1 Kɔrɛntɩ 15 - New Testament

Krɩstʋ femnɩ sɩm taa

¹ Taabalaa, mɔntɔzʋʋ-mɩ Laŋhɛzɩyɛ Tɔm ndʋ́ monsusi-mɩ yɔ. Ńdʋ́ itisaa nɛ ɩɖɔkɩ-tʋ nesi naalɛ kpam.

² Yee ɩɖɔkɩ-tʋ ḿbʋ́ camɩyɛ kpam ɛzɩ monsusuu-mɩ-tʋ yɔ yɔ, tɩyakɩ mɩ-ñʋʋ. Pɩtɛkɛ ḿbʋ́, lidaʋ ŋgʋ́ ɩɩwɛnɩ alɩwaatʋ ndʋ́ monsusi-mɩ-tʋ yɔ, kɩɩwazɩɣ-mɩ pʋyʋ.

³ Tɔm ndʋ́ maanɩwa nɛ mentisi nɛ tɩkɩlɩ wazaɣ yɔ, ńdʋ́ meheyi-mɩ. Ńdʋ́ lɛ se: ɖa-kɩwɛɛkɩm yɔɔ Krɩstʋ sɩba. Ḿbʋ́ pama Ɛsɔtɔm Takayaɣ taa ɖooo lɔŋ.

⁴ Pepim-i nɛ efe kɩyakʋ naadozo ñɩŋgʋ wiye ɛzɩ paamaʋ ɖɔɖɔ Ɛsɔtɔm Takayaɣ taa yɔ.

⁵ Efema lɛ, ɛwɩlɩ ɛ-tɩ Pɩyɛ. Pʋwayɩ lɛ, ɛwɩlɩ ɛ-tɩ e-tiyiyaa hiu nɛ naalɛ.

⁶ Paba wayɩ lɛ, ɛwɩlɩ ɛ-tɩ taabalaa mbá nɛ pɛkpɛndɩ-ɩ naʋ yɔ, pɛɖɛ ɛzɩ taŋga yɔ. Paa pa-taa lɛlaa ɛsɩba yɔ, pa-taa ɛyáa sakɩyɛ wɛ wezuu halɩ nɛ sɔnɔ.

⁷ Pʋwayɩ ɛwɩlɩ ɛ-tɩ Yakubu. Pʋbʋ wayɩ lɛ, ɛwɩlɩ ɛ-tɩ e-tiyiyaa lɛlaa tɩŋa.

⁸ Patɩŋa payɩ pa-wayɩ lɛ, ɛwɩlɩ-m ɛ-tɩ kɛtɛzaɣ taa. Ŋgʋ́, mɛwɛnɩ ɛzɩ pɩɣa ŋgá palʋlɩ-kɛ kɩtapɩpʋʋ yɔ.

⁹ Mbʋ́ pʋyɔɔ yɔ, mɛnkɛnɩ Krɩstʋ tiyiyaa taa tɔyaɣ. Toovenim lɛ, mantamʋna se paya-m se Krɩstʋ tiyiyu. Mbʋ́ pʋyɔɔ yɔ, maawɛnɩ ɛ-ŋgbɛyɛ taa ñɩma wayɩ kaŋ kaŋ.

¹⁰ Ɛlɛ́, Ɛsɔ lootiye yɔɔ lɛ, mɛnkɛ mbʋ́ mɛnkɛnaa yɔ. Lootiye nɖɩ́ ɛlabɩ-m yɔ, ɖɩwɛnɩ kɛzɛɣa. Mbʋ́ pʋyɔɔ yɔ, malabɩ tʋmɩyɛ nɛ pɩkɩlɩ Krɩstʋ tiyiyaa lɛlaa tɩŋa payɩ. Pɩtɛkɛ mon-ɖoŋ malabɩnaa, ɛlɛ́, lootiye nɖɩ́ ɛlabɩ-m yɔ ɖɩ-yɔɔ malabɩ-ɖɩ.

¹¹ Pʋ-yɔɔ lɛ, paa pɩɩkɛ ma yaa ḿbá yɔ, tɔm ndʋ́ ɖisusuu-mɩ yɔ, tɩ-yɔɔ ɖɔɖɔ ɩwɛnɩ lidaʋ.

