1 Tesalooniki 2 - New Testament

Tʋmɩyɛ nɖɩ́ Pɔɔlɩ laba Tesalooniki yɔ

¹ Taabalaa! Mɩ-maɣmaɣ ɩtɛm naʋ se pɩtɛkɛ falaa ɖɩkɔm mɩ-tɛ.

² Ɩtɛm naʋ ɖɔɖɔ se pʋcɔ ɖɩtalɩ mɩ-tɛ lɛ, ɖɩɩlaba kʋñɔŋ siŋŋ nɛ patʋʋ-ɖʋ Filiipu tɛtʋ taa. Đɔɖɔ lɛ, ɛyáa cɛyaɣ-ɖʋ siŋŋ mɩ-tɛ. Paa ḿbʋ́ yɔ, Ɛsɔ yeba nɛ ɖisusi-mɩ ɛ-Laŋhɛzɩyɛ Tɔm kaalɛyɩtʋ.

³ Mbʋ́ pʋyɔɔ yɔ, pɩtɛkɛ nʋmɔʋ kilebuu tɔm yaa cɛtɩm tɔm yaa lɩmaɣza kɩdɛkɛdɛɛ tɔm ɖɩsazɩɣnɩ ɛyáa.

⁴ Ɛlɛ́, ɖɩyɔɔdʋʋ tam ɛzɩ Ɛsɔ liu wɛʋ yɔ: ɛmaɣzɩ-ɖʋ nɛ pʋcɔ ɛ́ɖʋzɩ ɖe-nesi taa ɛ-Laŋhɛzɩyɛ Tɔm. Pɩtɛkɛ se ɖɩñɩnɩɣ se ɖɔ-tɔm ɛkɛdɩnɩ ɛyáa, ɛlɛ́, Ɛsɔ ɖɩñɩnɩɣ se tɩkɛdɩna, ɛnʋ naɣnɩ mbʋ́ pʋwɛ ɖa-laŋa taa yɔ.

⁵ Ɩtɛm naʋ se ɖɩtaalabɩ-mɩ nɔɔ leleŋ kaʋ. Đɔɖɔ lɛ, liidiye laɣzaɣ tɔm natʋyʋ taawɛɛ ɖɔ-tɔm taa mɛsaɣ tɛɛ. Ɛsɔ lɛ ɖa-aseɣɖe tʋ.

⁶ Pɩtɛkɛ se ɖɩñɩnɩɣ se ɛyáa ɛsam-ɖʋ: paa mɩ yaa nabɛyɛ.

⁷ Ŋgʋ́, ɖɩpɩzaɣ ɖinuuti-mɩ se ɖɩkɛ Krɩstʋ tiyiyaa. Ɛlɛ́, alɩwaatʋ ndʋ́ ɖɩɩwɛ mɩ-tɛ yɔ, ɖa nɛ mɩ ɖɛ-hɛkʋ taa kɛwɛ leleŋ siŋŋ. Đɩɩwɛ ɛzɩ halʋ weyi ɛcɔŋnɩ e-piya yɔɔ camɩyɛ yɔ.

⁸ Ḿbʋ́ ɖɩɩsɔɔlɩ-mɩ kpem nɛ piyele ɖisusi-mɩ Ɛsɔ Laŋhɛzɩyɛ Tɔm nɛ halɩ paa ɖe-wezuu maɣmaɣ yɔ, ɖɩpɩzaɣ se ɖɩha-kʋ mɩ-yɔɔ. Mbʋ́ pʋyɔɔ yɔ, ɖɩɩsɔɔlɩ-mɩ siŋŋ.

⁹ Taabalaa! Paa pɩɩla ɛzɩma ɩtɔzʋʋ ɖa-tʋmɩyɛ nɛ ɖa-kʋñɔŋ pɔ-yɔɔ: ɖɩɩlaba tʋmɩyɛ wɩsɩ nɛ ɖoó se ɖɩtaakɛnɩ mɩ-taa nɔɔyʋ sʋʋtʋ alɩwaatʋ ndʋ́ ɖisusaɣ-mɩ Ɛsɔ Laŋhɛzɩyɛ Tɔm yɔ.

¹⁰ Mbá mɩ ɩwɛnɩ lidaʋ Ɛsɔ yɔɔ yɔ, mɩ-ɛsɩndaa lɛ, ɖe-wezuu caɣʋ kɛwɛ cɩɖɩcɩɖɩ nɛ kʋtʋʋzɩ nɛ paanaɣ kawanaɣ nakɛyɛ pɩ-taa. Mɩ nɛ Ɛsɔ lɛ ɖa-aseɣɖe tɩnaa.

