1 Pɩyɛ 2 - New Testament

¹ Pʋ-yɔɔ lɛ, iyele kɩwɛɛkɩm tɩŋa payɩ labʋ: kañatʋ nɛ cɛtʋʋ nɛ tɛɛ nɛ pʋ-yɔɔ lakasɩ nɛ ɛsɩsɛmɩyɛ nɛ lɛlaa tɔm ɛzaɣ́tʋ yɔɔdʋʋ.

² Ɛsɔtɔm ɛlabɩ-mɩ liu tam ɛzɩ hɩlɩm lakʋʋ piya ajamaa liu yɔ nɛ pɩtɩŋnɩ tɩ-yɔɔ nɛ ɩtɛzɩ pɩʋ nɛ pʋkɔɔ pɩya mɩ-ñʋʋ.

³ Mbʋ́ pʋyɔɔ yɔ, ɩtɛm naʋ se Kɩpaɣlʋ lɛ kɩbanʋ.

Mbá pɛwɛnɩ lidaʋ yɔ, ḿbá lɛ Ɛsɔ ñɩma

⁴ Ɩkpɩtɩnɩ-ɩ. Ɛnʋ lɛ pɩyɛ nɖɩ́ ɖɩhaɣ wezuu yɔ, ɛyáa kizi-ɖɩ se ɖɩɩwazɩɣ pʋyʋ. Ɛlɛ́, Ɛsɔ ñalɩzɩ-ɖɩ se ńɖɩ́ kɩlɩnɩ wazaɣ ɛ-ɛsɩndaa.

⁵ Pʋwɛɛ se ɩwɛɛ ɛzɩ pɛɛ wena awɛ wezuu yɔ. Ana Ɛsɔ kpakɩɣ nɛ ɛtɩŋnɩ e-Fezuu Kiɖeɖeu yɔɔ nɛ ɛmanɩ ɛ-ɖɩɣa. Peeɖe ɩkɛɣ cɔjɔnaa mbá ɛlɩzɩ-wɛ nɛ patɩŋɩɣnɩ Yesu Krɩstʋ yɔɔ nɛ palaɣ-ɩ kɩlaŋ weyi paanaɣ nɛ e-liu wɛɛ-ɩ yɔ.

⁶ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Ɩnaɣ! Malɩzɩ pɩyɛ nɖɩ́ ɖɩkɩlɩ wazaɣ yɔ nɛ mansɩɩ-ɖɩ Siiyɔɔ tɛtʋ taa se ɖɩkɛ pɩyɛ sɔsɔɖɛ. Weyi ɛwɛɣnɩ lidaʋ ɖɩ-yɔɔ yɔ, ɛɛkaɣ fɛyɛ tɔɔʋ.»

⁷ Mbá mɩ ɩwɛnɩ lidaʋ Kɩpaɣlʋ yɔɔ yɔ, ɖɩwɛ-mɩ wazaɣ siŋŋ. Piyele mbá pɛfɛyɩnɩ lidaʋ ɛ-yɔɔ yɔ, pʋwɛ-wɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Pɩyɛ nɖɩ́ kuduyiŋ mayaa kpaɣaɣ pɔlɔ yɔ, ńɖɩ́ pɩsɩnɩ ɖɩkɩlɩ wazaɣ atɩŋa payɩ lɛɛlɛɛyɔ.»

⁸ Pamawa ɖɔɖɔ se: «Ńɖɩ́ tuuluuni ɛyáa, ńɖɩ́ lɛ ɛwaɣ ŋgá kɛpɛɖɩɣ-wɛ yɔ.» Đituuli-wɛ, mbʋ́ pʋyɔɔ yɔ, paatisiɣ Ɛsɔtɔm. Ḿbʋ́ pɩɩtɩɩɖʋ ɖooo lɔŋ se pɩlabɩ-wɛ.

⁹ Piyele mɩ yɔ, mɩ lɛ liɖe nɖɩ́ Ɛsɔ lɩzaa yɔ ɖɩ-taa ñɩma. Ɩkɛ wiyaʋ sɔsɔ cɔjɔnaa. Mɩ lɛ Ɛsɔ ɛjaɖɛ taa ñɩma, mɩ-ñʋʋ ɛyaba. Mɩ ɛlɩzɩ cɩkpɛndʋʋ taa nɛ ewoni ɛ-ñalɩmɩyɛ nɖɩ́ ɖɩkɩlɩ pɩtɩŋa payɩ yɔ ɖɩ-taa se isusi ɛ-tʋma sɔsɔna tɔm.

¹⁰ Đooo mbá mɩ ɩtaakɛ liɖe kʋɖʋmɖɩyɛ taa ñɩma yɔ, lɛɛlɛɛyɔ, ɩpɩsɩ ɛ-ñɩma. Đooo mbá mɩ Ɛsɔ taana mɩ-pʋtɔdɩyɛ yɔ, lɛɛlɛɛyɔ, ɛna mɩ-pʋtɔdɩyɛ.

Ɖɩwɛɛ ɖe-wezuu caɣʋ taa ɛzɩ Ɛsɔ tʋmlaɖaa yɔ

¹¹ Mɛ-ɛgbaɣdɩnaa! Ɩkɛ agɔmaa nɛ nʋmɔɖɔnaa kedeŋa yɔɔ cɩnɛ. Pʋ-yɔɔ lɛ, ɩñaɣ pana nɛ ɩɖɔkɩ mɩ-tɩ nɛ mɩ-maɣmaɣ mɩ-wɛtʋ ɛtaahɔm-mɩ nɛ ɩla mbʋ́ ɩtaasɔɔlɩ yɔ.