Ɛsɔ kaɣ fezuu sɩɖaa

¹² Yee ɖisusuu se Krɩstʋ sɩba nɛ efe lɛ, pɩlabɩ ɛzɩma mɩ-taa lɛlaa ñɔtɔŋ se sɩɖaa eefeŋ?

¹³ Yee toovenim se sɩɖaa eefeŋ yɔ, pʋbʋ Krɩstʋ tefe ɖɔɖɔ.

¹⁴ Yee Krɩstʋ etefe yɔ, tɔm ndʋ́ ɖisusuu yɔ, tɩfɛyɩnɩ wazaɣ nakɛyɛ nɛ mi-lidaʋ fɛyɩnɩ wazaɣ nakɛyɛ ɖɔɖɔ.

¹⁵ Yee toovenim sɩɖaa eefeŋ yɔ, pʋbʋ Ɛsɔ tefezi Krɩstʋ ɖɔɖɔ. Halɩ aseɣɖe nɖɩ́ ɖɩlɩzɩɣ alɩwaatʋ ndʋ́ ɖɩyɔɔdʋʋ se Ɛsɔ fezi-i kpem yɔ, ɖɩcɛtɩnɩ Ɛsɔ taa.

¹⁶ Mbʋ́ pʋyɔɔ yɔ, yee sɩɖaa eefeŋ yɔ, Krɩstʋ tefe ɖɔɖɔ.

¹⁷ Nɛ yee Krɩstʋ etefe yɔ, mi-lidaʋ fɛyɩnɩ kɛzɛɣa nakɛyɛ. Đɩnɛ ɩwɛ mɩ-kɩwɛɛkɩm nesi taa ḿbʋ́.

¹⁸ Pɩwɩlɩɣ ɖɔɖɔ se mbá paawɛnɩ lidaʋ Krɩstʋ yɔɔ nɛ pʋcɔ pasɩ yɔ, peleba.

¹⁹ Yee kedeŋa yɔɔ cɩnɛ wezuu caɣʋ ɖeke yɔɔ ɖɩtaɣ Krɩstʋ yɔ, ɖɩwɛ pʋtɔdɩyɛ nɛ pɩkɩlɩ ɛyáa tɩŋa payɩ.

²⁰ Ɛlɛ́ toovenim taa lɛ, Ɛsɔ fezi Krɩstʋ nɛ sɩɖaa taa. Ɛnʋ lɛ sɩɖaa taa kajalaɣ tʋ weyi efezaa yɔ.

²¹ Mbʋ́ pʋyɔɔ yɔ, ɛzɩma mbʋ́ pɩtɩŋnɩ ɛyʋ kʋɖʋm yɔɔ nɛ ɛyáa sɩkɩ yɔ, ḿbʋ́ ɖɔɖɔ pɩtɩŋɩɣnɩ ɛyʋ kʋɖʋm yɔɔ nɛ sɩɖaa fe.

²² Ɛzɩma mbʋ́ pɩtɩŋnɩ Aɖam yɔɔ nɛ ɛyáa tɩŋa sɩkɩ yɔ, ḿbʋ́ ɖɔɖɔ pɩtɩŋɩɣnɩ Krɩstʋ yɔɔ nɛ sɩɖaa tɩŋa fe.

²³ Ɛlɛ́, Ɛsɔ kɔŋ fezuu paa mbá nɛ pa-alɩwaatʋ: Krɩstʋ ɛcalɩnɩ fezuu. Ɛ-wayɩ lɛ, mbá pɛkɛ Krɩstʋ ɛnʋ ɛ-ñɩma yɔ, efeziɣ-wɛ alɩwaatʋ ndʋ́ Krɩstʋ pɩsɩɣ ɛkɔɔ yɔ.

²⁴ Pʋwayɩ lɛ, kɛtɛzaɣ alɩwaatʋ talɩ: alɩwaatʋ ńdʋ́ʋ́ Krɩstʋ kpakɩɣ kewiyaɣ nɛ ɛ́ɖʋzɩ Caa Ɛsɔ nesi taa. Pʋcɔ ɛ́ɖʋzɩ-kɛ lɛ, eɖeziɣ kewiyisi tɩŋa nɛ ɛyáa ɖoŋ nɛ aleewaa ñɩŋ pɩtɩŋa payɩ.

