1 Yohanɛɛsɩ 2 - New Testament

¹ Men-piya! Mamaɣ-mɩ takayaɣ kanɛ se ɩtaala kɩwɛɛkɩm. Ɛlɛ́, yee pɩlabɩ se nɔɔyʋ labɩ kɩwɛɛkɩm yɔ, pʋdʋ ɛtɩlɩ se nɔɔyʋ wɛ Caa Ɛsɔ cɔlɔ nɛ etendiɣ-i se ekpeɣ-ɖʋ ɖa-kɩwɛɛkɩm. Ɛnʋ lɛ Yesu Krɩstʋ, ɛtʋʋzaa.

² Ɛ-maɣmaɣ ɛ-calɩm kpɛdɩnɩ se Ɛsɔ ɛtɩŋnɩ pʋ-yɔɔ nɛ ekpeɣ-ɖʋ ɖa-kɩwɛɛkɩm. Pɩtasɩɩnɩ ɖe-ɖeke, ɛlɛ́, ekpeɣ ɖɔɖɔ kedeŋa yɔɔ ɛyáa tɩŋa payɩ pa-ñɩmbʋ.

Paɣtʋ kɩfatʋ tɔm

³ Yee ɖɩɖɔŋ Ɛsɔ paɣtʋ yɔɔ camɩyɛ yɔ, pɩwɩlɩɣ toovenim se ɖɩsɩm-ɩ.

⁴ Yee nɔɔyʋ ɛtɔm se ɛsɩm Ɛsɔ nɛ ɛɛɖɔŋ ɛ-paɣtʋ yɔɔ yɔ, pʋdʋ kɛ cɛtɩyʋ, ɛtasɩ toovenim.

⁵ Weyi ɛ́lɛ́ ɖɔŋ Ɛsɔtɔm yɔɔ yɔ, ɛkɛ weyi ɛsɔɔlɩ-ɩ nɛ ɛ-laŋɩyɛ tɩŋa pilim yɔ. Mbʋ́ pɩwɩlɩɣ se ɖa nɛ Ɛsɔ ɖɩlabɩ nɔɔ kʋɖʋmaɣ yɔ lɛ se:

⁶ weyi ɛkaɖɩɣ kpayɩ se ɛ nɛ Ɛsɔ pɛkpɛndaa yɔ, pʋwɛɛ se pʋdʋ ɛcaɣ wezuu ɛzɩ Yesu Krɩstʋ caɣʋ yɔ.

⁷ Mɛ-ɛgbaɣdɩnaa! Pɩtɛkɛ paɣtʋ kɩfatʋ natʋyʋ tɔm mamaɣ se meheyi-mɩ. Ɛlɛ́, kɩbɩndʋ ndʋ́ peheyi-mɩ ɖooo kiɖe tɛɛ nɛ itisi yɔ, tɩ-tɔm mamaɣ-mɩ. Paɣtʋ kɩbɩndʋ ńdʋ́ lɛ tɔm ndʋ́ ɩnɩwa yɔ.

⁸ Paa ḿbʋ́, tɔm ndʋ́ mamaɣ-mɩ yɔ, tɩkɛ paɣtʋ kɩfatʋ. Mbʋ́ pʋyɔɔ yɔ, cɩkpɛndʋʋ ɖɔŋ ɖɛʋ nɛ ñalɩmɩyɛ ñapazɩ ñalʋʋ: ńɖɩ́ lɛ toovenim mbʋ́ pʋwɛ mɩ nɛ Yesu Krɩstʋ mɩ-taa yɔ.

⁹ Yee nɔɔyʋ ɛtɔm se ɛwɛ ñalɩmɩyɛ taa nɛ ɛpaɖɩɣ ɛ-taabalaa yɔ, pɩwɩlɩɣ se ɛwɛ cɩkpɛndʋʋ taa tam.

¹⁰ Ɛlɛ́, yee nɔɔyʋ ɛsɔɔlɩ ɛ-taabalaa yɔ, ɛwɛ ñalɩmɩyɛ taa, nabʋyʋ fɛyɩ se pɩpɩzɩɣ pucoɖi-i Ɛsɔ nʋmɔʋ taa.

