1 Kɔrɛntɩ 14 - New Testament

Pʋwɛɛ se Fezuu Kiɖeɖeu kʋjɔŋ ɩwazɩ Krɩstʋ ñɩma tɩŋa

¹ Ɩñɩnɩ sɔɔlɩm. Ɩsɔɔlɩ ɖɔɖɔ Fezuu Kiɖeɖeu kʋjɔŋ lɛɛŋ, kɔzɩkɔzɩ tɔm ndʋ́ tɩlɩnɩ Ɛsɔ cɔlɔ yɔ ti-susuu ñɩŋgʋ.

² Toovenim lɛ, weyi ɛyɔɔdʋʋ kʋnʋmɩŋ ndɩ ndɩ yɔ, pɩtɛkɛ ɛyáa ɛyɔɔdʋʋna, ɛlɛ́, Ɛsɔ ɛyɔɔdʋʋna. Mbʋ́ pʋyɔɔ yɔ, nɔɔyʋ ɛɛnɩɣ ndʋ́ ɛyɔɔdʋʋ yɔ. Fezuu Kiɖeɖeu wɩlɩɣnɩ-ɩ mɛsaɣ tɛɛ tɔm nɛ ɛyɔɔdʋʋ.

³ Weyi ɛ́lɛ́ susuu tɔm ndʋ́ tɩlɩnɩ Ɛsɔ cɔlɔ yɔ, ɛyáa ɛyɔɔdʋʋnɩ se ɛsɩnɩ-wɛ nɛ papɩɩ pe-lidaʋ wɛnaʋ taa nɛ pɩlabɩ-wɛ hʋnʋm nɛ ɛhɛzɩ pa-laŋa.

⁴ Đɔɖɔ lɛ, weyi ɛyɔɔdʋʋ kʋnʋmɩŋ ndɩ ndɩ yɔ, pɩsɩŋnɩ-ɩ nɛ ɛ-maɣmaɣ ɛpɩɩ Ɛsɔ nʋmɔʋ taa. Weyi esusuu tɔm ndʋ́ tɩlɩnɩ Ɛsɔ cɔlɔ yɔ, Yesu ŋgbɛyɛ taa ñɩma ɛ́lɛ́ yeki se papɩɩ Ɛsɔ nʋmɔʋ taa.

⁵ Me-liu wɛɛ se mɩtɩŋa payɩ ɩyɔɔdɩ kʋnʋmɩŋ ndɩ ndɩ. Ɛlɛ́, mbʋ́ me-liu wɛɛ nɛ pɩkɩlɩ yɔ lɛ se isusi tɔm ndʋ́ tɩlɩnɩ Ɛsɔ cɔlɔ yɔ. Weyi esusuu-tʋ yɔ, ɛkɩlɩ wazaɣ weyi ɛyɔɔdʋʋ kʋnʋmɩŋ ɩnʋ yɔ. Ɛlɛ́, yee nɔɔyʋ ɛpɩzɩɣ se ɛlɩzɩ ndʋ́ ɛyɔɔdʋʋ yɔ tɩ-tɔbʋʋ nɛ pɩsɩnɩ Yesu ŋgbɛyɛ taa ñɩma nɛ papɩɩ Ɛsɔ nʋmɔʋ taa yɔ, ḿbʋ́ lɛ.

⁶ Pʋ-yɔɔ lɛ, taabalaa, mɔnpɔzʋʋ-mɩ se: yee mɔnkɔm mɩ-tɛ nɛ mɔyɔɔdʋʋnɩ-mɩ kʋnʋmɩŋ weyi ɩɩnɩɣ yɔ nɛ menteheyi-mɩ tɔm ndʋ́ tɩɩwɛ mɛsaɣ tɛɛ yɔ tɩ-taa natʋyʋ yaa lɔŋsɩnɖɛ tɔm yaa tɔm ndʋ́ tɩlɩnɩ Ɛsɔ cɔlɔ yɔ yaa mantawɩlɩ-mɩ natʋyʋ lɛ, mawazɩ-mɩ we?

⁷ Đɩkpaɣ soo wondu ɛzɩ hɩlaɣ yaa cɩmʋʋ yɔ: yee paawiɣ camɩyɛ lɛ, ɛzɩma peɖiɣziɣni ndʋ́ pahʋlʋʋ hɩlaɣ taa yaa ndʋ́ pamakɩ cɩmʋʋ yɔɔ yɔ?

⁸ Yee nɔndɔʋ hʋlɩyʋ ɛtayaa-kʋ camɩyɛ lɛ, akaɣ ɛ-tɩ ñɔɔzʋʋ se ɛɖɛɛ you yɔ?

