1 Kɔrɛntɩ 11 - New Testament

¹ Ɩla ɛzɩ ma yɔ, mbʋ́ pʋyɔɔ yɔ, ma-maɣmaɣ malakɩ ɛzɩ Krɩstʋ yɔ.

Ɛzɩma pʋwɛɛ se halʋ nɛ abalʋ posuu wondu Kɩpaɣlʋ ɛsɩndaa yɔ

² Mansaŋ-mɩ ɛzɩma mbʋ́ ɩtɔzʋʋ mɔ-yɔɔ paa ɖooye nɛ ɩɖɔkɩ ma-lakasɩ nɛ tɔm ndʋ́ pawɩlɩ-m nɛ mawɩlɩ-mɩ yɔ, pɔ-yɔɔ.

³ Paa ḿbʋ́ yɔ, me-liu wɛɛ se ɩtɩlɩ se: Krɩstʋ lɛ paa abalʋ weyi e-wiyaʋ nɛ abalʋ lɛ halʋ wiyaʋ nɛ Ɛsɔ lɛ Krɩstʋ wiyaʋ.

⁴ Abalʋ weyi ɛsɛɣ Ɛsɔ yaa esusuu tɔm ndʋ́ tɩlɩnɩ Ɛsɔ cɔlɔ yɔ, ehuuzi ɛ-ñʋʋ yɔɔ pʋyʋ yɔ, ɛɖʋʋ e-wiyaʋ Krɩstʋ fɛyɛ.

⁵ Ɛlɛ́, halʋ weyi ɛsɛɣ Ɛsɔ yaa esusuu tɔm ndʋ́ tɩlɩnɩ Ɛsɔ cɔlɔ yɔ nɛ etohuuzi ɛ-ñʋʋ yɔɔ pʋyʋ yɔ, ɛɖʋʋ ɛ-walʋ fɛyɛ. Mbʋ́ pʋyɔɔ yɔ, ɛnɩɣzɩnɩ halʋ weyi pahʋm-ɩ koloŋgolo se paɖʋ-ɩ fɛyɛ yɔ.

⁶ Pʋ-yɔɔ lɛ, yee halʋ nɔɔyʋ etohuuzi pʋyʋ ɛ-ñʋʋ yɔɔ yɔ, ɛtɛzɩ ɛ-ñɔsɩ hʋm. Ŋgʋ́, yee pɩkɛnɩ halʋ fɛyɛ se ɛhʋ ɛ-ñɔsɩ yaa pahʋm-ɩ koloŋgolo yɔ, pʋwɛɛ se ehuuzi pʋyʋ ɛ-ñʋʋ yɔɔ.

⁷ Pɩfɛyɩ se abalʋ ehuuzi pʋyʋ ɛ-ñʋʋ yɔɔ. Mbʋ́ pʋyɔɔ yɔ, ɛnʋ lɛ Ɛsɔ lɛzʋʋ nɛ e-koboyaɣ. Piyele halʋ lɛ abalʋ koboyaɣ.

⁸ Mbʋ́ pʋyɔɔ yɔ, pɩtɛkɛ halʋ yɔɔ Ɛsɔ tɩŋnaa nɛ ɛla abalʋ. Ɛlɛ́, abalʋ yɔɔ ɛtɩŋnaa nɛ ɛla halʋ.

⁹ Đɔɖɔ lɛ, pɩtɛkɛ halʋ yɔɔ Ɛsɔ labɩ abalʋ, ɛlɛ́, abalʋ yɔɔ ɛlabɩ halʋ.

¹⁰ Ḿbʋ́ labɩna nɛ Ɛsɔ tiyiyaa yɔɔ lɛ, pʋwɛɛ se halʋ ehuuzi pʋyʋ ɛ-ñʋʋ yɔɔ nɛ pɩwɩlɩ se eluzi ɛ-tɩ ɛ-walʋ tɛɛ.

¹¹ Ŋgʋ́ Kɩpaɣlʋ ɛsɩndaa lɛ, halʋ fɛyɩ ɛ-tɩ yɔɔ abalʋ cɔlɔ. Abalʋ ɖɔɖɔ ñɛfɛyɩ ɛ-tɩ yɔɔ halʋ cɔlɔ.

¹² Mbʋ́ pʋyɔɔ yɔ, paa abalʋ yɔɔ Ɛsɔ ɛtɩŋnaa nɛ ɛla halʋ yɔ, halʋ lʋlʋʋnɩ abalʋ. Ŋgʋ́, halʋ nɛ abalʋ nɛ pɩtɩŋa payɩ Ɛsɔ cɔlɔ pɩlɩnaa.

