1 Kɔrɛntɩ 6 - New Testament

Đama tɔm hʋnaʋ Krɩstʋ ñɩma taa

¹ Yee tɔm ɛwɛ mɩ-taa nɔɔyʋ nɛ ɛ-taabalʋ pɛ-hɛkʋ taa lɛ, pɩlabɩ ɛzɩma nɛ pʋdʋ woki mbá Ɛsɔ tapɩsɩ-wɛ kʋtʋʋzaa yɔ pɔ-cɔlɔ se pahʋʋ-wɛ-tʋ nɛ eewoki Ɛsɔ ñɩma cɔlɔ?

² Ɩtatɩlɩ se Ɛsɔ ñɩma kɔŋnɩ hʋnaʋ kedeŋa ñɩma tɔm naa we? Yee mɩ pʋwɛɛ se ɩhʋʋnɩ kedeŋa ñɩma tɩŋa payɩ lɛ, pɩlabɩ ɛzɩma ɩɩpɩzɩɣ ɩhʋʋ tɔm cikpetu yɔ?

³ Ɩtatɩlɩ se ɖɩkɔŋ Ɛsɔ tiyiyaa tɔm hʋnaʋ naa we? Yee ḿbʋ́ lɛ, ɛzɩma ɖɩɩpɩzɩɣ ɖɩhʋʋ kedeŋa yɔɔ cɩnɛ tɔm yɔ?

⁴ Pɩlabɩ ɛzɩma nɛ yee tɔm natʋyʋ ɛwɛ mɩ-taa nɔɔyʋ nɛ ɛ-taabalʋ pɛ-hɛkʋ taa lɛ, ɛyáa mbá Yesu ŋgbɛyɛ taa ñɩma takpaɣ-wɛ payaa pʋyʋ yɔ, pɔ-cɔlɔ powoki se pahʋʋ-wɛ-tʋ?

⁵ Fɛyɛ ɛɛkpaɣ-mɩ yaa we? Lɔŋsɩnɖʋ kʋɖʋm nɔɔyʋ fɛyɩ mɩ-hɛkʋ taa se ɛpɩzɩɣ ɛhʋʋ ɛ-taabalaa mɩ mɩ-tɔm naa we?

⁶ Đenɖe ɛzɩ pɩɩla ḿbʋ́ lɛ, powokini pɔ-tɔm mbá pɛfɛyɩnɩ lidaʋ Krɩstʋ yɔɔ yɔ pɔ-cɔlɔ se pahʋʋ-wɛ-tʋ.

⁷ Yee tɔm natʋyʋ ɛtɩɩwɛ mɩ-hɛkʋ taa se pahʋʋ-tʋ yɔ, pɩwɩlɩɣ se ɩtɛm tɔlʋʋ kpem. Pɩlabɩ ɛzɩma ɩɩpɩzɩɣ se ɩɖɔkɩ mɩ-tɩ alɩwaatʋ ndʋ́ nɔɔyʋ lakɩ-mɩ kɩdɛkɛdɩm yaa ɛmɩlɩ mɩ-pʋyʋ yɔ?

⁸ Halɩ mɩlakɩnɩ lɛlaa kɩdɛkɛdɩm nɛ ɩmɩlɩɣ-wɛ. Ŋgʋ́, pɛkɛ mɩ-taabalaa!

⁹ Ɩtatɩlɩ se kɩdɛkɛdɩm laɖaa ɛɛkaɣ sʋʋ Ɛsɔ Kewiyaɣ taa yaa we? Ɩtaacɛtɩ mɩ-tɩ: acɛyɛ laɖaa yaa sɩɩnaa layaa yaa acɛyɛ laɖaa yaa abalaa mbá pacaɣ ɖama yɔ

¹⁰ yaa mɩ́láa yaa kujoŋjoŋ tɩnaa yaa sʋlʋm kpaŋɩyaa yaa mbá patʋʋ ɛyáa yɔ yaa mɔntɔkɩnɩ mon-ɖoŋwaa paakaɣ sʋʋ Ɛsɔ Kewiyaɣ taa.

