1 Kɔrɛntɩ 10 - New Testament

Mbʋ́ Izrɛɛlɩ ñɩma wezuu caɣʋ lakʋ taa wɩlɩɣ-ɖʋ yɔ

¹ Taabalaa, me-liu wɛɛ se ɩtɔzɩ mbʋ́ pɩɩlabɩ ɖɔ-cɔzɔnaa mbá nɛ Mooyiizi pɔɖɔŋaɣ yɔ pʋ-yɔɔ. Ɛsɔmɩnʋʋ kohuuzi patɩŋa payɩ pɔ-yɔɔ nɛ paɖʋ Teŋgu Kɩsɛmʋʋ nɛ palɩɩ patɩŋa payɩ pɛɖɛɛ.

² Pɩlabʋ ḿbʋ́ yɔ, pʋwɛ ɛzɩ palabɩ patɩŋa payɩ lɩm sɔʋ sɔnzɩ ɛsɔmɩnʋʋ tɛɛ nɛ Teŋgu Kɩsɛmʋʋ taa yɔ. Mbʋ́ pʋyɔɔ yɔ, pa nɛ Mooyiizi paakpɛndaa.

³ Patɩŋa payɩ paatɔɔ tɔɔnaɣ ŋgá kalɩnɩ ɛsɔdaa yɔ

⁴ nɛ pɔñɔɔ ɖɔɖɔ patɩŋa payɩ Ɛsɔ pɩyɛ nɖɩ́ ɖɩtɩŋaɣ pa-wayɩ yɔ ɖɩ-lɩm. Pɩyɛ ńɖɩ́ lɛ Krɩstʋ.

⁵ Paa ḿbʋ́ yɔ, pa-taa ɛyáa sakɩyɛ taakɛdɩnɩ Ɛsɔ. Pʋ-yɔɔ pasɩbɩ lakʋ taa pɛɛbɛɛ.

⁶ Ḿbʋ́ wɩlɩɣnɩ-ɖʋ se ɖɩtaasɔɔlɩ kɩdɛkɛdɩm labʋ ɛzɩ paasɔɔlʋʋ yɔ.

⁷ Ɩtaanɩɩnɩ agɔlɩma kpɛyʋʋ ɛzɩ pa-taa lɛlaa yɔ. Pʋwɛ ɛzɩ pamaʋ Ɛsɔtɔm Takayaɣ taa se: «Ɛyáa caɣaɣ pɔtɔɔ nɛ pɔñɔɔ, pɛtɛma lɛ, pakʋyɩ pamayɩ amaya» yɔ.

⁸ Pɩfɛyɩ se ɖɩla acɛyɛ ɛzɩ pa-taa lɛlaa kalabʋ yɔ. Mbʋ́ pʋyɔɔ yɔ, palabɩ ḿbʋ́ nɛ pa-taa ɛyáa kutokiŋ nɩɩlɛ nɛ naadozo tɔlɩ evemiye kʋɖʋmɖɩyɛ nɛ pasɩ.

⁹ Ɖɩtaahɔ Kɩpaɣlʋ nɔɔ tam. Pɩfɛyɩ se ɖɩñɩnɩ nɛ ɖɩna tam ɛzɩma ɖɩpɩzɩɣ ɖɩla kɩwɛɛkɩm nɛ pʋcɔ ɛhɔ ɖa-nɩŋgbaŋʋʋ yɔ. Mbʋ́ pʋyɔɔ yɔ, ḿbʋ́ Izrɛɛlɩ ñɩma ḿbá pa-taa lɛlaa kalaba nɛ ɖʋmaa ñasɩ-wɛ nɛ pasɩ.

¹⁰ Pɩfɛyɩ ɖɔɖɔ se imidi ɛzɩ pa-taa lɛlaa kemiduu nɛ sɩm tiyiyu kʋ-wɛ yɔ.

¹¹ Pɩlabɩ-wɛ ḿbʋ́ se ɖɩna nɛ ɖɩkpa ɖa-tɩ. Ńdʋ́ pamawa se pasɩɣzɩnɩ mbá ɖa ɖɩwɛ alɩwaatʋ ndʋ́ tɩwɩzɩ tɛm yɔ tɩ-taa yɔ lɔŋ.

¹² Pʋ-yɔɔ lɛ, weyi ɛmaɣzɩɣ se ɛsɩŋ ɛ-nasɩ taa yɔ, ɛkpa ɛ-tɩ nɛ ɛtaakɔɔ ɛtɔlɩ.

