1 Yohanɛɛsɩ 3 - New Testament

¹ Ɩna ɛzɩma mbʋ́ Caa Ɛsɔ sɔɔlɩ-ɖʋ kpem yɔ: ɛyaɣ-ɖʋ se e-piya. Toovenim ɖɔɖɔ lɛ, ɖɩkɛ e-piya. Ɛlɛ́, kedeŋa ñɩma tasɩm-ɖʋ, mbʋ́ pʋyɔɔ yɔ, patasɩm-ɩ.

² Mɛ-ɛgbaɣdɩnaa! Lɛɛlɛɛyɔ ɖɩkɛ Ɛsɔ piya. Nɔɔyʋ tanadɩ mbʋ́ ɖɩkɔŋ kɛʋ yɔ. Ɛlɛ́, ɖɩsɩm se alɩwaatʋ ndʋ́ Yesu Krɩstʋ pɩsɩɣ ɛkɔɔ nɛ pana-ɩ yɔ, ɖɩwɛɣ ɛzɩ ɛwɛʋ yɔ, mbʋ́ pʋyɔɔ yɔ, ɖɩnaɣ-ɩ ɛzɩ ɛwɛʋ yɔ.

³ Weyi ɛtaɣ-ɩ liu ḿbʋ́ yɔ, ɛñɔɔzʋʋ ɛ-tɩ nɛ ɛwɛɛ cɩɖɩcɩɖɩ ɛzɩ Yesu Krɩstʋ ɛnʋ ɛwɛʋ yɔ.

⁴ Weyi ɛ́lɛ́ lakɩ kɩwɛɛkɩm yɔ, ɛɛɖɔŋ Ɛsɔ paɣtʋ yɔɔ. Mbʋ́ pʋyɔɔ yɔ, kɩwɛɛkɩm labʋ kɛ paɣtʋ yʋsɩnaʋ.

⁵ Ŋgʋ́, ɩnawa se Yesu Krɩstʋ kɔm kedeŋa yɔɔ se ɛlɩzɩ ɛyáa pa-kɩwɛɛkɩm taa, ɛtala kɩwɛɛkɩm nabʋyʋ.

⁶ Pʋ-yɔɔ lɛ, weyi ɛ nɛ Yesu Krɩstʋ pɛkpɛndaa yɔ, eyeki kɩwɛɛkɩm labʋ. Ɛlɛ́, yee nɔɔyʋ ɛwɛɛ nɛ ɛlakɩ kɩwɛɛkɩm yɔ, pɩwɩlɩɣ se pʋdʋ tana-ɩ, ɛtasɩm-ɩ ɖɔɖɔ.

⁷ Men-piya! Itaayele nɛ nɔɔyʋ cɛtɩ-mɩ kaʋ! Weyi ɛlakɩ mbʋ́ pʋtʋʋzaa yɔ, ɛkɛ kʋtʋʋzʋ ɛzɩ Yesu Krɩstʋ yɔ.

⁸ Weyi ɛ́lɛ́ ñɛwɛɛ nɛ ɛlakɩ kɩwɛɛkɩm yɔ, ɛkɛ eleeu ñɩnʋ. Mbʋ́ pʋyɔɔ yɔ, ɛnʋ wɛna nɛ ɛlakɩ kɩwɛɛkɩm ɖooo ɛzɩ Ɛsɔ labʋ kedeŋa yɔ. Pʋ-yɔɔ Ɛsɔ Pɩyalʋ kɔm kedeŋa yɔɔ se ɛwɛɛkɩ mbʋ́ eleeu ɛnʋ ɛlaba yɔ.

⁹ Weyi ɛkɛ Ɛsɔ pɩɣa yɔ, ɛɛtasɩɣ kɩwɛɛkɩm labʋ. Mbʋ́ pʋyɔɔ yɔ, Ɛsɔ ɖoŋ wɛ ɛ-taa. Ɛɛpɩzɩɣ ɛtasɩ labʋ kɩwɛɛkɩm: ɛ-Caa lɛ Ɛsɔ.

¹⁰ Ɩna mbʋ́ pɩwɩlɩɣ kaŋŋ se ɛyʋ kɛ Ɛsɔ pɩɣa yaa eleeu ñɩŋga yɔ: yee nɔɔyʋ ɛlabɩ mbʋ́ pɩtatʋʋzɩ yɔ yaa ɛtɔsɔɔlɩ lɛlaa yɔ, ɛtɛkɛ Ɛsɔ pɩɣa.

Đama sɔɔlʋʋ tɔm

¹¹ Tɔm ndʋ́ ɩnɩ ɖooo kajalaɣ taa yɔ, ńdʋ́ lɛ se: pʋwɛɛ se ɖɩsɔɔlɩ ɖama.

