1 Yohanɛɛsɩ 5 - New Testament

Ɛsɔ yɔɔ lidaʋ lakɩ nɛ ɖɩwa kedeŋa yɔɔ ɖoŋ

¹ Weyi etisiɣ se Yesu lɛ Weyi Ɛsɔ Lɩzaa Yɔ yɔ, ɛkɛ Ɛsɔ pɩɣa. Đɔɖɔ lɛ, weyi ɛsɔɔlʋʋ Caa Ɛsɔ weyi ɛha-ɩ wezuu yɔ, ɛsɔɔlʋʋ ɖɔɖɔ e-piya.

² Yee ɖɩsɔɔlɩ Ɛsɔ nɛ ɖɩɖɔŋ ɛ-paɣtʋ yɔɔ yɔ, pɩwɩlɩɣ se ɖɩsɔɔlɩ e-piya.

³ Yee ɖɩɖɔŋ Ɛsɔ paɣtʋ yɔɔ yɔ, pɩwɩlɩɣ toovenim se ɖɩsɔɔlɩ-ɩ. Ɛ-paɣtʋ takɩlɩ-ɖʋ kaɖɛ,

⁴ mbʋ́ pʋyɔɔ yɔ, paa Ɛsɔ pɩɣa ŋgá kawakɩ kedeŋa yɔɔ ɖoŋ tɩŋa payɩ. Đe-lidaʋ ɖɩwakɩnɩ kedeŋa kpeekpe yɔɔ ɖoŋ ɩnʋ.

⁵ Weyi ɛwɛnɩ lidaʋ se Yesu lɛ Ɛsɔ Pɩyalʋ yɔ, e-ɖeke koŋ ɛpɩzɩɣnɩ ɛwabɩ-ɩ.

Yesu Krɩstʋ yɔɔ aseɣɖe lɩzɩyaa tɔm

⁶ Yesu Krɩstʋ maɣmaɣ kɔmnɩ kedeŋa yɔɔ nɛ palabɩ-ɩ lɩm sɔʋ sɔnzɩ nɛ pɛkpɛdɩ ɛ-calɩm. Pɩtɛkɛ lɩm sɔʋ sɔnzɩ ńzɩ́ si-ɖeke sɩwɩlɩɣnɩ weyi ɛkɛnaa yɔ, ɛlɛ́, sɩ nɛ calɩm kpɛdʋʋ pawɩlɩɣnɩ weyi ɛkɛnaa yɔ. Fezuu Kiɖeɖeu maɣmaɣ lɩzɩɣ aseɣɖe se pɩkɛ toovenim: ŋ́gʋ́ lɛ toovenim tʋ.

⁷ Aseɣɖe lɩzɩyaa naadozo wɛna:

⁸ Fezuu Kiɖeɖeu nɛ lɩm sɔʋ sɔnzɩ nɛ calɩm kpɛdʋʋ. Pa-naadozo panɩnɩ ɖama nɛ palɩzɩɣ aseɣɖe kʋɖʋmɖɩyɛ Yesu Krɩstʋ yɔɔ.

⁹ Yee ɛyáa ɛlɩzɩɣ aseɣɖe nɛ ɖitisiɣ lɛ, pɩlabɩ ɛzɩma ɖiitisiɣ aseɣɖe nɖɩ́ Ɛsɔ ñalɩzɩ ɛ-Pɩyalʋ yɔɔ yɔ? Ŋgʋ́ ńɖɩ́ kɩlɩna kpem.

¹⁰ Pʋ-yɔɔ lɛ, weyi ɛwɛnɩ lidaʋ Ɛsɔ Pɩyalʋ yɔɔ yɔ, ɛnaɣ ɛ-taa se aseɣɖe nɖɩ́ Ɛsɔ lɩzaa yɔ, ɖɩkɛ toovenim. Weyi ɛ́lɛ́ ñɛfɛyɩnɩ lidaʋ Ɛsɔ yɔɔ yɔ, pʋdʋ kpakɩɣ-ɩ se ɛkɛ cɛtɩyʋ. Mbʋ́ pʋyɔɔ yɔ, pʋdʋ tetisi aseɣɖe nɖɩ́ ɛlɩzɩ ɛ-Pɩyalʋ yɔɔ yɔ.