¹³ Pɩtakɩɣ-mɩ takʋʋ mbʋ́ yɔ, pɩfɛyɩ ndɩ nɛ ɛyáa lɛlaa takʋʋ. Ɛsɔ tʋʋzaa. Ɛlakɩ mbʋ́ ɛɖʋwa yɔ. Eeyeki se pɩtakɩ-mɩ nɛ pɩɖɛɛ mi-ɖoŋ yɔɔ. Ɛlɛ́, alɩwaatʋ ndʋ́ pɩtakɩɣ-mɩ yɔ, ɛwɩlɩɣ-mɩ nʋmɔʋ ŋgʋ́ pʋwɛɛ se ɩtɩŋ nɛ ɩlɩɩ pɩ-taa yɔ.

Pɩfɛyɩ se Kɔrɛntɩ ñɩma ewolo latʋ

¹⁴ Pʋ-yɔɔ lɛ, mɛ-ɛgbaɣdɩnaa, iyele agɔlɩma tɔm kpem.

¹⁵ Mɔyɔɔdʋʋnɩ-mɩ ɛzɩ mbá pɛwɛ lɛɣtʋ yɔ. Mɩ-maɣmaɣ ɩmaɣzɩ ndʋ́ meheyiɣ-mɩ yɔ tɩ-yɔɔ nɛ ɩna.

¹⁶ Kpɛndʋʋ caɖaɣ ŋgá ɖɩsɛɣ kɔ-yɔɔ Ɛsɔ yɔ, kaakpɛndɩɣ ɖa nɛ Krɩstʋ calɩm alɩwaatʋ ndʋ́ ɖɩñɔʋ-kɛ yɔ yaa we? Nɛ tindine nɖɩ́ ɖɩcɩyɩɣ yɔ, ɖɩɩkpɛndɩɣ ɖa nɛ Krɩstʋ tomnaɣ alɩwaatʋ ndʋ́ ɖɩtɔkɩ-ɖɩ yɔ yaa we?

¹⁷ Ɛzɩma mbʋ́ tindine kʋɖʋmɖɩyɛ koŋ ɖɩtɔkɩ yɔ, ḿbʋ́ ɖɔɖɔ paa ɖɩɖɔwa yɔ, ɖɩkɛ tomnaɣ kʋɖʋmaɣ. Mbʋ́ pʋyɔɔ yɔ, ɖatɩŋa payɩ ɖɩtɔkɩ tindine kʋɖʋmɖɩyɛ ńɖɩ́.

¹⁸ Ɩcɔnɩ Izrɛɛlɩ ñɩma nɛ ɩna: mbá pɔtɔkɩ mbʋ́ pala Ɛsɔ yɔ, pa nɛ kɩlaŋ ɖɩlayɛ pɛtɛkpɛndɩ pala kʋɖʋm naa we?

¹⁹ Ndʋ́ mɔyɔɔdaa yɔ, tɩ-tɔbʋʋ se we? Tɩ-tɔbʋʋ se nandʋ ndʋ́ pala agɔlɩma yɔɔ yɔ, tɩkɛ pʋyʋ yaa we? Đɔɖɔ lɛ, agɔlɩma wena pala a-yɔɔ yɔ, akɛ pʋyʋ yaa we?

²⁰ Pa-taa nabʋyʋ tɛkɛ pʋyʋ. Ɛlɛ́, pʋ-tɔbʋʋ se mbʋ́ mbá paañaŋ Krɩstʋ yɔ palaɣ yɔ, aleewaa palaɣ-pʋ, pɩtɛkɛ Ɛsɔ. Ŋgʋ́, mɔntɔsɔɔlɩ se mɩ nɛ aleewaa ɩkpɛndɩ.

²¹ Ɩɩpɩzɩɣ ɩñɔɔ Kɩpaɣlʋ sʋlʋm caɖaɣ nɛ ɩtɛ ɩñɔɔ aleewaa ñɩmbʋ caɖaɣ. Mɩ nɛ Kɩpaɣlʋ ɩɩpɩzɩɣ ɩkpɛndɩ ɩtɔɔ nɛ mɩ nɛ aleewaa ɩtɛ ɩkpɛndɩ ɩtɔɔ ɖɔɖɔ.

²² Đɩcaɣ se ɖɩla ḿbʋ́ nɛ pukulusi Kɩpaɣlʋ sʋsɩ naa we? Ɛzɩ ɖakɩlɩnɩ-ɩ ɖoŋ naa we?