²⁵ Mbʋ́ pʋyɔɔ yɔ, pʋwɛɛ se ɛtɔɔ kewiyaɣ ḿbʋ́ nɛ pʋkɔɔ pɩsɩɩnɩ alɩwaatʋ ndʋ́ Ɛsɔ kpa e-koyindinaa tɩŋa payɩ nɛ ɛ́ɖʋzɩ-wɛ e-nesi taa yɔ.

²⁶ Koyindu weyi pɩɖɩkɩɣnɩ-ɩ tɔyɩtʋʋ yɔ lɛ sɩm.

²⁷ Ɛzɩ pamaʋ Ɛsɔtɔm Takayaɣ taa se: «Ɛsɔ ɖʋzɩ pɩtɩŋa payɩ e-nesi taa yɔ» pɩwɩlɩɣ kpayɩ se Ɛsɔ ɛnʋ ɛfɛyɩ pɩ-taa. Mbʋ́ pʋyɔɔ yɔ, ɛnʋ ɖʋzɩnɩ-pʋ e-nesi taa.

²⁸ Ɛsɔ ɖʋzʋʋ pɩtɩŋa payɩ Krɩstʋ nesi taa lɛ, ɛnʋ Ɛsɔ Pɩyalʋ maɣmaɣ eluzi ɛ-tɩ Ɛsɔ weyi ɛɖʋzʋʋ-pʋ e-nesi taa yɔ ɛ-tɛɛ. Peeɖe Ɛsɔ kɛɣ pɩtɩŋa payɩ pi-wiyaʋ.

²⁹ Ɩmaɣzɩ mbá petisiɣ se palabɩ-wɛ lɩm sɔʋ sɔnzɩ sɩɖaa yɔɔ yɔ pɔ-tɔm. Yee toovenim se sɩɖaa eefeŋ kpem lɛ, pɩlabɩ ɛzɩma petisiɣ se palabɩ-wɛ-sɩ pɔ-yɔɔ?

³⁰ Đa-maɣmaɣ kpem yɔ, pɩlabɩ ɛzɩma alɩwaatʋ kpeekpe ɖileŋ ɖa-tɩ sɩm nɔɔ taa ḿbʋ́?

³¹ Taabalaa, ɛzɩma mbʋ́ mankʋndʋʋnɩ-mɩ ma nɛ Kɩpaɣlʋ Yesu Krɩstʋ ɖɛ-kpɛndʋʋ taa yɔ, ḿbʋ́ ɖɔɖɔ mɛwɛ sɩm nɔɔ taa paa ɖooye.

³² Yee ɛyáa lɩmaɣza tɩtɩŋa maawɛna nɛ mala you nɛ tɛtɛ kpɩna Efɛɛzɩ lɛ, pɩɩlɩ-m we pɩ-taa? Yee sɩɖaa eefeŋ yɔ, pʋbʋ ɖɩla ɛzɩ potuu eduuye se: «Đɩtɔɔ nɛ ɖɩñɔɔ, mbʋ́ pʋyɔɔ yɔ, ɖɩkɔŋ sɩbʋ cee» yɔ.

³³ Ɩtaayele nɛ nɔɔyʋ cɛtɩ-mɩ: «Ɛgbaɣdɩyɛ kɩdɛkɛdɩyɛ lesiɣ lakasɩ kɩbanzɩ.»

³⁴ Pʋ-yɔɔ lɛ, ɩmaɣzɩ mɩ-ñʋŋ taa camɩyɛ ɛzɩ pʋpɔzʋʋ yɔ nɛ iyele kɩwɛɛkɩm labʋ. Me-liu wɛɛ se fɛyɛ ɛkpa-mɩ yɔɔ mɔyɔɔdʋʋ se mɩ-taa nabɛyɛ tasɩ Ɛsɔ.

Ɛzɩma sɩɖaa kaɣ fem?

³⁵ Nɔɔyʋ kaɣ pɔzʋʋ se: «Ɛzɩma sɩɖaa kɔŋ fem? Tomnaɣ ŋgá pɔkɔŋ wɛnaʋ?»

³⁶ Kɩmɛlɛŋ ña! Ŋtatɩlɩ se piye nɖɩ́ ŋɖuu yɔ, ɖɩtaɖazɩ yɔ, ɖɩɩpɩzɩɣ ɖɩñɔ yaa we?