¹³ Mɩ-maɣmaɣ ɩmaɣzɩ nɛ ɩna: pʋwɛ ɖeu ḿbʋ́ se halʋ ɛsɛɛ Ɛsɔ nɛ etohuuzi pʋyʋ ɛ-ñʋʋ yɔɔ yaa we?

¹⁴ Mbʋ́ mɩ-maɣmaɣ ɩnaɣ kedeŋa yɔɔ cɩnɛ yɔ, pɩɩwɩlɩɣ-mɩ se pɩkɛnɩ abalʋ fɛyɛ se eyele ɛ-ñɔsɩ nɛ susu yaa we?

¹⁵ Ɛlɛ́, pɩkɛnɩ halʋ hɩɖɛ ɖʋʋ se ɛ́lɛ́ ñɩnzɩ esu. Mbʋ́ pʋyɔɔ yɔ, pɩha-ɩ ñɔsɩ se sihuuzi ɛ-ñʋʋ yɔɔ.

¹⁶ Yee nɔɔyʋ liu ɛwɛɛ se ɛkpɛzɩɣnɩ tɔm tʋnɛ yɔ, ɖa ɖaalakɩ ḿbʋ́. Paalakɩ ḿbʋ́ ɖɔɖɔ Ɛsɔ aŋgba taa.

Kɩpaɣlʋ tɔɔnaɣ tɔm

¹⁷ Tɔm tʋnɛ tɩ-wayɩ lɛ, maasaŋ-mɩ lɛɛtʋ ndʋ́ manpazɩɣ yɔɔdʋʋ yɔ tɩ-taa. Mbʋ́ pʋyɔɔ yɔ, piiɖeɣni-mɩ mi-kpeɣluu taa. Ɛlɛ́, pʋwɛɛkɩɣ-mɩ kɩwɛɛkʋ.

¹⁸ Kajalaɣ lɛ, manɩwa se alɩwaatʋ ndʋ́ ikpeɣliɣ ɖama yɔ, tayʋʋ wɛ mɩ-hɛkʋ taa. Peheyi-m-tʋ nɛ mamaɣzɩɣ se pɩkɛɣ toovenim.

¹⁹ Pʋwɛɛ kpem se tayʋʋ ɛwɛɛ ḿbʋ́ mɩ-hɛkʋ taa nɛ papɩzɩ patɩlɩ mbá pɔɖɔkʋʋ pa-tɩ yɔ.

²⁰ Paa ɩmaɣzɩɣ se ɩlakɩ Kɩpaɣlʋ sɩm yɔɔ tɔzʋʋ sɔnzɩ yɔ, pɩtɛkɛ ńzɩ́ ɩlakɩ alɩwaatʋ ndʋ́ ikpeɣliɣ ɖama yɔ.

²¹ Mbʋ́ pʋyɔɔ yɔ, ɩcakɩ sɩ-ɖɩlaɖɛ lɛ, paa weyi ekpedesiɣ se ɛtɔɔ ɛ-maɣmaɣ ɛ-tɔɔnaɣ. Ḿbʋ́ yebina nɛ ñɔɔsɩ ñawɩɣ nabɛyɛ nɛ sʋlʋm ñakʋʋ lɛlaa.

²² Ɩfɛyɩnɩ ɖɩsɩ se ɩtɔɔ nɛ ɩñɔɔ sɩ-taa yaa we? Yaa Ɛsɔ ŋgbɛyɛ taa ñɩma iniɣziɣ nɛ ɩɖʋʋ fɛyɛ mbá pɛfɛyɩ pʋyʋ yɔ? Se we pʋwɛɛ se meheyi-mɩ yɔ? Mansam-mɩ yaa we? Aayɩ, maapɩzɩɣ mansam-mɩ kpem.

²³ Mbʋ́ pʋyɔɔ yɔ, tɔm ndʋ́ Kɩpaɣlʋ heyi-m nɛ meheyi-mɩ yɔ, ńdʋ́ lɛ se: ɖoó wena a-taa pakpa Kɩpaɣlʋ Yesu yɔ, pʋcɔ pakpa-ɩ lɛ, ɛɛkpaɣ tindine

²⁴ nɛ ɛsɛɛ ɖɩ-yɔɔ Ɛsɔ lɛ, ɛcɩyɩ-ɖɩ nɛ ɛtɔ se: «Pʋnɛ lɛ mon-tomnaɣ ŋgá paha mɩ-yɔɔ yɔ. Ɩtɔɔ-ɖɩ nɛ ɩtɔzʋʋnɩ mɔ-yɔɔ.»

