2 Kɔrɛntɩ 11 - New Testament

Pɔɔlɩ nɛ mbá pɛcɛtɩɣ se pɛkɛ Krɩstʋ tiyiyaa yɔ

¹ Hayɩ! Lɛɛlɛɛyɔ, mentendiɣ-mɩ se itisi man-kɩmɛlɛndʋ tɔm. Ɩmʋ-tʋ.

² Malakɩ mɩ-yɔɔ sʋsɩ ɛzɩ Ɛsɔ yɔ. Mbʋ́ pʋyɔɔ yɔ, ɩwɛ ɛzɩ pɛlɛ weyi ɛtasɩ abalʋ nɛ monsuu-i abalʋ kʋɖʋm yɔ. Abalʋ ɛnʋ lɛ Krɩstʋ.

³ Ɛlɛ́, sɔɔndʋ kpaɣ-m se ɛzɩma mbʋ́ ɖʋm kowobi ɛcɛtɩ Ɛɛvɩ nɛ ɛ-lɛɣtʋ yɔ, nɔɔyʋ ɛɛtaakɔɔ eliɣti mɩ-lɩmaɣza nɛ iyele Krɩstʋ weyi ɩsɔɔlɩ-ɩ nɛ mɩ-laŋɩyɛ tɩŋa yem fɛɛɛ yɔ.

⁴ Mbʋ́ pʋyɔɔ yɔ, yee nɔɔyʋ ɛkɔm esusi-mɩ Yesu tɔm nɛ tɩwɛnɩ ndɩ nɛ ndʋ́ ɖiisusi-mɩ yɔ yaa ɛkɛdɩ-mɩ Fezuu ŋgʋ́ kɩwɛnɩ ndɩ nɛ ŋgʋ́ ɩɩmʋwa yɔ kʋ-tɔm yaa ɛkɛdɩ-mɩ Laŋhɛzɩyɛ Tɔm ndʋ́ tɩwɛnɩ ndɩ nɛ ndʋ́ paaheyi-mɩ nɛ itisi yɔ yɔ, itisiɣ yem kitisu.

⁵ Ɛyáa ḿbá, ɩkpakɩɣ-wɛ se pɛkɛ Krɩstʋ tiyiyaa sɔsaa. Ŋgʋ́, mantasa se pakɩlɩ-m pʋyʋ!

⁶ Paa mɛnfɛyɩ nɔɔ leleŋ yɔ, mansɩm nabʋyʋ. Ḿbʋ́ ɖɩwɩlɩ-mɩ kpayɩ alɩwaatʋ kpeekpe pɩtɩŋa pɩ-taa.

⁷ Moluzi man-tɩ nɛ monsusi-mɩ Ɛsɔ Laŋhɛzɩyɛ Tɔm falaa. Malabʋ ḿbʋ́ se pɩkpazɩ-mɩ yɔ, mayʋsaa yaa we?

⁸ Manɖʋzɩ Yesu aŋgba lɛɛna. Mentisaa se ahɛyɩ-m nɛ mansɩnɩ-mɩ.

⁹ Maawɛ mɩ-tɛ nɛ mɛwɛɛ liidiye kʋñɔŋ taa lɛ, mantasʋlʋmɩ mɩ-taa nɔɔyʋ pʋyʋ. Ɛlɛ́, Yesu ŋgbɛyɛ taa ñɩma mbá palɩnɩ Masedonii egeetiye taa nɛ pɔkɔɔ yɔ, ḿbá hanɩ-m mbʋ́ pɩtɛɖaɣ-m yɔ. Maaɖɔkɩ man-tɩ pɩtɩŋa pɩ-taa se mantaakɛnɩ-mɩ sʋʋtʋ, mɔnɖɔkʋʋ man-tɩ ḿbʋ́ ɖɔɖɔ.

¹⁰ Ɛzɩma mbʋ́ Krɩstʋ toovenim wɛ man-taa yɔ, mankaɖɩɣ-mɩ se: nɔɔyʋ fɛyɩ Akayɩ hɔɔlʋʋ nakʋyʋ taa se ɛɖaŋɩɣ-m se mantaakʋndɩnɩ tɔm ńdʋ́.

¹¹ Mɔntɔsɔɔlɩ-mɩ yɔɔ mɔyɔɔdɩ ḿbʋ́ yaa we? Aayɩ! Ɛsɔ nawa se mɔnsɔɔlɩ-mɩ.