¹¹ Yee nɔɔyʋ ɛpaɖɩɣ ɛ-taabalaa yɔ, ɛwɛ cɩkpɛndʋʋ taa. Ɛɖɔŋ ɖɔɖɔ cɩkpɛndʋʋ taa, ɛɛnaɣ ɖenɖe ewoki yɔ, mbʋ́ pʋyɔɔ yɔ, cɩkpɛndʋʋ yʋlɩsɩ ɛ-ɛsɛ.

Ɖɩla mbʋ́ Ɛsɔ liu wɛɛ yɔ

¹² Men-piya! Mamaɣ-mɩ takayaɣ kanɛ se meheyi-mɩ tɔm tʋnɛ, mbʋ́ pʋyɔɔ yɔ, Ɛsɔ tɛm tɩŋnaʋ Yesu Krɩstʋ yɔɔ nɛ ekpeɣ-mɩ mɩ-kɩwɛɛkɩm.

¹³ Man-caanaa! Mɩ lɛ, mamaɣ-mɩ, mbʋ́ pʋyɔɔ yɔ, ɩsɩm weyi ɛɛwɛɛ nɛ pʋcɔ Ɛsɔ la kedeŋa yɔ. Evebiya! Mɩ lɛ, mamaɣ-mɩ-tʋ, mbʋ́ pʋyɔɔ yɔ, ɩwabɩ Satanɩ.

¹⁴ Men-piya! Mama-mɩ-tʋ, mbʋ́ pʋyɔɔ yɔ, ɩsɩm Caa Ɛsɔ. Man-caanaa! Mama-mɩ-tʋ, mbʋ́ pʋyɔɔ yɔ, ɩsɩm weyi ɛɛwɛɛ nɛ pʋcɔ Ɛsɔ la kedeŋa yɔ. Evebiya! Mama-mɩ-tʋ, mbʋ́ pʋyɔɔ yɔ, ɩwɛ ɖoŋ. Ɩɖɔkɩ Ɛsɔtɔm mɩ-laŋa taa kpam nɛ ɩwa Satanɩ.

¹⁵ Ɩtaasɔɔlɩ kedeŋa kanɛ yaa mbʋ́ pʋwɛ kɔ-yɔɔ yɔ. Yee nɔɔyʋ ɛsɔɔlɩ-kɛ yɔ, ɛtɔsɔɔlɩ Caa Ɛsɔ.

¹⁶ Mbʋ́ pɩtɩŋa pʋwɛ kɔ-yɔɔ yɔ, ḿbʋ́ yɔ: kɩdɛkɛdɩm mbʋ́ ɛyáa sɔɔlɩ labʋ yɔ, ɛsɛ naɣnaɣ nɛ ñɩm yɔɔ tɩ kpazʋʋ. Pɩtɩŋa payɩ pɩlɩnɩ kedeŋa yɔɔ, pɩtɛkɛ Caa Ɛsɔ cɔlɔ pɩlɩnaa.

¹⁷ Ɩtɩlɩ camɩyɛ se kedeŋa ɖɔŋ tɛm nɛ mbʋ́ pɩtɩŋa payɩ ɛyáa ɖʋʋ pʋ-yɔɔ ɛsɛ yɔ, pɩtɛŋ ɖɔɖɔ. Ɛlɛ́, weyi ɛlakɩ mbʋ́ Ɛsɔ liu wɛɛ yɔ, ɛ́lɛ́ cakɩ wezuu tam.

Krɩstʋ koyindinaa nabɛyɛ wɛ mɩ-haɖaa taa

¹⁸ Men-piya! Kedeŋa wɩzɩ tɛm! Ɩnɩwa se paa pɩɩla ɛzɩma, Krɩstʋ koyindu kaɣ kɔm. Ɖɔɖɔ lɛ, ɖɩnawa se alɩwaatʋ tʋnɛ tɩ-taa e-koyindinaa sakɩyɛ lɩwa. Ḿbʋ́ ɖɩnanaa se kedeŋa wɩzɩ tɛm.

¹⁹ Pɩtɛ ɛyáa ḿbá, ɖɛ-hɛkʋ taa palɩnaa, ɛlɛ́, pataakɛ ɖa-ñɩma siŋŋ. Toovenim lɛ, yee paakɛ ɖa-ñɩma yɔ, paawɛ ɖɛ-hɛkʋ taa. Pɩlabɩ ḿbʋ́ se ɛyáa ɛna se patɩŋa pataakɛ ɖa-ñɩma siŋŋ.

