1 Yohanɛɛsɩ 4 - New Testament

Ɛzɩma ɖɩpɩzɩɣ ɖɩtɩlɩ Fezuu Kiɖeɖeu?

¹ Mɛ-ɛgbaɣdɩnaa! Yee nɔɔyʋ eheyi-mɩ se Fezuu Kiɖeɖeu ɖoŋ ɛyɔɔdʋʋna yɔ, ɩtaatisi kpaagbaa. Ɛlɛ́, ɩmaɣzɩ-ɩ nɛ ɩna se pɩkɛ toovenim na. Meheyiɣ-mɩ ḿbʋ́, mbʋ́ pʋyɔɔ yɔ, mbá pɛcɛtɩɣ se pɛkɛ náyaa yɔ palɩ kedeŋa yɔɔ sakɩyɛ.

² Mbʋ́ ɩpɩzɩɣ ɩnana se toovenim Fezuu Kiɖeɖeu wɛ nɔɔyʋ cɔlɔ yɔ lɛ se: yee nɔɔyʋ ɛkaɖɩ kpayɩ se Yesu Krɩstʋ pɩsɩ ɛyʋ nɛ ɛkɔɔ kedeŋa yɔɔ yɔ, pɩwɩlɩɣ se Fezuu Kiɖeɖeu ŋ́gʋ́ kɩwɛ pʋdʋ cɔlɔ.

³ Weyi ɛ́lɛ́ ɛɛkaɖɩɣ ɛyáa samaɣ taa kpayɩ ḿbʋ́ yɔ, Fezuu Kiɖeɖeu fɛyɩ ɛ-cɔlɔ. Ɛlɛ́, Krɩstʋ koyindu kalɩzaɣ wɛnɩ ɛ-cɔlɔ. Ɩtɛm nɩʋ se paa pɩɩla ɛzɩma ɛkɔŋ, lɛɛlɛɛyɔ ɛtɛm kɔm kedeŋa yɔɔ.

⁴ Men-piya! Mɩ lɛ, ɩkɛ Ɛsɔ ñɩma nɛ ɩwa mbá pɛcɛtɩɣ se pɛkɛ náyaa yɔ. Mbʋ́ pʋyɔɔ yɔ, Fezuu Kiɖeɖeu ŋgʋ́ kɩwɛ mɩ-cɔlɔ yɔ, kɩkɩlɩ ɖoŋ ŋgʋ́ kʋkʋ wɛ kedeŋa ñɩma cɔlɔ yɔ.

⁵ Cɛtɩyaa ḿbá, pɛkɛ kedeŋa ñɩma. Pʋ-yɔɔ pɔyɔɔdʋʋ ɛzɩ kedeŋa ñɩma yɔ nɛ paba ñewelesiɣni-wɛ.

⁶ Piyele ma nɛ mɩ lɛ, ɖɩkɛ Ɛsɔ ñɩma. Weyi ɛsɩm Ɛsɔ yɔ, ɛnɩɣnɩ-ɖʋ. Weyi ɛ́lɛ́ tɛkɛ Ɛsɔ ñɩnʋ yɔ, ɛɛnɩɣnɩ-ɖʋ. Ḿbʋ́ ɖɩtɩlɩɣnɩ se toovenim Fezuu wɛnɩ nɔɔyʋ cɔlɔ yaa cɛtɩm ñɩŋgʋ wɛna.

Sɔɔlɩm lɩnɩ Ɛsɔ cɔlɔ

⁷ Mɛ-ɛgbaɣdɩnaa! Pʋwɛɛ se ɖɩsɔɔlɩ ɖama, mbʋ́ pʋyɔɔ yɔ, Ɛsɔ cɔlɔ sɔɔlɩm lɩɣna. Weyi ɛsɔɔlɩ lɛlaa yɔ, ɛkɛ Ɛsɔ pɩɣa, ɛsɩm-ɩ.

⁸ Weyi ɛ́lɛ́ tɔsɔɔlɩ-wɛ yɔ, ɛtasɩ Ɛsɔ, mbʋ́ pʋyɔɔ yɔ, Ɛsɔ lɛ sɔɔlɩm tʋ.

⁹ Ɛsɔ tiyi ɛ-Pɩyalʋ ɛgbamɩyɛ kedeŋa yɔɔ se ɛkɔɔ ɛha-ɖʋ wezuu. Ḿbʋ́ ɛwɩlɩɣnɩ-ɖʋ se ɛsɔɔlɩ-ɖʋ.

