1 Kɔrɛntɩ 8 - New Testament

Kɩlaʋ nandʋ tɔm

¹ Lɛɛlɛɛyɔ, pʋcɔ ɖɩyɔɔdɩ kɩlaʋ nandʋ tɔm lɛ, meheyiɣ-mɩ se pɩkɛ toovenim se: «Đatɩŋa payɩ ɖɩsɩm lɛɣtʋ.» Ɛlɛ́, lɛɣtʋ ńdʋ́ tiyeki nɛ ɛyʋ kpazɩ ɛ-tɩ. Ŋgʋ́, sɔɔlɩm ñeyeki nɛ ɛyʋ tɛzɩ pɩʋ e-lidaʋ wɛnaʋ taa.

² Weyi ɛmaɣzɩɣ se ɛsɩm nabʋyʋ yɔ, ɛtasɩmda nɛ pɩtalɩ ɛzɩ pʋpɔzʋʋ se ɛtɩlɩ yɔ.

³ Ŋgʋ́, yee nɔɔyʋ ɛsɔɔlɩ Ɛsɔ yɔ, Ɛsɔ sɩm-ɩ.

⁴ Lɛɛlɛɛyɔ, mancaɣ se mɔyɔɔdɩ kɩlaʋ nandʋ tɔɔʋ tɔm. Đɩnawa se agɔlɩma fɛyɩnɩ wazaɣ nakɛyɛ kedeŋa yɔɔ cɩnɛ. Đɩnawa ɖɔɖɔ se Ɛsɔ kʋɖʋm koŋ wɛna.

⁵ Toovenim lɛ, nabɛyɛ kpakɩɣ ɛsɔdaa nɛ tataa wondu natʋyʋ se tɩkɛ pɛ-ɛsɔnaa. Nɛ ɛyáa ḿbá, pamaɣzɩɣ toovenim taa se ɛsɔnaa ɖɔwa nɛ kɩpaɣlaa wɛɛ ndɩ ndɩ.

⁶ Paa ḿbʋ́ yɔ, ɖa ɖanawa se Ɛsɔ kʋɖʋm koŋ wɛna. Ɛnʋ lɛ ɖa-Caa. Ɛnʋ labɩnɩ pɩtɩŋa payɩ, ɛnʋ tɩnɩ-ɖʋ ɖe-wezuu caɣʋ taa. Kɩpaɣlʋ kʋɖʋm koŋ ɖɔɖɔ ɖɩwɛna. Ɛnʋ lɛ Yesu Krɩstʋ weyi Ɛsɔ tɩŋnɩ ɛ-yɔɔ nɛ ɛla mbʋ́ pɩtɩŋa payɩ pʋwɛ kedeŋa yɔɔ cɩnɛ yɔ. Ɛnʋ hanɩ-ɖʋ wezuu.

⁷ Ɛlɛ́, ɛyáa tɩŋa tatɩlɩ ḿbʋ́. Mbʋ́ pʋyɔɔ yɔ, agɔlɩma tɔm sʋnɩ mɩ-taa nabɛyɛ siŋŋ nɛ pɔtɔkɩ kɩlaʋ nandʋ nɛ pamaɣzɩɣ se agɔlɩma ana awɛnɩ ɖoŋ pɔ-yɔɔ. Ɛzɩma mbʋ́ patapɩɩ Ɛsɔ nʋmɔʋ taa nɛ pa-lɩmaɣza fɛyɩ a-ɖeɖe yɔ pʋ-yɔɔ lɛ, pamaɣzɩɣ se papɩsɩɣ azaɣ́a tɔɔnaɣ ŋgá kɔ-yɔɔ.

⁸ Ŋgʋ́, pɩtɛkɛ tɔɔnaɣ nakɛyɛ tɔɔʋ yekina nɛ ɖɩpɩsɩ ɛyáa kɩbama Ɛsɔ ɛsɩndaa. Paa ɖɩtɔɔ-kɛ yaa ɖɩtɔtɔɔ-kɛ yɔ, pɩɩsɔzʋʋ-ɖʋ pʋyʋ.

⁹ Paa ḿbʋ́ yɔ, ɩkpa mɩ-tɩ se waɖɛ nɖɩ́ pɩha-mɩ se ɩtɔɔ kɩlaʋ nandʋ yɔ, ɖitaayele nɛ mbá patapɩɩ Ɛsɔ nʋmɔʋ taa yɔ, pa-taa nɔɔyʋ tɔlɩ.

¹⁰ Mbʋ́ pʋyɔɔ yɔ, weyi ña ŋsɩm ḿbʋ́ yɔ, yee ŋcaɣ agɔlɩma naŋ nakʋyʋ tɛɛ nɛ ŋtɔkɩ kɩlaʋ nandʋ nɛ weyi ɛtapɩɩ Ɛsɔ nʋmɔʋ taa yɔ ɛna-ŋ yɔ, pɩɩlakɩ ɛ́lɛ́ ɖɔɖɔ se ɛtɔɔ-tʋ yaa we?

¹¹ Peeɖe mbʋ́ ŋsɩma yɔ, pilesiɣ weyi ɛtapɩɩ Ɛsɔ nʋmɔʋ taa yɔ. Ŋgʋ́, ɛkɛ ña-taabalʋ weyi Krɩstʋ sɩbɩ ɛ-yɔɔ yɔ.

¹² Yee ɩyʋsʋʋnɩ mɩ-taabalaa mbá patapɩɩ Ɛsɔ nʋmɔʋ taa yɔ ḿbʋ́ nɛ piliɣtiɣ pa-lɩmaɣza yɔ, Krɩstʋ maɣmaɣ ɩyʋsɩnaa.

¹³ Pʋ-yɔɔ lɛ, yee tɔɔnaɣ ŋgá ka-taa wɛ kɩlaʋ nandʋ yɔ kɔ-tɔɔʋ eyekina se man-taabalʋ ɛtɔlɩ Ɛsɔ nʋmɔʋ taa yɔ, maatasɩɣ nandʋ tɔɔʋ kaʋ.