²⁰ Mɩ lɛ, Ɛsɔ Ñɩnʋ ha-mɩ e-Fezuu Kiɖeɖeu ɛzɩ papɩyʋʋ ɛyʋ ñʋʋ taa num yɔ nɛ mɩtɩŋa payɩ ɩnaɣ mbʋ́ pɩkɛ toovenim yɔ.

²¹ Pʋ-yɔɔ lɛ, pɩtɛkɛ se ɩtasɩ toovenim yɔɔ mamaɣ-mɩ. Ɛlɛ́, ɩsɩm-pʋ yɔɔ mamaɣ-mɩ. Ɩnawa ɖɔɖɔ se cɛtɩm nabʋyʋ ɛɛlɩɣnɩ toovenim taa.

²² Anɩ lɛ cɛtɩyʋ yɔ? Ɛnʋ lɛ weyi ɛkpɛzɩɣ se pɩtɛkɛ Yesu lɛ Weyi Ɛsɔ Lɩzaa yɔ. Pʋdʋ kɛ Krɩstʋ koyindu: ekizi Caa Ɛsɔ nɛ ɛ-Pɩyalʋ pa-naalɛ.

²³ Toovenim lɛ, weyi ekiziɣ Ɛsɔ Pɩyalʋ yɔ, ɛtasɩ ɖɔɖɔ Caa Ɛsɔ. Weyi ɛ́lɛ́ tisiɣ se ɛsɩm Ɛsɔ Pɩyalʋ yɔ, ɛsɩm ɖɔɖɔ Caa Ɛsɔ.

²⁴ Pʋ-yɔɔ lɛ, iyele nɛ tɔm ndʋ́ ɩnɩ ɖooo kiɖe tɛɛ yɔ, tɩcaɣ mɩ-taa. Yee tɔm ndʋ́ ɩnɩ ɖooo kiɖe tɛɛ yɔ, tɩwɛ mɩ-taa yɔ, pʋbʋ, mɩ nɛ Caa Ɛsɔ nɛ ɛ-Pɩyalʋ ɩkpɛndaa.

²⁵ Mbʋ́ Yesu Krɩstʋ ɖʋwa se ɛhaɣ-ɖʋ yɔ lɛ: wezuu maatɛŋ.

²⁶ Ɛyáa mbá pacaɣ se pɛcɛtɩ-mɩ yɔ, pɔ-tɔm mamaɣ se meheyi-mɩ.

²⁷ Mɩ lɛ, Fezuu ŋgʋ́ Yesu Krɩstʋ ha-mɩ ɛzɩ papɩyʋʋ ɛyʋ ñʋʋ taa num yɔ, kɩwɛ mɩ-cɔlɔ. Yee ḿbʋ́ pɩtatasɩ pɔzʋʋ se nɔɔyʋ ɛkpɛlɩkɩ-mɩ, mbʋ́ pʋyɔɔ yɔ, kɩwɩlɩɣ-mɩ pɩtɩŋa payɩ nɛ toovenim, cɛtɩm fɛyɩ pɩ-taa. Pʋ-yɔɔ lɛ, mɩ nɛ Yesu Krɩstʋ mɩ-kpɛndʋʋ ɛwɛɛ ḿbʋ́ ɛzɩ Fezuu Kiɖeɖeu ŋ́gʋ́ kɩwɩlʋʋ-mɩ yɔ.

²⁸ Men-piya! Yee ḿbʋ́ mɩ nɛ Yesu Krɩstʋ mɩ-kpɛndʋʋ ɛwɛɛ ḿbʋ́ nɛ ɖɩpɩzɩ ɖɩñɔtɩnɩ-ɩ kaalɛyɩtʋ puwiye nɖɩ́ ɛpɩsɩɣ ɛkɔɔ nɛ pana-ɩ yɔ. Puwiye ńɖɩ́, fɛyɛ ɛɛkpaɣ-ɖʋ.

Ɛsɔ piya ɩɩtasɩɣ kɩdɛkɛdɩm labʋ

²⁹ Ɩsɩm camɩyɛ se Krɩstʋ tʋʋzaa. Pʋ-yɔɔ lɛ, pʋwɛɛ ɖɔɖɔ se itisi se weyi ɛlakɩ mbʋ́ pʋtʋʋzaa yɔ, ɛkɛ Ɛsɔ pɩɣa.