1 Kɔrɛntɩ 4 - New Testament

Pɩfɛyɩ se Krɩstʋ tiyiyaa ɛkpazɩ pa-tɩ

¹ Pʋwɛɛ se ɛyáa ɛtɩlɩ se Krɩstʋ tiyiyaa ɖa, ɖɩkɛ ɛ-tʋmlaɖaa. Ɛsɔ ɖʋzɩ e-toovenim mbʋ́ pɩɩwɛ mɛsaɣ tɛɛ yɔ ɖe-nesi taa se ɖɩwɩlɩ ɛyáa.

² Mbʋ́ pʋpɔzʋʋ weyi paɖʋzɩ e-nesi taa pʋyʋ yɔ lɛ se: ɛla mbʋ́ pʋmʋnaa yɔ.

³ Ma lɛ, yee ɩmaɣzɩɣ se malabɩ mbʋ́ pʋmʋnaa yɔ yaa mbʋ́ pɩtamʋna yɔ yɔ, pɩtana-m nɛ pʋyʋ. Paa lɛlaa ɛtɔm se malabɩ mbʋ́ pʋmʋnaa yɔ yaa mbʋ́ pɩtamʋna yɔ yɔ, pɩtana-m nɛ pʋyʋ. Halɩ ma-maɣmaɣ maatɔŋ ma-ñɩndʋ se pʋyʋ.

⁴ Mantatɩlɩ ɛzaɣ́tʋ ndʋ́ tɩwɛ mɔ-yɔɔ yɔ. Ɛlɛ́, pɩɩwɩlɩɣ se mantala ɛzaɣ́tʋ natʋyʋ. Kɩpaɣlʋ hʋʋnɩ mɔn-tɔm.

⁵ Pʋ-yɔɔ lɛ, ɩtaahʋʋnɩ ɖama nɛ pʋcɔ alɩwaatʋ ndʋ́ Ɛsɔ ɖʋwa se Kɩpaɣlʋ kɔŋ yɔ, tɩtalɩ. Ɛnʋ lɩzɩɣnɩ mbʋ́ pʋwɛ cɩkpɛndʋʋ taa yɔ nɛ ɛwɩlɩ. Ɛnʋ kuluuni ɖɔɖɔ mbʋ́ ɛyáa maɣzɩɣ pa-taa yɔ pʋ-yɔɔ. Peeɖe Ɛsɔ saŋ paa weyi mbʋ́ ɛlaba yɔ pʋ-yɔɔ.

⁶ Taabalaa Krɩstʋ ñɩma, mɩ-yɔɔ mankpaɣ tɔm ndʋ́ mɔyɔɔdaa yɔ nɛ mɛnkɛdɩnɩ ma nɛ Apoloosi. Mancaɣaɣ se ɩnɩɩ eduuye ɖɩnɛ ɖɩ-tɔbʋʋ: «Ɩtaala nɛ pɩɖɛɛ mbʋ́ pama Ɛsɔtɔm Takayaɣ taa yɔ pʋ-yɔɔ.» Pʋbʋ lɛ, nɔɔyʋ ɛɛtɩnɩɣ lɛlʋ yɔɔ nɛ ɛkpazɩ ɛ-tɩ nɛ eniɣzi lɛlʋ.

⁷ Mbʋ́ pʋyɔɔ yɔ, aheyi-ŋ se ŋkɩlɩ lɛlaa? Pɩtɛkɛ Ɛsɔ hanɩ-ŋ mbʋ́ pɩtɩŋa payɩ ŋwɛna yɔ yaa we? Yee toovenim se ɛnʋ ɛhanɩ-ŋ-pʋ lɛ, pɩlabɩ ɛzɩma ŋkʋndʋʋnɩ-pʋ ɛzɩ pataha-ŋ-pʋ kɩhaʋ yɔ?

⁸ Ei! Naze mɩtɛm mi-ɖeɖe hiɣu! Ɩtɛm pɩsʋʋ ñɩm tɩnaa! Naze mɩpɩsɩ awiya nɛ piyebi-ɖʋ! Toovenim lɛ, ɖe-liu kɛwɛɛ kpem se ɩtɔɔ kewiyaɣ nɛ ɖɩkɔɔ ɖa nɛ mɩ ɖɩtɔɔ-kɛ.

⁹ Mbʋ́ pʋyɔɔ yɔ, pɩlakɩ-m ɛzɩ ɖa Krɩstʋ tiyiyaa lɛ, lone nɖɩ́ pʋtɔyɩnɩ-ɖɩ yɔ, ɖɩ-taa Ɛsɔ sɩ-ɖʋ yɔ. Đɩwɛ ɛzɩ mbá pakʋ pɔ-tɔm nɛ pʋpɔzʋʋ se pakʋ-wɛ yɔ. Pelem-ɖʋ ɛyáa nɛ Ɛsɔ tiyiyaa patɩŋa payɩ pɛ-ɛsɩndaa.

