2 Kɔrɛntɩ 1 - New Testament

Sɛtʋ

¹ Ma Pɔɔlɩ weyi Ɛsɔ liu wɛɛ se mɛnkɛ Krɩstʋ Yesu tiyiyu yɔ nɛ taabalʋ Timootee ɖɩmaɣnɩ-mɩ takayaɣ kanɛ. Đɩmaɣ-kɛ mbá mɩ ɩkɛ Ɛsɔ ŋgbɛyɛ taa ñɩma Kɔrɛntɩ yɔ nɛ Ɛsɔ ñɩma lɛlaa mbá patɩŋa payɩ pɛwɛ Akayɩ egeetiye tɩŋa taa yɔ.

² Đɩsɛ-mɩ: ɖa-Caa Ɛsɔ nɛ Kɩpaɣlʋ Yesu Krɩstʋ palabɩ-mɩ lootiye nɛ pɛhɛzɩ mɩ-laŋa.

Pɔɔlɩ sɛɣ Ɛsɔ

³ Đɩsa Ɛsɔ weyi ɛkɛ ɖa-Kɩpaɣlʋ Yesu Krɩstʋ Caa nɛ ɛnaɣ ɖa-pʋtɔdɩyɛ nɛ ɛhɛzɩɣ ɖa-laŋa pɩtɩŋa pɩ-taa yɔ.

⁴ Ɛhɛzɩɣ ɖa-laŋa ɖa-kʋñɔmɩŋ tɩŋa taa se pɩtɩŋnɩ ɖɔ-yɔɔ nɛ ɖɩpɩzɩ ɖɩhɛzɩ ɖɔɖɔ mbá pɛwɛ kʋñɔmɩŋ ndɩ ndɩ taa yɔ pa-ñɩna.

⁵ Mbʋ́ pʋyɔɔ yɔ, ɛzɩma mbʋ́ ɖɩtɔkɩ kʋñɔmɩŋ siŋŋ ɛzɩ Krɩstʋ yɔ, ḿbʋ́ ɖɔɖɔ Ɛsɔ tɩŋɩɣnɩ Krɩstʋ ɛnʋ ɛ-yɔɔ nɛ ɛhɛzɩɣ ɖa-laŋa siŋŋ.

⁶ Paa ɖɩtɔkɩ kʋñɔmɩŋ yɔ, ɖɩtɔkɩ-ɩ se Ɛsɔ ɛtɩŋnɩ ɖɔ-yɔɔ nɛ ɛhɛzɩ mɩ-laŋa nɛ ɛya mɩ-ñʋʋ. Yee Ɛsɔ ɛhɛzɩɣ ɖa-laŋa yɔ, ɛhɛzɩɣ-yɛ se ɖɩpɩzɩ ɖɩhɛzɩ mɩ-ñɩna ɖɔɖɔ nɛ ɩɖɔkɩ mɩ-tɩ kʋñɔmɩŋ weyi ɩtɔkɩ ɖɔɖɔ ɛzɩ ɖa yɔ ɩ-taa.

⁷ Pʋ-yɔɔ lɛ, ɖɩtaɣ-mɩ liu siŋŋ, mbʋ́ pʋyɔɔ yɔ, ɖɩtɛm naʋ se ɛzɩma mbʋ́ ɖa nɛ mɩ ɖɩtɔkɩ kʋñɔmɩŋ yɔ, ḿbʋ́ ɖɔɖɔ Ɛsɔ hɛzɩɣ mɩ-laŋa ɛzɩ ɛhɛzʋʋ ɖa-ñɩna yɔ.

⁸ Taabalaa, ɖe-liu wɛɛ se ɩtɩlɩ kʋñɔŋ sɔsɔʋ ŋgʋ́ ɖɩɩtɔɔ Aazii ɛjaɖɛ taa nɛ pɩnɩɩ-ɖʋ siŋŋ nɛ pɩɖɛlɛsɩ ɖa-hama yɔɔ yɔ. Halɩ ɖɩɩmaɣzaa se ɖɩtɛŋɛlɩɣ kɩ-taa.

⁹ Toovenim lɛ, ɖa-maɣmaɣ ɖɩtɛm sɩm sɔŋ nɩʋ. Pɩlabɩ ḿbʋ́ se ɖɩtaatasɩ ɖa-tɩ taʋ liu. Ɛlɛ́, pʋwɛɛ se ɖɩtaa Ɛsɔ weyi efeziɣ sɩɖaa yɔ e-ɖeke koŋ.

¹⁰ Ɛnʋ yabɩnɩ ɖa-ñʋʋ sɩm ḿbʋ́ pɩ-taa. Ɛkɔŋ ɛtasɩ ɖa-ñʋʋ yabʋ. Toovenim ɖɩtaɣ-ɩ se ɛnʋ tasɩɣnɩ ɖa-ñʋʋ yabʋ.

¹¹ Mbʋ́ pʋyɔɔ yɔ, mɩ-maɣmaɣ ɩsɩŋnɩ-ɖʋ alɩwaatʋ ndʋ́ ɩsɛɣ Ɛsɔ ɖɔ-yɔɔ yɔ. Pʋ-yɔɔ lɛ, ɛyáa sakɩyɛ sɛɣ Ɛsɔ ɖɔ-yɔɔ nɛ ecosi-ɖʋ nɛ pasam-ɩ ɖɔ-yɔɔ.

