1 Tesalooniki 3 - New Testament

¹ Đe-liu wɛ ḿbʋ́ kpem se ɖɩkɔɔ mɩ-tɛ. Ɛlɛ́, ɖɩtaatasɩɣ pɩzʋʋ se ɖɩɖaŋ lɛ, ɖɩtɛzɩ labʋ lɩmaɣza se ɖɩcakɩ ɖe-ɖeke Atɛɛnɩ

² nɛ piyele ɖitiyi ɖa-tʋmlaɖʋ Timootee. Ɛkɛ Ɛsɔ tʋmlaɖʋ nɛ esusuu Krɩstʋ Laŋhɛzɩyɛ Tɔm. Đitiyi-i mɩ-cɔlɔ se eyele nɛ ɩtɛzɩ pɩʋ nɛ pɩlabɩ-mɩ hʋnʋm mi-lidaʋ wɛnaʋ taa

³ nɛ lɛɛlɛɛyɔ taa kʋñɔmɩŋ ɛtaañamsɩ mɩ-taa nɔɔyʋ. Mɩ-maɣmaɣ ɩtɛm naʋ se kʋñɔmɩŋ ɩnʋ Ɛsɔ ɖʋwa se pɩtɛmnɩ-ɖʋ.

⁴ Alɩwaatʋ ndʋ́ ɖɩɩwɛ mɩ-cɔlɔ yɔ, ɖɩɩtɛm-mɩ heyuu se ɖɩkɔŋ tɔɔʋ kʋñɔmɩŋ. Ḿbʋ́ ɩtɛm naʋ, ḿbʋ́ talɩna yɔ.

⁵ Me-liu wɛ ḿbʋ́ kpem nɛ pɩɩsaŋ lɛ, mɛntɛzɩ tiyuu Timootee se ɛkɔɔ nɛ mana se ɩwɛnɩ lidaʋ mbʋ́? Mbʋ́ pʋyɔɔ yɔ, sɔɔndʋ kpaɣaɣ-m se takɩyʋ ɛtaakɔɔ ɛtakɩ-mɩ nɛ tʋmɩyɛ nɖɩ́ ɖɩlaba yɔ, ɖɩpɩsɩ falaa ñɩnɖɛ.

⁶ Lɛɛlɛɛyɔ, Timootee lɩnɩ mɩ-tɛ nɛ ɛtalɩ. Ɛkɔnɩ-ɖʋ tɔm kɩbandʋ mi-lidaʋ wɛnaʋ nɛ mɩ-sɔɔlɩm nɛ ɛzɩma mbʋ́ ɩwɛɛ ɩtɔzʋʋ ɖɔ-yɔɔ camɩyɛ nɛ ɛzɩma mbʋ́ mi-liu wɛɛ kpem ɖɔɖɔ ɛzɩ ɖa yɔ se ɩtasɩ-ɖʋ naʋ yɔ pɔ-yɔɔ.

⁷ Pʋ-yɔɔ lɛ, taabalaa, paa ɖɩnɩɣ siziŋ nɛ ɖɩtɔkɩ kʋñɔmɩŋ yɔ, ɖa-laŋɩyɛ hɛnɩ-mɩ mi-lidaʋ wɛnaʋ yɔɔ.

⁸ Lɛɛlɛɛyɔ, ɖenɖe ɖɩnɩwa se ɩwɛ mi-ɖeɖe ḿbʋ́ mɩ nɛ Kɩpaɣlʋ mɩ-kpɛndʋʋ taa yɔ, pʋ-yɔɔ lɛ, ɖitisi fezuu.

⁹ Ɛzɩma kpem ɖɩpɩzɩɣ ɖɩsa Ɛsɔ mɩ-yɔɔ laŋhʋlʋmɩyɛ nɖɩ́ iyeba nɛ ɖɩwɛnɩ ɛ-ɛsɩndaa yɔ ɖɩ-yɔɔ?

¹⁰ Đɩwɛɛ ɖitendiɣ-i wɩsɩ nɛ ɖoó siŋŋ se ɛha-ɖʋ nʋmɔʋ nɛ ɖɩtasɩ mɩ-ɛsɩndaa naʋ nɛ ɖɩtɛzɩ-mɩ wɩlʋʋ mbʋ́ pɩkazɩ-mɩ mi-lidaʋ wɛnaʋ taa yɔ.

¹¹ Đa-Caa Ɛsɔ maɣmaɣ nɛ ɖa-Kɩpaɣlʋ Yesu pɔñɔɔzɩ ɖa-nʋmɔʋ nɛ ɖɩpɩzɩ ɖɩtalɩ-mɩ!

¹² Kɩpaɣlʋ eyele nɛ ɩtɛzɩ ɖama sɔɔlʋʋ nɛ ɩtɛzɩ ɖɔɖɔ lɛlaa tɩŋa payɩ sɔɔlʋʋ ɛzɩ ɖɩsɔɔlʋʋ-mɩ yɔ.

¹³ Ḿbʋ́ eyeki nɛ ɩtɛzɩ pɩʋ nɛ ɩwɛɛ cɩɖɩcɩɖɩ nɛ paanaɣ kawanaɣ nakɛyɛ mɩ-yɔɔ ɖa-Caa Ɛsɔ ɛsɩndaa puwiye nɖɩ́ ɖa-Kɩpaɣlʋ Yesu nɛ ɛ-ñɩma tɩŋa payɩ pɔkɔŋ yɔ.