⁹ Đɔɖɔ lɛ, yee ɩpaŋnɩ yɔɔdʋʋ kʋnʋmɩŋ ndɩ ndɩ lɛ, ɛzɩma patɩlɩɣ ndʋ́ ɩcaɣ yɔɔdʋʋ yɔ? Pʋbʋ ɩlɔʋ mɩ-tɔm yem.

¹⁰ Kʋnʋmɩŋ ndɩ ndɩ wɛnɩ kedeŋa yɔɔ. Ɛlɛ́, ɩ-taa nakʋyʋ fɛyɩ se kɩfɛyɩnɩ tɔbʋʋ.

¹¹ Paa ḿbʋ́ yɔ, yee maanɩɣ kʋnʋŋ ŋgʋ́ pɔyɔɔdʋʋnɩ-m yɔ yɔ, mɛwɛ ɛzɩ ɛgɔm yɔ weyi ɛyɔɔdʋʋ-kʋ yɔ ɛ-ɛsɩndaa nɛ pʋdʋ ñɛwɛɛ ɖɔɖɔ ɛzɩ ɛgɔm yɔ mɛ-ɛsɩndaa.

¹² Ḿbʋ́ ɖɔɖɔ pʋwɛnɩ-mɩ. Ɛzɩma mbʋ́ ɩsɔɔlɩ Fezuu Kiɖeɖeu kʋjɔŋ siŋŋ yɔ, ɩñaɣ pana nɛ ihiɣ-i camɩyɛ. Ɩkpaɣ-ɩ nɛ ɩsɩnɩnɩ Yesu ŋgbɛyɛ taa ñɩma nɛ papɩɩ pe-lidaʋ wɛnaʋ taa.

¹³ Pʋ-yɔɔ lɛ, weyi ɛyɔɔdʋʋ kʋnʋmɩŋ ndɩ ndɩ yɔ, pʋwɛɛ se ɛsɛɛ Ɛsɔ se ɛlabɩ-ɩ kʋjɔʋ ŋgʋ́ ɛɛlɩzɩnɩ ɩ-tɔbɩŋ yɔ.

¹⁴ Mbʋ́ pʋyɔɔ yɔ, yee mɛnsɛɣ Ɛsɔ nɛ kʋnʋmɩŋ ɩnʋ yɔ, man-kalɩzaɣ wɛ Ɛsɔ sɛʋ yɔɔ. Ɛlɛ́, mɛ-lɛɣtʋ eehikiɣ kɛzɛɣa nakɛyɛ.

¹⁵ Ɛbɛ pʋwɛɛ se mala yɔ? Pʋwɛɛ se mɛnsɛɛ Ɛsɔ nɛ man-kalɩzaɣ. Ɛlɛ́, mɛnsɛɣ-ɩ ɖɔɖɔ nɛ mɛ-lɛɣtʋ. Menteɣ hendu nɛ man-kalɩzaɣ. Ɛlɛ́, menteɣ-tʋ ɖɔɖɔ nɛ mɛ-lɛɣtʋ.

¹⁶ Toovenim lɛ, yee ŋsaŋ Ɛsɔ nɛ ña-kalɩzaɣ ɖeke lɛ, ɛzɩma weyi ɛɛnɩɣ kʋnʋŋ ŋ́gʋ́ yɔ, ɛpɩzɩɣ etisi se: «pɩla ḿbʋ́» ñɛ-Ɛsɔ sam ḿbʋ́ pʋ-yɔɔ? Mbʋ́ pʋyɔɔ yɔ, ɛɛnɩɣ ndʋ́ ŋyɔɔdʋʋ yɔ.

¹⁷ Paa ñɛ-Ɛsɔ sam ḿbʋ́ pʋwɛ ɖeu ɛzɩma yɔ, piiyeki se lɛlʋ ɛpɩɩ e-lidaʋ wɛnaʋ taa.

¹⁸ Mansaŋ Ɛsɔ ɛzɩma mbʋ́ eyeba nɛ mɔyɔɔdʋʋ kʋnʋmɩŋ ndɩ ndɩ nɛ pɩkɩlɩ mɩtɩŋa payɩ yɔ.

¹⁹ Paa ḿbʋ́ yɔ, alɩwaatʋ ndʋ́ Yesu ŋgbɛyɛ taa ñɩma kpeɣliɣ yɔ, me-liu kɩlɩ wɛʋ se mɔyɔɔdɩ tɔm pazɩ nɛ lɛɣtʋ nɛ mɛnkpɛlɩkɩnɩ lɛlaa nɛ pɩkɩlɩ ɛzɩ maayɔɔdɩnɩ-wɛ tɔm huwa huwa nɛ kʋnʋmɩŋ weyi paanɩɣ-ɩ yɔ.