¹⁰ Mbʋ́ pɩwɩlɩɣ sɔɔlɩm ḿbʋ́ kpem yɔ lɛ se: ɛnʋ calɩnɩ-ɖʋ sɔɔlʋʋ nɛ etiyi ɛ-Pɩyalʋ se ɛkɔɔ ɛsɩ ɖɔ-yɔɔ nɛ ɛpɩzɩ ekpeɣ-ɖʋ ɖa-kɩwɛɛkɩm.

¹¹ Mɛ-ɛgbaɣdɩnaa! Yee ḿbʋ́ Ɛsɔ ɛsɔɔlɩ-ɖʋ yɔ, pʋwɛɛ se ɖa ɖɔɖɔ ɖɩsɔɔlɩ ɖama.

¹² Nɔɔyʋ tana Ɛsɔ wiɖiyi kaʋ. Ɛlɛ́, yee ɖɩsɔɔlɩ ɖama yɔ, pɩwɩlɩɣ se ɖa nɛ ɩ ɖɩkpɛndaa nɛ ɛ-sɔɔlɩm wɛɛ ɖa-taa siŋŋ.

¹³ Ɛsɔ ha-ɖʋ e-Fezuu Kiɖeɖeu. Ḿbʋ́ wɩlɩɣnɩ-ɖʋ se ɖa nɛ ɩ ɖɩwɛ ɖama taa.

¹⁴ Đa lɛ, ɖɩnawa nɛ ɖɩlɩzɩɣ aseɣɖe se Caa Ɛsɔ tiyi ɛ-Pɩyalʋ kedeŋa yɔɔ se ɛya ɛyáa ñʋŋ.

¹⁵ Yee nɔɔyʋ ɛkaɖɩ kpayɩ se Yesu lɛ Ɛsɔ Pɩyalʋ yɔ, pɩwɩlɩɣ se ɛ nɛ Ɛsɔ pɛwɛ ɖama taa.

¹⁶ Đa lɛ, ɖɩna ɛzɩma mbʋ́ Ɛsɔ sɔɔlɩ-ɖʋ yɔ nɛ ɖitisi-pʋ. Ɛsɔ lɛ sɔɔlɩm tʋ, weyi ɛwɛɛ ɛsɔɔlʋʋ Ɛsɔ nɛ ɛyáa lɛlaa yɔ, pɩwɩlɩɣ se ɛ nɛ Ɛsɔ pɛwɛ ɖama taa.

¹⁷ Mbʋ́ pɩwɩlɩɣ se sɔɔlɩm tɛzɩ ɖa-taa wɛʋ yɔ lɛ se ɖɩsɩŋɩɣ Ɛsɔ ɛsɩndaa kaalɛyɩtʋ kɩyakʋ ŋgʋ́ ɛkɔŋ ɛyáa tɔm hʋnaʋ yɔ. Mbʋ́ pʋyɔɔ yɔ, ɖe-wezuu caɣʋ kedeŋa yɔɔ cɩnɛ nɩɣzɩnɩ Yesu ñɩmbʋ.

¹⁸ Weyi ɛwɛnɩ sɔɔlɩm yɔ, sɔɔndʋ ɛɛkpaɣ-ɩ, sɔɔlɩm siŋŋ ɖɔɔnʋʋ sɔɔndʋ. Yee ḿbʋ́, sɔɔndʋ ɛkpaɣ nɔɔyʋ yɔ, pʋdʋ fɛyɩnɩ sɔɔlɩm siŋŋ, mbʋ́ pʋyɔɔ yɔ, sɔɔndʋ wɛ ɛzɩ pɔhɔŋʋʋ ɛyʋ nɩŋgbaŋʋʋ yɔ.

¹⁹ Đa lɛ, ɖɩsɔɔlɩ Ɛsɔ, mbʋ́ pʋyɔɔ yɔ, ɛnʋ calɩnɩ-ɖʋ sɔɔlʋʋ.

²⁰ Yee nɔɔyʋ ɛtɔm se ɛsɔɔlɩ Ɛsɔ nɛ ɛpaɖɩɣ lɛlaa yɔ, ɛkɛ pɔpɔtʋ. Mbʋ́ pʋyɔɔ yɔ, ɛzɩma ɛpɩzɩɣ ɛsɔɔlɩ Ɛsɔ weyi ɛɛnaɣ ɛ́lɛ́ yɔ nɛ pɩkazɩ ɛpaɖɩ ɛ-taabalʋ weyi ɛ nɛ ɩ panaɣ ɖama yɔ?

²¹ Paɣtʋ ndʋ́ Yesu Krɩstʋ ɖʋ-ɖʋ yɔ, ńdʋ́ lɛ se: yee nɔɔyʋ ɛsɔɔlɩ Ɛsɔ yɔ, pʋwɛɛ se ɛsɔɔlɩ ɖɔɖɔ lɛlaa.