1 Kɔrɛntɩ 2 - New Testament

Pɔɔlɩ susaa se pakam Krɩstʋ kaamaŋkaɣ yɔɔ

¹ Taabalaa, alɩwaatʋ ndʋ́ mɔnkɔm mɩ-tɛ se meheyi-mɩ Ɛsɔ tɔm ndʋ́ tɩwɛ mɛsaɣ tɛɛ yɔ, pɩtɛkɛ tɔm sɔsɔtʋ natʋyʋ yaa lɔŋsɩnɖɛ sɔsɔɖɛ naɖɩyɛ meheyini-mɩ-tʋ.

² Mbʋ́ pʋyɔɔ yɔ, pʋcɔ mɔnkɔɔ mɩ-tɛ lɛ, manɖʋwa se alɩwaatʋ ndʋ́ mɛwɛɣ mɩ-tɛ yɔ, maaheyiɣ-mɩ natʋyʋ nɛ pɩtasɩnɩ Yesu Krɩstʋ tɔm. Kɔzɩkɔzɩ sɩm mbʋ́ ɛsɩbɩ kaamaŋkaɣ yɔɔ yɔ pʋ-tɔm.

³ Man-tɩ tɩŋa maawɛʋ mɩ-cɔlɔ yɔ, mɛwɛ ɛjandʋ taa nɛ sɔɔndʋ kpaɣ-m pɩtɩɩfɛyɩ nɛ menseliɣ.

⁴ Monsusaɣ-mɩ Ɛsɔtɔm lɛ, pɩtɛkɛ ɛyáa lɔŋsɩnɖɛ monsusaɣnɩ-mɩ-tʋ se mawabɩnɩ-mɩ. Ɛlɛ́, Fezuu Kiɖeɖeu ɖoŋ wɩlɩnɩ-mɩ se tɔm ndʋ́ monsusuu yɔ, tɩkɛ toovenim.

⁵ Ḿbʋ́ yebina nɛ ɩwɛnɩ lidaʋ Ɛsɔ ɖoŋ yɔɔ. Ɛlɛ́, pɩtɛkɛ ɛyáa lɔŋsɩnɖɛ yɔɔ pɩtɩŋnaa.

Ɛsɔ lɔŋsɩnɖɛ tɔm

⁶ Ŋgʋ́, lɔŋsɩnɖɛ tɔm ɖisusuu ɛyáa mbá papɩ Ɛsɔ nʋmɔʋ taa siŋŋ yɔ. Ɛlɛ́, pɩtɛkɛ kedeŋa ñɩma lɔŋsɩnɖɛ yaa kedeŋa awiya mbá pɔkɔŋ labʋ asayʋʋ yɔ pa-ñɩnɖɛ.

⁷ Ɛsɔ lɔŋsɩnɖɛ nɖɩ́ ɖɩɩwɛ ɛyáa mɛsaɣ tɛɛ yɔ, ɖɩ-tɔm ɖisusuu. Tɩ-taa wɛ cukaŋ. Pʋcɔ Ɛsɔ la kedeŋa lɛ, ɛɛɖʋwa se pɩtɩŋnɩ ɖɩ-yɔɔ nɛ ɖɩwɛɛ e-koboyaɣ taa.

⁸ Kedeŋa awiya taa nɔɔyʋ tasɩ lɔŋsɩnɖɛ ńɖɩ́. Mbʋ́ pʋyɔɔ yɔ, yee paasɩm-ɖɩ yɔ, pataaka Kɩpaɣlʋ weyi ɛtɩnɩ koboyaɣ yɔ kaamaŋkaɣ yɔɔ.

⁹ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Mbʋ́ ɛyʋ tana wiɖiyi kaʋ yaa ɛtanɩɩ yɔ, mbʋ́ ɛyʋ tamaɣzɩ pʋ-yɔɔ wiɖiyi kaʋ yɔ, toovenim lɛ, ḿbʋ́ Ɛsɔ ñɔɔzaa nɛ ɛsɩɩ mbá pɔsɔɔlɩ-ɩ yɔ.»

¹⁰ Đa Ɛsɔ tɩŋnɩ e-Fezuu Kiɖeɖeu yɔɔ nɛ ɛwɩlɩ-pʋ. Toovenim lɛ se Fezuu Kiɖeɖeu sɩm pɩtɩŋa payɩ, halɩ pɩkpɛndɩnɩ mbʋ́ pʋwɛ ɖooo Ɛsɔ taa yɔ.

¹¹ Apɩzɩɣ ɛtɩlɩ mbʋ́ pʋwɛ lɛlʋ taa yɔ? Ɛlɛ́, paa weyi ɛ-maɣmaɣ ɛ-kalɩzaɣ tɩlɩɣnɩ mbʋ́ pʋwɛ ɛ-taa yɔ. Ḿbʋ́ ɖɔɖɔ mbʋ́ pʋwɛ Ɛsɔ taa yɔ, nɔɔyʋ ɛɛpɩzɩɣ ɛtɩlɩ-pʋ nɛ pɩtasɩnɩ Ɛsɔ ɛnʋ ɛ-maɣmaɣ e-Fezuu.

¹² Ŋgʋ́ ɖa lɛ, pɩtɛkɛ kedeŋa fezuu paha-ɖʋ. Ɛlɛ́, Ɛsɔ hanɩ-ɖʋ e-Fezuu Kiɖeɖeu se ɖɩpɩzɩ ɖɩtɩlɩ ɛ-ñɩm mbʋ́ paha-ɖʋ falaa yɔ.

¹³ Đɩɩyɔɔdʋʋ pʋ-tɔm nɛ tɔm ndʋ́ kedeŋa lɔŋsɩnɖaa wɩlɩɣ yɔ. Ɛlɛ́, ndʋ́ Fezuu Kiɖeɖeu wɩlɩɣ yɔ ɖɩyɔɔdʋʋna. Pʋ-yɔɔ ɖɩlɩzɩɣ kʋ-tɔm ńdʋ́ tɩ-tɔbʋʋ mbá Ɛsɔ ha-wɛ-kʋ yɔ.

¹⁴ Ɛlɛ́, mbá ɛtaha-wɛ-kʋ yɔ, paapɩzɩɣ petisi toovenim tɔm ndʋ́ kiheyiɣ ɛyáa yɔ. Pamaɣzɩɣ se tɩkɛ kɩmɛlɛndʋ tɔm. Paapɩzɩɣ panɩɩ-tʋ. Mbʋ́ pʋyɔɔ yɔ, mbá Ɛsɔ ha-wɛ e-Fezuu Kiɖeɖeu yɔ pe-ɖeke papɩzɩɣna panɩɩ tɩ-tɔbʋʋ.

¹⁵ Mbá ɛha-wɛ-kʋ yɔ, papɩzɩɣ patɩlɩ mbʋ́ pʋwɛ ɖeu yaa mbʋ́ pɩfɛyɩ ɖeu yɔ. Nɔɔyʋ ɛɛpɩzɩɣ ɛkpɛzɩnɩ-wɛ.

¹⁶ Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se: «Asɩm Kɩpaɣlʋ lɩmaɣza? Apɩzɩɣ ɛtasɩ-ɩ tɔm?» Ŋgʋ́ ɖa yɔ, ɖɩmaɣzɩɣ ɛzɩ Krɩstʋ maɣzʋʋ yɔ.