Marke 2 - Dɔnɔn kə̂ Siki: Tar kə̂ aw arə təbbə

Jeju aji dingaw kə̂ dəbbə rɔɛ̂ oy

¹ Ndɔ ngaji goe tə̂ a, Jeju təl ddee Kapɛrnawum, a dəwje ooje nan nee kə̂y.

² Dəwje tokə banya nya mbɔnje naan arə lo nayn ang ang ngaa, ta-kəy tə̂ le ddaka njaa kara lo goto. Jeju aw tɔjude tar lə Lubba.

³ Dəwje sɔ otoje marə dəw kə̂ dəbbə rɔɛ̂ oy ddeeje saa.

⁴ A dingaje ddəw ta kaw saa nɔn Jeju tə̂ ang, mba dəwje le banyaje nya. Yeenn bba dɔruje kəm lo dɔ kəy tə̂ le, lo tə̂ kə̂ Jeju ar tə̂. Dulaje dəw kə̂ rɔɛ̂ oy le kə tuwa laa baa kə kəm lo nɔn Jeju tə̂.

⁵ Jeju oo mə-kunn lə dəwje le a, pa arə dəw kə̂ dəbbə rɔɛ̂ oy le nan: «Ngonnəm, tar majangje ləi ɔru dɔi tə̂ ngaa.»

⁶ Marə njê-gərəje-Ndu kə̂ eeje tə̂ənn le aw əjəje məde tə̂ nan:

⁷ «Dəw nəənn pa tar baann mba ddi wa? Naw tuju ri Lubba wa? Lubba kâra baa â asə ta kɔru tar majangje bbo marə dəw dang ang.»

⁸ Njangə baa njaa Jeju gərə tar kə̂ daw dəjəje le ngaâ pa arəde nan: «Mba ddi bba aw əjəje tar tokə baann məse tə̂ wa?

⁹ Ta pa karə dəw kə̂ dəbbə rɔɛ̂ oy le nan: ‹Tar majang ləi ɔru dɔi tə̂›, wase nan: ‹In taar unn tuwa ləi bbo ə-nja›, ye kə̂ dda ngəng ang ta pa wa?

¹⁰ A m-ndiki karə ə-gərəje to Ngonn lə dəw ee kə singa dɔ nangə tə̂ nəənn ta kɔru tar majang lə dəwje.» Yeenn a, n̂-pa narə dəw kə̂ dəbbə rɔɛ̂ oy le nan:

¹¹ «M-pa mari, in taar, unn tuwa ləi bbo aw bbeê ləi.»

¹² Njangə baa njaa, dingaw le ubba nangə in kəm dəwje tə̂ le tɔyn ngaâ unn tuwa laa ɔtu. Dede tɔyn njaa dɔde ayn ngaâ dɔsuje gaji Lubba n̂-paje nan: «Joo marə nɛ̂n kə̂ be ndɔ kâra ang.»

Jeju bbar Lebi karə unn goe

¹³ Jeju təl aw kar dangə tə̂ kə̂ Galile. Dəwje kə̂ banya ddeeje rɔɛ̂ tə̂ arə naw tɔjude nɛ̂n.

¹⁴ Kar kə̂ naw nday a, noo Lebi ngonn lə Alpe kə̂ isi lo taa narɛ lambo tə̂. Jeju pa arɛ̂ nan: «Unn gom.» Lebi le in taar ngaâ unn goe.

¹⁵ Goe tə̂ a, Jeju aw usa nɛ̂n kəy lə Lebi le. A njê-taaje narɛ lambo tokə banya kə njê-nɛ̂n-ddaje kə̂ maji ang isije ta nɛ̂n-kusa tə̂ le kə Jeju, ne kə njê-njaje goe tə̂. Dede nya njaa daw dunnje go Jeju le.

¹⁶ Njê-gərəje-Ndu kə̂ eeje mbɔn-naan tə̂ lə Parijinyɛje ooje a, Jeju aw usa nɛ̂n kə dəwjeenn le tɔyn. Yeenn bba n̂-paje darəje njê-njaje go Jeju tə̂ le nan: «Mba ddi bba naw nusa nɛ̂n kə njê-taaje narɛ lambo kə njê-nɛ̂n-ddaje kə̂ maji ang wa?»

