2 Kɔrɛntɩ 3 - New Testament

Krɩstʋ ñɩma kɛ Nɔɔ haʋ kɩfam tʋmlaɖaa

¹ Đɩyɔɔdʋʋ ḿbʋ́ yɔ, pɩwɩlɩɣ se ɖɩɖaɣnɩɣ ɖa-tɩ wɩlʋʋ naa we? Yaa pʋpɔzʋʋ se pama takayɩsɩ ɛzɩ lɛlaa lakʋʋ yɔ nɛ pawɩlɩnɩ-mɩ mbʋ́ ɖɩkɛwa yɔ? Đɩɩpɔzʋʋ-mɩ ɖɔɖɔ se ɩma takayaɣ nakɛyɛ nɛ ɩwɩlɩnɩ-ɖʋ lɛlaa.

² Mɩ-maɣmaɣ ɩwɛ ɛzɩ takayaɣ ŋgá Krɩstʋ mawa yɔ. Ŋ́gá wɩlɩɣnɩ ɛyáa mbʋ́ ɖɩkɛnaa yɔ. Kɛwɛ ɖa-laŋa taa. Ɛyáa tɩŋa payɩ pɩzɩɣ pasɩm-kɛ nɛ pakalɩ-kɛ.

³ Mɩwɛnɩ ɛzɩ takayaɣ ŋ́gá yɔ. Mbʋ́ pʋyɔɔ yɔ, ɖɔ-yɔɔ Krɩstʋ tɩŋnaa nɛ ɛma-kɛ. Pɩtɛkɛ tɔlɩm ɛmanɩ-kɛ, ɛlɛ́, Ɛsɔ wezuu tʋ Fezuu Kiɖeɖeu ɛmanɩ-kɛ. Pɩtɛkɛ pɩtaahalanzɩ yɔɔ ɛma-kɛ, ɛlɛ́, ɛyáa laŋa taa ɛmawa.

⁴ Đɩyɔɔdʋʋ ḿbʋ́, mbʋ́ pʋyɔɔ yɔ, Krɩstʋ yɔɔ pɩtɩŋnaa nɛ ɖɩtaa Ɛsɔ liu.

⁵ Mbʋ́ pʋyɔɔ yɔ, ɖɩnawa se ɖɩɩpɩzɩɣ ɖɩla tʋmɩyɛ ńɖɩ́ nɛ ɖa-maɣmaɣ ɖo-ɖoŋ. Ɛlɛ́, Ɛsɔ yebina se ɖɩpɩzɩ ɖɩlabɩ-ɖɩ.

⁶ Eyeba ɖɔɖɔ se ɖɩkɛ nɔɔ haʋ kɩfam tʋmlaɖaa. Nɔɔ haʋ kɩfam ḿbʋ́, pɩtɛkɛ paɣtʋ ndʋ́ paamawa yɔ. Ɛlɛ́, pɩkɛ mbʋ́ pɩlɩnɩ Fezuu Kiɖeɖeu cɔlɔ yɔ. Mbʋ́ pʋyɔɔ yɔ, paɣtʋ yeki nɛ ɛyáa sɩkɩ. Ɛlɛ́, Fezuu Kiɖeɖeu ñahaɣ wezuu.

⁷ Đooo lɔŋ Ɛsɔ kama paɣtʋ piye piye pɩtaahalanzɩ yɔɔ nɛ e-koboyaɣ ñɩlɩsɩ. Mbʋ́ pʋyɔɔ yɔ, eeyeba nɛ Mooyiizi ɛsɩndaa ñɩlɩsɩ siŋŋ nɛ Izrɛɛlɩ ñɩma tapɩzɩɣ se pɔcɔnɩ-ɩ. Ŋgʋ́, koboyaɣ ŋ́gá kɛtɛwɛɣ tam. Yee paɣtʋ ndʋ́ tiyeki nɛ ɛyáa sɩkɩ yɔ, tɩwɩlɩ-wɛ ɛzɩma mbʋ́ Ɛsɔ koboyaɣ paɣlaa yɔ lɛ,

⁸ ɛzɩma Fezuu Kiɖeɖeu tʋmɩyɛ ñaawɩlɩɣ koboyaɣ ŋ́gá ka-paɣlɩka kpem nɛ pɩkɩlɩ ḿbʋ́ yɔ?

