1 Pɩyɛ 4 - New Testament

Lidaʋ tayaa wezuu kɩfalʋʋ caɣʋ tɔm

¹ Ɩtɛm naʋ se Krɩstʋ nɩ siziŋ e-tomnaɣ taa. Ɩmaɣzɩ pʋ-yɔɔ nɛ ɩkpa ɖoŋ. Mbʋ́ pʋyɔɔ yɔ, weyi ɛnɩ siziŋ e-tomnaɣ taa yɔ, ɛha kɩwɛɛkɩm siɣ́ye

² se ɛtaatasɩ wezuu caɣʋ ɛzɩ ɛyáa liu wɛʋ yɔ. Ɛlɛ́, ɛcaɣ-kʋ ɛzɩ Ɛsɔ liu wɛʋ yɔ nɛ pʋkɔɔ pɩsɩɩnɩ kɩyakʋ ŋgʋ́ ɛkʋyaa yɔ.

³ Đooo lɔŋ, ɩɩkpaɣ alɩwaatʋ siŋŋ nɛ ɩla ɛzɩ mbá paañaŋ Ɛsɔ yɔ palakʋʋ mbʋ́ pe-liu wɛɛ yɔ. Pɩmaɣ ḿbʋ́. Ɩɖɔŋaɣ ɛzaɣ́tʋ nʋmɔʋ taa nɛ ɩɖʋʋ ɛsɛ lɛlaa ñɩm yɔɔ nɛ ɩkpaŋɩɣ sʋlʋm nɛ ɩɖɛlɛsɩɣ niye tɔkɩyɛ nɛ ñɔtʋ pa-taa nɛ mɩ nɛ mɩ-taabalaa ɩñɔʋ nɛ pɩɖɛlɛsɩɣ niye nɛ iluŋuu agɔlɩma tɛɛ.

⁴ Lɛɛlɛɛyɔ, pɩɖɩɣzɩɣ mbá paañaŋ Ɛsɔ yɔ nɛ ɛzɩma mbʋ́ ɩɩtaasɩɣ labʋ ɛzaɣ́tʋ nɛ ɩɖɛlɛsɩɣ niye ɛzɩ ḿbá yɔ. Pʋ-yɔɔ patʋʋ-mɩ.

⁵ Pɔkɔŋ sɩŋʋʋ Ɛsɔ ɛsɩndaa nɛ paa weyi eheyi-i mbʋ́ ɛlaba yɔ. Toovenim lɛ, ɛɖaŋ kpam se ɛhʋʋnɩ sɩɖaa nɛ ɛsɛ tɩnaa patɩŋa payɩ.

⁶ Pʋ-yɔɔ Krɩstʋ susi Laŋhɛzɩyɛ Tɔm sɩɖaa se paa pasɩba ɛzɩ pʋpɔzʋʋ ɛyáa tɩŋa payɩ yɔ yɔ, pɩtɩŋnɩ Fezuu Kiɖeɖeu yɔɔ nɛ pɛwɛɛ wezuu.

Ɛzɩma pʋwɛɛ se Krɩstʋ ñɩma ɩwɛɛ pa-haɖaa taa yɔ

⁷ Pɩtɩŋa payɩ pɩwɩzɩ tɛm. Pʋ-yɔɔ lɛ, ɩɖɔkɩ mɩ-tɩ nɛ ɩcaɣnɩ mɩ-ɛsɛ nɛ ɩpɩzɩ ɩsɛɛ Ɛsɔ.

⁸ Mbʋ́ pʋwɛɛ kpem se ɩla yɔ lɛ se ɩsɔɔlɩ ɖama siŋŋ. Mbʋ́ pʋyɔɔ yɔ, sɔɔlɩm hɛzɩɣ kɩwɛɛkɩm sakɩyɛ.

⁹ Ɩmʋ ɛyáa mbá pɔkɔŋ mɩ-tɛ yɔ camɩyɛ. Ɩtaamʋ-wɛ nɛ miduu.

¹⁰ Ɛsɔ labɩ paa mɩ-taa weyi kʋjɔʋ nɛ kɩ-ndɩ se ɛla tʋma ndɩ ndɩ. Pʋ-yɔɔ lɛ, pʋwɛɛ se paa weyi ɛkpaɣ-kʋ nɛ ɛlabɩnɩ tʋmɩyɛ camɩyɛ nɛ ɛsɩnɩ lɛlaa.

