2 Kɔrɛntɩ 4 - New Testament

Pɔɔlɩ nɛ tiyiyaa lɛlaa pɛkpɛndɩ Yesu yɔɔ nɛ pala kʋñɔŋ

¹ Ɛsɔ labɩnɩ-ɖʋ ɖeu nɛ ɛɖʋ-ɖʋ nɔɔ haʋ kɩfam tʋmɩyɛ ńɖɩ́. Pʋ-yɔɔ piitisiɣ ɖo-toma taa.

² Đikizi mɛsaɣ tɛɛ lakasɩ nzɩ́ sɩwɛ fɛyɛ yɔ. Điipeɣziɣ ɛyáa, ɖɩɩlɛɣzɩɣ Ɛsɔtɔm. Ɛlɛ́, ɖɩñɩnɩɣ se paa weyi ɛtaa-ɖʋ liu Ɛsɔ ɛsɩndaa yɔɔ ɖɩyɔɔdʋʋ toovenim kpayɩ ḿbʋ́.

³ Yee Laŋhɛzɩyɛ Tɔm ndʋ́ ɖisusuu yɔ tɩ-taa ɛwɛ cɩkpɛndʋʋ ɖɔɖɔ yɔ, mbá peleki yɔ tɩwɛ cɩkpɛndʋʋ.

⁴ Laŋa kpɩzɩŋ tɩnaa mbá kedeŋa wiyaʋ kañadʋ huuzi pa-lɩmaɣza yɔɔ yɔ, ḿbá tɩwɛ cɩkpɛndʋʋ. Pɩlabɩ ḿbʋ́ se pataana ɛzɩma mbʋ́ Laŋhɛzɩyɛ Tɔm ñalɩmɩyɛ wɩlɩɣ Krɩstʋ koboyaɣ yɔ. Ɛnʋ lɛ Ɛsɔ lɛzʋʋ.

⁵ Toovenim lɛ, pɩtɛkɛ ɖa-maɣmaɣ ɖɔ-tɔm ɖisusuu. Ɛlɛ́, Krɩstʋ Yesu weyi ɛkɛ Kɩpaɣlʋ yɔ ɛ-tɔm ɖisusuu. Ndʋ́ ɖɩyɔɔdʋʋ ɖa-maɣmaɣ ɖɔ-yɔɔ yɔ lɛ se: ɖɩkɛ mɩ-tʋmlaɖaa Yesu yɔɔ.

⁶ Mbʋ́ pʋyɔɔ yɔ, Ɛsɔ weyi ɛtɔm se: «Ñalɩmɩyɛ ɛñalɩ cɩkpɛndʋʋ taa» yɔ, ɛnʋ ɖɔɖɔ yebina nɛ ɛ-ñalɩmɩyɛ ñalɩ ɖa-laŋa taa. Ńɖɩ́ yekina se ɖɩtɩlɩ e-koboyaɣ ŋgá kañɩlɩsɩɣ Krɩstʋ ɛsɩndaa yɔ.

⁷ Đɩwɛ ɛzɩ cʋʋ pɛŋ weyi ɩ-taa wɛ ñɩm sɔsɔm ḿbʋ́ yɔ se paa weyi ɛna se ɖoŋ sɔsɔŋ ɛnʋ ɛtɛkɛ ɖa-ñɩŋ, ɛlɛ́ Ɛsɔ ñɩŋ ɛkɛnaa.

⁸ Ɛyáa cɔ-ɖʋ pata nɛ panazɩɣ-ɖʋ, ɛlɛ́, pɩtakɩlɩ-ɖʋ. Đɩɩnaɣ se ɖɩla ɛzɩma, ɛlɛ́, ɖɩtɔlɔ liu.

⁹ Pɛwɛ ɖa-wayɩ kaŋ kaŋ, ɛlɛ́, Ɛsɔ tɔlɔ-ɖʋ. Payakɩ-ɖʋ nɛ tɛtʋ, ɛlɛ́, ɖɩɩsɩkɩ.

¹⁰ Yesu sɩm siziŋ wɛ ɖo-tomnaɣ taa tam se pɩwɩlɩ se e-wezuu wɛ ɖa-taa.

¹¹ Yesu yɔɔ lɛ, ɖɩwɛ sɩm nɔɔ taa tam ɖe-wezuu caɣʋ taa se pɩwɩlɩ se paa ɖo-tomnaɣ ɛsɩkɩ yɔ, e-wezuu wɛ ka-taa tam.

¹² Pʋ-yɔɔ ɖɩwɛ sɩm nɔɔ taa tam. Ḿbʋ́ yebina ihiɣ wezuu.

¹³ Paa ḿbʋ́ yɔ, ɛzɩma mbʋ́ ɖɩwɛnɩ lɩmaɣza kʋɖʋma ɖe-lidaʋ wɛnaʋ taa ɛzɩ pamaʋ Ɛsɔtɔm Takayaɣ taa se: «Mɛwɛnɩ lidaʋ yɔɔ mɔyɔɔdaa» yɔ, ḿbʋ́ ɖɔɖɔ ɖɩwɛnɩ lidaʋ. Pʋ-yɔɔ ɖɩyɔɔdʋʋ.

¹⁴ Mbʋ́ pʋyɔɔ yɔ, ɖɩnawa se Ɛsɔ weyi efezi Kɩpaɣlʋ Yesu yɔ, ɛkɔŋ-ɖʋ fezuu ɖɔɖɔ ɛzɩ efezuu-i yɔ nɛ eyele ɖa nɛ mɩ ɖiwolo ɛ-cɔlɔ.

¹⁵ Mɩ-yɔɔ pɩtɩŋa payɩ pɩlakɩ ḿbʋ́ se Ɛsɔ ɛtɩŋnɩ e-lootiye yɔɔ nɛ ɛya ɛyáa sakɩyɛ ñʋʋ. Ɛlakɩ ḿbʋ́ se mbá pasaŋ-ɩ se ɛ-hɩɖɛ ɛsɛɛ yɔ, pɛtɛzɩ ɖɔʋ.

Koboyaɣ ŋgá kɔkɔŋ yɔ, kɛwɛɣ tam

¹⁶ Tɔm ńdʋ́, tɩ-yɔɔ piitisiɣ ɖo-toma taa. Paa ɖo-ɖoŋ ɛɖɔŋ tɛm yɔ, ɖa-kalɩzaɣ tɛzɩɣ kpaʋ ɖoŋ tam.

¹⁷ Mbʋ́ pʋyɔɔ yɔ, kʋñɔmɩŋ cikpeŋ weyi ɖɩtɔkɩ ɖe-wezuu caɣʋ taa yɔ, ɩhaɣ-ɖʋ koboyaɣ sɔsɔɔ ŋgá kakɩlɩ ɩtɩŋa payɩ nɛ kaatɛŋ wiɖiyi kaʋ yɔ.

¹⁸ Đɔɖɔ lɛ, pɩtɛkɛ mbʋ́ panaɣ yɔ, pʋ-yɔɔ ɖɩmaɣzɩɣ. Ɛlɛ́, mbʋ́ paanaɣ yɔ, pʋ-yɔɔ ɖɩmaɣzɩɣ. Mbʋ́ pʋyɔɔ yɔ, mbʋ́ panaɣ yɔ, pɩwɛɣ alɩwaatʋ pazɩ yem nɛ mbʋ́ paanaɣ yɔ, pʋbʋ ñɛwɛɣ tam.