¹² Mbʋ́ malakɩ yɔ, mɛwɛɣ pɩ-labʋ yɔɔ se manɖɩɣ nʋmɔʋ mbá pañɩnɩɣ se pehiɣ mbʋ́ paawana nɛ pakʋndɩ se pa-tʋmɩyɛ labʋ wɛ ɛzɩ ɖa-ñɩnɖɛ yɔ.

¹³ Ɛyáa ḿbá, pɛcɛtɩɣ kɩcɛtʋ se pɛkɛ Krɩstʋ tiyiyaa. Paayɔɔdʋʋ toovenim pa-tʋmɩyɛ labʋ taa. Papɩsɩ pa-tɩ Krɩstʋ tiyiyaa kɩpɩsʋ.

¹⁴ Tɔm tʋnɛ tɩfɛyɩ piti. Mbʋ́ pʋyɔɔ yɔ, Satanɩ maɣmaɣ ñapɩsɩɣ ɛ-tɩ Ɛsɔ tiyiyu weyi ɛñɩlɩsɩɣ yɔ.

¹⁵ Pʋ-yɔɔ lɛ, pɩtaaɖɩɣzɩ-mɩ se ɛ-tʋmlaɖaa ñapɩsɩɣ pa-tɩ Ɛsɔ tʋmlaɖaa toovenim ñɩma. Mbʋ́ palakɩ yɔ, ḿbʋ́ pɔkɔŋ tɛmnaʋ.

Pɔɔlɩ tɔɔʋ kʋñɔŋ yɔ

¹⁶ Mantasɩɣ-mɩ heyuu se mɩ-taa nɔɔyʋ ɛtaamaɣzɩ se mɛnkɛ kɩmɛlɛŋ. Tɛ yee ɩkpaɣ-m ɛzɩ kɩmɛlɛŋ yɔ yɔ, ɩha-m waɖɛ nɛ ma ɖɔɖɔ manpɩzɩ mankʋndɩ pazɩ.

¹⁷ Toovenim lɛ, ndʋ́ mɔyɔɔdʋʋ lɛɛlɛɛyɔ yɔ, pɩtɛkɛ Kɩpaɣlʋ hanɩ-m nʋmɔʋ se mɔyɔɔdɩ-tʋ. Ɛlɛ́, pɩlabɩ-m se mankʋndɩ yɔɔ mɔyɔɔdʋʋ yem ɛzɩ kɩmɛlɛŋ yɔ.

¹⁸ Mbʋ́ pʋyɔɔ yɔ, ɛzɩma mbʋ́ ɛyáa sakɩyɛ kʋndʋʋnɩ mbʋ́ pʋwɛ kedeŋa yɔɔ yɔ, ḿbʋ́ ɖɔɖɔ mɔnkɔŋ kʋndʋʋ.

¹⁹ Ɛzɩma mbʋ́ ɩkɛ lɔŋsɩnɖaa yɔ, iitisiɣni amʋʋya kɩmɛlɛmɩŋ tɔm naa we?

²⁰ Mbʋ́ pʋyɔɔ yɔ, itisiɣ se mbá pɛcɛtɩɣ se pɛkɛ Krɩstʋ tiyiyaa yɔ, palabɩ-mɩ ɛzɩ yomaa yɔ yaa pɔtɔɔ mɩ-yɔɔ yaa pɛcɛtɩ-mɩ yaa peniɣzi-mɩ yaa pɛcɛbɩ-mɩ kadanzɩ.

²¹ Ɩcɔnɩ ɩna ɛzɩma mbʋ́ pɩkpaɣ-m fɛyɛ kpem se mɔyɔɔdɩ se ɖɩɩkɛ ajamaa yɔɔ ɖɩtanazɩ-mɩ ḿbʋ́ yɔ! Paa ḿbʋ́ yɔ, yee pɩcɩbɩ nɔɔyʋ nɛ ɛkʋndɩnɩ nabʋyʋ yɔ, ma ɖɔɖɔ mankʋndʋʋnɩ-pʋ. Mɔyɔɔdʋʋ ɛzɩ kɩmɛlɛŋ yɔ.

²² Ɛyáa ḿbá pɛkɛ Ebree ñɩma naa we? Ma ɖɔɖɔ mɛnkɛ Ebree tʋ. Pɛkɛ Izrɛɛlɩ ñɩma naa we? Ma ɖɔɖɔ mɛnkɛ Izrɛɛlɩ tʋ. Pɛkɛ Abraham liɖe taa ñɩma naa we? Ma ɖɔɖɔ mɛnkɛ e-liɖe taa tʋ.

