2 Kɔrɛntɩ 2 - New Testament

¹ Pʋ-yɔɔ manɖʋwa se maakɔŋ mɩ-tɛ nɛ mantasɩ mɩ-hɔ pɩsʋʋ.

² Yee mɔnkɔm mɩ-tɛ nɛ mɩ-hɔ pɩsɩ lɛ, apɩzɩɣ eyele nɛ ma-laŋɩyɛ hʋlʋmɩ yɔ? Pɩɩkɛɣnɩ mɩ! Mbʋ́ pʋyɔɔ yɔ, mɩtɩŋa payɩ mɩ-hɔ pɩsaa.

³ Pʋ-yɔɔ mama-mɩ takayaɣ lɛɛka ŋ́gá se mantalaa lɛ, mɔ-hɔyɛ ɛtaapɩsɩnɩ mbá pɩɩwɛɛ se peyele nɛ ma-laŋɩyɛ hʋlʋmɩ yɔ. Ŋgʋ́, manawa se mɩtɩŋa payɩ mɩ-laŋa hʋlʋmʋʋ alɩwaatʋ ndʋ́ ma-ñɩnɖɛ hʋlʋmʋʋ yɔ.

⁴ Mama-mɩ takayaɣ ŋ́gá nɛ ɛsɛñɩŋɩyɛ siŋŋ nɛ laŋpɩsɩyɛ nɛ ɛsɩtɛɣlɩm. Mantama-mɩ se mɩ-hɔ ɛpɩsɩ. Ɛlɛ́, mancaɣaɣ se ɩtɩlɩ ɛzɩma mbʋ́ mɔnsɔɔlɩ-mɩ siŋŋ yɔ.

Pɔɔlɩ kpeɣ weyi ɛtʋ-ɩ yɔ

⁵ Toovenim lɛ, yee nɔɔyʋ eyeba nɛ ɛyáa hɔ pɩsɩ yɔ, pɩtɛkɛ ma-maɣmaɣ mɔ-hɔyɛ ɛpɩsaa. Ɛlɛ́, mɩtɩŋa payɩ mɩ-hɔ ɛpɩsaa. Ɛlɛ́, ɖɩtaaɖɛlɛsɩ niye tɔm tʋnɛ tɩ-yɔɔ.

⁶ Ɛzɩma mbʋ́ mɩ-taa ɛyáa sakɩyɛ tɛm hɔm pʋdʋ nɩŋgbaŋʋʋ yɔ, pʋɖɔwa.

⁷ Lɛɛlɛɛyɔ, pʋwɛɛ se ɩtɛzɩ-ɩ kpeɣu nɛ ɩhɛzɩ ɛ-laŋɩyɛ. Pɩtɛkɛ ḿbʋ́, pʋkɔŋ pɩkɩlɩ ɛ-hɔyɛ pɩsʋʋ nɛ ɛlɔ liu.

⁸ Pʋ-yɔɔ lɛ, mentendiɣ-mɩ se ɩla mbʋ́ pɩwɩlɩɣ se ɩsɔɔlɩ-ɩ yɔ.

⁹ Mbʋ́ piiyeba nɛ mama-mɩ takayaɣ ŋ́gá yɔ lɛ se: me-liu wɛɛ se mantakɩ-mɩ nɛ mana se ndʋ́ meheyiɣ-mɩ yɔ, ɩlakɩ tɩtɩŋa tɩ-yɔɔ yaa ɩɩlakɩ.

¹⁰ Yee nɔɔyʋ ɛyʋsaa nɛ ikpeɣ-i yɔ, ma ɖɔɖɔ menkpeɣiɣ-i. Ma lɛ, yee pɩɩwɛɛ se menkpeɣ nɔɔyʋ yɔ, mɛntɛm-ɩ kpeɣu mɩ-yɔɔ ɛzɩ pʋmʋnaʋ se mala Krɩstʋ ɛsɩndaa yɔ.

¹¹ Malabɩ ḿbʋ́ se Satanɩ ɛtaawɛnɩ waɖɛ ɖɔ-yɔɔ. Mbʋ́ pʋyɔɔ yɔ, ɖɩtɛm sɩm mbʋ́ ɛcaɣ labʋ yɔ.

Pɔɔlɩ woba Trowaasɩ

¹² Alɩwaatʋ ndʋ́ mantalɩ Trowaasɩ se monsusuu Krɩstʋ Laŋhɛzɩyɛ Tɔm yɔ, Kɩpaɣlʋ kaha-m nʋmɔʋ.

¹³ Ɛlɛ́, man-taa taawɛɛ leleŋ, mbʋ́ pʋyɔɔ yɔ, mantaana taabalʋ Tiiti. Peeɖe mankʋyɩ Trowaasɩ ñɩma ḿbá pɔ-cɔlɔ nɛ mowolo Masedonii egeetiye taa.

Yesu Krɩstʋ haɣ wabɩyɛ

¹⁴ Pʋwɛɛ se ɖɩsa Ɛsɔ se eyeba pɩtɩŋna ɖa nɛ Krɩstʋ ɖɛ-kpɛndʋʋ yɔɔ nɛ ɖɩwakɩ tam. Mbʋ́ pʋyɔɔ yɔ, eyeki se pɩtɩŋnɩ ɖɔ-yɔɔ nɛ ɛyáa sɩm-ɩ paa le ɛzɩ tɩlaaɖɩ sɔzɩŋ ñɛyʋʋ yɔ.

¹⁵ Toovenim lɛ, ɖɩwɛ ɛzɩ tɩlaaɖɩ kɩbaŋgʋ ŋgʋ́ Krɩstʋ ha Ɛsɔ yɔ. Kʋ-sɔzɩŋ ñɛyɩɣ mbá Ɛsɔ yakɩ pa-ñʋʋ yɔ nɛ mbá peleki yɔ pɛ-hɛkʋ taa.

¹⁶ Mbá peleki yɔ, sɔzɩŋ ɛnʋ ɛkɛnɩ-wɛ sɔŋ weyi ɛkʋʋ ɛyáa yɔ. Mbá Ɛsɔ yakɩ pa-ñʋʋ yɔ, ɛkɛnɩ paba sɔzɩŋ weyi ɛhaɣ ɛyáa wezuu yɔ. Pʋ-yɔɔ lɛ, apɩzɩɣ se ɛla tʋmɩyɛ ńɖɩ́?

¹⁷ Đɩfɛyɩ ɛzɩ ɛyáa sakɩyɛ mbá pakpakɩɣ Ɛsɔtɔm nɛ palakɩnɩ tadɩyɛ yɔ. Ɛlɛ́, ɖa lɛ mbá Ɛsɔ tiyaa nɛ ɖɩyɔɔdʋʋ toovenim ɛ-ɛsɩndaa ɖa nɛ Krɩstʋ ɖɛ-kpɛndʋʋ taa yɔ.