¹² Pɩtamʋnɩ se ɖɩwɛɛ ɛzɩ Satanɩ ñɩnʋ Kayɛnɩ weyi ɛkʋ e-neu yɔ. Ɛkʋ-ɩ, mbʋ́ pʋyɔɔ yɔ, e-neu lakasɩ tʋʋzaa nɛ ɛnʋ ñɩnzɩ fɛyɩ ɖeu.

¹³ Man-taabalaa! Yee kedeŋa yɔɔ cɩnɛ ɛyáa ɛpaɖɩɣ-mɩ yɔ, pɩtaaɖɩɣzɩ-mɩ.

¹⁴ Đa lɛ, ɖɩna ɖeu se ɖɩlɩ sɩm taa nɛ ɖihiɣ wezuu, mbʋ́ pɩwɩlɩɣ-pʋ yɔ lɛ se ɖɩsɔɔlɩ ɖa-taabalaa. Weyi ɛtɔsɔɔlɩ ɛ-taabalʋ yɔ, ɛkpɛndɩ ɛwɛ sɩm taa.

¹⁵ Weyi ɛpaɖɩɣ ɛ-taabalʋ yɔ, ɛkɛ ɛyáa kʋyʋ. Ɩtɛm naʋ se ɛyáa kʋyʋ fɛyɩnɩ wezuu maatɛŋ.

¹⁶ Mbʋ́ pɩwɩlɩɣ-ɖʋ sɔɔlɩm yɔ lɛ se: Yesu Krɩstʋ tisaa nɛ ɛsɩ ɖɔ-yɔɔ. Pʋ-yɔɔ lɛ, pʋwɛɛ se ɖa ɖɔɖɔ ɖɩsɩ ɖa-taabalaa yɔɔ.

¹⁷ Yee nɔɔyʋ ɛwɛnɩ ñɩm nɛ ɛna se ɛ-taabalʋ fɛyɩnɩ pʋyʋ nɛ piteheyi-i natʋyʋ lɛ, ɛzɩma ɛpɩzɩɣ ɛtɔ se ɛsɔɔlɩ Ɛsɔ yɔ?

¹⁸ Men-piya! Pɩfɛyɩ se ɖɩsɔɔlɩ ɖa-taabalaa nɛ nɔsɩ yem, ɛlɛ́, pʋwɛɛ se ɖɩsɔɔlɩ-wɛ nɛ ɖa-lakasɩ toovenim taa.

¹⁹ Yee ɖɩlakɩ ḿbʋ́ yɔ, pɩwɩlɩɣ-ɖʋ se ɖɩkɛ toovenim tɩnaa. Ḿbʋ́ kɔŋnɩ yebu ɖɔɖɔ nɛ ɖa-laŋa hɛɛ Ɛsɔ ɛsɩndaa.

²⁰ Toovenim lɛ, paa ɖa-laŋa ɛkʋyʋʋ ɖɔ-yɔɔ se ɖɩlabɩ kɩwɛɛkɩm yɔ, ɖɩnawa se Ɛsɔ kɩlɩ ɖa-laŋa, ɛsɩm pɩtɩŋa payɩ.

²¹ Mɛ-ɛgbaɣdɩnaa! Yee ɖa-laŋa ɛɛkʋyʋʋ ɖɔ-yɔɔ yɔ, pʋbʋ ɖɩpɩzɩɣ ɖɩsɩŋ ɛ-ɛsɩndaa kaalɛyɩtʋ.

²² Ɛhaɣ-ɖʋ ɖɔɖɔ mbʋ́ ɖɩpɔzʋʋ-ɩ yɔ pɩtɩŋa payɩ, mbʋ́ pʋyɔɔ yɔ, ɖɩɖɔŋ ɛ-paɣtʋ yɔɔ nɛ ɖɩlakɩ mbʋ́ pɩkɛdɩnɩ-ɩ yɔ.

²³ Ɛ-paɣtʋ ńdʋ́ lɛ se: ɖɩwɛnɩ lidaʋ ɛ-Pɩyalʋ Yesu Krɩstʋ yɔɔ nɛ ɖɩsɔɔlɩ ɖama ɛzɩ ɛ́lɛ́ ɖʋʋ-ɖʋ se ɖɩla yɔ.

²⁴ Weyi ɛɖɔŋ Ɛsɔ paɣtʋ yɔɔ yɔ, ɛ nɛ ɩ pɛwɛ ɖama taa. E-Fezuu Kiɖeɖeu ŋgʋ́ ɛha-ɖʋ yɔ, ŋ́gʋ́ wɩlɩɣnɩ-ɖʋ se ɖa nɛ ɩ ɖɩwɛ ɖama taa.