²⁵ Ḿbʋ́ ɖɔɖɔ pɛtɛm tɔɔnaɣ tɔɔʋ lɛ, ɛkpaɣ sʋlʋm nɛ caɖaɣ nɛ ɛtɔ se: «Sʋlʋm caɖaɣ kanɛ lɛ nɔɔ haʋ kɩfam mbʋ́ pɩtɩŋnɩ man-calɩm yɔɔ nɛ pʋwɛɛ yɔ. Alɩwaatʋ ndʋ́ tɩtɩŋa payɩ ɩñɔʋ-pʋ yɔ, ɩla ḿbʋ́ nɛ ɩtɔzʋʋnɩ mɔ-yɔɔ.»

²⁶ Mbʋ́ pʋyɔɔ yɔ, alɩwaatʋ ndʋ́ tɩtɩŋa payɩ ɩtɔkɩ tindine ɖɩnɛ nɛ ɩñɔʋ sʋlʋm caɖaɣ kanɛ yɔ, isusuu Kɩpaɣlʋ sɩm nɛ pʋkɔɔ pɩsɩɩnɩ ɛ-kɔm.

²⁷ Ḿbʋ́ labɩna nɛ yee nɔɔyʋ ɛɛtɔkɩ Kɩpaɣlʋ tindine nɛ ɛɛñɔʋ ɛ-sʋlʋm caɖaɣ ɛzɩ pʋmʋnaʋ yɔ yɔ, ɛyʋsɩnɩ Kɩpaɣlʋ tomnaɣ nɛ ɛ-calɩm.

²⁸ Pʋ-yɔɔ lɛ, pʋwɛɛ se paa weyi ɛmaɣzɩ ɛ-taa camɩyɛ nɛ ɛna nɛ pʋcɔ ɛtɔɔ tindine ńɖɩ́ nɛ ɛñɔɔ sʋlʋm caɖaɣ ŋ́gá.

²⁹ Mbʋ́ pʋyɔɔ yɔ, weyi ɛtɔkɩ nɛ ɛñɔɔ yem nɛ ɛtamaɣzɩ camɩyɛ se ɛna mbʋ́ Kɩpaɣlʋ tomnaɣ kɛwa yɔ, mbʋ́ ɛtɔkɩ nɛ ɛñɔʋ yɔ, ḿbʋ́ kʋʋnɩ ɛ-maɣmaɣ ɛ-tɔm.

³⁰ Pʋ-yɔɔ mɩ-taa ɛyáa sakɩyɛ hɛnɩ kʋdɔmɩŋ nɛ papɩsɩ ajamaa nɛ mɩ-taa nabɛyɛ sɩ.

³¹ Yee ɖa-maɣmaɣ ɖɩmaɣzaa nɛ ɖɩtɩlɩ ɖa-tɩ nɛ pʋcɔ yɔ, Ɛsɔ ɛɛhʋʋnɩ-ɖʋ.

³² Ɛlɛ́, Kɩpaɣlʋ hʋʋnɩ-ɖʋ nɛ ɛhɔŋ ɖa-nɩŋgbaŋʋʋ se ɛñɔɔzɩ-ɖʋ nɛ pataakɔɔ pakʋ mbá paañaŋ Krɩstʋ yɔ pɔ-tɔm nɛ pɩkpɛndɩnɩ-ɖʋ.

³³ Man-taabalaa, pʋ-yɔɔ meheyiɣ-mɩ se: ɩɖaŋ ɖama alɩwaatʋ ndʋ́ ikpeɣliɣ se ɩtɔɔ Kɩpaɣlʋ tɔɔnaɣ yɔ.

³⁴ Yee ñɔɔsɩ ɛwɩɣ nɔɔyʋ yɔ, pʋwɛɛ se ɛtɔɔ ɛ-tɛ nɛ ɛtaakɔɔ eyele nɛ Ɛsɔ kʋ mɩ-tɔm alɩwaatʋ ndʋ́ ikpeɣliɣ ɖama yɔ. Tɔm ndʋ́ tɩkazaa yɔ, mɔñɔɔzʋʋ-tʋ alɩwaatʋ ndʋ́ mantalɩɣ mɩ-tɛ yɔ.