2 Kɔrɛntɩ 5 - New Testament

¹ Toovenim lɛ, ɖɩnawa se yee tomnaɣ ŋgá ɖɩwɛnɩ kedeŋa yɔɔ cɩnɛ nɛ kɛwɛ ɛzɩ kɩɖanɖʋʋ ŋgʋ́ ɖɩwɛ kɩ-tɛɛ yɔ, kɔyɔlaa yɔ, ɖɩwɛnɩ tomnaɣ lɛɛka ɛsɔdaa, kɛwɛ ɛzɩ ɖɩɣa yɔ. Pɩtɛkɛ ɛyáa manɩ-kɛ, ɛlɛ́, Ɛsɔ maɣmaɣ manɩ-kɛ. Kɛwɛɣ tam.

² Đɔɖɔ lɛ, ɖisisiɣ kɩɖanɖʋʋ ŋ́gʋ́ kɩ-tɛɛ nɛ ɖe-liu wɛɛ kpem se Ɛsɔ ɛsʋzɩ-ɖʋ ɖa-ɖɩɣa ŋ́gá ka-taa nɛ pʋwɛɛ ɛzɩ posu-ɖʋ wondu yɔ.

³ Mbʋ́ pʋyɔɔ yɔ, yee ɖɩsʋ ka-taa yɔ, ɖɩɩwɛɣ tombolo.

⁴ Alɩwaatʋ ndʋ́ tɩtɩŋa ɖɩwɛɣ kɩɖanɖʋʋ ŋ́gʋ́ kɩ-tɛɛ yɔ, ɖisisiɣ nɛ pɩnɩɣ-ɖʋ. Mbʋ́ pʋyɔɔ yɔ, ɖɩɩcaɣ se Ɛsɔ ɛhɔzɩ tomnaɣ ŋgá ɖɩwɛ ka-taa yɔ. Ɛlɛ́, ɖe-liu wɛɛ se esuu-ɖʋ ɖɔɖɔ ɛsɔdaa ñɩŋga. Peeɖe mbʋ́ pʋwɛ wezuu yɔ, pɩlɛɣzɩɣ mbʋ́ pɩsɩkɩ yɔ pu-lone taa.

⁵ Ɛsɔ maɣmaɣ ɖʋna se pɩlɛɣzɩ-ɖʋ ḿbʋ́. Ɛha-ɖʋ e-Fezuu Kiɖeɖeu. Ḿbʋ́ wɩlɩɣnɩ-ɖʋ se ɛhaɣ-ɖʋ ɛ-ñɩm lɛɛbʋ ɖɔɖɔ.

⁶ Pʋ-yɔɔ ɖɩtaɣ-ɩ liu paa ɖooye. Ŋgʋ́, ɖɩtɛm naʋ se yee ɖɩwɛ tomnaɣ kanɛ ka-taa ḿbʋ́ yɔ, ɖiposini Kɩpaɣlʋ ɖɩɣa.

⁷ Toovenim lɛ, ɖɩtanata-pʋ nɛ ɖɛ-ɛsɛ, ɛlɛ́, ɖɩwɛnɩ lidaʋ ɛ-yɔɔ yɔɔ ɖɩɖɔŋ ḿbʋ́.

⁸ Đɩtaɣ-ɩ liu siŋŋ nɛ ɖɩsɔɔlɩ se ɖɩlɩɩ tomnaɣ kanɛ ka-taa nɛ ɖiwolo ɖɩwɛɛ Kɩpaɣlʋ cɔlɔ.

⁹ Pʋ-yɔɔ ɖɔɖɔ ɖɩwɛɛ ɖɩlʋkɩ se paa ɖɩɩwɛ cɩnɛ yaa peeɖe yɔ yɔ, ɖɔ-tɔm ɛkɛdɩnɩ-ɩ.

¹⁰ Mbʋ́ pʋyɔɔ yɔ, pʋwɛɛ se ɖatɩŋa payɩ ɖiwolo Krɩstʋ ɛsɩndaa nɛ ɛhʋʋnɩ-ɖʋ tɔm nɛ ɛhɛyɩ paa weyi kɩbandʋ yaa kɩdɛkɛdɩm mbʋ́ ɛɛlaba alɩwaatʋ ndʋ́ ɛɛwɛ e-tomnaɣ taa yɔ pʋ-yɔɔ.

Ɛsɔ tɩŋnɩ Krɩstʋ yɔɔ nɛ ɖa nɛ ɩ ɖiceɣ

¹¹ Yee ḿbʋ́ ɖɩnawa se pʋwɛɛ se ɖɩña Kɩpaɣlʋ yɔɔ ɖɩñɩnɩɣ se ɛyáa etisi ɖɔ-tɔm. Ɛsɔ sɩm-ɖʋ nɛ pɩkpɛndɩnɩ ɖa-taa lotu nɛ manaɣ se mɩ-lɩmaɣza taa lɛ, ɩsɩm-ɖʋ camɩyɛ ɖɔɖɔ.

