1 Timootee 6 - New Testament

Yomaa nɛ pa-caanaa tɔm

¹ Pʋwɛɛ se mbá patɩŋa payɩ pɛkɛ yomaa yɔ, patɩlɩ se pʋmʋnaa se paɖʋ pa-caanaa hɩɖɛ siŋŋ. Ḿbʋ́ yekina nɛ nɔɔyʋ ɛɛyɔɔdʋʋ Ɛsɔ nɛ mbʋ́ ɖɩwɩlɩɣ yɔ ɛzaɣ́tʋ tɔm natʋyʋ.

² Yom weyi ɛ-caa kɛ Krɩstʋ tʋ yɔ, pʋwɛɛ se yom ɛnʋ, ɛtaaniɣzi-i se ɛkɛ ɛ-taabalʋ yɔ, ɛ nɛ ɩ pɛwɛ kɩmaŋ. Ɛlɛ́, pʋwɛɛ se ɛlabɩ-ɩ tʋmɩyɛ camɩyɛ. Mbʋ́ pʋyɔɔ yɔ, weyi ɛlakɩ-ɩ tʋmɩyɛ ńɖɩ́ yɔ, ɛkɛ Krɩstʋ tʋ nɛ taabalʋ kʋsɔɔlʋ. Tɔm ndʋ́ meheyi-ŋ lɛɛlɛɛyɔ yɔ, pʋwɛɛ se ŋwɩlɩ-tʋ ɛyáa nɛ ŋsazɩnɩ-wɛ.

Liidiye laɣzaɣ kɔŋnɩnɩ ɛzaɣ́tʋ tɩŋa

³ Yee nɔɔyʋ ɛwɩlɩɣ mbʋ́ pʋwɛnɩ ndɩ yɔ nɛ ɛɛɖɔŋ ɖa-Kɩpaɣlʋ Yesu Krɩstʋ tɔm kɩbandʋ nɛ ndʋ́ tiyeki se ɛyáa ɛɖɔ ɛzɩ Ɛsɔ liu wɛʋ yɔ pɔ-yɔɔ yɔ,

⁴ pʋdʋ wɛ cɛjɛyɛ. Ɛtatɩlɩ nabʋyʋ kpem. Tɔm hɔm kʋdɔŋ kpa-ɩ nɛ ɛ nɛ lɛlaa poyou tɔm ndɩ ndɩ yɔɔ. Ḿbʋ́ kɔŋnɩnɩ ɛsɩsɛmɩyɛ nɛ pana nɛ tʋtʋ nɛ ɖama yɔɔ lɩmaɣza kɩdɛkɛdɛɛ ɖʋʋ.

⁵ Pʋkɔŋnɩ ɖɔɖɔ you kaatɛŋa ɛyáa mbá pɛfɛyɩnɩ lɩmaɣza kɩbana nɛ patatasɩ sɩm toovenim yɔ. Pamaɣzɩɣ se yee ɛyʋ ɛñɩtaa ɛɖɔŋ Ɛsɔ nʋmɔʋ taa yɔ, pɩkɛɣnɩ-ɩ waɖɛ se ehiɣ liidiye.

⁶ Toovenim lɛ, Ɛsɔ nʋmɔʋ taa ɖɔm kɛnɩ ɛyʋ waɖɛ siŋŋ se ehiɣ kɛzɛɣa. Ɛlɛ́, pʋwɛɛ se ɛ-laŋɩyɛ ɛhʋlʋmɩnɩ mbʋ́ ɛwɛna yɔ.

⁷ Mbʋ́ pʋyɔɔ yɔ, ɖɩtaakpɛndɩnɩ pʋyʋ nɛ ɖɩkɔɔ kedeŋa yɔɔ cɩnɛ. Ḿbʋ́ ɖɔɖɔ alɩwaatʋ ndʋ́ ɖɩkʋyʋʋ kɔ-yɔɔ yɔ, ɖɩɩkpɛndɩɣnɩ ka-pʋyʋ.

⁸ Pʋ-yɔɔ lɛ, yee ɖɩwɛnɩ tɔɔnaɣ nɛ tokonaa yɔ, pʋwɛɛ se pɩmaɣ-ɖʋ.

⁹ Ɛlɛ́, mbá pacaɣ se pɛkɛ ñɩm tɩnaa yɔ, pasʋʋ takʋʋ taa nɛ kaamʋʋ kpa-wɛ. Pe-liu wɛ kɩmɛlɛndʋ ndʋ́ tɩwɛɛkɩɣ-wɛ yɔ. Ńdʋ́ sʋzʋʋnɩ-wɛ asayʋʋ taa.

¹⁰ Mbʋ́ pʋyɔɔ yɔ, liidiye laɣzaɣ sʋzʋʋ ɛyʋ ɛzaɣ́tʋ tɩŋa taa. Liidiye laɣzaɣ kakpa nabɛyɛ nɛ pele lidaʋ nʋmɔʋ nɛ pa-maɣmaɣ pasʋzɩ pa-tɩ wɩzasɩ ndɩ ndɩ taa.