¹² Ɩwɛnɩ wɛtʋ kɩbandʋ mbá paañaŋ Ɛsɔ yɔ pɔ-cɔlɔ. Yee ɩlabɩ ḿbʋ́ yɔ, paa pakʋyʋʋ mɩ-yɔɔ se ɩkɛ kɩdɛkɛdɩm laɖaa yɔ, pɩkɛɣnɩ-wɛ kɩcɛyʋʋ nɛ pɔyɔɔdɩnɩ pɔ-nɔɔ se ɩlabɩ camɩyɛ nɛ pasa Ɛsɔ kɩyakʋ ŋgʋ́ ɛkɔŋ yɔ.

¹³ Kɩpaɣlʋ yɔɔ lɛ, pʋwɛɛ se ɩña mbá patɩŋa payɩ pɔcɔŋnɩ mɩ-yɔɔ yɔ. Kajalaɣ lɛ, ɩña ɛjaɖɛ ñʋʋdʋ. Ɛnʋ cɔŋnɩnɩ pɩtɩŋa payɩ pʋ-yɔɔ.

¹⁴ Ɩña ɖɔɖɔ ageeta ñʋndɩnaa mbá ɛlɩzaa se pɔhɔ kɩdɛkɛdɩm laɖaa nɩŋgbaaŋ nɛ payɩɣyɩ mbá palakɩ camɩyɛ yɔ.

¹⁵ Mbʋ́ pʋyɔɔ yɔ, Ɛsɔ liu wɛɛ se ɩwɛnɩ wɛtʋ kɩbandʋ. Peeɖe kɩmɛlɛmɩŋ, ñʋʋ taa fɛyɩ tɩnaa mbá pɔhɔŋnɩ-mɩ tɔm yɔ, panaɣ-tʋ nɛ posu pe-ɖeɖe ɖiɣ ɖiɣ.

¹⁶ Ɩwɛɛ ɛzɩ ɛyáa mbá pɛwɛ pa-tɩ yɔɔ yɔ. Ɩtaawanɩ mɩ-tɩ yɔɔ wɛʋ ḿbʋ́ nɛ ɩla ɛzaɣ́tʋ, ɛlɛ́, pʋwɛɛ se ɩwɛɛ ɛzɩ Ɛsɔ yomaa yɔ.

¹⁷ Ɩɖʋ ɛyáa tɩŋa payɩ hɩɖɛ. Ɩsɔɔlɩ mɩ-taabalaa Krɩstʋ ñɩma. Ɩña Ɛsɔ. Ɩɖʋ ɛjaɖɛ ñʋʋdʋ hɩɖɛ.

Ɖɩla ɛzɩ Krɩstʋ labʋ yɔ

¹⁸ Mɩ tʋmlaɖaa lɛ, pʋwɛɛ se iluzi mɩ-tɩ mɩ-caanaa tɛɛ nɛ ɩñam-wɛ siŋŋ. Ɩtaaña mbá pɛwɛ ɖeu nɛ pɔ-tɔm fɛyɩ kaɖɛ yɔ pe-ɖeke. Ɛlɛ́, ɩña ɖɔɖɔ mbá pɔ-tɔm wɛ kaɖɛ yɔ.

¹⁹ Ɛsɔ ñam yɔɔ lɛ, pʋwɛ ɖeu se ɛyʋ etisi nɛ ɛtɔɔ kʋñɔŋ ɖulum.

²⁰ Yee ɩlabɩ kɩdɛkɛdɩm nɛ pamakɩ-mɩ lɛ, ɛbɛ pɩsɛɣ-mɩ? Ɛlɛ́, yee ɩlakɩ mbʋ́ Ɛsɔ liu wɛɛ yɔ nɛ pamakɩ-mɩ ɖulum nɛ iikiziɣ yɔ, pɩkɛdɩɣnɩ-ɩ.

²¹ Ḿbʋ́ Ɛsɔ ɖʋwa se ɩla. Mbʋ́ pʋyɔɔ yɔ, Krɩstʋ ñalabɩ kʋñɔŋ ɖɔɖɔ mɩ-yɔɔ nɛ ɛwɩlɩ-mɩ se ɩla ɛzɩ ɛnʋ yɔ nɛ ɩtɩŋ ɛ-nʋmɔʋ taa.

²² Ɛtala kɩwɛɛkɩm nabʋyʋ. Wiɖiyi patanɩɩ ɛ-nɔɔ taa cɛtɩm tɔm natʋyʋ.

²³ Patʋwaɣ-ɩ, ɛlɛ́, ɛtatʋʋ nɔɔyʋ. Panazaɣ-ɩ, ɛlɛ́, etoholini nɔɔyʋ. Ɛsɔ weyi ɛhʋʋ tɔm nɛ toovenim yɔ, e-nesi taa ɛɖʋzɩ ɛ-tɩ.

²⁴ Pakam-ɩ kaamaŋkaɣ yɔɔ lɛ, ɛmʋ ɖa-kɩwɛɛkɩm nɛ pʋwɛɛ ɛ-yɔɔ. Ɛlabɩ ḿbʋ́ se ɖɩsɩ ɖa-kɩwɛɛkɩm labʋ taa nɛ ɖɩwɛɛ wezuu nɛ ɖɩla mbʋ́ pʋtʋʋzaa yɔ. Ɛ-kɩcɩkpɩŋ yɔɔ pɩtɩŋnaa nɛ mɩ-yɔɔ cɛ.

²⁵ Đooo lɛ, ɩɩwɛ ɛzɩ heŋ weyi ileba yɔ. Ɛlɛ́, lɛɛlɛɛyɔ ɩpɩsaa ɩkɔɔ Krɩstʋ ɛnʋ ɛ-cɔlɔ. Ɛnʋ lɛ ɖiyiyu weyi ɛcɔŋnɩ mɩ-yɔɔ yɔ.