¹² Đɩɩɖaɣnɩɣ ɖa-tɩ wɩlʋʋ mɩ-cɔlɔ. Ɛlɛ́, ɖɩhaɣ-mɩ waɖɛ se ɩkʋndɩnɩ-ɖʋ nɛ ɩpɩzɩ icosi mbá pakpazɩɣ pa-tɩ ɛsɛ yɔɔ yem nɛ paanɩɣnɩ mbʋ́ pʋwɛ ɛyʋ taa yɔ.

¹³ Yee ɖɩɩwɛ ɛzɩ kɩmɛlɛmɩŋ yɔ yɔ, Ɛsɔ ɛsɩndaa ɖɩɩwɛ ḿbʋ́. Ŋgʋ́, ɖɩtɛkɛ kɩmɛlɛmɩŋ. Ḿbʋ́ wazɩɣnɩ-mɩ.

¹⁴ Mbʋ́ pʋyɔɔ yɔ, Krɩstʋ sɔɔlɩm seɣtiɣni mbá ɖa ɖitisaa se: ɛyʋ kʋɖʋm koŋ sɩbɩnɩ ɛyáa tɩŋa payɩ yɔɔ yɔ. Pʋ-tɔbʋʋ se ɛyáa tɩŋa payɩ sɩba.

¹⁵ Krɩstʋ sɩbɩ ɛyáa tɩŋa payɩ yɔɔ se mbá pɛwɛ wezuu yɔ, pataatasɩ wezuu caɣʋ ɛzɩ pa-maɣmaɣ pe-liu wɛʋ yɔ. Ɛlɛ́, pacaɣ-kʋ ɛzɩ weyi ɛsɩbɩ pɔ-yɔɔ nɛ Ɛsɔ fezi-i yɔ, e-liu wɛʋ yɔ.

¹⁶ Pʋ-yɔɔ lɛ, pɩkpaɣʋnɩ lɛɛlɛɛyɔ yɔ, ɖɩɩtasɩɣ nɔɔyʋ sɩm ɛsɛ yɔɔ. Paa ɛsɛ yɔɔ ɖɩɩsɩm Krɩstʋ yɔ, lɛɛlɛɛyɔ, ɖɩsɩm mbʋ́ ɛkɛnaa kpem yɔ.

¹⁷ Đɔɖɔ lɛ, yee nɔɔyʋ nɛ Krɩstʋ pɛkpɛndaa yɔ, pʋdʋ pɩsɩ ɛyʋ kɩfalʋ. Mbʋ́ pɩɩkɛ kɩbɩm yɔ, pɩɖɛwa nɛ kɩfam kɔɔ.

¹⁸ Ɛsɔ weyi ɛtɩŋnɩ Krɩstʋ yɔɔ nɛ ɖa nɛ ɩ ɖiceɣ yɔ, ɛ-cɔlɔ pɩtɩŋa payɩ pɩlɩnaa. Ɛnʋ ɖʋnɩ-ɖʋ se ɖiwoni ɛyáa lɛlaa ɛ-cɔlɔ nɛ pa nɛ ɩ peceɣ ɖɔɖɔ.

¹⁹ Mbʋ́ pʋyɔɔ yɔ, Krɩstʋ yɔɔ Ɛsɔ katɩŋnaa nɛ ɛ nɛ ɛyáa tɩŋa payɩ peceɣ. Pe-ceɣu ḿbʋ́ pɩ-taa lɛ, ɛtaakpaɣ pa-kɩwɛɛkɩm nɛ ɛlabɩnɩ tʋmɩyɛ. Ɛɖʋ-ɖʋ se ɖisusi ceɣu ḿbʋ́ pʋ-tɔm.

²⁰ Pʋ-yɔɔ lɛ, ɖɩkɛ Krɩstʋ tiyiyaa. Ɛsɔ tɩŋɩɣnɩ ɖɔ-yɔɔ nɛ etendiɣ ɛyáa alɩwaatʋ ndʋ́ ɖiheyiɣ-wɛ se: «Đitendiɣ-mɩ, itisi nɛ mɩ nɛ Ɛsɔ iceɣ Krɩstʋ yɔɔ.

²¹ Krɩstʋ tala kɩwɛɛkɩm kaʋ. Ɛlɛ́, Ɛsɔ sʋʋ-ɩ ɖa-kɩwɛɛkɩm se ɖa nɛ ɩ ɖɛ-kpɛndʋʋ taa lɛ, ɖɩpɩsɩ ɛyáa kʋtʋʋzaa Ɛsɔ ɛnʋ ɛ-ɛsɩndaa» yɔ.