1 Kɔrɛntɩ 12 - New Testament

Fezuu Kiɖeɖeu kʋjɔŋ tɔm

¹ Taabalaa, Fezuu Kiɖeɖeu kʋjɔŋ tɔm taa lɛ, mɔntɔsɔɔlɩ se ɩwɛɛ cɩkpɛndʋʋ tɛɛ.

² Ɩtɛm sɩm ɛzɩma mbʋ́ pʋhɔŋaɣ-mɩ nɛ ɩtɩŋɩɣ sɩʋ kpelisi nzɩ́ sɩɩyɔɔdʋʋ yɔ sɩ-wayɩ yem ɖimɖim alɩwaatʋ ndʋ́ ɩtaañaŋ Krɩstʋ yɔ.

³ Pʋ-yɔɔ mankaɖɩɣ-mɩ se: nɔɔyʋ fɛyɩ se ɛyɔɔdʋʋnɩ Fezuu Kiɖeɖeu ɖoŋ nɛ ɛtɛ ɛtɔ se: «Ɛsɔ ɛwɩlɩ Yesu kpalʋʋ.» Nɔɔyʋ ɛɛpɩzɩɣ ɛyɔɔdɩ ɖɔɖɔ se: «Yesu lɛ Kɩpaɣlʋ» nɛ pɩtatɩŋnɩ Fezuu Kiɖeɖeu yɔɔ.

⁴ Paa Fezuu Kiɖeɖeu kʋjɔŋ ɩwɛ ndɩ ndɩ yɔ, ki-ɖeke koŋ kɩhaɣnɩ-ɩ.

⁵ Paa tʋma wena ɖɩlakɩ yɔ awɛ ndɩ ndɩ yɔ, Kɩpaɣlʋ kʋɖʋm ɖeke ɖɩlakɩ-yɛ.

⁶ Paa ɖa-tʋma labʋ ɛwɛ ndɩ ndɩ yɔ, Ɛsɔ kʋɖʋm ɛnʋ ɛhaɣnɩ ɖatɩŋa payɩ ɖoŋ se ɖɩla atɩŋa.

⁷ Ŋgʋ́, kʋjɔʋ ŋgʋ́ Fezuu Kiɖeɖeu lakɩ paa weyi se pʋwazɩ ɖatɩŋa payɩ yɔ, ŋ́gʋ́ wɩlɩɣna se kɩwɛ ɛ-cɔlɔ.

⁸ Pʋ-yɔɔ kɩha ɖa-taa nabɛyɛ lɔŋsɩnɖɛ se pɔyɔɔdɩna, nɛ kɩha lɛlaa lɛɣtʋ se paba ɛyɔɔdɩna ɖɔɖɔ.

⁹ Fezuu Kiɖeɖeu kʋɖʋmʋʋ ŋ́gʋ́ kɩhanɩ nabɛyɛ se pɛwɛnɩ lidaʋ nɛ kɩha lɛlaa se pala nɛ kʋdɔndɩnaa yɔɔ cɛ.

¹⁰ Ŋ́gʋ́ ɖɔɖɔ hanɩ nabɛyɛ se pala hama lakasɩ, lɛlaa se posusi tɔm ndʋ́ tɩlɩnɩ Ɛsɔ cɔlɔ yɔ, lɛlaa se patɩlɩ mbʋ́ pɩlɩnɩ kʋ-cɔlɔ yaa mbʋ́ pɩtalɩɩnɩ kʋ-cɔlɔ yɔ, lɛlaa se pɔyɔɔdɩ kʋnʋmɩŋ ndɩ ndɩ nɛ lɛlaa se palɩzɩ a-tɔbɩŋ.

¹¹ Fezuu Kiɖeɖeu kʋɖʋmʋʋ ŋ́gʋ́ kɩlakɩnɩ pɩtɩŋa payɩ nɛ kɩha paa weyi e-ɖeɖe ɛzɩ ki-liu wɛʋ yɔ.

Krɩstʋ ŋgbɛyɛ kɛ Krɩstʋ tomnaɣ

¹² Toovenim lɛ, Krɩstʋ wɛ ɛzɩ tomnaɣ kʋɖʋmaɣ ŋgá kɛwɛnɩ pilinzi sakɩyɛ yɔ. Paa ke-pilinzi ɛɖɔwa yɔ, kɛkɛ kʋɖʋmaɣ.

¹³ Mbʋ́ pʋyɔɔ yɔ, Fezuu Kiɖeɖeu kʋɖʋmʋʋ ŋ́gʋ́ kɩ-yɔɔ pɩtɩŋnaa nɛ pala ɖatɩŋa payɩ lɩm sɔʋ sɔnzɩ nɛ ɖɩpɩsɩ tomnaɣ kʋɖʋmaɣ. Paa ɖɩkɛ Yuda ñɩma yaa mbá pɛtɛkɛ Yuda ñɩma yɔ, yaa yomaa yaa mbá pɛwɛ pa-tɩ yɔɔ yɔ, ɖatɩŋa payɩ Fezuu kʋɖʋmʋʋ ŋ́gʋ́ kɩ-lɩm ɖɩñɔwa.

¹⁴ Pɩtɛkɛ piliŋa kʋɖʋmaɣ wɛnɩ tomnaɣ yɔɔ, ɛlɛ́, sɩɖɔ sakɩyɛ.

¹⁵ Paa naŋgbaŋaɣ ɛtɔm se: «Mɛntɛkɛ nesi, pʋ-yɔɔ lɛ, mɛnfɛyɩ tomnaɣ yɔɔ» yɔ, kaapɩzɩɣ keyele tomnaɣ piliŋa kɛʋ.

