1 Tesalooniki 4 - New Testament

Ɖɩcaɣ wezuu ɛzɩ Ɛsɔ liu wɛʋ yɔ

¹ Taabalaa! Đɩɩkpɛlɩkɩ-mɩ ɛzɩma mbʋ́ pʋwɛɛ se ɩɖɔ nɛ pɩkɛdɩnɩ Ɛsɔ yɔ. Paa pɩɩla ɛzɩma, ḿbʋ́ ɩɖɔŋ. Ɛlɛ́, tɔm ndʋ́ ɖɩtɛzɩɣnɩ-mɩ yɔ lɛ se ɖɩsazɩɣ-mɩ nɛ ɖiheyiɣ-mɩ ɖa nɛ Kɩpaɣlʋ Yesu ɖɛ-kpɛndʋʋ taa se: ɩla nɛ pɩkɩlɩ ḿbʋ́!

² Toovenim lɛ, ɩsɩm tɔm ndʋ́ ɖiheyi-mɩ nɛ ɛ-nɔɔ se ɩɖɔ tɩ-yɔɔ yɔ.

³ Mbʋ́ Ɛsɔ liu wɛɛ yɔ lɛ se: ɩtɛzɩ wɛʋ cɩɖɩcɩɖɩ. Ḿbʋ́ lɛ se ɩkpa mɩ-tɩ nɛ acɛyɛ labʋ.

⁴ Paa mɩ-taa weyi ɛtɩlɩ ɛzɩma mbʋ́ pʋwɛɛ se ɛ nɛ ɛ-halʋ pacaɣ wezuu ɛzɩ pʋmʋnaʋ Ɛsɔ ɛsɩndaa yɔ nɛ pʋɖʋ-mɩ hɩɖɛ.

⁵ Ɛtaayele ɛ-tɩ nɛ pɩɖɛnɩ-ɩ lɩmaɣza kɩdɛkɛdɛɛ taa ɛzɩ mbá paañaŋ Ɛsɔ yɔ.

⁶ Nɔɔyʋ ɛtaamuli ɛ-taabalʋ pʋnɛ pɩ-taa, ɛtaacɛtɩ-ɩ. Đɩɩtɛm-mɩ-tʋ heyuu nɛ ɖɩka mɩ-ñʋŋ taa siŋŋ se Kɩpaɣlʋ kɔŋ hɔm mbá palakɩ ḿbʋ́ yɔ pa-nɩŋgbaaŋ.

⁷ Ɛsɔ tayaa-ɖʋ se ɖɩwɛɛ azuluma taa, ɛlɛ́, ɛya-ɖʋ se ɖɩwɛɛ cɩɖɩcɩɖɩ.

⁸ Weyi ekiziɣ tɔm tʋnɛ yɔ, pɩtɛkɛ ɛyʋ ekizaa. Ɛlɛ́, Ɛsɔ ekizaa. Ŋgʋ́, ɛ́lɛ́ ha-mɩ ɖɔɖɔ e-Fezuu Kiɖeɖeu.

⁹ Ɛsɔ tɛm mɩ-maɣmaɣ kpɛlɩkʋʋ ɖama sɔɔlʋʋ tɔm. Ḿbʋ́ ɩɖɔŋ labʋ yɔ. Pʋ-yɔɔ lɛ, pɩtacazɩ pɔzʋʋ se ɖɩma pʋ-tɔm nɛ ɖiheyi-mɩ.

¹⁰ Ḿbʋ́ ɖɔɖɔ ɩsɔɔlɩ taabalaa mbá pɛwɛ Masedonii egeetiye kpeekpe taa yɔ patɩŋa payɩ. Ɛlɛ́, taabalaa! Đɩsazɩɣ-mɩ se ɩla nɛ pɩkɩlɩ ḿbʋ́!

¹¹ Ɩñaɣ pana nɛ ɩwɛɛ laŋhɛzɩyɛ taa fɛɛɛ nɛ ɩnɩɩnɩ mɩ-maɣmaɣ mɩ-tɔm nɛ ɩla tʋma nɛ mi-nesi ɛzɩ ɖɩtɛm-mɩ heyuu yɔ.

¹² Pʋbʋ, ɩkɛɣ mbá pamʋnaa yɔ mbá pɛtɛkɛ Krɩstʋ ñɩma yɔ pɛ-ɛsɩndaa. Đɔɖɔ lɛ, ɩɩkɛɣnɩ nɔɔyʋ sʋʋtʋ.

Ɛsɔ kaɣ fezuu sɩɖaa

¹³ Taabalaa! Sɩɖaa tɔm taa lɛ, ɖe-liu fɛyɩ se ɩwɛɛ kaatɩlɩtʋ taa nɛ piyele mɩ-ɛsɛ kɔɔ añɩŋ ɛzɩ lɛlaa mbá paataɣ pʋyʋ liu yɔ.

¹⁴ Toovenim lɛ, yee ɖɩwɛnɩ lidaʋ se Yesu sɩba nɛ Ɛsɔ fezi-i yɔ, pʋbʋ, ɖɩwɛnɩ-kʋ ɖɔɖɔ se ɛtɩŋɩɣnɩ Yesu ɛnʋ ɛ-yɔɔ nɛ efezi mbá pɛwɛnɩ lidaʋ ɛ-yɔɔ nɛ pʋcɔ pasɩ yɔ.

¹⁵ Ɩna tɔm ndʋ́ Kɩpaɣlʋ yɔɔdaa nɛ ɖiheyiɣ-mɩ yɔ. Ńdʋ́ lɛ se: mbá ɖa ɖɩwɛɣnɩ ɖɛ-ɛsɛ puwiye nɖɩ́ ɛkɔŋ yɔ, ɖɩɩkaɣ ɖɛʋ mbá pasɩba yɔ nɔɔ kaʋ.

¹⁶ Kɩyakʋ ŋ́gʋ́, pɔkɔŋ panɩɩ nɔɔ haʋ kubuka nɛ Ɛsɔ tiyiyu sɔsɔ nɔɔyʋ ñɩŋga nɛ Ɛsɔ ɛgandɩyɛ lɛ, Kɩpaɣlʋ maɣmaɣ lɩɣnɩ ɛsɔdaa nɛ etii. Peeɖe mbá paawɛnɩ lidaʋ Krɩstʋ yɔɔ nɛ pʋcɔ pasɩ yɔ, pɛlɛyɩɣ fem.

¹⁷ Pʋwayɩ lɛ, mbá ɖa ɖɩwɛɣnɩ ɖɛ-ɛsɛ alɩwaatʋ ńdʋ́ yɔ, pɩkpazɩ ɖa nɛ wɛ yem ɛsɔmɩndʋ tɛɛ nɛ ɖɩkatɩ Kɩpaɣlʋ ɛsɔdaa nɛ ɖa nɛ ɩ ɖɩwɛɛ tam.

¹⁸ Pʋ-yɔɔ lɛ, ɩsazɩ ɖama nɛ tɔm ndɩ ndɩ tʋnɛ.