1 Timootee 2 - New Testament

A-yɔɔ pʋwɛɛ se ɖɩsɛɛ Ɛsɔ?

¹ Lɛɛlɛɛyɔ, mbʋ́ mancalɩɣ ɛyáa heyuu yɔ lɛ se: pɛsɛɛ Ɛsɔ nɛ petendi-i nɛ pasam-ɩ ɛyáa kpeekpe yɔɔ.

² Ɩla ḿbʋ́ ɖɔɖɔ awiya nɛ ñʋndɩnaa patɩŋa payɩ pɔ-yɔɔ nɛ ɖɩpɩzɩ ɖɩcaɣ wezuu laŋhɛzɩyɛ taa fɛɛɛ nɛ ɖɩña Ɛsɔ camɩyɛ nɛ ɖɩla mbʋ́ pʋmʋnaa yɔ.

³ Ḿbʋ́ wɛnɩ ɖeu nɛ pɩkɛdɩnɩ ɖa-ñʋʋ yaɖʋ Ɛsɔ.

⁴ E-liu wɛɛ se pɩya ɛyáa tɩŋa payɩ ñʋʋ nɛ patɩlɩ toovenim.

⁵ Mbʋ́ pʋyɔɔ yɔ, Ɛsɔ kʋɖʋm koŋ wɛna nɛ ceyiyu kʋɖʋm koŋ ñɛwɛɛ Ɛsɔ ɛnʋ nɛ ɛyáa pɛ-hɛkʋ taa nɛ patɩŋɩɣnɩ ɛ-yɔɔ. Ɛnʋ lɛ Krɩstʋ Yesu.

⁶ Ɛkpaɣ ɛ-maɣmaɣ ɛ-tɩ nɛ ɛhɛyɩ ɛyáa yɔɔ se puholi patɩŋa payɩ: ḿbʋ́ lɩzɩnɩ aseɣɖe alɩwaatʋ ndʋ́ Ɛsɔ ɖʋwa yɔ se Ɛsɔ ɛnʋ e-liu wɛɛ se ɛya ɛyáa tɩŋa payɩ ñʋʋ.

⁷ Pʋ-yɔɔ palɩzɩ man-tɩ tɩŋa se mɛnkɛ Ɛsɔtɔm susiyu nɛ mɛntɛ mɛnkɛ Krɩstʋ tiyiyu. Mɔyɔɔdʋʋ toovenim, maacɛtɩɣ. Paɖʋ-m se mawɩlɩ mbá pɛtɛkɛ Yuda ñɩma yɔ toovenim nɛ lidaʋ pɔ-tɔm.

Ɛzɩma pʋwɛɛ se abalaa nɛ halaa pɛwɛɛ yɔ

⁸ Pʋ-yɔɔ me-liu wɛɛ se abalaa ɛsɛɣ Ɛsɔ paa le lɛ, pakpazɩ pe-nesi ɛsɔdaa. Ɛlɛ́, kɩwɛɛkɩm nabʋyʋ ɛtaawɛɛ pɔ-yɔɔ. Nɔɔyʋ pana ɛtaakpanɩ lɛlʋ, you ɛtaawɛɛ ɖɔɖɔ.

⁹ Me-liu wɛɛ ɖɔɖɔ se halaa esuu wondu ɛzɩma mbʋ́ pʋmʋnaa yɔ, pataaɖɛlɛsɩ niye, pataakɩlɩ pa-tɩ canʋʋ. Pataakɩlɩ canʋʋ pɔ-ñɔsɩ, pataalɛɛ ñɩɣlɩ́m nɩŋgbacaɣlɩnaa yaa lɩtʋ ndʋ́ tɩwɛ liidiye yɔ, pataasuu wondu ndʋ́ tɩkɩlɩ liidiye yɔ.

¹⁰ Ɛlɛ́, pala tʋma kɩbana ɛzɩ pʋmʋnaʋ se halaa mbá pɔtɔŋ pa-tɩ se pañaŋ Ɛsɔ yɔ pala yɔ.

¹¹ Pʋwɛɛ se halaa esu nɛ petisi pa-tɩ kpem alɩwaatʋ ndʋ́ pɛkpɛlɩkɩɣ-wɛ Ɛsɔtɔm yɔ.

¹² Maahaɣ halʋ nʋmɔʋ se ɛwɩlɩ abalaa yaa ɛwɛnɩ ɖoŋ pɔ-yɔɔ. Pʋwɛɛ se esu.

¹³ Mbʋ́ pʋyɔɔ yɔ, Aɖam Ɛsɔ calɩnɩ labʋ kedeŋa yɔɔ. Pʋwayɩ lɛ, ɛla Ɛɛvɩ.

¹⁴ Pɩtɛkɛ Aɖam pɛcɛtaa, ɛlɛ́, halʋ pɛcɛtaa nɛ eyele ɖɔm mbʋ́ Ɛsɔ ɖʋwa yɔ pʋ-yɔɔ.

¹⁵ Paa ḿbʋ́ yɔ, halaa lʋlʋʋ piya nɛ Ɛsɔ ya pa-ñʋʋ. Ɛlɛ́, pʋwɛɛ se pɛwɛnɩ lidaʋ ɛ-yɔɔ tam ḿbʋ́ nɛ pɔsɔɔlɩ ɛyáa nɛ pɛwɛɛ cɩɖɩcɩɖɩ Ɛsɔ ɛnʋ ɛ-ɛsɩndaa. Pataaɖɛlɛsɩ niye.