³⁷ Piye yem ŋɖuu. Pʋtɔma yɔ, mɩɖɛ yaa tɔɔnaɣ nakɛyɛ piye, ńɖɩ́ ñɔʋna. Ɛlɛ́, mbʋ́ ŋɖuwa yɔ, pɩɩwɛɣ ɛzɩ mbʋ́ pʋkɔŋ ñɔʋ yɔ.

³⁸ Ɛsɔ haɣnɩ piye ńɖɩ́ tomnaɣ ŋgá e-liu wɛɛ yɔ. Paa pee wena lɛ, ɛhaɣ-yɛ tomnaɣ ŋgá kamʋnɩ-yɛ yɔ.

³⁹ Mbʋ́ pʋwɛ wezuu yɔ, pɩtɩŋa pu-tomnasɩ tɛkɛ kʋɖʋmaɣ: ɛyáa wɛnɩ po-tomnaɣ, kpɩna ñɛwɛnɩ a-ñɩŋga, sumasɩ ñɛwɛnɩ sɩ-ñɩŋga nɛ kpakpasɩ ñɛwɛnɩ sɩ-ñɩŋga ɖɔɖɔ.

⁴⁰ Tomnasɩ ńzɩ́ sɩ-ɖeu wɛ ndɩ nɛ wɩsɩ nɛ fenaɣ nɛ tɩɩnzɩ pa-ñɩmbʋ. Tataa tomnasɩ ńzɩ́ sɩ-ɖeu wɛ ndɩ nɛ mbʋ́ pʋwɛ ɛsɔdaa yɔ pi-ɖeu.

⁴¹ Đɔɖɔ lɛ, wɩsɩ ɖeu wɛ ndɩ, fenaɣ ñɩmbʋ ñɛwɛɛ ndɩ nɛ tɩɩnzɩ ñɩmbʋ ñɛwɛɛ ndɩ ɖɔɖɔ. Halɩ tɩɩnzɩ tɩtɩŋa taa lɛ, paa ŋgá nɛ ke-ɖeu.

⁴² Ḿbʋ́ ɖɔɖɔ sɩɖaa wɛɣ alɩwaatʋ ndʋ́ pefeŋ yɔ. Pepiŋ-wɛ lɛ, po-tomnaɣ ɖazɩ, pefeŋ lɛ, po-tomnaɣ ɛɛtasɩɣ ɖazʋʋ kaʋ.

⁴³ Pepiŋ-wɛ nɛ pʋtɔdɩyɛ, ɛlɛ́ pefemni koboyaɣ. Pepiŋ-wɛ nɛ ɛjandʋ, ɛlɛ́ pefemni ɖoŋ.

⁴⁴ Pepiŋ-wɛ nɛ tomnaɣ ŋgá panaɣ yɔ, ɛlɛ́ pefemni ɛsɔdaa ñɩŋga. Yee tomnaɣ ŋgá panaɣ yɔ kɛwɛɛ yɔ, pʋwɛɛ se ɛsɔdaa ñɩŋga wɛɣ ɖɔɖɔ.

⁴⁵ Pʋ-yɔɔ pama Ɛsɔtɔm Takayaɣ taa se: «Kajalaɣ ɛyʋ weyi Ɛsɔ ma-ɩ nɛ payaɣ-ɩ se Aɖam yɔ, ɛpɩsɩ weyi ɛwɛ wezuu yɔ.» Ɛlɛ́, kɛtɛzaɣ Aɖam lɛ Fezuu Kiɖeɖeu ŋgʋ́ kɩhaɣ wezuu yɔ.

⁴⁶ Pɩtɛkɛ ɛsɔdaa tomnaɣ calɩnɩ wɛʋ, ɛlɛ́, kedeŋa yɔɔ ñɩŋga. Pʋwayɩ lɛ, ɛsɔdaa ñɩŋga ñɔkɔɔ.

⁴⁷ Tɛtʋ pamanɩ kajalaɣ ɛyʋ nɛ ɛkɛ kedeŋa yɔɔ ñɩnʋ. Naalɛ tʋ yɔ, ɛ́lɛ́ ñalɩnɩ ɛsɔdaa.

⁴⁸ Mbá pɛwɛ kedeŋa yɔɔ yɔ, pɛwɛ ɛzɩ weyi pamanɩ tɛtʋ yɔ. Mbá pɛkɛ ɛsɔdaa ñɩma yɔ, paba ñɛwɛ ɛzɩ weyi ɛlɩnɩ ɛsɔdaa yɔ.

