1 Kɔrɛntɩ 3 - New Testament

Krɩstʋ tɩnɩ ɛ-ñɩma

¹ Taabalaa, mantaapɩzɩɣ se mɔyɔɔdɩnɩ-mɩ ɛzɩ mbá Ɛsɔ ha-wɛ e-Fezuu Kiɖeɖeu yɔ. Ɛlɛ́, mɔyɔɔdɩnɩ-mɩ ɛzɩ mbá palakɩ ɛzɩ ɖooo paalakʋʋ yɔ yaa ɛzɩ mbá pɛkɛ piya pɩcɩɩcɩyɩmwaa Krɩstʋ nʋmɔʋ taa yɔ.

² Tɔm ndʋ́ mɛnkɛdɩ-mɩ yɔ, tɩwɛ ɛzɩ naalɩm maha-mɩ yɔ, tɩfɛyɩ ɛzɩ tɔɔnaɣ yuŋ ñɩŋga yɔ. Mbʋ́ pʋyɔɔ yɔ, ɩtaapɩzɩɣ se ɩtɔɔ-kɛ. Halɩ nɛ sɔnɔ ɩɩpɩzɩɣ ɩtɔɔ-kɛ ɖɔɖɔ.

³ Mbʋ́ pʋyɔɔ yɔ, mi-wezuu caɣʋ taa lɛ, ɩlakɩ ɛzɩ ɩɩwɛʋ yɔ. Alɩwaatʋ ndʋ́ ɛsɩsɛmɩyɛ nɛ you pɛwɛ mɩ-hɛkʋ taa yɔ, ɩfɛyɩ ɛzɩ ɩɩwɛʋ yɔ yaa we? Yaa mi-wezuu caɣʋ ñɛfɛyɩ ɖɔɖɔ ɛzɩ ɛyáa lɛlaa yɔ?

⁴ Alɩwaatʋ ndʋ́ mɩ-taa nɔɔyʋ yɔɔdʋʋ se ɛwɛ Pɔɔlɩ yɔɔ nɛ lɛlʋ se ɛ́lɛ́ ñɛwɛ Apoloosi yɔɔ yɔ, paalakɩ ɛzɩ kedeŋa ñɩma lakʋʋ yɔ yaa we?

⁵ Yee ḿbʋ́ anɩ lɛ Apoloosi? Ma Pɔɔlɩ, ma lɛ anɩ? Đɩkɛ Ɛsɔ tʋmlaɖaa yem. Ɖɔ-yɔɔ pɩtɩŋnaa nɛ ɩwɛnɩ lidaʋ Krɩstʋ yɔɔ. Paa ɖa-taa weyi ɛlakɩ tʋmɩyɛ nɖɩ́ Kɩpaɣlʋ ɖʋ-ɩ yɔ.

⁶ Pʋwɛ ɛzɩ mɔsɔnɩ tɩʋ nɛ Apoloosi mɩzɩ kʋ-yɔɔ lɩm yɔ. Ɛlɛ́, Ɛsɔ lakɩna nɛ kɩpaɣlɩɣ.

⁷ Pɩtɛkɛ weyi ɛsɔʋ tɩʋ yaa weyi ɛmɩzɩɣ kʋ-yɔɔ lɩm yɔ, ɛkɩlɩnɩ wazaɣ. Ɛlɛ́, Ɛsɔ weyi ɛlakɩ nɛ kɩpaɣlɩɣ yɔ, e-ɖeke koŋ ɛkɩlɩnɩ wazaɣ.

⁸ Weyi ɛsɔʋ tɩʋ yɔ nɛ weyi ɛmɩzɩɣ kʋ-yɔɔ lɩm yɔ, pɛwɛ kɩmaŋ. Paa pa-taa weyi lɛ, tʋmɩyɛ nɖɩ́ ɛlaba yɔ, ɖɩ-yɔɔ Ɛsɔ kɔŋ-ɩ hɛyʋʋ.

⁹ Mbʋ́ pʋyɔɔ yɔ, ɖatɩŋa ɖɩkpɛndaa nɛ ɖɩlakɩ Ɛsɔ tʋmɩyɛ nɛ mɩ mɩwɛɛ ɛzɩ ɛ-hayɩm yɔ. Ɩwɛ ɖɔɖɔ ɛzɩ ɛ-ɖɩɣa yɔ.

¹⁰ Ma lɛ, Ɛsɔ labɩ-m lootiye nɛ mɛwɛɛ ɛzɩ kuduyiŋ mayʋ kɩbanʋ weyi ɛsɩ tigiɖe nɛ lɛlʋ tɩnɩɣ ɖɩ-yɔɔ yɔ. Ɛlɛ́, pʋwɛɛ se paa weyi ɛtɩlɩ ɛzɩma mbʋ́ ɛtɩnɩɣ ɖɩ-yɔɔ yɔ.

