2 Kɔrɛntɩ 6 - New Testament

¹ Yee ḿbʋ́, mbá ɖa ɖa nɛ Ɛsɔ ɖɩlakɩ tʋmɩyɛ yɔ, ɖɩsazɩɣ-mɩ se ɩtaawɛɛkɩ lootiye nɖɩ́ ɛlabɩ-mɩ yɔ yem.

² Mbʋ́ pʋyɔɔ yɔ, Ɛsɔ yɔɔdaa se: «Pɩtalɩ ɖeu labʋ lɛ, manɩnɩ-ŋ. Pɩtalɩ ñʋʋ yabʋ lɛ, mansɩnɩ-ŋ.» Ɩnɩɩ camɩyɛ se: lɛɛlɛɛyɔ lɛ Ɛsɔ ɖeu labʋ alɩwaatʋ. Lɛɛlɛɛyɔ ɛyakɩ ɛyáa ñʋʋ.

³ Đɩcaɣ se nɔɔyʋ ɛtaapɩzɩ ɛkpɛzɩnɩ-ɖʋ tʋmɩyɛ nɖɩ́ ɖɩlakɩ yɔ ɖɩ-yɔɔ. Pʋ-yɔɔ ɖɩñakɩ pana se nɔɔyʋ ɛtaatɔlɩ Ɛsɔ nʋmɔʋ taa.

⁴ Ɛlɛ́, ɖɩtɩŋnɩ ɛzɩma mbʋ́ ɖɩɖɔkʋʋ ɖa-tɩ siŋŋ kʋñɔmɩŋ nɛ kɛtɛɖaɣ nɛ nɩɣzʋʋ pa-taa yɔ pʋ-yɔɔ nɛ ɖɩwɩlɩ se ɖɩkɛ Ɛsɔ tʋmlaɖaa.

⁵ Pamabɩ-ɖʋ nɛ paɖʋ-ɖʋ salaka nɛ palɩzɩ ɖɔ-yɔɔ ñaɖʋʋ. Đɩlabɩ tʋma sɩm yɔɔ sɩm yɔɔ: nabʋyʋ taa, ɖitoɖoo, ɖɩtɔtɔɔ pʋyʋ ɖɔɖɔ.

⁶ Đɔɖɔ lɛ, ɖɩtɩŋɩɣnɩ ɖa-cɩɖɩcɩɖɩ wɛtʋ nɛ ɖɔ-lɔŋsɩnɖɛ nɛ ɖa-tɩ ɖɔkʋʋ nɛ ɖa-camɩyɛ lakasɩ nɛ Fezuu Kiɖeɖeu nɛ ɖɔ-sɔɔlɩm siŋŋ

⁷ nɛ toovenim tɔm susuu nɛ Ɛsɔ ɖoŋ pɔ-yɔɔ nɛ ɖɩwɩlɩ se ɖɩkɛ Ɛsɔ tʋmlaɖaa. Đɩkpakɩɣ mbʋ́ pʋtʋʋzaa yɔ ɖɩɖɔkɩ nɛ ɖɩlakɩnɩ you ɛzɩ you wondu ndʋ́ pɔɖɔkʋʋ nɩmɩyɛ nɛ nɩwaŋ pa-taa yɔ.

⁸ Nabɛyɛ ɖʋʋ-ɖʋ hɩɖɛ nɛ lɛlaa ñaɖʋʋ-ɖʋ fɛyɛ. Nabɛyɛ saŋ-ɖʋ nɛ lɛlaa ñatʋʋ-ɖʋ. Pakpakɩɣ-ɖʋ ɛzɩ cɛtɩyaa yɔ, ŋgʋ́ toovenim ɖɩyɔɔdʋʋ.

⁹ Palakɩ ɛzɩ paasɩŋ-ɖʋ yɔ, ŋgʋ́ pasɩm-ɖʋ camɩyɛ. Pakpakɩɣ-ɖʋ ɛzɩ sɩɖaa yɔ, ŋgʋ́ ɖɩwɛ wezuu ɛzɩ ɩnaɣʋ yɔ. Pɔhɔŋ ɖa-nɩŋgbaaŋ, ɛlɛ́, paakʋʋ-ɖʋ.

¹⁰ Papɩsɩɣ ɖɔ-hɔ, ɛlɛ́, ɖɩwɛ laŋhʋlʋmɩyɛ taa paa ɖooye. Đɩwɛ ɛzɩ kʋñɔndɩnaa yɔ, ɛlɛ́, ɖiyeki nɛ ɛyáa sakɩyɛ hikiɣ pa-tɩ Ɛsɔ nʋmɔʋ taa. Đɩwɛ ɛzɩ mɛnfɛyɩpʋyʋwaa yɔ, ŋgʋ́ ɖɩwɛnɩ pɩtɩŋa payɩ.

¹¹ Taabalaa Kɔrɛntɩ ñɩma mɩ, ɖiheyi-mɩ mbʋ́ pʋwɛ ɖa-taa yɔ kpayɩ. Đɩsɔɔlɩ-mɩ siŋŋ.

¹² Đitekizi se ɖɩɩsɔɔlʋʋ-mɩ, ɛlɛ́, mikizini se ɩɩsɔɔlʋʋ-ɖʋ.

¹³ Pʋ-yɔɔ mɔyɔɔdʋʋnɩ-mɩ ɛzɩ men-piya yɔ: ɩsɔɔlɩ-ɖʋ ɛzɩ ɖɩsɔɔlʋʋ-mɩ yɔ.

Weyi ɛwɛnɩ lidaʋ yɔ, pʋwɛɛ se ɛña Ɛsɔ

¹⁴ Mɩ nɛ mbá paañaŋ Krɩstʋ yɔ, ɩtaakpɛndɩ. Mbʋ́ pʋyɔɔ yɔ, ɛzɩma mbʋ́ pʋtʋʋzaa yɔ nɛ mbʋ́ pɩtatʋʋzɩ yɔ pɩpɩzɩɣ pɩkpɛndɩ? Ɛzɩma ñalɩmɩyɛ nɛ cɩkpɛndʋʋ papɩzɩɣ pɛkpɛndɩ?

¹⁵ Ɛzɩma Krɩstʋ nɛ Eleeu papɩzɩɣ panɩɩnɩ ɖama? Yaa ɛbɛ Krɩstʋ tʋ nɛ weyi ɛtɛkɛ Krɩstʋ tʋ yɔ papɩzɩɣ pakaa?

¹⁶ Ɛbɛ Ɛsɔ ɖɩɣa nɛ kumola pakawa? Ŋgʋ́, ɖɩkɛ Ɛsɔ wezuu tʋ ɖɩɣa. Pʋwɛ ɛzɩ Ɛsɔ yɔɔdʋʋ se: «Mɛwɛɣ pɔ-cɔlɔ nɛ ma nɛ wɛ ɖɩɖɔ. Mɛnkɛɣ pɛ-Ɛsɔ nɛ pɛkɛ mɛ-ɛyáa» yɔ.

¹⁷ Pamawa ɖɔɖɔ se: Kɩpaɣlʋ tɔŋ se: «ɩlɩɩ azaɣ́a ḿbá pa-taa nɛ iyebi-wɛ. Ɩtaatukuni azuluma pʋyʋ nɛ piyele mamʋ-mɩ.»

¹⁸ Kɩpaɣlʋ Đoŋ Tɩŋa Tʋ tasɩ yɔɔdʋʋ se: «Mɔnkɔŋ kɛʋ mɩ-Caa nɛ mɩkɛ man-pɩyalaa nɛ mɛn-pɛlaa.»