Pɔɔlɩ lɛɣzɩɣ nɩmaŋ weyi ɛɛɖʋwa se ɛɖɔŋ yɔ

¹² Mbʋ́ ɖɩkʋndʋʋna yɔ lɛ se: ɖɩnaɣ ɖa-taa se ɖe-wezuu caɣʋ kedeŋa yɔɔ cɩnɛ, kɔzɩkɔzɩ mɩ-ɛsɩndaa lɛ, ɖɩwɛ yayɩ nɛ ɖɩyɔɔdʋʋ toovenim. Ɛsɔ cɔlɔ pɩlɩnɩ pɩtɩŋa. Pɩtɛkɛ ɛyáa lɔŋsɩnɖɛ yɔɔ pɩtɩŋnaa. Ɛlɛ́, Ɛsɔ lootiye yɔɔ pɩtɩŋnaa.

^13-14 Maamaɣ-mɩ natʋyʋ yem nɛ pɩtasɩnɩ ndʋ́ ɩkalɩɣ nɛ ɩnɩɣ yɔ. Mantaɣ liu se ɩkɔŋ tɩtɩŋa tɩ-taa nɩʋ camɩyɛ. Halɩ ɩtɛm pazʋʋ tɩ-taa nɩʋ se puwiye nɖɩ́ ɖa-Kɩpaɣlʋ Yesu pɩsɩɣ yɔ, ɩkʋndʋʋnɩ-ɖʋ ɛzɩ ɖɩkʋndʋʋnɩ-mɩ ɖɔɖɔ yɔ.

¹⁵ Maatɛm naʋ siŋŋ se ɩnɩɣnɩ-m yɔɔ maaɖʋwa se mancalɩɣnɩ mɩ-tɛ kɔm nɛ mɩ-laŋa hʋlʋmɩ nabʋlɛ.

¹⁶ Mankʋyʋʋ mɩ-tɛ lɛ, me-liu wɛɛ se mowolo Masedonii nɛ malɩɩnɩ peeɖe lɛ, mantasɩ mɩ-tɛ tɩŋʋʋ. Pʋbʋ ɩpɩzɩɣ ɩsɩnɩ-m nɛ mowolo Yudee.

¹⁷ Mbʋ́ maaɖʋwa yɔ, pʋ-yɔɔ yem malaba-pʋ yaa we? Yaa ma-lɩmaɣza ana, ɛyáa lɩmaɣza akɛnaa se maapɩzɩ mɛwɛnɩ nɔsɩ naalɛ tɔm kʋɖʋmtʋ yɔɔ?

¹⁸ Ɛzɩma mbʋ́ pɩkɛ toovenim se Ɛsɔ ɛɛlɛɣzɩɣ ɛ-tɔm kaʋ yɔ, ḿbʋ́ ɖɔɖɔ maayɔɔdʋʋnɩ-mɩ nɔsɩ naalɛ.

¹⁹ Mbʋ́ pʋyɔɔ yɔ, Ɛsɔ Pɩyalʋ Krɩstʋ Yesu weyi ma nɛ Silaasɩ nɛ Timootee ɖisusi ɛ-tɔm mɩ-hɛkʋ taa yɔ, ɛtɔyɔɔdɩ nɔsɩ naalɛ tɔm kʋɖʋmtʋ yɔɔ. Ɛlɛ́, mbʋ́ pɩkɛ toovenim yɔ «Ɛɛ» ɖeke ɛtɔŋ.

²⁰ Ɛnʋ wɩlɩɣnɩ-ɖʋ kaŋŋ se mbʋ́ pɩtɩŋa payɩ Ɛsɔ heyi-ɖʋ se ɛlakɩ-ɖʋ yɔ, ɛlakɩ pɩtɩŋa payɩ nɛ pɩtɩŋnɩ Krɩstʋ yɔɔ. Đɔɖɔ lɛ, ɛ-yɔɔ ɖɩtɩŋɩɣna nɛ ɖiheyi Ɛsɔ se: «Pɩla ḿbʋ́!» Nɛ pɩkɛnɩ Ɛsɔ ɛnʋ koboyaɣ.

²¹ Ɛsɔ ɛnʋ ɛ-maɣmaɣ eyekini se ɖa nɛ mɩ ɖɩkpa ɖoŋ ɖa nɛ Krɩstʋ ɖɛ-kpɛndʋʋ taa. Ɛ-maɣmaɣ ɛlɩzɩnɩ-ɖʋ ɛsɩɩ hɔɔlʋʋ.

²² Ɛlabɩ ɖɔ-yɔɔ ɖɔɖɔ ɛ-yʋsaɣ nɛ ɛha-ɖʋ e-Fezuu Kiɖeɖeu. Ḿbʋ́ wɩlɩɣna se ɛkɔŋ-ɖʋ haʋ ñɩm lɛɛbʋ mbʋ́ eheyi-ɖʋ se ɛhaɣ-ɖʋ yɔ.

²³ Ŋgʋ́, Ɛsɔ mankpakɩɣ se ɛkɛ ma-aseɣɖe tʋ, yee mɛncɛtɩɣ yɔ, ɛkʋ-m. Mbʋ́ pʋ-yɔɔ mantatasɩ pɩsʋʋ mɩ-tɛ Kɔrɛntɩ yɔ lɛ se: maasɔɔlaa se malɩzɩ-mɩ pɩ-taa.

²⁴ Đɩɩcɛyɩɣ-mɩ se ɩwɛnɩ lidaʋ. Mbʋ́ pʋyɔɔ yɔ, ɩtɛm wɛnaʋ lidaʋ siŋŋ. Ɛlɛ́, ɖe-liu wɛɛ se ɖa nɛ mɩ ɖɩla tʋmɩyɛ nɛ ɩwɛɛ laŋhʋlʋmɩyɛ taa.