¹¹ Mbʋ́ pʋyɔɔ yɔ, nɔɔyʋ ɛɛpɩzɩɣ ɛtasɩ tigiɖe naɖɩyɛ sɩʋ nɛ pɩtasɩnɩ nɖɩ́ pɛtɛm sɩʋ yɔ. Ńɖɩ́ lɛ Yesu Krɩstʋ.

¹² Paa nɔɔyʋ ɛtɩnɩ ɖɩ-yɔɔ nɛ sika yaa ñɩɣlɩ́m yaa pɛɛ kɩñɩlɩzɛɛ yaa ɖasɩ yaa kesi yaa ñɩtʋ yɔ,

¹³ pɔkɔŋ ɛ-tʋmɩyɛ naʋ. Mbʋ́ pʋyɔɔ yɔ, tɔm hʋʋ kɩyakʋ wiye lɛ, Ɛsɔ ɖʋʋ paa weyi ɛ-tʋmɩyɛ miŋ taa. Miŋ ɛnʋ ɛwɩlɩɣna se ɖɩwɛ ɖeu naa ɖɩfɛyɩ ɖeu nɛ pasɩm-ɖɩ.

¹⁴ Weyi paɖʋʋ ɛ-tʋmɩyɛ miŋ taa nɛ ɖɩtañaɣ yɔ, pɔkɔŋ-ɩ hɛyʋʋ.

¹⁵ Ɛlɛ́, yee paɖʋ nɔɔyʋ tʋmɩyɛ miŋ taa nɛ ɖɩñaɣ yɔ, pʋdʋ lesiɣ ɛ-kɩhɛyʋʋ. Ehikiɣ ñʋʋ yabʋ, ɛlɛ́, pʋwɛɣ ɛzɩ ɛyʋ seɣu ɛtɩŋɩɣnɩ miŋ taa nɛ ɛtʋlɩ yɔ.

¹⁶ Ɩtatɩlɩ se ɩwɛ ɛzɩ Ɛsɔ ɖɩɣa ŋgá e-Fezuu Kiɖeɖeu wɛ ka-taa yɔ yaa we?

¹⁷ Yee nɔɔyʋ ɛyɔkɩ-kɛ yɔ, Ɛsɔ tɔyɩtʋʋ-ɩ. Mbʋ́ pʋyɔɔ yɔ, kɛkɛ ɛ-maɣmaɣ ɛ-pʋyʋ. Mɩ lɛ ɖɩɣa ŋ́gá.

¹⁸ Nɔɔyʋ ɛtaacɛtɩ ɛ-tɩ yem. Yee mɩ-taa nɔɔyʋ ɛmaɣzɩɣ se ɛwɛnɩ kedeŋa lɔŋsɩnɖɛ yɔ, pʋdʋ ɛpɩsɩ ɛzɩ kɩmɛlɛŋ yɔ. Peeɖe ɛkɛɣ lɔŋsɩnɖʋ toovenim taa.

¹⁹ Mbʋ́ pʋyɔɔ yɔ, kedeŋa lɔŋsɩnɖɛ kɛ kɩmɛlɛndʋ Ɛsɔ ɛsɩndaa. Pʋwɛ ɛzɩ pamaʋ Ɛsɔtɔm Takayaɣ taa se: «Ɛsɔ kpaɣ lɔŋsɩnɖaa nɛ pa-maɣmaɣ pɛ-cɛtɩm» yɔ.

²⁰ Patasɩ maʋ ɖɔɖɔ se: «Kɩpaɣlʋ sɩm lɔŋsɩnɖaa lɩmaɣza. Ɛnawa se aawazɩɣ pʋyʋ.»

²¹ Pʋ-yɔɔ lɛ, nɔɔyʋ ɛtaakʋndɩ se ɛkɛ lɛlʋ ñɩnʋ. Mbʋ́ pʋyɔɔ yɔ, paa weyi ɛkɛ mɩ-ñɩnʋ:

²² paa ma Pɔɔlɩ yaa Apoloosi yaa Pɩyɛ. Paa kedeŋa yaa wezuu yaa sɩm yaa mbʋ́ pʋwɛ sɔnɔ yaa mbʋ́ pʋkɔŋ yɔ yɔ, pɩtɩŋa payɩ pɩkɛ mɩ-ñɩm ɖɔɖɔ.

²³ Ɛlɛ́, mɩ mɩkɛ Krɩstʋ ñɩma nɛ Krɩstʋ ñɛkɛ Ɛsɔ ñɩnʋ.