²⁰ Taabalaa, ɩtaawɛnɩ pɩcatʋ lɩmaɣza. Kɩdɛkɛdɩm ɖeɖe lɛ, ɩwɛɛ ɛzɩ piya yɔ. Ɛlɛ́, ɩmaɣzɩ ɛzɩ sɔsaa yɔ.

²¹ Pʋwɛ ɛzɩ Kɩpaɣlʋ yɔɔdʋʋ nɛ pama Ɛsɔtɔm Takayaɣ taa yɔ. Pamawa se: «Ɛyáa mbá pɔyɔɔdʋʋ kʋnʋmɩŋ lɛɛŋ yɔ nɛ agɔmaa, pɔ-yɔɔ mɔnkɔŋ tɩŋnaʋ nɛ mɔyɔɔdɩnɩ mɛ-ɛyáa Izrɛɛlɩ ñɩma. Halɩ paakaɣ-m welesinaʋ.»

²² Pʋ-yɔɔ lɛ, mbá pañaŋ Krɩstʋ yɔ, kʋnʋmɩŋ ndɩ ndɩ yɔɔdʋʋ tɛkɛnɩ-wɛ yʋsaɣ. Ɛlɛ́, mbá paañaŋ Krɩstʋ yɔ pɩkɛnɩ yʋsaɣ. Piyele tɔm ndʋ́ tɩlɩnɩ Ɛsɔ cɔlɔ yɔ ti-susuu tɛkɛnɩ yʋsaɣ mbá paañaŋ Krɩstʋ yɔ. Ɛlɛ́, mbá pañaŋ-ɩ yɔ pɩkɛnɩ yʋsaɣ.

²³ Mɩ lɛ, yee ikpeɣli ɖama nɛ mɩtɩŋa ɩyɔɔdʋʋ kʋnʋmɩŋ ndɩ ndɩ nɛ nabɛyɛ yem yaa mbá paañaŋ Krɩstʋ yɔ patalɩ, paatɔŋ se ɩkɛ kpaanzɩyaa naa we?

²⁴ Đɔɖɔ lɛ, yee patɩŋa posusuu tɔm ndʋ́ tɩlɩnɩ Ɛsɔ cɔlɔ yɔ nɛ weyi ɛɛñaŋ Krɩstʋ yɔ yaa nɔɔyʋ yem talɩ peeɖe yɔ, paa pɩɩla ɛzɩma yɔ, ɛnɩɣ natʋyʋ nɛ tɩlabɩ-ɩ tʋmɩyɛ nɛ ɛtɩlɩ mbʋ́ pʋwɛɛ se ɛla yɔ.

²⁵ Peeɖe pukuluu ɛ-lɩmaɣza wena awɛ mɛsaɣ tɛɛ yɔ a-yɔɔ nɛ ɛpa ɛ-ɛsɛ nɛ tɛtʋ nɛ ɛsa Ɛsɔ nɛ ɛkaɖɩ kpayɩ se: «Toovenim, Ɛsɔ wɛ mɩ-hɛkʋ taa.»

Yesu ŋgbɛyɛ taa ñɩma kediɣzasɩ tɔm

²⁶ Taabalaa, ɛbɛ pʋwɛɛ se ɩla yɔ? Pʋwɛɛ se paa mɩ-taa weyi ɛwɛnɩ nabʋyʋ alɩwaatʋ ndʋ́ ikpeɣliɣ ɖama yɔ. Pɩpɩzaɣ se pɩkɛ hendu yaa tɔm natʋyʋ se ɛwɩlɩɣ yaa Ɛsɔ wɩlɩ-ɩ nabʋyʋ yaa ɛwɛnɩ tɔm natʋyʋ se ɛyɔɔdʋʋnɩ kʋnʋŋ ŋgʋ́ ɛyáa ɛɛnɩɣ yɔ kɩ-taa nɛ lɛlʋ ɖɛzɩɣ-tʋ. Ɛlɛ́, pʋwɛɛ se pɩtɩŋa payɩ pɩsɩnɩ lɛlaa nɛ papɩɩ pe-lidaʋ nʋmɔʋ taa.

²⁷ Yee mɩ-taa nabɛyɛ ɛyɔɔdʋʋ kʋnʋmɩŋ ndɩ ndɩ yɔ, pɛwɛɛ naalɛ yaa naadozo, pataaɖɛɛ pʋ-yɔɔ. Pɔyɔɔdɩ kʋɖʋm kʋɖʋm. Pʋwɛɛ ɖɔɖɔ se nɔɔyʋ ɛwɛɛ nɛ ɛ́lɛ́ ɖɛzɩɣ ndʋ́ pɔyɔɔdʋʋ yɔ.

