1 Tesalooniki 1 - New TestamentSɛtʋ 1 Ma Pɔɔlɩ, ma nɛ Silaasɩ nɛ Timootee ɖɩmaɣnɩ takayaɣ kanɛ. Đɩmaɣ-kɛ Krɩstʋ ŋgbɛyɛ taa ñɩma mbá mɩ ɩwɛ Tesalooniki nɛ ɩkɛ Caa Ɛsɔ nɛ Kɩpaɣlʋ Yesu Krɩstʋ pa-ñɩma yɔ. Đɩsɛ-mɩ: Ɛsɔ ɛlabɩ-mɩ lootiye nɛ ɛhɛzɩ mɩ-laŋa! Pɔɔlɩ saŋ Ɛsɔ Krɩstʋ ñɩma lidaʋ yɔɔ 2 Alɩwaatʋ ndʋ́ tɩtɩŋa ɖɩtɔzʋʋ mɩ-yɔɔ ɖɛ-Ɛsɔ sɛtʋ taa yɔ, ɖɩsaŋ-ɩ mɩtɩŋa payɩ mɩ-yɔɔ tam. 3 Đɩtɔzʋʋ tam ɖa-Caa Ɛsɔ ɛsɩndaa ɛzɩma mbʋ́ ɩwɛnɩ lidaʋ siŋŋ nɛ ɩlakɩ tʋmɩyɛ yɔ nɛ ɛzɩma mbʋ́ mɩ-sɔɔlɩm yeba nɛ ɩwɛɛ kpekpeka yɔ pʋ-yɔɔ. Đɩtɔzʋʋ ɖɔɖɔ ɛzɩma mbʋ́ ɩɖaŋ Kɩpaɣlʋ Yesu Krɩstʋ kpam yɔ pʋ-yɔɔ. 4 Taabalaa! Đɩnawa se Ɛsɔ sɔɔlɩ-mɩ nɛ ɛlɩzɩ-mɩ se ɩkɛ ɛ-ñɩma. 5 Toovenim lɛ, Laŋhɛzɩyɛ Tɔm ndʋ́ ɖisusi-mɩ yɔ, pɩtɛkɛ nɔɔ taa yem ɖɩlaba. Ɛlɛ́, pɩtɩŋnɩ Fezuu Kiɖeɖeu yɔɔ nɛ ɩna ti-ɖoŋ nɛ ɛzɩma ɖɩtaɣ-tʋ liu siŋŋ yɔ. Mɩ-maɣmaɣ ɩna ɛzɩma mbʋ́ ɖɩcaɣ wezuu mɩ-hɛkʋ taa yɔ, ɖɩlabɩ ḿbʋ́ se pɩsɩnɩ-mɩ. 6 Ḿbʋ́ yebina nɛ ɩtɩŋ ɖa nɛ Kɩpaɣlʋ ɖa-nʋmɔʋ. Alɩwaatʋ ndʋ́ itisi Laŋhɛzɩyɛ Tɔm yɔ, ɩtɔɔ kʋñɔŋ siŋŋ. Ɛlɛ́, Fezuu Kiɖeɖeu kasɩnɩ-mɩ nɛ ɩwɛɛ laŋhʋlʋmɩyɛ taa. 7 Pʋ-yɔɔ ɩpɩsɩ mbá pawɩlɩɣ nʋmɔʋ mbá patɩŋa payɩ pɛwɛnɩ lidaʋ Ɛsɔ yɔɔ Masedonii nɛ Akayɩ pa-ageeta taa yɔ. 8 Mbʋ́ pʋyɔɔ yɔ, Kɩpaɣlʋ tɔm lɩnɩ mɩ-tɛ nɛ tɩcɔʋ ageeta ana a-taa. Ɛlɛ́, pɩtasɩɩnɩ a-taa ɖeke, tɩcɔ paa le nɛ ɛyáa na ɛzɩma mbʋ́ ɩwɛnɩ lidaʋ Ɛsɔ yɔɔ yɔ. Pʋ-yɔɔ lɛ, pɩtacazɩ pɔzʋʋ se ɖɩyɔɔdɩ ɖɔɖɔ. 9 Pa-maɣmaɣ pɛkɛdɩɣ ɛzɩma mbʋ́ ɩmʋ-ɖʋ mɩ-tɛ yɔ pʋ-tɔm nɛ ɛzɩma mbʋ́ ɩha agɔlɩma siɣ́ye nɛ ɩnɩɣnɩ Ɛsɔ wezuu tʋ nɛ toovenim tʋ tʋmɩyɛ 10 se ɩɖaŋ ɛ-Pɩyalʋ weyi ɛlɩɣnɩ ɛsɔdaa se ɛkɔɔ yɔ. Ɛnʋ lɛ Yesu weyi efezi-i nɛ sɩɖaa taa yɔ. Ɛnʋ lɩzɩɣnɩ-ɖʋ Ɛsɔ pana wena akɔŋ-ɖʋ kpanaʋ yɔ a-taa. |