⁴⁹ Đa lɛ, ɖɩwɛ ɛzɩ weyi pamanɩ tɛtʋ yɔ. Ḿbʋ́ ɖɔɖɔ ɖɩkɔŋ wɛʋ ɛzɩ weyi ɛlɩnɩ ɛsɔdaa yɔ.

⁵⁰ Taabalaa, ndʋ́ meheyiɣ-mɩ yɔ lɛ se: ɖo-tomnasɩ nzɩ́ sɩwɛ ɛzʋnɔ yɔ, sɩɩpɩzɩɣ sɩsʋʋ Ɛsɔ Kewiyaɣ taa. Mbʋ́ pʋyɔɔ yɔ, mbʋ́ pɩɖazɩɣ yɔ, pɩɩpɩzɩɣ pɩpɩsɩ mbʋ́ pɩɩɖazɩɣ wiɖiyi kaʋ yɔ.

⁵¹ Iwelesi nɛ ɩnɩɩ: mancɩkɩ-mɩ cɩkpalʋʋ mɛsaɣ tɛɛ tɔm natʋyʋ. Ńdʋ́ lɛ se: ɖɩɩkɔŋ ɖatɩŋa sɩbʋ. Ɛlɛ́, pɔkɔŋ ɖatɩŋa payɩ lɛɣzʋʋ tomnaɣ

⁵² tam kʋɖʋm taa yem ɛzɩ pacɩbɩyʋʋ ɛsɛ yɔ alɩwaatʋ ndʋ́ payaɣ kɛtɛzaɣ ɛgandɩyɛ yɔ. Mbʋ́ pʋyɔɔ yɔ, payaɣ-ɖɩ lɛ, sɩɖaa feŋ nɛ papɩsɩ mbá paapɩzɩɣ patasɩ sɩbʋ wiɖiyi kaʋ yɔ nɛ mbá ɖa ɖɩwɛ wezuu yɔ, pɛlɛɣzɩ ɖatɩŋa payɩ ɖo-tomnaɣ.

⁵³ Mbʋ́ pʋyɔɔ yɔ, pʋwɛɛ se ɖo-tomnaɣ ŋgá kaɖazɩɣ yɔ, kapɩsɩ ŋgá kaaɖazɩɣ wiɖiyi kaʋ yɔ nɛ ɖo-tomnaɣ ŋgá kasɩkɩ yɔ, kapɩsɩ ɖɔɖɔ ŋgá kaasɩkɩ wiɖiyi kaʋ yɔ.

⁵⁴ Alɩwaatʋ ndʋ́ ɖo-tomnaɣ ŋgá kasɩkɩ nɛ kaɖazɩ yɔ, kapɩsɩɣ ŋgá kaasɩkɩ nɛ kaaɖazɩɣ wiɖiyi kaʋ yɔ lɛ, tɔm ndʋ́ pamawa yɔ tɩlakɩ. Ńdʋ́ lɛ se: «Pawabɩ sɩm nɛ pamʋʋzɩ-pʋ.

⁵⁵ Sɩm, ño-ɖoŋ wɛ le? Sɩm, ñɔ-sɔtʋ ndʋ́ ŋkʋʋna yɔ tɩwɛ le?»

⁵⁶ Sɩm sɔtʋ lɛ kɩwɛɛkɩm nɛ paɣtʋ ñɛtɛzɩɣ kɩwɛɛkɩm ɖoŋ haʋ.

⁵⁷ Ɛlɛ́, ɖɩsa Ɛsɔ weyi ɛtɩŋɩɣnɩ ɖa-Kɩpaɣlʋ Yesu Krɩstʋ yɔɔ nɛ ɛhaɣ-ɖʋ ɖoŋ nɛ ɖɩwakɩ yɔ.

⁵⁸ Pʋ-yɔɔ lɛ, taabalaa kɩbama, ɩɖɔkɩ mɩ-tɩ camɩyɛ kpam. Pɩtaaliɣti-mɩ, ɩla Kɩpaɣlʋ tʋma paa ɖooye. Mbʋ́ pʋyɔɔ yɔ, mɩ-maɣmaɣ ɩtɛm naʋ se tʋma wena ɩlakɩ mɩ nɛ ɩ mɩ-kpɛndʋʋ taa yɔ, atɛkɛ falaa.