Kulaje 24 - Dɔnɔn kə̂ Siki: Tar kə̂ aw arə təbbəJiipije undaje tar dɔ Pɔl tə̂ 1 Ndɔ min goe tə̂ a, Ananiyas kə̂ to tɔkə nje-polo Lubba kə tɔkəje kə Tɛrtulus kə̂ to nje-taa dɔ dəwje dawje Sejare. Daw səkəje Pɔl ta ngonn mbay Peliksə tə̂. 2 N̂-bbar Pɔl darə ddee ngaâ Tɛrtulus le unn kutu kunda tar dɔɛ̂ tə̂ nan: «Dəw kə̂ bo Peliksə, tambal dɔi â jisi nɛ̂n ddekeke bbokənɛn kə ddəw gusu tə̂ kə̂ siki kə̂ ə-tee nɛ̂n â njê kə̂ bbeê nəənn isije nɛ̂n kə majɛ̂. 3 Kə ndɔ kâra kâra tɔyn, loje tə̂ tɔyn jaw jari wooyo mbay Peliksə, mba nɛ̂nje kə̂ maji kə̂ jaw jinga baann ddəw tə̂ ləi le. 4 Mâ pa tar tɛn baa mba m-ndiki ta tuju kar ləi baa ang. Yeenn bba, m-wali nya karə ə-tuka mbii oo tar le ddəw mə-maji tə̂ ləi. 5 Joo a, dingaw nəənn to dəw kə̂ maji ang nya. N̂-dda narə lo yəkə horo Jiipije tə̂ tɔyn kə̂ dɔ nangə tə̂. Ngaâ n̂-to marə mbay dɔ mbɔn-naan tə̂ lə dəwje kə̂ Najarɛtə kə̂ to mbɔn-naan kə̂ maji ang. 6 N̂-sangə ddəw ta ddee kə nɛ̂n-yərəw mə kəy-polo Lubba tə̂ ləje bba juwɛ̂. [N-ndiki ta gangə sariya dɔɛ̂ tə̂ ddəw Ndu tə̂ ləje. 7 A Lisiyas kə̂ to mbay lə mbambaje ddee ɔrɛ̂ jije tə̂ kə singa 8 ngaâ duju karə njê kə̂ undaje tar dɔɛ̂ tə̂ le ddeeje kə tar le nɔin tə̂.] Əi njaa bbo ə-duje tar a, a gərə to nɛ̂nje tɔyn kə̂ junda nɛ̂n tar dɔɛ̂ tə̂ le to nɛ̂nje kə̂ tɔkɔrɔ.» 9 Jiipije ndikije tar tə̂ le tɔ ngaâ paje nan tar le to tar kə̂ tɔkɔrɔ. Pɔl ɔru naji laa nɔn Peliksə tə̂ 10 Goe tə̂ a, ngonn mbay le dda jia arə Pɔl karə pa tar ngaâ Pɔl pa nan: «M-gərə to ə-to nje-gangə sariya lə dəwje mə bbe tə̂ nəənn bbal banya nya. Yeenn bba, mâ ta kɔru naji ləm nɔin tə̂ a, məm oso pɔn. 11 Bbo uru gəle a, â gərə. Dda ndɔ dɔku gire joo baa bbay â maw Jerujalɛm mba polo Lubba. 12 Mə kəy-polo Lubba tə̂ wase kəy mbɔn-naanje tə̂ wase mə bbe tə̂, marə dəw ingam maw mayn tar kə marə dəw wase maw mərə dəwje karə yəkə lo ndɔ kâra ang. 13 Dəwje nəənn a kasəje ta tɔji nɛ̂n kə̂ dundaje nɛ̂n tar dɔm tə̂ le bbasinɛn nəənn ang. 14 Nɛ̂n kə̂ m-gərə goe â nəənn: Maw polo Lubba lə kajeje kə ‹ddəw› kə̂ siki. Əman le m-ndiki tə̂ kə nɛ̂n tɔyn kə̂ n̂-dda Makəturu-Ndu tə̂ kə nɛ̂n tɔyn kə̂ njê-kilaje mbər tar lə Lubba paje njaa. A