¹⁷ Jeju oo tar ləde le ngaâ pa nan: «Dəwje kə̂ rɔde to kə majɛ̂ aw ndikije ta koo nje-karə-kuman ang. Dəwje kə̂ rɔde tode bba. Dəwje kə̂ gatə gatə â m-ddee ta bbarde ang. M-ddee mba njê-nɛ̂n-ddaje kə̂ maji ang.»

Tar dɔ kɔku rɔ nɛ̂n-kusa tə̂

¹⁸ Marə ndɔ, njê-njaje go Jan-Batisi tə̂ kə Parijinyɛje aw ɔkuje rɔde nɛ̂n-kusa a, dəwje aw dujuje Jeju nan: «Mba ddi bba njê-njaje go Jan-Batisi tə̂ kə njê-njaje go Parijinyɛje tə̂ aw ɔkuje rɔde nɛ̂n-kusa, a njê-njaje goi tə̂ ɔkuje rɔde nɛ̂n-kusa ang wa?»

¹⁹ A Jeju ilade tə̂ nan: «Əjəje to dəwje kə̂ n̂-bbarde kusu taa-naan tə̂ a kɔkuje rɔde nɛ̂n-kusa kar tə̂ kə̂ nje-dɛnɛ̂n le isi kə de wa? Baann ang. Bbo n̂-nayn kə de bbay a, dasəje ta kɔku rɔde nɛ̂n-kusa ang.

²⁰ A karɛ̂ aw ddee kə̂ dâ kunn nje-dɛnɛ̂n le horode tə̂ kə ddang, a dâ kɔkuje rɔde nɛ̂n-kusa bbay.

²¹ «Dəw a kunn ta-kubbu kə̂ siki kila nɛ̂n kəm bar kubbu ang. Bbo n̂-dda tokə baann a, ta-kubbu kə̂ siki le a kɔru kəm bar kubbu le karə təl bo uta ye kə̂ kete bbay.

²² Ddəm, dəw a kungu bɛn kə̂ n̂-dda siki bbay mə ku-əndaarje tə̂ kə̂ to konnɛ̂ ang. Baann ang a, bɛn le a dda karə kuje le ujaje ta bɛn le kara a kula kɔrɔ̂ ddəm ku-əndaarje le kara a tujuje kə kɔrɔ̂ ddəm. Ku-əndaarje kə̂ siki â maji ta kungu bɛn kə̂ siki məɛ tə̂.»

Tar dɔ ndɔ-kuwa-rɔ tə̂

²³ Marə ndɔ-kuwa-rɔ, Jeju aw nday mə ndɔɔ bleje tə̂. A njê-njaje goe tə̂ unnje kutu ti jinga bleje le kə ddəw ddəw.

²⁴ Parijinyɛje paje arə Jeju nan: «Oo, mba ddi bba njê-njaje goi tə̂ aw ddaje nɛ̂n kə̂ ndu ləje mbətə karə dəw dda ndɔ-kuwa-rɔ tə̂ wa?»

²⁵ Jeju ilade tə̂ nan: «Ndɔ kâra ə-turaje Makəturu dɔ nɛ̂n tə̂ kə̂ Dabbiti dda ang wa? Marə ndɔ, bbo dda Dabbiti kə njê kə̂ unnje goe a, dingaje nɛ̂n ta kusa ang.

²⁶ Nandə mə kəy tə̂ lə Lubba dɔ ndɔ tə̂ kə̂ Abiyatar â to tɔkə nje-polo Lubba. Nusa mapaje kə̂ darə Lubba to nɛ̂n-polo ngaâ narə njê kə̂ unnje goe le tɔ. A ndu arə ddəw karə njê-poloje Lubba bba ta usaje mapajeenn le.»

²⁷ Jeju pa arəde bbay nan: «N̂-dda ndɔ-kuwa-rɔ mba dəw, bbo n̂-dda dəw mba ndɔ-kuwa-rɔ ang.

²⁸ Mba yeenn bba Ngonn lə dəw njaa â to nje-ndɔ-kuwa-rɔ tɔ.»