1 Timootee 3 - New Testament

Yesu ŋgbɛyɛ ñʋndɩnaa tɔm

¹ Tɔm ndʋ́ meheyiɣ-mɩ yɔ, tɩkɛ toovenim. Ńdʋ́ lɛ se: yee nɔɔyʋ ɛcaɣ se ɛkɛ Yesu ŋgbɛyɛ taa ñɩma yɔɔ cɔnɩyʋ yɔ, tʋmɩyɛ kɩbanɖɛ pʋdʋ liu wɛɛ.

² Pʋwɛɛ se weyi ɛlakɩ tʋmɩyɛ ńɖɩ́ yɔ, kawanaɣ nakɛyɛ ɛtaawɛɛ ɛ-yɔɔ. Ɛwɛnɩ halʋ kʋɖʋm koŋ, ɛ-ɛsɛ ekuli. Ɛkɛ ɛyʋ weyi ɛmaɣzɩɣ nɛ pʋcɔ ɛla pʋyʋ yɔ, ɛla mbʋ́ pʋmʋnaa yɔ, ɛmʋ agɔmaa camɩyɛ. Pʋwɛɛ se ɛtɩlɩ ɛzɩma mbʋ́ pawɩlɩɣ Ɛsɔtɔm yɔ.

³ Pɩtamʋnɩ se ɛkɛ sʋlʋm kpaŋɩyʋ, ɛtaawɛɛ helu helu. Ɛlɛ́, pʋwɛɛ se ɛwɛɛ leleŋ, ɛtaakɛ tɔm cayʋ, ɛtaawɛɛ liidiye laɣzaɣ.

⁴ Pʋwɛɛ se ɛ-maɣmaɣ ɛpɩzɩ ɛcɔnɩ ɛ-hɔʋ taa ñɩma yɔɔ camɩyɛ nɛ ɛkpɛlɩkɩ e-piya nɛ siluzi sɩ-tɩ ɛ-tɛɛ nɛ sɩñam-ɩ ɖeu siŋŋ.

⁵ Mbʋ́ pʋyɔɔ yɔ, yee ɛyʋ ɛɛpɩzɩɣ ɛ-maɣmaɣ ɛ-hɔʋ taa ñɩma yɔɔ cɔnaʋ lɛ, ɛzɩma ɛpɩzɩɣ ɛcɔnɩ Ɛsɔ ŋgbɛyɛ taa ñɩma yɔɔ yɔ?

⁶ Pɩtamʋnɩ se ɛkɛ ɛyʋ weyi ɛpɩsɩ Krɩstʋ tʋ nɛ piteleɖida yɔ. Pɩtɛkɛ ḿbʋ́, nabʋyʋ taa ɛkɔŋ ɛkpazɩ ɛ-tɩ nɛ Ɛsɔ hʋʋnɩ-ɩ nɛ ɛkʋ ɛ-tɔm ɛzɩ ɛkʋʋ Satanɩ ñɩndʋ yɔ.

⁷ Pʋwɛɛ ɖɔɖɔ se mbá pɛtɛkɛ Yesu ŋgbɛyɛ taa ñɩma yɔ, palɩzɩ ɛ-yɔɔ aseɣɖe kɩbanɖɛ. Pɩtɛkɛ ḿbʋ́, pɛpɛŋɩɣ-ɩ tɛtɛ nɛ Satanɩ kaamʋʋ kɔɔ kɩkpa-ɩ.

Mbá palɩzɩ-wɛ se patayɩɣ kʋñɔndɩnaa mbʋ́ paha-wɛ yɔ pɔ-tɔm

⁸ Pʋwɛɛ se mbá pɛkɛɣ tayɩyaa Yesu ŋgbɛyɛ taa yɔ, pɛkɛ ɛyáa kʋtʋʋzaa, pataawɛnɩ nɔsɩ naalɛ naalɛ. Pɩfɛyɩ se pɔñɔɔ sʋlʋm nɛ pɩkɩlɩ-wɛ yaa pomuli lɛlaa se pehiɣ kɛzɛɣa.

