Kulaje 18 - Dɔnɔn kə̂ Siki: Tar kə̂ aw arə təbbə

Pɔl aw Kɔrɛntə

¹ Go nɛ̂nje tə̂ənn le a, Pɔl ɔtu Atɛnn aw Kɔrɛntə.

² Ninga marə Jiipi kə̂ ria nan Akilas lo tə̂ənn. Duje nangə tə̂ kə̂ Pɔn. Akilas de kə dɛnɛ̂n laa Pirisil dinje Itali bba n̂-ddeeje, mba tɔkə mbay Kolodə unn ndu karə Jiipije tɔyn ɔtuje Rɔm kə ddang. Pɔl aw rɔ Akilas de kə Pirisil tə̂ le.

³ A kula laa kə kula lə Pɔl kə̂ aw dda to kâra baa. Kula le to kula dda tande. Yeenn bba, Pɔl le nayn rɔde tə̂ ngaâ daw ddaje kula le.

⁴ Ndɔ-kuwa-rɔ tə̂ kâra kâra tɔyn Pɔl aw pa tar nya kəy mbɔn-naan tə̂ le kə dəwje kə̂ toje to Jiipije ddəm Gɛrɛkəje ddəm karə n̂-ndikije tar tə̂ laa.

⁵ Silas de kə Timɔte dinje Maseduwann n̂-teeje a, Pɔl unn rɔɛ̂ tɔyn mba tɔju tar lə Lubba. N̂-pa narə Jiipije nan Jeju le njaa to Mesi.

⁶ A Jiipije mbətəje tar laa ngaâ daw tajɛ̂je. Yeenn bba, Pɔl le tunda bum kə̂ kubbu tə̂ laa ngaâ pa arəde nan: «Məsəse təl kə dɔse tə̂, tarɛ̂ a kuwa dɔm ang. Bbasinɛn nəənn mâ kaw kə rɔ dəwje tə̂ kə̂ toje to Jiipije ang ngaa.»

⁷ Nɔtu lo tə̂ənn naw rɔ marə dəw tə̂ kə̂ ria nan Titus Justus kə̂ kəy laa to mbɔr kəy mbɔn-naan tə̂ lə Jiipije. N̂-to nje-polo Lubba.

⁸ Krispus kə̂ to nje-kɔn dɔ kəy mbɔn-naan lə Jiipije unn məɛ̂ arə Əbbə-dəwje, ne de kə njê kə̂ kə̂y laa tɔyn. Marə dəwje kə̂ Kɔrɛntə nya ooje tar kə̂ Pɔl tɔju le. Dooje məde tə̂ ngaâ dingaje batɛm.

⁹ Marə ndɔ til tə̂, Əbbə-dəwje pa arə Pɔl mə marə nɛ̂n tə̂ tokə lə nin nan: «Ə-bbəəl ang, əw rɔi pa tar ang, utu tai ang.

¹⁰ Mba mee səi, dəw kâra a kasə kuwai ta ddai ang, mba dəwje ləm banya nya mə bbe tə̂ nəənn.»

¹¹ Pɔl nayn Kɔrɛntə tɔju tar lə Lubba bbal kâra kə nɛyn misan.

Daw kə Pɔl nɔn ngonn mbay Galiyɔn tə̂

¹² Bbal tə̂ kə̂ Galiyɔn to ngonn mbay kə̂ Akay, Jiipije ooje ta naan ngaâ mbətəje Pɔl. Dawje saa lo gangə sariya tə̂.

¹³ N̂-paje nan: «Dəw nəənn aw dda karə dəwje poloje Lubba kə ddəw kə̂ ndu mbətə.»

¹⁴ Pɔl a ta pa tar a, Galiyɔn ila tar Jiipije tə̂ nan: «Bbo tar nəənn to tar tɔl dəw wase tar nɛ̂n kə̂ ngəng a, mâ kungu tar gəlse tə̂.