Lɛɣtʋ ndʋ́ Pɔɔlɩ tasɩɣ Timootee yɔ

¹¹ Weyi ña ŋkɛ Ɛsɔ ɛyʋ yɔ, koli pɩtɛ lakasɩ ńzɩ́. Ñɩnɩ mbʋ́ pʋtʋʋzaa yɔ nɛ ŋñɩnɩ ɖɔɖɔ se ŋla mbʋ́ Ɛsɔ liu wɛɛ yɔ. Ñaɣ pana nɛ ŋwɛnɩ lidaʋ Ɛsɔ yɔɔ ḿbʋ́ nɛ ŋsɔɔlɩ ɛyáa nɛ ŋɖɔkɩ ña-tɩ nɛ ŋwɛɛ leleŋ.

¹² Lʋ lidaʋ taa lʋbɩyɛ kɩbanɖɛ. Ñaɣ pana nɛ ŋhiɣ wezuu maatɛŋ. Mbʋ́ pʋyɔɔ yɔ, kʋ-yɔɔ Ɛsɔ ya-ŋ nɛ ŋkaɖɩ aseɣɖe tɩnaa sakɩyɛ ɛsɩndaa kpayɩ se ŋwɛnɩ lidaʋ ɛ-yɔɔ.

¹³ Ɛsɔ weyi ɛhaɣ pɩtɩŋa payɩ wezuu yɔ nɛ Krɩstʋ Yesu weyi ɛkaɖɩ toovenim kpayɩ wiyaʋ sɔsɔ Pilaatɩ ɛsɩndaa yɔ pɛ-ɛsɩndaa lɛ, meheyiɣ-ŋ se:

¹⁴ ɖɔkɩ tɔm ndʋ́ meheyi-ŋ yɔ kpam nɛ ŋwɛɛ cɩɖɩcɩɖɩ. Pataana kawanaɣ nakɛyɛ ñɔ-yɔɔ nɛ pʋkɔɔ pɩsɩɩnɩ kɩyakʋ ŋgʋ́ ɖa-Kɩpaɣlʋ Yesu Krɩstʋ pɩsaa ɛkɔɔ yɔ.

¹⁵ Alɩwaatʋ ndʋ́ Ɛsɔ ɖʋwa yɔ tɩtalɩɣ lɛ, eyele nɛ Krɩstʋ pɩsɩ ɛkɔɔ. Ɛnʋ lɛ Ɛsɔ weyi ɛwɛ laŋhɛzɩyɛ taa yɔ. E-ɖeke koŋ ɛcɔŋnɩnɩ pɩtɩŋa pʋ-yɔɔ. Ɛnʋ lɛ awiya taa Wiyaʋ nɛ kɩpaɣlaa taa Kɩpaɣlʋ.

¹⁶ E-ɖeke koŋ ɛɛsɩkɩna, ñalɩmɩyɛ naɖɩyɛ taa ɛwɛɛ. Nɔɔyʋ ɛɛpɩzɩɣ ɛñɔtɩnɩ-ɖɩ. Nɔɔyʋ tana-ɩ, nɔɔyʋ ɛɛpɩzɩɣ ɛna-ɩ ɖɔɖɔ. Paɖʋ-ɩ hɩɖɛ nɛ e-ɖoŋ wɛɛ tam! Pɩla ḿbʋ́.

Mbʋ́ pʋwɛɛ se ñɩm tɩnaa ɩla yɔ

¹⁷ Ñɩm tɩnaa lɛ, heyi-wɛ se pataakpazɩ pa-tɩ. Pataataa pa-ñɩm, mbʋ́ pʋyɔɔ yɔ, pɩɩwɛɣ tam. Ɛlɛ́, pataa Ɛsɔ weyi ɛhaɣ-ɖʋ pɩtɩŋa payɩ sakɩyɛ se ɖa-laŋa ɛhʋlʋmɩnɩ-pʋ yɔ.

¹⁸ Heyi-wɛ ɖɔɖɔ se pala tʋma kɩbana. Palabɩ-yɛ sakɩyɛ nɛ pasɩnɩ lɛlaa, pahanɩ hɔ kɩbana.

¹⁹ Yee palakɩ ḿbʋ́ yɔ, pasɩɣ pa-tɩ ñɩm mbʋ́ pɩɩwɛɛkɩɣ yɔ cee wayɩ yɔɔ. Peeɖe pehikiɣ wezuu maatɛŋ.

Sɛtʋ

²⁰ Man-taabalʋ Timootee, ɖɔkɩ mbʋ́ Ɛsɔ ɖʋzɩ ñe-nesi taa yɔ nesi naalɛ kpam. Taaɖʋ ñɔ-nɔɔ tɔm ndʋ́ tɩɩwazɩɣ pʋyʋ nɛ tiiyeki se ɛyʋ ɛtɩlɩ Ɛsɔ yɔ tɩ-taa. Koli tɔm hɔm mbʋ́ ɛyáa kpakɩɣ se pɩkɛ lɛɣtʋ yɔ.

²¹ Mbʋ́ pʋyɔɔ yɔ, nabɛyɛ tɔŋaɣ se pɛwɛnɩ pɩtɛ lɛɣtʋ ńdʋ́ ḿbʋ́ nɛ pele lidaʋ nʋmɔʋ. Ɛsɔ ɛlabɩ-mɩ lootiye.