¹¹ Yee Ɛsɔ ɛha nɔɔyʋ se esusi ɛ-tɔm yɔ, ńdʋ́ pʋwɛɛ se esusi. Yee ɛha nɔɔyʋ se ɛsɩnɩ lɛlaa yɔ, pʋwɛɛ se ɛsɩnɩ-wɛ nɛ ɖoŋ weyi Ɛsɔ ha-ɩ yɔ. Ḿbʋ́ yekina nɛ ɛyáa tɩŋnɩ Yesu Krɩstʋ yɔɔ nɛ pasa Ɛsɔ mbʋ́ pɩtɩŋa payɩ ɩlakɩ yɔ pɩ-taa. Ɛnʋ tɩnɩ koboyaɣ nɛ ɖoŋ tam. Pɩla ḿbʋ́!

Ɩtɔɔ kʋñɔŋ mi-lidaʋ yɔɔ ɛzɩ Krɩstʋ yɔ

¹² Mɛ-ɛgbaɣdɩnaa! Pɩtaaɖɩɣzɩ-mɩ nɛ kʋñɔmɩŋ sɔsɔŋ weyi pamaɣzɩɣnɩ-mɩ se pana yɔ. Ɩtaakɛnɩ-mɩ ɛgɔndʋ pʋyʋ.

¹³ Ɛlɛ́, pʋwɛɛ se mɩ-laŋa ɛhʋlʋmɩ se mɩ nɛ Krɩstʋ ɩtɔkɩnɩ kʋñɔŋ. Mbʋ́ pʋyɔɔ yɔ, ḿbʋ́ yekina nɛ mɩ-laŋa tɛzɩ hʋlʋmʋʋ ɖɔɖɔ siŋŋ puwiye nɖɩ́ ɛlɩzɩɣ e-koboyaɣ nɛ ɛwɩlɩ ɛyáa yɔ.

¹⁴ Yee patʋʋ-mɩ Krɩstʋ yɔɔ yɔ, ihiɣ mɩ-tɩ! Mbʋ́ pʋyɔɔ yɔ, Fezuu Kiɖeɖeu koboyaɣ ñɩŋgʋ wɛ mɩ-cɔlɔ.

¹⁵ Mɩ-taa nɔɔyʋ ɛtaatɔɔ kʋñɔŋ se ɛkɛ ɛyáa kʋyʋ yaa mɩ́lʋ́ yaa kɩdɛkɛdɩm laɖʋ yaa weyi ɛɖʋʋ ɛ-nɔɔ lɛlaa tɔm taa yɔ.

¹⁶ Ɛlɛ́, yee nɔɔyʋ ɛtɔkɩ kʋñɔŋ se ɛkɛ Krɩstʋ tʋ yɔ, fɛyɛ ɛtaakpa-ɩ. Pʋwɛɛ se ɛsa Ɛsɔ se ɛkɛ ḿbʋ́.

¹⁷ Mbʋ́ pʋyɔɔ yɔ, alɩwaatʋ talaa se Ɛsɔ ɛhʋʋnɩ ɛyáa tɔm. Ɛ-ñɩma ɛpazɩɣna. Yee ɖa ɛpazɩɣna lɛ, ɛbɛ pʋkɔŋ tɛmnaʋ mbá paaɖɔŋ ɛ-Laŋhɛzɩyɛ tɔm yɔɔ yɔ?

¹⁸ Pʋwɛ ɛzɩ pamaʋ Ɛsɔtɔm Takayaɣ taa se: «Yee ɛyʋ kʋtʋʋzʋ ɛwɩɣnɩ ñʋʋ yabʋ hiɣu lɛ, ɛbɛ pʋkɔŋ tɛmnaʋ kpem ɛzaɣ́ʋ nɛ kɩwɛɛkɩm laɖʋ yɔ?»

¹⁹ Pʋ-yɔɔ lɛ, mbá pɔtɔkɩ kʋñɔŋ ɛzɩ Ɛsɔ liu wɛʋ yɔ, pʋwɛɛ se pakpaɣ pa-tɩ pilim nɛ paɖʋzɩ e-nesi taa nɛ pala camɩyɛ. Mbʋ́ pʋyɔɔ yɔ, ɛnʋ manɩ-wɛ, ɛlakɩ ɖɔɖɔ mbʋ́ ɛɖʋwa yɔ.