2 Kɔrɛntɩ 10 - New Testament

Pɔɔlɩ lɩzɩɣ ɛ-tʋmɩyɛ tɔbʋʋ mbá papaɖɩɣ-ɩ yɔ

¹ Ma Pɔɔlɩ manawa se mɔn-tɔm ɛyáa yɔɔdʋʋ se mɛwɛɣ pɔ-cɔlɔ lɛ, mañaŋ pɛ-ɛsɛ. Mɛnɖɛɣ poliŋ lɛ, mañazɩɣ-wɛ. Ma-maɣmaɣ mantɩŋɩɣnɩ Krɩstʋ leleŋ nɛ ɛ-camɩyɛ lakasɩ pɔ-yɔɔ nɛ mentendiɣ-mɩ se:

² ɩtaala nɛ mañazɩ-mɩ alɩwaatʋ ndʋ́ mɔnkɔŋ mɩ-tɛ yɔ. Mbʋ́ pʋyɔɔ yɔ, mansɩm ɛzɩma mbʋ́ mɔnkɔŋ ñazʋʋ mbá pamaɣzɩɣ se ma nɛ man-taabalaa ɖɩcakɩ wezuu ɛzɩ kedeŋa ñɩma yɔ.

³ Toovenim lɛ, ɖɩwɛ kedeŋa yɔɔ, ɛlɛ́, ɖɩɩlakɩ you ŋgʋ́ kedeŋa ñɩma lakɩ yɔ.

⁴ Mbʋ́ pʋyɔɔ yɔ, pɩtɛkɛ hɔzɩŋ weyi kedeŋa ñɩma lakɩnɩ you yɔ ɖɩlakɩna. Ɛlɛ́, weyi ɩlɩnɩ Ɛsɔ cɔlɔ yɔ ɖɩlakɩna. Ɩwɛ ɖoŋ, ɩpɩzɩɣ ɩyɔkɩ Ɛsɔ koyindinaa ɖɩmɛlɩyɛ. Ɩnʋ ɖiɖiɣzini cɛtɩm tɔm.

⁵ Ɩnʋ ɖɔɖɔ ɖɩyɔkʋʋnɩ mbʋ́ tɩ kpazɩyaa ɖɩkɩnɩ ɛyáa nʋmɔʋ se pataatɩlɩ Ɛsɔ yɔ. Đɩpaɣ ɛyáa se pɛlɛɣzɩ pa-lɩmaɣza nɛ paña Krɩstʋ.

⁶ Đɩɖaŋ kpam se yee ɩtɛzɩ ñam nɛ pɩsɛɣ mɩ-taa nabɛyɛ yɔ, ɖɩhɔ pa-nɩŋgbaaŋ.

⁷ Ɩnaɣ wondu ɛsɛ yɔɔ yem. Yee nɔɔyʋ ɛna ɛ-maɣmaɣ se ɛkɛ Krɩstʋ tʋ lɛ, pɩlabɩ ɛzɩma ɛɛnaɣ se: ɖa ɖɔɖɔ ɖɩkɛ Krɩstʋ ñɩma ɛzɩ ɛnʋ yɔ?

⁸ Paa maakɩlɩ kʋndɩnaʋ ɖoŋ weyi Kɩpaɣlʋ ha-ɖʋ yɔ yɔ, fɛyɛ ɛɛkpaɣ-m. Mbʋ́ pʋyɔɔ yɔ, ɛha-ɖʋ-ɩ se ɖɩsɩnɩ-mɩ nɛ ɩpɩɩ Ɛsɔ nʋmɔʋ taa. Ɛlɛ́, ɛtaha-ɖʋ-ɩ se ɖɩɖʋzɩnɩ-mɩ.

⁹ Maacaɣ se ɩmaɣzɩ se mamaɣ-mɩ takayɩsɩ se sɔɔndʋ ɛkpa-mɩ.