¹¹ Ɩnawa ɖɔɖɔ se ɖa nɛ mɩ-taa paa weyi pɩɩwɛ ɛzɩ caja nɛ e-piya yɔ.

¹² Điiyeba pɩlabɩ-mɩ hʋnʋm nɛ ɖɩhɛzɩ mɩ-laŋa nɛ ɖɩka mɩ-ñʋŋ taa se ɩɖɔ ɛzɩ pʋmʋnaʋ Ɛsɔ ɛsɩndaa yɔ. Ɛnʋ yaɣnɩ-mɩ se ɩkɛ e-Kewiyaɣ nɛ e-koboyaɣ pa-taa ñɩma.

Tesalooniki ñɩma tisi Ɛsɔtɔm

¹³ Đɩsaŋ Ɛsɔ tam nabʋyʋ yɔɔ ɖɔɖɔ. Ḿbʋ́ lɛ se: alɩwaatʋ ndʋ́ ɖisusi-mɩ ɛ-tɔm nɛ ɩnɩɩ-tʋ yɔ, itetisi-tʋ ɛzɩ ɛyáa tɔm yem yɔ. Ɛlɛ́, itisi-tʋ ɛzɩ mbʋ́ tɩkɛ toovenim taa yɔ, tɩkɛ Ɛsɔtɔm siŋŋ nɛ tɩlakɩ mbá mɩ ɩwɛnɩ lidaʋ ɛ-yɔɔ yɔ tʋmɩyɛ.

¹⁴ Taabalaa! Toovenim lɛ, ɩtɩŋ Yudee Ɛsɔ aŋgba taa ñɩma nʋmɔʋ. Aŋgba ana, a nɛ Krɩstʋ Yesu pɛ-kpɛndʋʋ yɔɔ akɛ ḿbʋ́. Mɩ-maɣmaɣ mɩ-tɛ ñɩma ɖʋ-mɩ kʋñɔŋ ɖɔɖɔ ɛzɩ Yuda ñɩma kaaɖʋʋ a-taa ñɩma yɔ.

¹⁵ Yuda ñɩma ḿbá pakʋnɩ Kɩpaɣlʋ Yesu nɛ náyaa nɛ pɛwɛɛ ɖa-wayɩ kaŋ kaŋ. Pɔ-tɔm tɛkɛdɩnɩ Ɛsɔ, papɩsɩ ɛyáa tɩŋa koyindinaa.

¹⁶ Paɖɩkɩ-ɖʋ nʋmɔʋ se ɖitaasusi mbá pɛtɛkɛ Yuda ñɩma yɔ ñʋʋ yabʋ tɔm. Ḿbʋ́ pɛwɛɛ pɛtɛzɩɣ kɩwɛɛkɩm labʋ. Ɛlɛ́, Ɛsɔ pana tɛmnɩ-wɛ kpanaʋ.

Pɔɔlɩ liu wɛɛ se ɛtasɩ Tesalooniki Krɩstʋ ñɩma naʋ

¹⁷ Taabalaa! Đa nɛ mɩ ɖɩyasɩ ɖama alɩwaatʋ pazɩ. Ɛlɛ́, ɖɩɩwɛɛ ɖɩmaɣzɩɣ mɩ-yɔɔ nɛ ɖe-liu wɛɛ kpem nɛ ɖɩcɛyɩ ɖa-tɩ se ɖɩtasɩ mɩ-ɛsɩndaa naʋ. Ɛlɛ́, pɩtala.

¹⁸ Đɩɩɖʋwa se ɖɩpɩsɩɣ mɩ-tɛ, mancaɣ mɔntɔ se ma Pɔɔlɩ, manɖʋ nabʋlɛ nabʋlɛ se mɔnkɔŋ, ɛlɛ́, Satanɩ ɖɩɣ-ɖʋ nʋmɔʋ.

¹⁹ Ŋgʋ́, mi-ɖeke koŋ ɖɩtaɣ liu, mɩ ɖa-taa hʋlʋmʋʋna. Mɩ ɖɔɖɔ lɛ ɖa-wabɩyɛ yʋsaɣ ŋgá ɖɩkʋndʋʋnɩ puwiye nɖɩ́ ɖa-Kɩpaɣlʋ Yesu pɩsɩɣ ɛkɔɔ yɔ.

²⁰ Toovenim lɛ, mɩ ɖɩkʋndʋʋna, ɖa-taa hʋlʋmɩnɩ-mɩ.