dede n̂-paje nan to ‹ddəw› kə̂ to kə dɔgɔlɛ̂ ang. 15 Munda məm dɔ Lubba tə̂ to dəwje kə̂ gatə gatə ddəm njê kə̂ gatə gatə ang ddəm kə̂ oyje a ndolje. Dede kara dunda məde tokə baann tɔ. 16 Yeenn bba, kə̂ ndɔ tɔyn maw sangə ddəw karə kəjə kə̂ maji dɔrɔ â to məm tə̂ nɔn Lubba tə̂ ddəm nɔn dəwje tə̂ ddəm. 17 «M-tee Jerujalɛm ang bbal banya nya. Yeenn bba m-ddee ta karə nɛ̂n mba kuman nɛ̂n dəwje kə̂ mə bbe tə̂ le ddəm ta karə nɛ̂n-polo Lubba ddəm. 18 Kar tə̂ənn le â m-toko nɛ̂n-yərəw ləm mə kəy-polo Lubba tə̂ m-tunga a, dingamje. Ndɔɛ̂ tə̂ənn le dəwje mbɔnje naan banya ang ddəm bula goto ddəm. 19 A marə Jiipije kə̂ Aji eeje tə̂ənn. Dede â bbo dingaje səm tar a, to tar ləde ta ddee nɔin tə̂ mba kunda tar dɔm tə̂. 20 Wase dede nəənn bbo dooje majang kə̂ m-dda ndɔ tə̂ kə̂ daw nɛ̂n səm nɔn sariya tə̂ le a, maji karə n̂-paje. 21 Kar tə̂ənn le mar horo njê-gangəje sariya tə̂ muru əkii m-pa nan: ‹Daw ta gangə sariya dɔm tə̂ mba tar lə dəwje kə̂ oyje kə̂ munda məm to dâ ndolje le.› Mba tar kə̂ kâra baa nəənn le njaa n̂-ddeeje nɛ̂n səm sariya tə̂ nɔnse tə̂ bbokənɛn nəənn.» 22 Peliksə gərə tar dɔ ddəw tə̂ kə̂ siki kə̂ Əbbə-dəwje tɔju le kə majɛ̂ ngaâ nɔru ndɔ sariya le kə kete. N̂-pa nan: «Ndɔ kə̂ Lisiyas kə̂ to mbay lə mbambaje ddee bba mâ gangə sariya le.» 23 Nunn ndu narə mbay lə mbambaje karə n̂-ngəm Pɔl kəy-kula tə̂, a ta ninya ddəw narə n̂-dda marə nɛ̂nje kə̂ məɛ̂ ndiki ddəm ninya ddəw narə njê kə̂ laa ddee umɛ̂nje ddəm. Pɔl aw nɔn Peliksə de kə Durusil tə̂ 24 Dda ndɔ ngaji goe tə̂ a, Peliksə de kə dɛnɛ̂n laa Durusil kə̂ to Jiipi n̂-ddeeje. Peliksə le ula bbar Pɔl ngaâ noo tar kə̂ naw tɔju dɔ kunn-mə karə Jeju-Kristə tə̂. 25 Kar tə̂ kə̂ Pɔl aw pa tar kula-dda kə̂ to gatə gatə, tar tɔ-bbo kə̂ da-rɔ tə̂ kə tar sariya kə̂ aw ddee a, Peliksə le bbəəl ngaâ pa nan: «Asə baann, ɔtu ngaa. Marə ndɔ bba mâ bbari.» 26 Nunda məɛ̂ tɔ to Pɔl a karɛ̂ narɛ, mba yeenn bba, naw nula narə Pɔl ddee tɔn saa tam gɔl banya nya. 27 Bbal joo nday a, Pɔrsiyus Pestus ɔn mbay turu Peliksə tə̂. A Peliksə le ndiki ta nəəl kəm Jiipije tə̂ arə narə Pɔl nayn kəy-kula tə̂. |
© 2020, ACOTBA
Wycliffe Bible Translators, Inc.