¹⁰ Ei! Đɛkɛ kɩmɛlɛmɩŋ Krɩstʋ yɔɔ nɛ mɩ mɩkɛ lɔŋsɩnɖaa mɩ nɛ ɩ mɩ-kpɛndʋʋ taa! Đɛkɛ ajamaa nɛ mɩkɛ ɖoŋ tɩnaa! Patakpaɣ-ɖa payaa pʋyʋ nɛ piyele pasaŋ-mɩ!

¹¹ Toovenim lɛ, halɩ nɛ sɔnɔ, ñɔɔsɩ wɛɛ sɩwɩɣ-ɖʋ nɛ lɔkɔtʋ ñɔɖɔkɩ-ɖʋ. Đɩfɛyɩnɩ wondu se ɖisuu. Pamakɩ-ɖʋ nɛ ɖɩwɛɛ ɖɩcɔʋ paa le.

¹² Đɩkʋʋ ɖa-tɩ nɛ tʋmɩyɛ se ɖihiɣ ɖɩtɔɔ. Ŋgʋ́, alɩwaatʋ ndʋ́ ɛyáa tʋʋ-ɖʋ yɔ, ɖɩwazɩɣ-wɛ. Đɩɖɔkʋʋ ɖa-tɩ ɖɔɖɔ alɩwaatʋ ndʋ́ pɛwɛɣ ɖa-wayɩ kaŋ kaŋ yɔ.

¹³ Yee ɛyáa ɛyɔɔdʋʋ-ɖʋ tɔm ɛzaɣ́tʋ yɔ, ɖicosuu-wɛ camɩyɛ. Halɩ nɛ sɔnɔ, ɛyáa kpakɩɣ-ɖʋ ɛzɩ kedeŋa yɔɔ azuluma nɛ ñɩtʋ ndʋ́ pahazɩɣ yɔ.

Pɔɔlɩ yɔɔdʋʋnɩ e-piya nzɩ́ ɛsɔɔlɩ-sɩ siŋŋ yɔ

¹⁴ Maamaɣ-mɩ tɔm tʋnɛ se manɖʋ-mɩ fɛyɛ. Ɛlɛ́, mamaɣ-mɩ-tʋ se mansɩɣzɩ-mɩ lɔŋ ɛzɩ men-piya nzɩ́ mɔnsɔɔlaa siŋŋ yɔ.

¹⁵ Mbʋ́ pʋyɔɔ yɔ, paa ɩɩwɛnɩ wɩlɩyaa sakɩyɛ nɛ pawɩlɩɣ-mɩ Krɩstʋ tɔm yɔ, ɩɩpɩzɩɣ ɩwɛnɩ caanaa sakɩyɛ. Mbʋ́ pʋyɔɔ yɔ, mɔnkɔmnɩ monsusi-mɩ Krɩstʋ Yesu Laŋhɛzɩyɛ Tɔm nɛ pɩtɩŋnɩ pʋ-yɔɔ nɛ manpɩsɩ ɛzɩ mɩ-caa yɔ.

¹⁶ Pʋ-yɔɔ mentendiɣ-mɩ se ɩtɩŋ ma-nʋmɔʋ.

¹⁷ Ḿbʋ́ yebina nɛ mentiyini-mɩ man-pɩɣa kʋsɔɔlaɣ Timootee weyi ɛkɛ ɛyʋ toovenim tʋ Kɩpaɣlʋ ɛsɩndaa yɔ. Ɛnʋ tɔzʋʋnɩ-mɩ ɛzɩma mbʋ́ mɔnɖɔŋ Krɩstʋ nʋmɔʋ taa me-wezuu caɣʋ taa yɔ, nɛ ɛzɩma mbʋ́ mawɩlɩɣ paa le Yesu aŋgba tɩŋa payɩ taa yɔ.

¹⁸ Mɩ-taa lɛlaa kpazaɣ pa-tɩ, mbʋ́ pʋyɔɔ yɔ, pɩlakaɣ-wɛ se maatasɩɣ kɔm mɩ-tɛ.

¹⁹ Ɛlɛ́, yee Kɩpaɣlʋ etisaa yɔ, mɔnkɔŋ mɩ-tɛ alɩwaatʋ tʋnɛ tɩ-taa nɛ mana se tɩ-kpazɩyaa ḿbá, pɔyɔɔdʋʋ yem yaa pɛwɛnɩ ɖoŋ nɩɩyɩ.

²⁰ Mbʋ́ pʋyɔɔ yɔ, pɩtɛkɛ ɛyáa yɔɔdaɣ panaɣnɩ ɛzɩma mbʋ́ Ɛsɔ tɔkɩ e-Kewiyaɣ yɔ. Ɛlɛ́, pa-lakasɩ panaɣna.

²¹ Ɛbɛ mi-liu wɛɛ: mɔnkɔɔ mɩ-tɛ nɛ ɛgbazɩyɛ yaa mɔnkɔmnɩ sɔɔlɩm nɛ ma nɛ mɩ pʋwɛɛ leleŋ?