⁹ Yee paɣtʋ ndʋ́ tiyeki se Ɛsɔ ɛhʋʋnɩ ɛyáa nɛ ɛkʋ pɔ-tɔm yɔ, tɩwɩlɩ-ɖʋ ɛzɩma mbʋ́ e-koboyaɣ paɣlaa yɔ lɛ, ɛzɩma nɔɔ haʋ kɩfam ḿbʋ́ piyeki se Ɛsɔ eɖezi-ɖʋ yɔ, pɩɩwɩlɩɣ e-koboyaɣ paɣlɩka kpem nɛ pɩkɩlɩ ḿbʋ́?

¹⁰ Halɩ ɖɩpɩzɩɣ ɖɩtɔ se koboyaɣ ŋgá kaañɩlɩsaa yɔ, kaatasɩɣ ñɩlɩsʋʋ ŋgá kañɩlɩsɩɣ lɛɛlɛɛyɔ yɔ kɔ-cɔlɔ.

¹¹ Toovenim lɛ, yee mbʋ́ pɩɩwɛɣ tam yɔ, pɩwɩlɩ ɛzɩma mbʋ́ Ɛsɔ koboyaɣ paɣlaa yɔ lɛ, ɛzɩma mbʋ́ pʋbʋ ñɛwɛɣ tam yɔ, pɩɩwɩlɩɣ-kɛ kpem nɛ pɩkɩlɩ ḿbʋ́?

¹² Đɩyɔɔdʋʋ kaalɛyɩtʋ, mbʋ́ pʋyɔɔ yɔ, ɖɩtaɣ liu mbʋ́ pʋwɛɣ tam yɔ.

¹³ Đɩɩlakɩ ɛzɩ Mooyiizi kohuuzuu ɛ-ɛsɩndaa kɛtɛɛka yɔ. Ehuuzaɣ-kɛ se Izrɛɛlɩ ñɩma ɩtaana ɛzɩma mbʋ́ ɛ-ɛsɩndaa ñɩlɩsʋʋ mʋkɩ yɔ.

¹⁴ Pa-ñʋŋ taa kakpa ɖoŋ nɛ halɩ nɛ sɔnɔ yee pakalɩɣ Nɔɔ Haʋ Kɩbɩm Takayaɣ yɔ, paanɩɣ kɔ-tɔbʋʋ. Pʋwɛ ɛzɩ kɛtɛɛka ŋgá kohuuzi pɛ-ɛsɩndaa tam yɔ. Weyi ɛ nɛ Krɩstʋ pɛkpɛndaa yɔ, e-ɖeke koŋ ɛ-ɛsɩndaa kɛtɛɛka ŋ́gá kamʋkɩ.

¹⁵ Halɩ nɛ sɔnɔ, yee pakalɩɣ Mooyiizi takayɩsɩ yɔ, pʋwɛ ɛzɩ kɛtɛɛka ŋ́gá kohuuzi pa-lɩmaɣza yɔɔ ḿbʋ́ yɔ.

¹⁶ Ɛlɛ́, pʋwɛ ɛzɩ pamaʋ Ɛsɔtɔm Takayaɣ taa se: «Alɩwaatʋ ndʋ́ nɔɔyʋ yeki ɛ-nʋmɔʋ nɛ ɛpɩsɩnɩ Kɩpaɣlʋ yɔɔ yɔ, kɛtɛɛka ŋ́gá, kamʋkɩ ɛ-ɛsɩndaa» yɔ.

¹⁷ Ŋgʋ́, Kɩpaɣlʋ ɛnʋ lɛ Fezuu Kiɖeɖeu. Nɛ ɖenɖe Kɩpaɣlʋ Fezuu wɛɛ yɔ, peeɖe ñɩma wɛ pa-tɩ yɔɔ.

¹⁸ Pʋ-yɔɔ lɛ, mbá ɖa ɖatɩŋa payɩ pokuli ɖɛ-ɛsɛ yɔɔ kɛtɛɛka ŋ́gá yɔ, ɖɩnaɣ Kɩpaɣlʋ koboyaɣ tam nɛ ɖɩtɛzɩɣ wɛʋ ɛzɩ ɛnʋ yɔ. Ḿbʋ́ yebina nɛ pɩtɩŋɩɣnɩ e-Fezuu Kiɖeɖeu yɔɔ nɛ e-koboyaɣ tɛzɩɣ ɖɔʋ ɖɔ-cɔlɔ.