2 Kɔrɛntɩ 12 - New Testament

Pɔɔlɩ laŋɩyɛ hʋlʋmaa mbʋ́ pʋyɔɔ yɔ, ɛlakɩ kʋñɔŋ Krɩstʋ yɔɔ

¹ Pʋwɛɛ se mankʋndɩ. Ŋgʋ́, kʋndʋʋ fɛyɩ ɖeu. Lɛɛlɛɛyɔ, mɛnkɛdɩɣ-mɩ mbʋ́ Kɩpaɣlʋ yeba nɛ mana nɛ mbʋ́ ɛwɩlɩ-m ɖozee taa yɔ pʋ-tɔm.

² Mansɩm Krɩstʋ tʋ nɔɔyʋ, pɩtalɩ pɩnzɩ hiu nɛ naanza yɔ Ɛsɔ kpazʋʋ-ɩ ɛ-cɔlɔ ɖooo ɛsɔdaa yɔ. Mantatɩlɩ se toovenim pɩkpazɩ-ɩ yaa ɛ-kalɩzaɣ ɖeke kpana. Ɛsɔ ɖeke sɩmna.

^3-4 Mantasɩɣ yɔɔdʋʋ ɖɔɖɔ se: mantatɩlɩ se toovenim pɩkpazɩ-ɩ yaa ɛ-kalɩzaɣ ɖeke kpana. Ɛsɔ ɖeke sɩmna. Ɛlɛ́, manawa se: alɩwaatʋ ndʋ́ Ɛsɔ kpazɩ-ɩ ɛ-cɔlɔ koboyaɣ taa yɔ, ɛnɩ tɔm ndʋ́ ɛyáa ɛɛpɩzɩɣ pɔyɔɔdɩ-tʋ nɛ pɩtaha nʋmɔʋ se ɛyʋ ɛyɔɔdɩ-tʋ yɔ.

⁵ Mɔnkɔŋ kʋndɩnaʋ ɛyʋ ɛnʋ. Pɩtɛkɛ ma-maɣmaɣ mankʋndʋʋna. Pʋtɔmaɣ yɔ, mɛ-ɛjandʋ mankʋndʋʋna.

⁶ Yee me-liu ɛɛwɛɛ se mankʋndʋʋ yɔ, mantaakɛ kɩmɛlɛŋ. Pʋbʋ maakʋndɩnɩ mbʋ́ pɩlabɩ ɖeyi ɖeyi yɔ. Ɛlɛ́, mɔnɖɔkʋʋ man-tɩ man-kʋndʋʋ ḿbʋ́ pɩ-taa se nɔɔyʋ ɛtaakpaɣ-m ɛsɩɩ ɖenɖe mantatalɩ yɔ. Me-liu wɛɛ se pañam-m mbʋ́ malakɩ nɛ panaɣ yɔ nɛ toovenim mbʋ́ mɔyɔɔdʋʋ yɔ pɔ-yɔɔ.

⁷ Pʋ-yɔɔ lɛ, pʋcɔ mantaakpazɩ man-tɩ mbʋ́ mbʋ́ Ɛsɔ wɩlɩ-m yɔ pʋ-yɔɔ lɛ, paɖʋ-m kʋdɔŋ nɛ kɩsalɩɣ-m, ŋ́gʋ́ lɛ Satanɩ tiyiyu.

⁸ Mentendi Kɩpaɣlʋ tam naadozo se ɛlɩzɩ-m kʋdɔŋ ŋ́gʋ́ kɩ-taa.

⁹ Peeɖe ecosi-m se: lootiye nɖɩ́ ɖɩ-taa ŋwɛɛ yɔ, ɖɩɖɔ-ŋ. Mbʋ́ pʋyɔɔ yɔ, ñɛ-ɛjandʋ taa mawɩlɩɣ mon-ɖoŋ tɩŋa payɩ. Pʋ-yɔɔ lɛ, pɩkɩlɩ ɖeu se mankʋndɩ nɛ ma-laŋɩyɛ tɩŋa mɛ-ɛjandʋ yɔɔ nɛ Krɩstʋ ɖoŋ wɛɛ mɔ-yɔɔ.

¹⁰ Pʋ-yɔɔ man-taa hʋlʋmɩnɩ ɛjandʋ nɛ tʋtʋ nɛ tɛɖʋʋ nɛ wayɩ wɛʋ kaŋ kaŋ nɛ siziŋ weyi manɩɣ Krɩstʋ nʋmɔʋ taa yɔ. Mbʋ́ pʋyɔɔ yɔ, alɩwaatʋ ndʋ́ mɛwɛɣ ɛjandʋ taa yɔ mɛwɛɣ ɖoŋ.

Pɔɔlɩ peyindiɣ Kɔrɛntɩ ñɩma yɔɔ

¹¹ Mɔyɔɔdaa ɛzɩ mɛnkɛ kɩmɛlɛŋ yɔ: ɛlɛ́, miyebina nɛ mɔyɔɔdɩ ḿbʋ́. Mɩ pɩɩmʋnaa se ɩlʋ mɔ-yɔɔ. Mbʋ́ pʋyɔɔ yɔ, paa mɛntɛkɛ pʋyʋ yɔ, mbá ɩkpakaɣ-wɛ se pɛkɛ Krɩstʋ tiyiyaa sɔsaa yɔ, pa-taa nɔɔyʋ takɩlɩ-m pʋyʋ.