¹⁶ Paa nɩŋgbaŋʋʋ ɛtɔm se: «Mɛntɛkɛ ɛsɩyɛ, pʋ-yɔɔ lɛ, mɛnfɛyɩ tomnaɣ yɔɔ» yɔ, kɩɩpɩzɩɣ kiyele tomnaɣ piliŋa kɛʋ.

¹⁷ Yee ɛyʋ tomnaɣ tɩŋa ɛɛkɛ ɛsɩyɛ lɛ, ɛbɛ ɛɛnɩnaa yɔ? Yee kaakɛ nɩŋgbaŋʋʋ lɛ, ɛbɛ ɛɛsɔŋnaa yɔ?

¹⁸ Ɛsɔ ɖʋnɩ paa piliŋa ŋgá tomnaɣ yɔɔ ḿbʋ́ ɛzɩ e-liu wɛʋ yɔ.

¹⁹ Yee sɩtɩŋa payɩ sɩɩkɛ piliŋa kʋɖʋmaɣ lɛ, le tomnaɣ ñaawɛɛ yɔ?

²⁰ Pʋ-yɔɔ lɛ, pilinzi ndɩ ndɩ nɛ tomnaɣ kʋɖʋmaɣ koŋ pɛwɛna.

²¹ Ɛsɩyɛ ɛɛpɩzɩɣ ɖiheyi nesi se: «Man-paa fɛyɩnɩ-ŋ.» Yaa ñʋʋ ñaapɩzɩɣ kiheyi naŋgbanzɩ se: «Man-paa fɛyɩnɩ-mɩ.»

²² Halɩ tomnaɣ yɔɔ pilinzi nzɩ́ ɖɩkpakɩɣ se sɩkɛ ajamaa kpem yɔ, sɩwɛ-ɖʋ wazaɣ siŋŋ.

²³ Đɔɖɔ lɛ, tomnaɣ yɔɔ pilinzi nzɩ́ ɖɩmaɣzɩɣ se sɩkɛ-ɖʋ fɛyɛ pʋyʋ yɔ, sɩ-yɔɔ ɖɩkɩlɩɣ huuzuu. Halɩ nzɩ́ sɩfɛyɩ cɔnaʋ kpem yɔ, sɩ-yɔɔ ɖɩkɩlɩɣ cɔnaʋ kpem.

²⁴ Ŋgʋ́, pɩtɛkɛnɩ-ɖʋ kɩcɛyʋʋ se ɖɩcɔŋnɩ nzɩ́ sɩwɛ cɔnaʋ yɔ sɩ-yɔɔ ḿbʋ́. Ɛsɔ labɩ tomnaɣ nɛ ɛɖʋ ke-pilinzi nzɩ́ sɩfɛyɩ cɔnaʋ yɔ hɩɖɛ nɛ pɩkɩlɩ

²⁵ se tayʋʋ ɛtaawɛɛ tomnaɣ yɔɔ. Ɛlabɩ ḿbʋ́ ɖɔɖɔ se pilinzi ɛwɛnɩ lɩmaɣza kʋɖʋmɛɛ nɛ sɩtɔzʋʋ ɖama yɔɔ.

²⁶ Yee piliŋa nakɛyɛ ɛnɩɣ siziŋ yɔ, pilinzi tɩŋa nɩɣ siziŋ ɖɔɖɔ ɛzɩ ŋ́gá yɔ. Yee pasam piliŋa nakɛyɛ yɔ, ka nɛ pilinzi tɩŋa pamayɩɣ amaya.

²⁷ Mɩtɩŋa payɩ ɩkɛ Krɩstʋ tomnaɣ nɛ paa mɩ-taa weyi ɛkɛ tomnaɣ ŋ́gá ke-piliŋa.

²⁸ Krɩstʋ tiyiyaa Ɛsɔ calɩnɩ lɩzʋʋ Yesu ŋgbɛyɛ taa. Pa-wayɩ lɛ, náyaa, paba wayɩ lɛ, wɩlɩyaa. Pʋwayɩ lɛ, ɛla lɛlaa kʋjɔŋ ndɩ ndɩ: ḿbá lɛ mbá palakɩ hama lakasɩ nɛ mbá peyeki se kʋdɔndɩnaa yɔɔ ɛcɛ yɔ nɛ mbá pasɩŋnɩ lɛlaa nɛ mbá pɔcɔŋnɩ lɛlaa yɔɔ yɔ nɛ mbá pɔyɔɔdʋʋ kʋnʋmɩŋ ndɩ ndɩ yɔ.

²⁹ Patɩŋa payɩ pɛkɛ Krɩstʋ tiyiyaa naa we? Pɛkɛ náyaa naa we? Pɛkɛ wɩlɩyaa naa we? Palakɩ hama lakasɩ naa we?

³⁰ Pɩha patɩŋa payɩ se peyele kʋdɔndɩnaa yɔɔ cɛ naa we? Pɩha patɩŋa payɩ se pɔyɔɔdɩ kʋnʋmɩŋ ndɩ ndɩ yaa we? Pɩha patɩŋa payɩ se pɛɖɛzɩ tɔm kʋnʋmɩŋ ɩnʋ ɩ-taa yaa we?

³¹ Pʋ-yɔɔ lɛ, ɩñɩnɩ kʋjɔŋ weyi ɩkɩlɩ lɛɛŋ yɔ. Đɔɖɔ lɛ, mantasɩɣ-mɩ wɩlʋʋ nʋmɔʋ ŋgʋ́ kɩkɩlɩ pɩtɩŋa payɩ yɔ.