¹¹ Aseɣɖe ńɖɩ́ lɛ se: ɛtɩŋnɩ ɛ-Pɩyalʋ yɔɔ nɛ ɛha-ɖʋ wezuu maatɛŋ.

¹² Weyi ɛsɩm Ɛsɔ Pɩyalʋ yɔ, ehiɣ wezuu ŋ́gʋ́. Ɛlɛ́, weyi ɛ́lɛ́ tasɩm-ɩ yɔ, etehiɣ-kʋ.

Ɛsɔ cɔlɔ wezuu caɣʋ tɔm

¹³ Mbá mɩ ɩwɛnɩ lidaʋ Ɛsɔ Pɩyalʋ yɔɔ yɔ, mama-mɩ takayaɣ kanɛ se ɩtɩlɩ se ɩtɛm hiɣu wezuu maatɛŋ.

¹⁴ Yee ɖɩpɔzʋʋ Ɛsɔ mbʋ́ e-liu wɛɛ yɔ yɔ, ɛnɩɣnɩ-ɖʋ. Pʋ-yɔɔ ɖɩsɩŋɩɣ ɛ-ɛsɩndaa kaalɛyɩtʋ.

¹⁵ Yee ɖɩnawa se ɖɩpɔzɩ-ɩ paa ɛbɛ ɛnɩɣnɩ-ɖʋ yɔ, ɖɩnaɣ ɖɔɖɔ se ɛhaɣ-ɖʋ mbʋ́ ɖɩpɔzʋʋ-ɩ yɔ.

¹⁶ Yee nɔɔyʋ ɛna ɛ-taabalʋ lakɩ kɩwɛɛkɩm mbʋ́ piiyeki se ɛ́lɛ́ ɛsɩ yɔ yɔ, pʋmʋnaa se ɛsɛɛ Ɛsɔ ɛ-yɔɔ nɛ ɛ́lɛ́ ha-ɩ wezuu. Mbá palakɩ kɩwɛɛkɩm mbʋ́ piiyeki se pasɩ yɔ, pe-ɖeke pɔ-yɔɔ mɔntɔŋ se pɛsɛɛ Ɛsɔ. Ɛlɛ́, kɩwɛɛkɩm nabʋyʋ wɛɛ, piyeki se ɛyáa ɛsɩ. Pɩtɛkɛ weyi ɛlakɩ-pʋ yɔ ɛ-yɔɔ mɔntɔŋ se ɩsɛɛ Ɛsɔ.

¹⁷ Mbʋ́ pɩtɩŋa payɩ ɖɩlakɩ nɛ pɩfɛyɩ ɖeu yɔ, pɩkɛ kɩwɛɛkɩm. Paa ḿbʋ́ yɔ, pɩtɛkɛ kɩwɛɛkɩm tɩŋa yekini se ɛyáa ɛsɩ.

¹⁸ Đɩnawa se paa Ɛsɔ pɩɣa ŋgá, kaawɛɣ kɩwɛɛkɩm labʋ yɔɔ. Mbʋ́ pʋyɔɔ yɔ, Ɛsɔ Pɩyalʋ huuzuu kɔ-yɔɔ nɛ kaasʋʋ Satanɩ nesi taa.

¹⁹ Đɩnawa se ɖɩkɛ Ɛsɔ ñɩma nɛ piyele kedeŋa ñɩma tɩŋa payɩ ñɛwɛɛ Satanɩ nesi taa.

²⁰ Đɩnawa ɖɔɖɔ se Ɛsɔ Pɩyalʋ kɔm kedeŋa yɔɔ nɛ ɛha-ɖʋ lɛɣtʋ se ɖɩpɩzɩ ɖɩtɩlɩ Ɛsɔ. Ɛsɔ ɛnʋ lɛ Ɛsɔ maɣmaɣ kpem. Ɛ-Pɩyalʋ Yesu Krɩstʋ yɔɔ pɩtɩŋnaa nɛ ɖa nɛ ɩ ɖɩwɛɛ ɖama taa. Ɛnʋ lɛ Ɛsɔ maɣmaɣ kpem, ɛnʋ lɛ wezuu maatɛŋ.

²¹ Men-piya! Ɩkpa mɩ-tɩ nɛ agɔlɩma!