ! Ɩcɔnɩ ɩna ɛzɩma mbʋ́ mi-liu wɛɛ se ɩtasɩ-m naʋ yɔ! Ɩcɔnɩ ɩna ɛzɩma mbʋ́ pɩlakɩ-mɩ hʋnʋm yɔ! Ɩcɔnɩ ɩna ɛzɩma mbʋ́ ɩhɔm kɩwɛɛkɩm laɖʋ nɩŋgbaŋʋʋ yɔ! Ɩwɩlɩ pɩtɩŋa pɩ-taa se ɩtɛwɛɛkɩ pʋyʋ tɔm ńdʋ́ tɩ-taa.

¹² Pʋ-yɔɔ lɛ, yee mama-mɩ takayaɣ kanɛ yɔ, pɩtɛkɛ weyi ɛyʋsaa yaa weyi payʋsɩnaa yɔ, pa-taa nɔɔyʋ yɔɔ mama-mɩ-kɛ. Ɛlɛ́, mama-mɩ-kɛ se ɩna Ɛsɔ ɛsɩndaa camɩyɛ ɛzɩma mbʋ́ ɩñakɩ pana ɖɔ-yɔɔ yɔ.

¹³ Pʋ-yɔɔ ɖa-laŋa hɛwa. Pɩtasɩɩnɩ ɖa-laŋa hɛʋ ɖeke. Ɛlɛ́, ɖa-taa kɛtɛzɩ hʋlʋmʋʋ alɩwaatʋ ndʋ́ ɖɩnawa se Tiiti taa hʋlʋmɩnɩ ɛzɩma mbʋ́ mɩtɩŋa payɩ iyeba nɛ ɛ-lɩmaɣza caɣ a-ɖeɖe yɔ.

¹⁴ Maasam-mɩ ɛ-cɔlɔ, ɩtaɖʋ-m fɛyɛ. Mbʋ́ pʋyɔɔ yɔ, ɛzɩma mbʋ́ ɖiheyiɣ-mɩ toovenim paa ɖooye yɔ, ḿbʋ́ ɖɔɖɔ mɩ-tɔm ndʋ́ ɖiheyi Tiiti yɔ, tɩlabɩ ḿbʋ́ ɖeyi ɖeyi.

¹⁵ Alɩwaatʋ ndʋ́ Tiiti kɔm mɩ-tɛ yɔ, mɩtɩŋa payɩ ɩɩñam-ɩ nɛ ɩmʋ-ɩ camɩyɛ. Ɛtɔzʋʋ pʋ-yɔɔ lɛ, ɛtɛzɩɣ-mɩ sɔɔlʋʋ.

¹⁶ Pʋ-yɔɔ man-taa hʋlʋmɩ poyi poyi, mbʋ́ pʋyɔɔ yɔ, manpɩzɩɣ mantaa-mɩ liu pɩtɩŋa pɩ-taa.