⁹ Pʋwɛɛ se pɔ́ɖɔ́kɩ lidaʋ tɔm ndʋ́ Ɛsɔ lɩzaa ɛwɩlɩ ɛ-ñɩma yɔ. Ɛlɛ́, pa-lɩmaɣza ɛtaacɛyɩ-wɛ pe-wezuu caɣʋ taa.

¹⁰ Pʋwɛɛ se pacalɩ-wɛ maɣzʋʋ nɛ yee patana kawanaɣ nakɛyɛ pɔ-yɔɔ lɛ, peyebi-wɛ nɛ pɛkɛ tayɩyaa.

¹¹ Pʋwɛɛ se pa-halaa ɛkɛ ɖɔɖɔ ɛyáa kʋtʋʋzaa. Pataayɔɔdʋʋ ɛyáa tɔm, pɛ-ɛsɛ ekuli nɛ pala paa ɛbɛ ɛzɩ pʋpɔzʋʋ yɔ.

¹² Pʋwɛɛ se weyi ɛkɛ tayɩyʋ yɔ, ɛwɛnɩ halʋ kʋɖʋm koŋ. Pʋwɛɛ se ɛpɩzɩ ɛcɔnɩ e-piya nɛ ɛ-hɔʋ taa ñɩma lɛlaa pɔ-yɔɔ camɩyɛ.

¹³ Mbʋ́ pʋyɔɔ yɔ, tayɩyaa mbá palakɩ pa-tʋmɩyɛ camɩyɛ yɔ, paɖʋʋ-wɛ hɩɖɛ, pa-laŋɩyɛ ɛɛmaɣnɩ pʋyʋ Ɛsɔ ɛsɩndaa. Mbʋ́ pʋyɔɔ yɔ, pɛwɛnɩ lidaʋ Krɩstʋ Yesu yɔɔ.

Lɛɣtʋ ndʋ́ ɖe-lidaʋ wɩlɩɣ-ɖʋ yɔ tɩ-tɔm

¹⁴ Mamaɣ-ŋ takayaɣ kanɛ, ɛlɛ́, mamaɣzɩɣ se mɔnkɔŋ ñɛ-tɛ alɩwaatʋ tʋnɛ tɩ-taa.

¹⁵ Yee mɔntɔkɔɔ lɔŋ yɔ, takayaɣ kanɛ kawɩlɩɣnɩ-ŋ ɛzɩma mbʋ́ pʋwɛɛ se pɔɖɔ Ɛsɔ hɔʋ taa yɔ. Ŋ́gʋ́ lɛ Ɛsɔ weyi ɛwɛ wezuu yɔ ɛ-ŋgbɛyɛ. Ŋ́gʋ́ ɖɔɖɔ lɛ toovenim tɔm tilimiye nɛ ti-sisika.

¹⁶ Toovenim lɛ, tɔm ndʋ́ tɩɩwɛ mɛsaɣ tɛɛ nɛ Ɛsɔ wɩlɩ-ɖʋ-tʋ nɛ ɖɩtɩŋɩɣnɩ tɩ-yɔɔ nɛ ɖɩlakɩ mbʋ́ e-liu wɛɛ yɔ, tɩpaɣlaa kámaɣ́ fɛyɩ! Ńdʋ́ lɛ se: weyi ɛwɛ ɛsɔdaa yɔ, etiba nɛ ɛpɩsɩ ɛyʋ. Fezuu Kiɖeɖeu wɩlaa se ɛtʋʋzaa, Ɛsɔ tiyiyaa na-ɩ. Posusi ɛ-tɔm paa le, ɛyáa sakɩyɛ wɛnɩ lidaʋ ɛ-yɔɔ, Ɛsɔ kpazɩ-ɩ koboyaɣ taa.