1 Timootee 4 - New Testament

Mbʋ́ pɩtɩŋa Ɛsɔ laba yɔ, pʋwɛ ɖeu

¹ Fezuu Kiɖeɖeu yɔɔdɩ kpayɩ se kɛtɛzaɣ alɩwaatʋ taa lɛ, ɛyáa nabɛyɛ kɔŋ yebu lidaʋ ŋgʋ́ pɛwɛnɩ Krɩstʋ yɔɔ yɔ nɛ panɩɣnɩ feziŋ weyi ɩcɛtɩɣ yɔ nɛ pewelesiɣ tɔm ndʋ́ aleewaa wɩlɩɣ yɔ.

² Tɛɛ nɛ pʋ-yɔɔ ñɩma mbá pɛcɛtɩɣ yɔ, ḿbá lesiɣni-wɛ nʋmɔʋ. Tɛɛ nɛ pʋ-yɔɔ ñɩma ḿbá, pa-ñʋŋ taa wɩlɩ kaŋ kaŋ ɛzɩ pɔhɔbɩ ñɩmɩyɛ miŋ nɛ pañaɣzɩ pe-feteɣnim yɔ.

³ Pɩtɛ ɛyáa ḿbá pɔtɔŋnɩ se pataakpaɣ halaa, pataatɔɔ tɔɔnasɩ nasɩyɩ. Ŋgʋ́, Ɛsɔ labɩ-sɩ se pɔtɔɔ-sɩ. Mbá pɛwɛnɩ lidaʋ Krɩstʋ yɔɔ nɛ patɩlɩ mbʋ́ pɩkɛ toovenim yɔ, papɩzɩɣ pɔtɔɔ-sɩ nɛ pasa Ɛsɔ sɩ-yɔɔ.

⁴ Mbʋ́ pɩtɩŋa payɩ Ɛsɔ laba yɔ, pʋwɛ ɖeu. Pɩfɛyɩ se pekizi pɩ-taa nabʋyʋ. Ɛlɛ́, ɖɩsɛɛ-ɩ mbʋ́ ɛhaɣ-ɖʋ yɔ pʋ-yɔɔ.

⁵ Mbʋ́ pʋyɔɔ yɔ, Ɛsɔtɔm nɛ Ɛsɔ sɛʋ peyekina se papɩzɩ pɔtɔɔ-pʋ.

Ɛzɩma ɖɩpɩzɩɣ ɖɩkɛ Yesu Krɩstʋ tʋmlaɖʋ kɩbanʋ?

⁶ Yee ŋwɩlɩɣ ña-taabalaa tɔm ńdʋ́ yɔ, ŋkɛɣ Krɩstʋ Yesu tʋmlaɖʋ kɩbanʋ. Ḿbʋ́ wɩlɩɣna se ŋyeki nɛ lidaʋ tɔm sʋʋnɩ-ŋ nɛ ŋɖɔŋ camɩyɛ tɔm kɩbandʋ ndʋ́ pɛkpɛlɩkɩ-ŋ yɔ tɩ-yɔɔ.

⁷ Kizi tɔm ndʋ́ tɩtɛkɛ Ɛsɔ ñɩndʋ yɔ nɛ halaa akpadɩyaa mʋya wena aawazɩɣ pʋyʋ yɔ. Malɩsɩ ña-tɩ nɛ ŋcaɣ wezuu ɛzɩ Ɛsɔ liu wɛʋ yɔ.

⁸ Yee nɔɔyʋ ɛmalɩsɩɣ e-tomnaɣ nɛ nabʋyʋ yɔ, pʋwɛ waɣzaɣ pazɩ yem. Ɛlɛ́, yee ɛcaɣ wezuu ɛzɩ Ɛsɔ liu wɛʋ yɔ yɔ, pʋwɛ waɣzaɣ pɩtɩŋa pɩ-taa. Mbʋ́ pʋyɔɔ yɔ, pɩhaɣ-ɖʋ lɛɛlɛɛyɔ wezuu nɛ cee wayɩ ñɩŋgʋ.

⁹ Tɔm ńdʋ́ tɩkɛ toovenim. Tɩmʋnaa se paa weyi etisi-tʋ nɛ ɛ-laŋɩyɛ tɩŋa.

¹⁰ Pʋ-yɔɔ ɖɩlakɩ tʋmɩyɛ sɩbʋ yɔɔ sɩbʋ yɔɔ nɛ ɖɩlʋkɩ. Mbʋ́ pʋyɔɔ yɔ, ɖɩtaɣ Ɛsɔ weyi ɛwɛ wezuu yɔ. Ɛkɛ ɛyáa tɩŋa payɩ ñʋʋ yaɖʋ, kɔzɩkɔzɩ mbá pɛwɛnɩ lidaʋ ɛ-yɔɔ yɔ.

¹¹ Ḿbʋ́ pʋwɛɛ se ŋheyi ɛyáa nɛ ŋwɩlɩ-wɛ.

Mbʋ́ pʋwɛɛ se ɖɩwɩlɩ mbá pataɣ Ɛsɔ liu yɔ

¹² Taayele se nɔɔyʋ ɛpɛŋ-ŋ tɛtɛ se ŋkɛ evebu. Ɛlɛ́, pʋwɛɛ se ŋwɩlɩ mbá pɛwɛnɩ lidaʋ Krɩstʋ yɔɔ yɔ nʋmɔʋ nɛ ñɔ-yɔɔdaɣ nɛ ñɔ-ɖɔnɛ nɛ ñɔ-sɔɔlɩm nɛ ñe-lidaʋ wɛnaʋ nɛ ña-cɩɖɩcɩɖɩ wɛtʋ.

¹³ Wɛɛ Ɛsɔtɔm kalʋʋ yɔɔ ɛyáa samaɣ taa nɛ ŋyele pɩlabɩ-wɛ hʋnʋm nɛ ŋwɩlɩ-wɛ-tʋ nɛ pʋkɔɔ pɩsɩɩnɩ alɩwaatʋ ndʋ́ mɔnkɔŋ yɔ.

¹⁴ Taaniɣzi kʋjɔʋ ŋgʋ́ Fezuu Kiɖeɖeu labɩ-ŋ yɔ. Kɩlabɩ-ŋ-kʋ alɩwaatʋ ndʋ́ paayɔɔdɩ ñɔ-yɔɔ tɔm ndʋ́ tɩlɩnɩ Ɛsɔ cɔlɔ nɛ sɔsaa tɩnɩ ñɔ-yɔɔ nesi yɔ.

¹⁵ Pʋwɛɛ se ŋha ña-tɩ pilim nɛ ŋla tʋmɩyɛ ńɖɩ́ nɛ ɛyáa tɩŋa na ɛzɩma mbʋ́ ŋwokini ɛsɩndaa yɔ.

¹⁶ Ñaɣ pana ŋɖɔkɩ ña-tɩ nɛ ŋɖʋ ɛsɩyɛ mbʋ́ ŋwɩlɩɣ yɔ pʋ-yɔɔ. Mbʋ́ pʋyɔɔ yɔ, yee ŋlabɩ ḿbʋ́ yɔ, ŋyakɩ ña nɛ mbá pewelesiɣni-ŋ yɔ mɩ-ñʋʋ.