¹⁰ Nabɛyɛ yɔɔdʋʋ se: «Takayɩsɩ nzɩ́ Pɔɔlɩ maɣ yɔ sɩwɛ kaɖɛ, sɩ-tɔm wɛ ɖoŋ. Ŋgʋ́ ɖa nɛ ɩ ɖɩwɛɣ lɛ, ɛwɛ ɛjandʋ, tɔm ndʋ́ ɛyɔɔdʋʋ yɔ tɩɩwazɩɣ pʋyʋ.»

¹¹ Pʋwɛɛ se weyi ɛyɔɔdʋʋ ḿbʋ́ yɔ, ɛtɩlɩ camɩyɛ se: tɔm ndʋ́ ɖɩmaɣ-mɩ alɩwaatʋ ndʋ́ ɖɩfɛyɩ mɩ-cɔlɔ yɔ, tɩfɛyɩ ndɩ nɛ mbʋ́ ɖɩlakɩ alɩwaatʋ ndʋ́ ɖɩwɛɣ mɩ-cɔlɔ yɔ.

¹² Đɩɩcazɩɣ ɖa-tɩ kpaɣʋ se ɖɩkɛdɩna yaa ɖɩmaɣzɩnɩ mbá pawɩlɩɣ pa-tɩ yem yɔ. Pa-ñʋŋ taa fɛyɩ yɔɔ pɛkɛdɩɣnɩ pa-tɩ yaa pamaɣzɩɣnɩ pa-tɩ nɛ pa-maɣmaɣ.

¹³ Đa lɛ, tʋmɩyɛ nɖɩ́ Ɛsɔ cɛlɩ-ɖʋ yɔ, ɖi-ɖeke ɖɩkʋndʋʋna. Đɩɩkʋndʋʋnɩ nabʋyʋ ɖɔɖɔ. Ɛsɔ ɖʋzɩ ɖe-nesi taa tʋmɩyɛ nɖɩ́ yɔ, ńɖɩ́ lɛ se halɩ ɖɩkɔɔ ɖooo mɩ-tɛ.

¹⁴ Pʋ-yɔɔ lɛ, ɖɩkɔnaʋ Krɩstʋ Laŋhɛzɩyɛ Tɔm mɩ-tɛ yɔ, ɖɩtɛɖɛɛ kámaɣ́ ŋ́gá Ɛsɔ ɖʋ-ɖʋ yɔ kɔ-yɔɔ. Mbʋ́ pʋyɔɔ yɔ, ɖɛkɛnɩ kajalaɣ ñɩma mbá pɔkɔnɩ-mɩ-tʋ yɔ.

¹⁵ Đɩɩkʋndʋʋnɩ lɛlaa tʋma. Ɛlɛ́, ɖɩtaɣ liu se ɩtɛzɩɣ lidaʋ wɛnaʋ Krɩstʋ yɔɔ. Peeɖe ɖɩpɩzɩɣ ɖɩla tʋmɩyɛ mɩ-hɛkʋ taa nɛ pɩɖɛnɩ ɛsɩndaa. Ɛlɛ́, ɖɩɩlakɩ nɛ pɩɖɛɛ mbʋ́ Ɛsɔ ɖʋ-ɖʋ yɔ pʋ-yɔɔ.

¹⁶ Pʋwayɩ lɛ, ɖɩpɩzɩɣ ɖiwolo ɖisusi Laŋhɛzɩyɛ Tɔm ajɛya wɛna akɩlɩ poliŋ mɩ-ñɩnɖɛ yɔ a-taa. Pɩfɛyɩ se ɖɩkʋndɩnɩ mbʋ́ lɛlaa tɛm labʋ yɔ.

¹⁷ Ḿbʋ́ pama Ɛsɔtɔm Takayaɣ taa se: «Pʋwɛɛ se weyi ɛkʋndʋʋ yɔ, ɛkʋndɩnɩ mbʋ́ Kɩpaɣlʋ laba yɔ.»

¹⁸ Mbʋ́ pʋyɔɔ yɔ, pɩtɛkɛ weyi ɛsaŋ ɛ-tɩ yɔ, ɛkɛnɩnɩ kɩbanʋ Kɩpaɣlʋ ɛsɩndaa. Ɛlɛ́, weyi Kɩpaɣlʋ saŋ-ɩ yɔ, ɛnʋ lɛ kɩbanʋ.