¹⁵ A tar le to mayn naan tar dɔ nɛ̂n-tɔju tə̂, tar rije kə Ndu ləse njaa. Yeenn oose sese njaa. M-ndiki ta to nje-gangə sariya tarje kə̂ baann ang.»

¹⁶ Yeenn ngaâ n̂-tubbade lo gangə sariya tə̂ le.

¹⁷ Dede tɔyn duwaje Sostɛnn kə̂ to nje-kɔn dɔ kəy mbɔn-naan lə Jiipije le n̂-tundɛ̂je ta-kəy gangə sariya tə̂ le. A Galiyɔn aa lo kə tə̂ ang.

Pɔl təl Antiyos

¹⁸ Pɔl nayn ndɔ banya ngaji Kɔrɛntə bba inya njê-mə-kunnje ngaâ unn to təl nangə tə̂ kə̂ Siri. Ne de kə Pirisil kə Akilas. Kete bba ta kaw a, narə n̂-ngisa dɔɛ̂ bbe tə̂ kə̂ Sankere, mba nunn ndue.

¹⁹ Daw teeje Epɛjə. Pɔl inya Pirisil de kə Akilas lo tə̂ənn ngaâ ɔtu aw kəy mbɔn-naan tə̂ lə Jiipije aw pa tar kə de.

²⁰ N̂-dujuje Pɔl nya karə nayn kə de ndɔ banya bbay. A Pɔl mbətə.

²¹ Nâ ta kinyade a, n̂-ndəjəde nan: «Bbo Lubba ndiki a, mâ təl rɔse tə̂ marə ndɔ.» Yeenn ngaâ nunn tɔkə to Epɛjə nɔtu.

²² N̂-tee Sejare a, naw dda lapiya njê-mə-kunnje kə̂ Jerujalɛm ngaâ n̂-nday naw Antiyos.

²³ N̂-dda ndɔ ngaji lo tə̂ənn ngaâ nin n̂-nday nangə Galasi kə Piriji tə̂, narə ndəjə njê-njaje go Əbbə-dəwje tə̂ tɔyn karə dingaje singa.

Apolos aw Epɛjə

²⁴ Marə Jiipi kə̂ ria nan Apolos kə̂ duje Alɛkəjandiri ddee Epɛjə le. N̂-to dəw kə̂ gərə pa tar ddəm gərə makəturu lə Lubba nya ddəm.

²⁵ N̂-tɔjɛ̂ «ddəw lə Əbbə-dəwje» tokə kete arə kəjə laa sangə kə majɛ̂ ngaâ n̂-tɔju nɛ̂n dɔ Jeju tə̂ kə̂ dɔgɔlɛ̂. A batɛm lə Jan kâra baa a n̂-gərə.

²⁶ Naw pa tar mə kəy mbɔn-naan tə̂ lə Jiipije kə bbəəl ang. Go tar tə̂ laa tɔyn kə̂ Pirisil kə Akilas dooje a, n̂-bbarɛ̂je kə rɔde tə̂ ngaâ n̂-təl n̂-tɔjɛ̂je tar kə̂ tɔkɔrɔ kə̂ dɔ ddəw lə Lubba tə̂ le kə majɛ̂ uta ye kə̂ kete.

²⁷ Goe tə̂ a, Apolos le ndiki ta kaw Akay. Njê-mə-kunnje ndikije tə̂ saa ngaâ n̂-ddaje makəturu darə njê-mə-kunnje kə̂ Akay le karə n̂-tɛɛ̂je kə rɔde tə̂ kə majɛ̂. N̂-tee nu a, Lubba dda saa mə-maji arə numan njê-mə-kunnje nya,

²⁸ mba tar kə̂ tɛɛ̂ tə̂ ngəng arə Jiipije ooje tar ta kila tə̂ ang. N̂-tɔju ddəw makəturu tə̂ lə Lubba kə ddaka narəde to Jeju njaa to Mesi.