1 Kɔrɛntɩ 13 - New Testament

Sɔɔlɩm kɩlɩ pɩtɩŋa

¹ Meheyiɣ-mɩ se: paa maapɩzaɣ se mɔyɔɔdɩ ɛyáa kʋnʋmɩŋ nɛ pɩkpɛndɩnɩ Ɛsɔ tiyiyaa ñɩŋ nɛ yee maasɔɔlʋʋ ɛyáa yɔ, mɛwɛ ɛzɩ suye yaa ŋgbanɛ nɖɩ́ pamakɩ nɛ ɖiwiɣ yem yɔ.

² Paa pɩɩha-m se monsusi tɔm ndʋ́ tɩlɩnɩ Ɛsɔ cɔlɔ yɔ nɛ mɛwɛnɩ lɛɣtʋ tɩŋa nɛ manpɩzɩɣ manɩɣ tɔm ndʋ́ tɩwɛ mɛsaɣ tɛɛ yɔ tɩtɩŋa yaa paa maawɛnɩ lidaʋ siŋŋ se manpɩzɩɣ mɛnkpɛzɩɣnɩ pʋŋ nɛ yee maasɔɔlʋʋ ɛyáa yɔ, mɛntɛkɛ pʋyʋ.

³ Paa maakpaɣ ma-ñɩm tɩŋa payɩ nɛ mantayɩ lɛlaa yaa paa maacɛlɩ man-tɩ se pɔsɔbɩ-m miŋ ɛyáa yɔɔ nɛ yee maasɔɔlʋʋ-wɛ yɔ, pɩɩlɩɣ-m pʋyʋ.

⁴ Weyi ɛsɔɔlʋʋ ɛyáa yɔ, ɛɖɔkʋʋ ɛ-tɩ, ɛsɩŋnɩ-wɛ, ɛɛwɛɣ ɛsɩsɛmɩyɛ. Ɛɛkpazɩɣ ɛ-tɩ, ɛɛwɛɣ ajana.

⁵ Ɛɛlakɩ mbʋ́ pɩkpaɣ ɛyáa fɛyɛ yɔ, ɛɛñɩnɩɣ e-ɖeke e-ɖeɖe, ɛɛmʋʋ pana, ɛɛcakɩnɩ lɛlaa.

⁶ Ɛ-taa ɛɛhʋlʋmʋʋnɩ kɩdɛkɛdɩm, ɛlɛ́, toovenim ɛ-taa hʋlʋmʋʋna.

⁷ Etisiɣ pɩtɩŋa payɩ, ɛwɛnɩ lidaʋ pɩtɩŋa pɩ-taa, ɛtaɣ liu se pɩtɩŋa payɩ pʋkɔŋ labʋ, ɛɖɔkʋʋ ɛ-tɩ pɩtɩŋa pɩ-taa.

⁸ Sɔɔlɩm wɛɣ tam, ɛlɛ́, tɔm ndʋ́ tɩlɩnɩ Ɛsɔ cɔlɔ yɔ ti-susuu kaɣ sɩʋ tɩnaɣ. Kʋnʋmɩŋ ndɩ ndɩ yɔɔdʋʋ nɛ mbʋ́ ɖɩsɩma yɔ, pɔkɔŋ sɩʋ tɩnaɣ ɖɔɖɔ.

⁹ Mbʋ́ pʋyɔɔ yɔ, ɖɩtasɩ pɩtɩŋa. Đɩɩpɩzɩɣ ɖisusi tɔm ndʋ́ tɩlɩnɩ Ɛsɔ cɔlɔ yɔ tɩtɩŋa payɩ.

¹⁰ Ɛlɛ́, alɩwaatʋ ndʋ́ mbʋ́ pʋwɛ pɩtɩŋa payɩ yɔ pʋkɔŋ lɛ, mbʋ́ pɩfɛyɩ pɩtɩŋa payɩ yɔ pʋmʋkɩ.

¹¹ Alɩwaatʋ ndʋ́ maakɛ pɩɣa yɔ, mɔyɔɔdaɣ nɛ mamaɣzɩɣ nɛ mahʋʋ man-taa ɛzɩ pɩɣa yɔ. Lɛɛlɛɛyɔ malabɩ ɛyʋ lɛ, meyele pɩcatʋ tɔm.

¹² Alɩwaatʋ tʋnɛ tɩ-taa lɛ, pʋwɛ ɛzɩ ñɩnʋʋ fiɖiyii ñɩŋgʋ taa ɖɩcɔŋna yɔ, ɖɩɩnaɣ pɩtɩŋa camɩyɛ. Ɛlɛ́ puwiye lɛ, ɖɩkɔŋ pɩtɩŋa naʋ ɖɛ-ɛsɩndaa kaŋŋ. Lɛɛlɛɛyɔ mantatɩlɩ pɩtɩŋa, ɛlɛ́, mɔnkɔŋ tɛzʋʋ pɩtɩŋa payɩ sɩm puwiye ńɖɩ́ ɛzɩ Ɛsɔ sɩm-m ɖɔɖɔ yɔ.

¹³ Yee ḿbʋ́ lɛɛlɛɛyɔ lidaʋ nɛ ɖaŋʋʋ nɛ sɔɔlɩm pa-naadozo pɛwɛɣna tam. Ɛlɛ́, pa-taa lɛ, sɔɔlɩm kɩlɩna.