¹¹ Ḿbʋ́ mɩ-taa lɛlaa lakaɣ. Ɛlɛ́ lɛɛlɛɛyɔ, Ɛsɔ ñalɩ mɩ-kɩwɛɛkɩm nɛ ɛpɩsɩ-mɩ ɛ-ñɩma nɛ pɩtɩŋnɩ e-Fezuu Kiɖeɖeu yɔɔ nɛ ɩkɛ kʋtʋʋzaa ɛ-ɛsɩndaa Kɩpaɣlʋ Yesu Krɩstʋ yɔɔ.

Ɛyʋ tomnaɣ kɛ Fezuu Kiɖeɖeu ɖɩɣa

¹² Toovenim lɛ: «Pɩha-ɖʋ waɖɛ se ɖɩla pɩtɩŋa,» ɛlɛ́, pɩtɛkɛ pɩtɩŋa pʋwɛnɩ wazaɣ. «Pɩha-ɖʋ waɖɛ se ɖɩla pɩtɩŋa,» ɛlɛ́, ɖiiyeki se nabʋyʋ ɛpɩsɩ-ɖʋ pu-yomaa.

¹³ Meheyiɣ-mɩ se: «Tɔɔnasɩ yɔɔ lotu wɛɛ nɛ lotu ñɛwɛɛ tɔɔnasɩ yɔɔ.» Paa ḿbʋ́ yɔ, Ɛsɔ kɔŋ pa-naalɛ yɔkʋʋ. Pɩtɛkɛ acɛyɛ yɔɔ palabɩ tomnaɣ: palabɩ-kɛ se kawazɩ Kɩpaɣlʋ nɛ ɛcɔnɩ kɔ-yɔɔ.

¹⁴ Đɔɖɔ lɛ, Ɛsɔ weyi efezi Kɩpaɣlʋ nɛ sɩm taa yɔ, ɛkɔŋ-ɖʋ fezuu ɖɔɖɔ nɛ e-ɖoŋ.

¹⁵ Ɩtatɩlɩ se mi-tomnasɩ kɛ Krɩstʋ tomnaɣ pilinzi naa we? Pʋwɛ ɖeu se pakpaɣ Krɩstʋ tomnaɣ piliŋa nɛ pɛcɛlɩ halʋ weyi ɛlakɩ acɛyɛ yɔ yaa we? Aayɩ! Pɩfɛyɩ ɖeu ḿbʋ́ kpem.

¹⁶ Ɩtatɩlɩ ɖɔɖɔ se weyi ɛca halʋ weyi ɛlakɩ acɛyɛ yɔ, ɛ nɛ ɩ po-tomnasɩ pɩsɩ kʋɖʋmaɣ naa we? Mbʋ́ pʋyɔɔ yɔ, pama Ɛsɔtɔm Takayaɣ taa se: «Pa-naalɛ papɩsɩɣ tomnaɣ kʋɖʋmaɣ.»

¹⁷ Ɛlɛ́, weyi ɛ nɛ Kɩpaɣlʋ pɛkpɛndɩɣ yɔ, ɛ nɛ ɩ pa-kalɩzasɩ pɩsɩ kʋɖʋmaɣ.

¹⁸ Pʋ-yɔɔ lɛ, ɩtaatɩɩlabʋ acɛyɛ kpem. Kɩwɛɛkɩm lɛɛbʋ mbʋ́ ɛyáa lakɩ yɔ, piitukuuni po-tomnasɩ. Ɛlɛ́, weyi ɛlakɩ acɛyɛ yɔ, ɛwɛɛkɩɣ ɛ-maɣmaɣ e-tomnaɣ.

¹⁹ Ɩtatɩlɩ se mi-tomnaɣ lɛ Fezuu ŋgʋ́ Ɛsɔ ha-mɩ nɛ kɩwɛɛ mɩ-taa yɔ kɩ-ɖɩɣa naa we? Pɩtɛkɛ mɩtɩnɩ mɩ-tɩ.

²⁰ Mbʋ́ pʋyɔɔ yɔ, ɩkɛ ɛyáa mbá Ɛsɔ yabɩ-wɛ yɔ. Pʋ-yɔɔ lɛ, ɩkpaɣ mi-tomnasɩ nɛ ɩɖʋnɩ Ɛsɔ hɩɖɛ.