Mbʋ́ pʋwɛɛ se ɖɩla nɛ Ɛsɔ hɩɖɛ sɛɛ tam yɔ

²³ Toovenim lɛ: «Pɩha-ɖʋ waɖɛ se ɖɩla pɩtɩŋa.» Ɛlɛ́, pɩtɛkɛ pɩtɩŋa pʋwɛnɩ wazaɣ. «Pɩha-ɖʋ waɖɛ se ɖɩla pɩtɩŋa.» Ɛlɛ́, pɩtɛkɛ pɩtɩŋa piyekina se ɖɩpɩɩ Ɛsɔ nʋmɔʋ taa.

²⁴ Nɔɔyʋ ɛtaañɩnɩ ɛ-maɣmaɣ ɛ-kɛzɛɣa. Ɛlɛ́, ɛñɩnɩ lɛlaa ñɩŋga.

²⁵ Ɩpɩzɩɣ ɩtɔɔ mbʋ́ pɩtɩŋa payɩ pɛpɛdɩɣ kɩyakʋ taa yɔ. Ɩtaapɔzɩ mɩ-tɩ tɔm natʋyʋ pʋ-yɔɔ nɛ pʋkɔɔ piliɣti-mɩ.

²⁶ Mbʋ́ pʋyɔɔ yɔ, pʋwɛ ɛzɩ pamaʋ Ɛsɔtɔm Takayaɣ taa se: «Kɩpaɣlʋ tɩnɩ tɛtʋ nɛ mbʋ́ pɩtɩŋa payɩ pʋwɛ tɩ-yɔɔ yɔ.»

²⁷ Yee weyi ɛfɛyɩnɩ lidaʋ Krɩstʋ yɔɔ yɔ, ɛya-ŋ se ŋwolo ŋtɔɔ ɛ-tɛ nɛ ŋtalɩ yɔ, ŋpɩzɩɣ ŋtɔɔ mbʋ́ pɩtɩŋa pɔkɔŋnɩ-ŋ yɔ. Taapɔzɩ ña-tɩ tɔm natʋyʋ pʋ-yɔɔ nɛ pʋkɔɔ piliɣti-ŋ.

²⁸ Ɛlɛ́, yee nɔɔyʋ eheyi-mɩ se: «Nandʋ tʋnɛ tɩkɛ kɩlaʋ nandʋ» yɔ, weyi eheyi-mɩ ḿbʋ́ yɔ ɛ-yɔɔ lɛ, ɩtaatɔɔ. Pɩtɛkɛ ḿbʋ́, piliɣtiɣ-i.

²⁹ Pʋ-yɔɔ lɛ, pɩtɛkɛ ɛzɩma mbʋ́ piiliɣti-mɩ yɔ pʋ-yɔɔ mɔyɔɔdʋʋ cɩnɛ. Ɛlɛ́, ɛzɩma mbʋ́ piiliɣti lɛlʋ yɔ pʋ-yɔɔ mɔyɔɔdʋʋ. Paa ḿbʋ́ yɔ, nɔɔyʋ lɩmaɣza ɛɛpɩzɩɣ pɩɖɩɣ nʋmɔʋ ŋgʋ́ pɩha-m se mala pʋyʋ yɔ.

³⁰ Yee manpɩzɩɣ se mansa Ɛsɔ mbʋ́ mɔntɔkɩ yɔ pʋ-yɔɔ lɛ, pɩlabɩ ɛzɩma ɛyáa kʋyʋʋ mɔ-yɔɔ mbʋ́ pʋ-yɔɔ mansaŋ-ɩ yɔ?

³¹ Pʋ-yɔɔ lɛ, paa ɛbɛ ɩtɔkɩ yaa ɩñɔʋ yaa ɩlakɩ yɔ, ɩla pɩtɩŋa payɩ se Ɛsɔ hɩɖɛ ɛsɛɛ.

³² Mi-wezuu caɣʋ taa lɛ, itaayele nɛ pɩtɩŋnɩ mɩ-yɔɔ nɛ Yuda ñɩma yaa mbá pɛtɛkɛ Yuda ñɩma yɔ yaa Ɛsɔ ñɩma pa-taa nɔɔyʋ tɔlɩ nʋmɔʋ ŋgʋ́ ɛɖɔŋ yɔ kɩ-taa.

³³ Ɩla ɖɔɖɔ ɛzɩ ma yɔ: mañakɩ pana se mɔn-tɔm ɛkɛdɩnɩ ɛyáa tɩŋa pɩtɩŋa pɩ-taa. Maañɩnɩɣ se piɖeni ma-maɣmaɣ. Ɛlɛ́, mañɩnɩɣ se piɖeni ɛyáa tɩŋa nɛ pɩya pa-ñʋʋ.