²³ Pɛkɛ Krɩstʋ tʋmlaɖaa naa we? Tɔɔ! Mɔyɔɔdʋʋ ɛzɩ ma-ñʋʋ taa fɛyɩ yɔ. Mɛnkɛ Krɩstʋ tʋmlaɖʋ nɛ pɩkɩlɩ-wɛ. Mbʋ́ pʋyɔɔ yɔ, malabɩ tʋmɩyɛ nɛ pɩkɩlɩ-wɛ. Paɖʋ-m salaka tam sakɩyɛ nɛ pɩkɩlɩ-wɛ. Pamabɩ-m siŋŋ. Manpam coɖuu sɩm ɖɔɖɔ.

²⁴ Yuda ñɩma mabɩ-m ɖaŋ kʋɖʋmʋʋ fɛyɩ nɩɩnaza tam kagbaanzɩ taa.

²⁵ Room ñɩma ñolu-m agbazɛɛ tam naadozo taa. Tam kʋɖʋm payaɣ-m pɛɛ se mansɩ. Tam naadozo ɖɛ-mɛlɛ sʋ lɩm. Mancaɣ lɩm taa wɩsɩ nɛ ɖoó pilim.

²⁶ Ma-nʋmɔŋ ɖɔm taa paa ɖooye lɛ, moncoɖi sɩm pɔsɩ nɛ teŋgu nɛ tɛtʋ ndɩ ndɩ nɛ lakɩŋ pa-taa. Moncoɖi ɖɔɖɔ sɩm mɩ́láa nɛ mbá pɛkɛ Yuda ñɩma nɛ mbá pɛtɛkɛ Yuda ñɩma yɔ nɛ mbá pɛcɛtɩɣ se pɛwɛnɩ lidaʋ Krɩstʋ yɔɔ yɔ pe-nesi taa.

²⁷ Malabɩ tʋma wena awɛ kaɖɛ yɔ nɛ pɩnɩ-m siŋŋ. Nabʋyʋ taa lɛ, mancaɣnɩ mɛ-ɛsɛ nɛ ñɔɔsɩ nɛ lɔkɔtʋ pakʋ-m. Nabʋyʋ taa lɛ, mɛwɛɛ nɔɔ hɔkʋʋ yɔɔ. Mantaawɛnɩ wondu se monsuu nɛ niŋkaɣ kʋ-m.

²⁸ Maacazɩɣ yɔɔdʋʋ kʋñɔmɩŋ lɛɛŋ tɔm. Tɛʋ feŋuu yɔ, Yesu aŋgba tɩŋa payɩ lɩmaɣza kʋʋnɩ-m.

²⁹ Yee nɔɔyʋ ɛwɛnɩ ɛjandʋ Ɛsɔ nʋmɔʋ taa yɔ, pʋwɛ ɛzɩ mɛwɛnɩ tɩ-taa yɔ. Yee nɔɔyʋ ɛtɔlɩ Ɛsɔ nʋmɔʋ taa yɔ, pɩcɛyɩɣ-m ɖɔɖɔ siŋŋ.

³⁰ Yee pʋwɛɛ se mankʋndɩ yɔ, mɛ-ɛjandʋ mankʋndʋʋna.

³¹ Ɛsɔ weyi ɛkɛ Kɩpaɣlʋ Yesu Caa yɔ, ɛnawa se maacɛtɩɣ! Pasam-ɩ tam!

³² Wiyaʋ sɔsɔ Aretaasɩ kasɩ nɔɔyʋ se ɛcɔŋnɩ Damaasɩ tɛtʋ yɔɔ. Alɩwaatʋ ndʋ́ maawɛ peeɖe yɔ, pʋdʋ ɛnʋ ɛɛɖʋnɩ ɛyáa se paɖaŋ tɛtʋ nɔnɔsɩ taa nɛ pakpa-m.

³³ Ɛlɛ́, nabɛyɛ kpaɣ-m paɖʋ ɖɔkʋ taa nɛ petisi-m nɛ mundoɖe nɖɩ́ ɖɩwɛ tɛtʋ koloŋa sɔsɔ yɔɔ yɔ ɖɩ-wayɩ nɛ mantʋlɩ, etehiɣ-m.