²⁸ Yee nɔɔyʋ ɛfɛyɩ mɩ-hɛkʋ taa peeɖe se ɛɖɛzɩɣ yɔ, pʋwɛɛ se pɛtɛzɩ sum. Pɔyɔɔdɩnɩ pa-maɣmaɣ pa-tɩ nɛ pɔyɔɔdɩnɩ Ɛsɔ ɖɔɖɔ.

²⁹ Náyaa lɛ, pʋwɛɛ se naalɛ yaa naadozo ɛyɔɔdɩna nɛ lɛlaa maɣzɩ nɛ pana.

³⁰ Ɛlɛ́, yee Ɛsɔ ɛwɩlɩ nɔɔyʋ natʋyʋ peeɖe yɔ, pʋwɛɛ se weyi ɛyɔɔdaɣ yɔ esu nɛ ɛ́lɛ́ ñɔyɔɔdɩ.

³¹ Mbʋ́ pʋyɔɔ yɔ, mɩtɩŋa payɩ ɩpɩzɩɣ ɩyɔɔdɩ tɔm ndʋ́ tɩlɩnɩ Ɛsɔ cɔlɔ yɔ kʋɖʋm kʋɖʋm nɛ ɩwɩlɩnɩ ɛyáa tɩŋa payɩ lɔŋ nɛ pɩlabɩ-wɛ hʋnʋm.

³² Náyaa wɛnɩ ɖoŋ kʋjɔʋ ŋgʋ́ Ɛsɔ labɩ-wɛ yɔ kʋ-yɔɔ.

³³ Mbʋ́ pʋyɔɔ yɔ, Ɛsɔ tayaa-ɖʋ se ɖɩla yem yem, ɛlɛ́, ɛya-ɖʋ se ɖɩwɛɛ laŋhɛzɩyɛ taa. Ɛzɩ pʋwɛʋ Ɛsɔ ñɩma aŋgba tɩŋa taa payɩ yɔ,

³⁴ pʋwɛɛ se halaa esu alɩwaatʋ ndʋ́ Yesu aŋgba taa ñɩma kpeɣliɣ yɔ. Pɩtaha-wɛ nʋmɔʋ se pɔyɔɔdɩ. Pʋwɛɛ se poluzi pa-tɩ ɛzɩ paɖʋʋ Mooyiizi paɣtʋ taa ɖɔɖɔ yɔ.

³⁵ Yee pe-liu ɛwɛɛ se pɔpɔzʋʋ tɔm natʋyʋ yɔ, pʋwɛɛ se pɔpɔzɩ-tʋ pa-maɣmaɣ pa-walaa ɖɩsɩ. Mbʋ́ pʋyɔɔ yɔ, pʋwɛ fɛyɛ se halʋ ɛyɔɔdɩ alɩwaatʋ ndʋ́ Yesu ŋgbɛyɛ taa ñɩma kpeɣliɣ yɔ.

³⁶ Mɩ-tɛ Kɔrɛntɩ Ɛsɔtɔm lɩnaa yaa we? Yaa mi-ɖeke tɩtalaa?

³⁷ Yee mɩ-taa nɔɔyʋ ɛmaɣzɩɣ se ɛkɛ náyʋ yaa ɛwɛnɩ Fezuu Kiɖeɖeu kʋjɔʋ yɔ, pʋwɛɛ se ɛtɩlɩ se ndʋ́ mama-mɩ lɛɛlɛɛyɔ yɔ, tɩkɛ Kɩpaɣlʋ paɣtʋ.

³⁸ Ɛlɛ́, yee mɩ-taa nɔɔyʋ ɛtakpaɣ-tʋ ɛ́yáa pʋyʋ yɔ, paakpakɩɣ pʋdʋ payaa pʋyʋ ɖɔɖɔ.

³⁹ Pʋ-yɔɔ lɛ, taabalaa, meheyiɣ-mɩ se tɔm ndʋ́ tɩlɩnɩ Ɛsɔ cɔlɔ yɔ ti-susuu ɛwɛɛ-mɩ liu. Ɩtaaɖaŋ ɛyáa se pataayɔɔdɩ kʋnʋmɩŋ ndɩ ndɩ.

⁴⁰ Pʋwɛɛ se pala pɩtɩŋa payɩ ɛzɩ pʋmʋnaʋ yɔ nɛ pʋtʋʋzɩ.