¹² Alɩwaatʋ ndʋ́ malakaɣ tʋmɩyɛ mɩ-tɛ yɔ, mɔnɖɔkaɣ man-tɩ pɩtɩŋa pɩ-taa nɛ Ɛsɔ tɩŋɩɣnɩ mɔ-yɔɔ nɛ ɛlakɩ ɛ-hama lakasɩ ndɩ ndɩ. Ḿbʋ́ wɩlɩɣna se mɛnkɛ Krɩstʋ tiyiyu.

¹³ Ɛbɛ malabɩ Yesu aŋgba lɛɛna taa ñɩma nɛ pɩkɩlɩ-mɩ? Yaa mentekpizi mi-nesi taa yɔɔ? Yee ḿbʋ́, ikpeɣ-m mɛ-ɛzaɣ́tʋ ńdʋ́ tɩ-yɔɔ.

¹⁴ Mɔñɔɔzɩ man-tɩ se mɔnkɔɔ mɩ-tɛ tozo ɖeɖe. Mantalɩɣ yɔ, maapɔzʋʋ mɩ-taa nɔɔyʋ se ɛsɩnɩ-m. Mbʋ́ pʋyɔɔ yɔ, pɩtɛkɛ mɩ-ñɩm mañɩnɩɣ, ɛlɛ́, mɩ-maɣmaɣ mañɩnɩɣ. Toovenim lɛ, pɩtɛkɛ piya cazɩɣna se sɩcalɩ sɩ-ñɩma, ɛlɛ́, ñɩma cazɩɣna se pacalɩ pe-piya.

¹⁵ Ma lɛ, paa mankpaɣ ma-ñɩm nɛ mɛwɛɛkɩ mɩ-yɔɔ yɔ, pɩɩcɛyɩɣ-m. Mbʋ́ pʋyɔɔ yɔ, manpɩzɩɣ mankpaɣ man-tɩ maha nɛ pɩya mɩ-ñʋʋ. Ɛzɩ mankɩlɩ-mɩ sɔɔlʋʋ yɔɔ ɩtɔsɔɔlɩ-m camɩyɛ naa we?

¹⁶ Yee ḿbʋ́ mɩ-maɣmaɣ ɩnawa se mantaapɔzɩ mɩ-taa nɔɔyʋ se ɛsɩnɩ-m. Ɛlɛ́, lɛɛlɛɛyɔ, nɔɔyʋ pɩzɩɣ ɛmaɣzɩ se mɛncɛtɩ-mɩ kɩcɛtʋ nɛ mehiɣ-mɩ.

¹⁷ Mantɩŋnɩ mbá mentiyini-mɩ yɔ pa-taa nɔɔyʋ yɔɔ nɛ mɔhɔɔzɩ mi-nesi taa yaa we?

¹⁸ Meheyi Tiiti se ɛñaɣ pana nɛ ɛkɔɔ mɩ-tɛ. Ɛ nɛ taabalʋ weyi ɩsɩma yɔ mentiyaa. Tiiti kɔm yɔ, ɛhɔɔzɩ mi-nesi taa yaa we? Ɛzɩ pɩtɛkɛ lɩmaɣza kʋɖʋma ɖa nɛ ɩ ɖɩɖɔmnɩ nʋmɔʋ kʋɖʋmʋʋ taa yaa we?

¹⁹ Pʋtɔma ɩmaɣzaɣ mɩ-taa ɖooo lɔŋ se ɖɩcaɣ se ɖiɖezi ɖa-tɩ mɩ-cɔlɔ. Taabalaa kʋsɔɔlaa, ɖa nɛ Krɩstʋ ɖɩkpɛndaa yɔɔ ɖɩyɔɔdʋʋ ḿbʋ́ Ɛsɔ ɛsɩndaa. Điheyiɣ-mɩ pɩtɩŋa payɩ ḿbʋ́ se ɩtɛzɩ pɩʋ Ɛsɔ nʋmɔʋ taa.

²⁰ Mbʋ́ pʋyɔɔ yɔ, manpɩsɩɣ mɩ-tɛ. Ɛlɛ́, sɔɔndʋ kpaɣ-m se maamakɩnɩ-mɩ ɛzɩ me-liu wɛʋ yɔ nɛ mɩ-maɣmaɣ ɩɩnaɣ-m ɛzɩ mi-liu wɛʋ ɖɔɖɔ yɔ. Tɩkpaɣ-m ɖɔɖɔ se mamakɩnɩ you nɛ ɛsɩsɛmɩyɛ nɛ pana nɛ paɖɩyɛ nɛ tʋtʋ nɛ ɛyáa tɔm yɔɔdʋʋ nɛ tɩ kpazʋʋ nɛ yem yem lakasɩ mɩ-hɛkʋ taa.

²¹ Mantasʋʋ pɩsʋʋ mɩ-tɛ yɔ, sɔɔndʋ kpaɣ-m se mɛ-Ɛsɔ ɖʋʋ-m fɛyɛ mɩ-tɔm taa. Tɩkpaɣ-m ɖɔɖɔ se mɔnkɔŋ tɩmʋʋ mbá paalabɩ kɩwɛɛkɩm ɖooo lɔŋ nɛ pataha acɛyɛ nɛ ɛzaɣ́tʋ siɣ́ye yɔ, pa-taa ɛyáa sakɩyɛ yɔɔ.